Navratri 2026: ಚಿನ್ನ, ಕಾರು, ಬೈಕ್‌, ಆಸ್ತಿ ಖರೀದಿಗೆ ಈ 3 ದಿನಗಳು ವಿಶೇಷ! ದಸರಾ ದಿನವೂ ಶುಭಯೋಗ

Navratri 2026: ನವರಾತ್ರಿ ಹಬ್ಬದ ಸಂಭ್ರಮ ಎಲ್ಲೆಡೆ ಮನೆಮಾಡಿದೆ. ಶರನ್ನವರಾತ್ರಿಯ ಸಂದರ್ಭದಲ್ಲಿ ದುರ್ಗಾದೇವಿಯ ಆರಾಧನೆಯ ಜೊತೆಗೆ ಹೊಸ ವಸ್ತುಗಳ ಖರೀದಿ, ವಾಹನ ಬುಕಿಂಗ್, ಚಿನ್ನಾಭರಣ ಖರೀದಿ ಹಾಗೂ ಆಸ್ತಿ ಸಂಬಂಧಿತ ವ್ಯವಹಾರಗಳಿಗೆ ಹೆಚ್ಚಿನ ಮಹತ್ವ ನೀಡಲಾಗುತ್ತದೆ. ಹೊಸ ಮನೆ, ಕಾರು, ಬೈಕ್ ಅಥವಾ ಚಿನ್ನ ಖರೀದಿಸಲು ಯೋಜಿಸುತ್ತಿರುವವರು ಯಾವ ದಿನ ಶುಭ? ಯಾವ ದಿನ ಖರೀದಿ ಮಾಡಿದರೆ ಒಳ್ಳೆಯದು? ಎಂಬ ಪ್ರಶ್ನೆಗಳಿಗೆ ಉತ್ತರ ಹುಡುಕುತ್ತಿದ್ದಾರೆ. ಜ್ಯೋತಿಷ್ಯ ಸಂಪ್ರದಾಯದ ಪ್ರಕಾರ, ಈ ವರ್ಷದ ನವರಾತ್ರಿಯಲ್ಲಿ ಕೆಲವು ದಿನಗಳನ್ನ ಖರೀದಿಗೆ ವಿಶೇಷವಾಗಿ ಅನುಕೂಲಕರವೆಂದು ಪರಿಗಣಿಸಲಾಗಿದೆ.

2026ರ ಶರನ್ನವರಾತ್ರಿ ಅಕ್ಟೋಬರ್ 11ರಿಂದ ಆರಂಭವಾಗಿದ್ದು, ಅಕ್ಟೋಬರ್ 20ರಂದು ವಿಜಯದಶಮಿ ಆಚರಿಸಲಾಗುತ್ತದೆ. ಈ ಅವಧಿಯಲ್ಲಿ ಸರ್ವಾರ್ಥ ಸಿದ್ಧಿ ಯೋಗಕ್ಕೆ ವಿಶೇಷ ಪ್ರಾಮುಖ್ಯತೆ ನೀಡಲಾಗುತ್ತದೆ. ವಿಶೇಷವಾಗಿ ಅಕ್ಟೋಬರ್ 14, 18 ಮತ್ತು 19ರಂದು ಈ ಯೋಗ ಉಂಟಾಗುತ್ತದೆ ಎಂದು ಕೆಲವು ಪಂಚಾಂಗಗಳ ವಿವರಗಳು ತಿಳಿಸುತ್ತವೆ. ಈ ಪೈಕಿ ಅಕ್ಟೋಬರ್ 18ರಂದು ಚಿನ್ನ ಹಾಗೂ ಅಕ್ಟೋಬರ್ 19ರಂದು ವಾಹನ ಖರೀದಿಗೆ ಅನುಕೂಲಕರವೆಂದು ಕೆಲ ಜ್ಯೋತಿಷ್ಯ ಪದ್ಧತಿಗಳಲ್ಲಿ ಹೇಳಲಾಗಿದೆ.

ಸರ್ವಾರ್ಥ ಸಿದ್ಧಿ ಯೋಗ ಎಂದರೇನು?

