Bank Holidays in October 2026: ಅಕ್ಟೋಬರ್ 15 ರಿಂದ 31 ರ ನಡುವೆ 10 ದಿನ ಬ್ಯಾಂಕ್‌ಗಳು ಬಂದ್‌!

Bank Holidays in October 2026: ಸಾಲು ಸಾಲು ಹಬ್ಬಗಳ ಹಿನ್ನೆಲೆಯಲ್ಲಿ ಅಕ್ಟೋಬರ್ ತಿಂಗಳ ದ್ವಿತೀಯಾರ್ಧದಲ್ಲಿ ಬ್ಯಾಂಕ್‌ಗಳ ಕಾರ್ಯನಿರ್ವಹಣೆಯಲ್ಲಿ ವ್ಯತ್ಯಯ ಉಂಟಾಗುವ ಸಾಧ್ಯತೆಯಿದೆ. ದುರ್ಗಾ ಪೂಜೆ, ದಸರಾ, ವಿಜಯದಶಮಿ ಹಾಗೂ ಕರ್ವಾ ಚೌತ್ ಸೇರಿದಂತೆ ವಿವಿಧ ಹಬ್ಬಗಳ ಹಿನ್ನೆಲೆಯಲ್ಲಿ ದೇಶದ ಹಲವು ರಾಜ್ಯಗಳಲ್ಲಿ ಬ್ಯಾಂಕ್‌ಗಳಿಗೆ ಸಾಲು ಸಾಲು ರಜೆ ಘೋಷಿಸಲಾಗಿದೆ. ಅಕ್ಟೋಬರ್ 15ರಿಂದ 30ರವರೆಗಿನ ಅವಧಿಯಲ್ಲಿ ವಾರಾಂತ್ಯದ ರಜೆಗಳೂ ಸೇರಿ ಹಲವು ದಿನ ಬ್ಯಾಂಕ್ ಶಾಖೆಗಳು ಮುಚ್ಚಿರಲಿವೆ.

ಹಣ ಜಮೆ ಮಾಡುವುದು, ಚೆಕ್ ಕ್ಲಿಯರೆನ್ಸ್, ಡಿಡಿ ಪಡೆಯುವುದು, ಸಾಲಕ್ಕೆ ಸಂಬಂಧಿಸಿದ ದಾಖಲೆ ಸಲ್ಲಿಕೆ ಸೇರಿದಂತೆ ಶಾಖೆಗೆ ಭೇಟಿ ನೀಡಿ ಮಾಡಬೇಕಾದ ಕೆಲಸಗಳಿದ್ದರೆ ಮುಂಚಿತವಾಗಿ ಯೋಜನೆ ರೂಪಿಸಿಕೊಳ್ಳುವುದು ಉತ್ತಮ. ಆದರೆ, ಬ್ಯಾಂಕ್ ರಜೆಗಳು ದೇಶಾದ್ಯಂತ ಒಂದೇ ರೀತಿಯಾಗಿರುವುದಿಲ್ಲ. ಭಾರತೀಯ ರಿಸರ್ವ್ ಬ್ಯಾಂಕ್ (RBI) ಪ್ರಕಟಿಸುವ ರಜಾ ಪಟ್ಟಿಯ ಪ್ರಕಾರ, ಆಯಾ ರಾಜ್ಯಗಳ ಹಬ್ಬ ಮತ್ತು ಸ್ಥಳೀಯ ಆಚರಣೆಗಳಿಗೆ ಅನುಗುಣವಾಗಿ ರಜೆಗಳು ಅನ್ವಯಿಸುತ್ತವೆ.

ಅಕ್ಟೋಬರ್ 15ರಿಂದ 30ರವರೆಗಿನ ಬ್ಯಾಂಕ್ ರಜೆಗಳ ವಿವರ:

ಅಕ್ಟೋಬರ್ 17, ಶನಿವಾರ: ಮಹಾ ಸಪ್ತಮಿ ಹಬ್ಬದ ಹಿನ್ನೆಲೆಯಲ್ಲಿ ತ್ರಿಪುರಾದ ಅಗರ್ತಲಾದಲ್ಲಿ ಬ್ಯಾಂಕ್‌ಗಳಿಗೆ ರಜೆ ಇರಲಿದೆ ಎಂದು ನೀಡಿರುವ ಪಟ್ಟಿಯಲ್ಲಿ ತಿಳಿಸಲಾಗಿದೆ.