ಜ್ಯೋತಿಷ್ಯ ಶಾಸ್ತ್ರದಲ್ಲಿ ವಾರ ಮತ್ತು ನಕ್ಷತ್ರಗಳ ನಿರ್ದಿಷ್ಟ ಸಂಯೋಜನೆಯಿಂದ ಉಂಟಾಗುವ ಶುಭಯೋಗವನ್ನ ಸರ್ವಾರ್ಥ ಸಿದ್ಧಿ ಯೋಗ ಎಂದು ಕರೆಯಲಾಗುತ್ತದೆ. ಈ ಯೋಗದ ಅವಧಿಯಲ್ಲಿ ಆರಂಭಿಸುವ ಕೆಲಸಗಳು ಯಶಸ್ವಿಯಾಗುತ್ತವೆ ಎಂಬುದು ಸಾಂಪ್ರದಾಯಿಕ ನಂಬಿಕೆ. ಹೊಸ ವ್ಯಾಪಾರ ಆರಂಭಿಸುವುದು, ಚಿನ್ನಾಭರಣ ಖರೀದಿಸುವುದು, ಮನೆ ಅಥವಾ ಜಮೀನಿಗೆ ಮುಂಗಡ ಹಣ ಪಾವತಿಸುವುದು ಹಾಗೂ ವಾಹನ ಬುಕಿಂಗ್ ಮಾಡುವಂತಹ ಕಾರ್ಯಗಳಿಗೆ ಈ ಯೋಗವನ್ನ ಕೆಲವರು ಆಯ್ಕೆ ಮಾಡಿಕೊಳ್ಳುತ್ತಾರೆ. ಆದರೆ ಶುಭಯೋಗದ ಸಮಯವು ಪ್ರದೇಶ ಮತ್ತು ಸ್ಥಳೀಯ ಪಂಚಾಂಗದ ಲೆಕ್ಕಾಚಾರಕ್ಕೆ ಅನುಗುಣವಾಗಿ ಬದಲಾಗಬಹುದು.

ಅಕ್ಟೋಬರ್ 18: ಚಿನ್ನ ಖರೀದಿಗೆ ವಿಶೇಷ ದಿನ

ಭಾನುವಾರ, ಅಕ್ಟೋಬರ್ 18ರಂದು ಉತ್ತರಾಷಾಢ ನಕ್ಷತ್ರದೊಂದಿಗೆ ಸರ್ವಾರ್ಥ ಸಿದ್ಧಿ ಯೋಗ ಉಂಟಾಗುತ್ತದೆ ಎಂದು ಜ್ಯೋತಿಷ್ಯ ವಿವರಗಳು ತಿಳಿಸುತ್ತವೆ. ಉತ್ತರಾಷಾಢ ನಕ್ಷತ್ರದ ಅಧಿಪತಿ ಸೂರ್ಯನಾಗಿದ್ದು, ಭಾನುವಾರವೂ ಸೂರ್ಯನಿಗೆ ಸಂಬಂಧಿಸಿದ ದಿನವಾಗಿದೆ. ಈ ಸಂಯೋಜನೆಯೊಂದಿಗೆ ಅಷ್ಟಮಿ ತಿಥಿಯ ಪ್ರಭಾವ ಇರುವುದರಿಂದ ಚಿನ್ನಾಭರಣ ಖರೀದಿಗೆ ಈ ದಿನವನ್ನ ಅನುಕೂಲಕರವೆಂದು ಕೆಲವರು ಪರಿಗಣಿಸುತ್ತಾರೆ. ಹಬ್ಬದ ಸಂದರ್ಭದಲ್ಲಿ ಚಿನ್ನದ ಸರ, ಉಂಗುರ, ಬಳೆ ಅಥವಾ ನಾಣ್ಯ ಖರೀದಿಸಲು ಯೋಜಿಸಿರುವವರು ಈ ದಿನವನ್ನ ಆಯ್ಕೆ ಮಾಡಿಕೊಳ್ಳಬಹುದು. ಆದರೆ ಚಿನ್ನ ಖರೀದಿಸುವಾಗ ಕೇವಲ ಶುಭದಿನವನ್ನಷ್ಟೇ ಪರಿಗಣಿಸದೆ, ಮಾರುಕಟ್ಟೆ ಬೆಲೆ, ಮೇಕಿಂಗ್ ಚಾರ್ಜ್, ಹಾಲ್‌ಮಾರ್ಕ್ ಮತ್ತು ಬಿಲ್ ವಿವರಗಳನ್ನ ಪರಿಶೀಲಿಸುವುದು ಮುಖ್ಯ.

ಅಕ್ಟೋಬರ್ 19: ಹೊಸ ಕಾರು, ಬೈಕ್ ಖರೀದಿಗೆ ಶುಭ?

ಸೋಮವಾರ, ಅಕ್ಟೋಬರ್ 19ರಂದು ಶ್ರವಣ ನಕ್ಷತ್ರದೊಂದಿಗೆ ಸರ್ವಾರ್ಥ ಸಿದ್ಧಿ ಯೋಗ ಉಂಟಾಗುತ್ತದೆ ಎಂದು ಕೆಲವು ಜ್ಯೋತಿಷ್ಯ ಮೂಲಗಳು ಹೇಳುತ್ತವೆ. ಶ್ರವಣ ನಕ್ಷತ್ರವನ್ನು ಪ್ರಯಾಣ ಮತ್ತು ವಾಹನಗಳಿಗೆ ಸಂಬಂಧಿಸಿದ ಶುಭಕಾರ್ಯಗಳಿಗೆ ಅನುಕೂಲಕರವೆಂದು ಪರಿಗಣಿಸಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಹೊಸ ಕಾರು, ಬೈಕ್ ಅಥವಾ ಸ್ಕೂಟರ್ ಖರೀದಿಸಲು ಬಯಸುವವರು ಅಕ್ಟೋಬರ್ 19ರಂದು ವಾಹನ ಬುಕಿಂಗ್ ಅಥವಾ ಖರೀದಿಯನ್ನ ಪರಿಗಣಿಸಬಹುದು. ಆದರೆ ವಾಹನ ಖರೀದಿಯ ನಿರ್ದಿಷ್ಟ ಮುಹೂರ್ತದ ವಿಚಾರದಲ್ಲಿ ಪಂಚಾಂಗಗಳ ನಡುವೆ ಭಿನ್ನಾಭಿಪ್ರಾಯವಿದೆ. ಕೆಲವು ಪಂಚಾಂಗಗಳು ಅಕ್ಟೋಬರ್ 19ರಂದು ವಾಹನ ಖರೀದಿಗೆ ಸೂಕ್ತ ಮುಹೂರ್ತವಿಲ್ಲ ಎಂದೂ ಸೂಚಿಸುತ್ತವೆ. ಹೀಗಾಗಿ ತಮ್ಮ ಸಂಪ್ರದಾಯಕ್ಕೆ ಅನುಗುಣವಾಗಿ ಸ್ಥಳೀಯ ಪಂಚಾಂಗವನ್ನ ಪರಿಶೀಲಿಸುವುದು ಉತ್ತಮ.

ಆಸ್ತಿ ಖರೀದಿಗೆ ಯಾವ ದಿನ ಸೂಕ್ತ?

ನವರಾತ್ರಿ ಸಂದರ್ಭದಲ್ಲಿ ಮನೆ, ನಿವೇಶನ ಅಥವಾ ಜಮೀನು ಖರೀದಿಗೂ ವಿಶೇಷ ಮಹತ್ವ ನೀಡಲಾಗುತ್ತದೆ. ಅಕ್ಟೋಬರ್ 14ರಂದು ಅನುರಾಧ ನಕ್ಷತ್ರದೊಂದಿಗೆ ಸರ್ವಾರ್ಥ ಸಿದ್ಧಿ ಯೋಗ ಉಂಟಾಗಿತ್ತು ಎಂದು ಜ್ಯೋತಿಷ್ಯ ವಿವರಗಳು ತಿಳಿಸುತ್ತವೆ. ಇದೇ ರೀತಿ ಅಕ್ಟೋಬರ್ 18 ಮತ್ತು ವಿಜಯದಶಮಿಯ ದಿನವನ್ನ ಆಸ್ತಿ ಖರೀದಿ ಪ್ರಕ್ರಿಯೆ ಆರಂಭಿಸಲು ಕೆಲವರು ಅನುಕೂಲಕರವೆಂದು ಪರಿಗಣಿಸುತ್ತಾರೆ. ನಿವೇಶನಕ್ಕೆ ಮುಂಗಡ ಹಣ ಪಾವತಿಸುವುದು, ಮನೆ ಖರೀದಿ ಒಪ್ಪಂದಕ್ಕೆ ಮುಂದಾಗುವುದು ಅಥವಾ ಭೂಮಿಪೂಜೆ ನಡೆಸುವಂತಹ ಕಾರ್ಯಗಳಿಗೆ ಈ ದಿನಗಳನ್ನ ಆಯ್ಕೆ ಮಾಡಿಕೊಳ್ಳುವ ಸಂಪ್ರದಾಯವಿದೆ. ಆದರೆ ಆಸ್ತಿ ಖರೀದಿಸುವ ಮೊದಲು ಮಾಲೀಕತ್ವದ ದಾಖಲೆಗಳು, ಇ-ಖಾತಾ, ಅನುಮೋದಿತ ಲೇಔಟ್ ನಕ್ಷೆ ಮತ್ತು ಎನ್‌ಕಂಬರೆನ್ಸ್ ಸರ್ಟಿಫಿಕೇಟ್ ಪರಿಶೀಲಿಸುವುದು ಅತ್ಯಗತ್ಯ.