ಅಕ್ಟೋಬರ್ 18, ಭಾನುವಾರ: ವಾರದ ಸಾಪ್ತಾಹಿಕ ರಜೆಯ ಕಾರಣ ದೇಶಾದ್ಯಂತ ಬ್ಯಾಂಕ್ ಶಾಖೆಗಳು ಮುಚ್ಚಿರುತ್ತವೆ.

ಅಕ್ಟೋಬರ್ 19, ಸೋಮವಾರ: ಮಹಾ ನವಮಿ ಮತ್ತು ಆಯುಧ ಪೂಜೆಯ ಹಿನ್ನೆಲೆಯಲ್ಲಿ ಅಗರ್ತಲಾ, ಐಜ್ವಾಲ್, ಭುವನೇಶ್ವರ, ಚೆನ್ನೈ, ಗುವಾಹಟಿ, ಇಂಫಾಲ, ಇಟಾನಗರ, ಕೊಹಿಮಾ, ಕೋಲ್ಕತ್ತಾ, ಪಾಟ್ನಾ, ರಾಂಚಿ ಮತ್ತು ಶಿಲ್ಲಾಂಗ್ ಸೇರಿದಂತೆ ಹಲವು ನಗರಗಳಲ್ಲಿ ಬ್ಯಾಂಕ್‌ಗಳಿಗೆ ರಜೆ ಇರಲಿದೆ ಎಂದು ಪಟ್ಟಿಯಲ್ಲಿ ಉಲ್ಲೇಖಿಸಲಾಗಿದೆ.

ಅಕ್ಟೋಬರ್ 20, ಮಂಗಳವಾರ: ವಿಜಯದಶಮಿ ಅಥವಾ ದಸರಾ ಆಚರಣೆಯ ಹಿನ್ನೆಲೆಯಲ್ಲಿ ದೇಶದ ಹಲವು ಭಾಗಗಳಲ್ಲಿ ಬ್ಯಾಂಕ್‌ಗಳು ಕಾರ್ಯನಿರ್ವಹಿಸುವುದಿಲ್ಲ. ಆದರೆ, ಕೆಲವು ನಗರಗಳಲ್ಲಿ ರಜೆಯ ನಿಯಮಗಳು ಭಿನ್ನವಾಗಿರಬಹುದು.

ಅಕ್ಟೋಬರ್ 21, ಬುಧವಾರ: ದುರ್ಗಾ ಪೂಜೆ ಮತ್ತು ವಿಜಯದಶಮಿ ಆಚರಣೆಗೆ ಸಂಬಂಧಿಸಿದಂತೆ ಅಗರ್ತಲಾ, ಬೆಂಗಳೂರು, ಗ್ಯಾಂಗ್ಟಕ್, ಗುವಾಹಟಿ, ಕೊಚ್ಚಿ, ಕೋಲ್ಕತ್ತಾ ಹಾಗೂ ತಿರುವನಂತಪುರಂನಲ್ಲಿ ಬ್ಯಾಂಕ್ ರಜೆ ಇರಲಿದೆ ಎಂದು ನೀಡಿರುವ ಮಾಹಿತಿಯಲ್ಲಿ ತಿಳಿಸಲಾಗಿದೆ.

ಅಕ್ಟೋಬರ್ 22 ಮತ್ತು 23, ಗುರುವಾರ ಹಾಗೂ ಶುಕ್ರವಾರ: ಸಿಕ್ಕಿಂನ ಗ್ಯಾಂಗ್ಟಕ್‌ನಲ್ಲಿ ದುರ್ಗಾ ಪೂಜೆ ಮತ್ತು ದಶೈನ್ ಹಬ್ಬದ ಹಿನ್ನೆಲೆಯಲ್ಲಿ ಬ್ಯಾಂಕ್‌ಗಳಿಗೆ ರಜೆ ಇರಲಿದೆ.

ಅಕ್ಟೋಬರ್ 24, ಶನಿವಾರ: ತಿಂಗಳ ನಾಲ್ಕನೇ ಶನಿವಾರವಾಗಿರುವುದರಿಂದ ದೇಶಾದ್ಯಂತ ಬ್ಯಾಂಕ್ ಶಾಖೆಗಳು ಮುಚ್ಚಿರುತ್ತವೆ.