ಅಕ್ಟೋಬರ್ 20ರ ವಿಜಯದಶಮಿಗೆ ವಿಶೇಷ ಮಹತ್ವ

2026ರ ಅಕ್ಟೋಬರ್ 20ರಂದು ವಿಜಯದಶಮಿ ಹಬ್ಬವನ್ನ ಆಚರಿಸಲಾಗುತ್ತದೆ. ಹಿಂದೂ ಸಂಪ್ರದಾಯದಲ್ಲಿ ವಿಜಯದಶಮಿಯನ್ನ ದುಷ್ಟಶಕ್ತಿಯ ವಿರುದ್ಧ ಒಳ್ಳೆಯತನದ ವಿಜಯದ ಸಂಕೇತವೆಂದು ಪರಿಗಣಿಸಲಾಗುತ್ತದೆ. ಕೆಲವು ಸಂಪ್ರದಾಯಗಳಲ್ಲಿ ವಿಜಯದಶಮಿಯನ್ನ 'ಅಬೂಜ್ ಮುಹೂರ್ತ' ಎಂದು ಕರೆಯುತ್ತಾರೆ. ಅಂದರೆ ವಿಶೇಷ ಮುಹೂರ್ತವನ್ನ ಹುಡುಕದೆ ಕೆಲವು ಶುಭಕಾರ್ಯಗಳನ್ನ ಆರಂಭಿಸಲು ಈ ದಿನವನ್ನ ಅನುಕೂಲಕರವೆಂದು ನಂಬಲಾಗುತ್ತದೆ. ಹೀಗಾಗಿ ಹೊಸ ಉದ್ಯಮ ಆರಂಭಿಸುವುದು, ಚಿನ್ನಾಭರಣ ಖರೀದಿಸುವುದು, ಹೊಸ ವಾಹನವನ್ನ ಮನೆಗೆ ತರುವುದು ಮತ್ತು ಆಸ್ತಿ ಖರೀದಿ ಪ್ರಕ್ರಿಯೆಗೆ ಚಾಲನೆ ನೀಡುವಂತಹ ಕಾರ್ಯಗಳಿಗೆ ವಿಜಯದಶಮಿಯನ್ನ ಹಲವರು ಆಯ್ಕೆ ಮಾಡಿಕೊಳ್ಳುತ್ತಾರೆ.

ಖರೀದಿಗೂ ಮುನ್ನ ಈ ವಿಷಯ ನೆನಪಿರಲಿ

ಈ ಬಾರಿ ಶುಕ್ರನ ಹಿಮ್ಮುಖ ಚಲನೆಯ ಹಿನ್ನೆಲೆಯಲ್ಲಿ ದುಬಾರಿ ವಸ್ತುಗಳ ಖರೀದಿಯಲ್ಲಿ ಎಚ್ಚರಿಕೆ ವಹಿಸಬೇಕು ಎಂದು ಕೆಲವು ಜ್ಯೋತಿಷ್ಯ ಪದ್ಧತಿಗಳು ಸೂಚಿಸುತ್ತವೆ. ಆದರೆ ಶುಭಯೋಗ ಮತ್ತು ಗ್ರಹಗಳ ಪ್ರಭಾವದಿಂದ ಖರೀದಿಯ ಯಶಸ್ಸು ನಿರ್ಧಾರವಾಗುತ್ತದೆ ಎಂಬುದಕ್ಕೆ ವೈಜ್ಞಾನಿಕ ಆಧಾರವಿಲ್ಲ. ಹೀಗಾಗಿ ಹಬ್ಬದ ಸಂಪ್ರದಾಯಗಳನ್ನ ಪಾಲಿಸುವುದರ ಜೊತೆಗೆ ತಮ್ಮ ಆರ್ಥಿಕ ಸಾಮರ್ಥ್ಯ, ಅಗತ್ಯ ಮತ್ತು ಖರೀದಿಗೆ ಸಂಬಂಧಿಸಿದ ದಾಖಲೆಗಳನ್ನ ಪರಿಶೀಲಿಸುವುದು ಮುಖ್ಯ. ವಿಶೇಷವಾಗಿ ವಾಹನ ಅಥವಾ ಆಸ್ತಿಯಂತಹ ದೊಡ್ಡ ಮೊತ್ತದ ಖರೀದಿಗಳಲ್ಲಿ ಅವಸರದ ನಿರ್ಧಾರ ತೆಗೆದುಕೊಳ್ಳದಿರುವುದು ಉತ್ತಮ.

(ಸೂಚನೆ: ಇಲ್ಲಿ ತಿಳಿಸಿರುವ ಶುಭದಿನಗಳು ಜ್ಯೋತಿಷ್ಯ ನಂಬಿಕೆಗಳನ್ನ ಆಧರಿಸಿವೆ. ನಿಖರ ಮುಹೂರ್ತಗಳು ಸ್ಥಳೀಯ ಪಂಚಾಂಗ ಮತ್ತು ಪ್ರದೇಶಕ್ಕೆ ಅನುಗುಣವಾಗಿ ಬದಲಾಗಬಹುದು. Zee Kannada News ಇಲ್ಲಿನ ಯಾವುದೇ ವಿಷಯಗಳನ್ನ ದೃಢಪಡಿಸುವುದಿಲ್ಲ.)