ಅಕ್ಟೋಬರ್ 25, ಭಾನುವಾರ: ಸಾಪ್ತಾಹಿಕ ರಜೆ ಇರಲಿದೆ. ಇದೇ ದಿನ ಲಕ್ಷ್ಮಿ ಪೂಜೆಯೂ ಇರುವುದರಿಂದ ಕೆಲವು ರಾಜ್ಯಗಳಲ್ಲಿ ಹಬ್ಬದ ಆಚರಣೆಗೆ ವಿಶೇಷ ಮಹತ್ವವಿದೆ.

ಅಕ್ಟೋಬರ್ 26, ಸೋಮವಾರ: ಲಕ್ಷ್ಮಿ ಪೂಜೆ, ಪ್ರವೇಶ ದಿನ ಮತ್ತು ವಾಲ್ಮೀಕಿ ಜಯಂತಿಗೆ ಸಂಬಂಧಿಸಿದಂತೆ ಅಗರ್ತಲಾ, ಚಂಡೀಗಢ, ಜಮ್ಮು, ಶಿಮ್ಲಾ ಮತ್ತು ಶ್ರೀನಗರದಲ್ಲಿ ಬ್ಯಾಂಕ್ ರಜೆ ಇರಲಿದೆ ಎಂದು ಪಟ್ಟಿಯಲ್ಲಿ ಉಲ್ಲೇಖಿಸಲಾಗಿದೆ.

ಅಕ್ಟೋಬರ್ 29, ಗುರುವಾರ: ಕರ್ವಾ ಚೌತ್ ಹಬ್ಬದ ಹಿನ್ನೆಲೆಯಲ್ಲಿ ಹಿಮಾಚಲ ಪ್ರದೇಶದ ಶಿಮ್ಲಾದಲ್ಲಿ ಸ್ಥಳೀಯ ಬ್ಯಾಂಕ್ ರಜೆ ಇರಲಿದೆ ಎಂದು ತಿಳಿಸಲಾಗಿದೆ.

ಬ್ಯಾಂಕ್ ಶಾಖೆಗಳು ಮುಚ್ಚಿರುವ ದಿನಗಳಲ್ಲಿಯೂ ಗ್ರಾಹಕರು ಹಲವು ಬ್ಯಾಂಕಿಂಗ್ ಸೇವೆಗಳನ್ನು ಡಿಜಿಟಲ್ ಮಾಧ್ಯಮಗಳ ಮೂಲಕ ಬಳಸಬಹುದು. ಇಂಟರ್ನೆಟ್ ಬ್ಯಾಂಕಿಂಗ್, ಮೊಬೈಲ್ ಬ್ಯಾಂಕಿಂಗ್, ಯುಪಿಐ ಮತ್ತು ಎಟಿಎಂ ಸೇವೆಗಳು ಸಾಮಾನ್ಯವಾಗಿ ಲಭ್ಯವಿರುತ್ತವೆ. ಆದಾಗ್ಯೂ, ಕೆಲವು ವಹಿವಾಟುಗಳು, ಚೆಕ್ ಕ್ಲಿಯರೆನ್ಸ್ ಮತ್ತು ಶಾಖೆ ಆಧಾರಿತ ಸೇವೆಗಳು ಬ್ಯಾಂಕ್ ರಜೆಯಿಂದಾಗಿ ವಿಳಂಬವಾಗಬಹುದು.

ತುರ್ತು ಹಣಕಾಸು ವ್ಯವಹಾರಗಳು ಅಥವಾ ದಾಖಲೆಗಳಿಗೆ ಸಂಬಂಧಿಸಿದ ಕೆಲಸಗಳಿದ್ದರೆ ರಜೆಗೆ ಮುನ್ನವೇ ಪೂರ್ಣಗೊಳಿಸುವುದು ಸೂಕ್ತ. ವಿಶೇಷವಾಗಿ ಹಬ್ಬದ ದಿನಗಳಲ್ಲಿ ಸತತ ರಜೆಗಳು ಎದುರಾಗುವ ಸಾಧ್ಯತೆ ಇರುವುದರಿಂದ, ನಿಮ್ಮ ನಗರ ಮತ್ತು ಬ್ಯಾಂಕ್ ಶಾಖೆಗೆ ಅನ್ವಯಿಸುವ ರಜೆಯನ್ನು ಮುಂಚಿತವಾಗಿ ಪರಿಶೀಲಿಸಿಕೊಳ್ಳಿ.