ರಾಯಲ್ ಎನ್‌ಫೀಲ್ಡ್‌ನ ಹೊಸ ಬೈಕ್‌ ಲಾಂಚ್‌! ಬಣ್ಣ ಬದಲಿಸುವ ಲುಕ್‌; ಕೇವಲ 125 ಬೈಕ್‌ಗಳಷ್ಟೇ ಲಭ್ಯ!

Royal Enfield Classic 650 Hypershift: ದ್ವಿಚಕ್ರ ವಾಹನ ಪ್ರಿಯರಿಗೆ ರಾಯಲ್ ಎನ್‌ಫೀಲ್ಡ್ ಕಂಪನಿಯಿಂದ ವಿಶೇಷ ಸುದ್ದಿ ಹೊರಬಿದ್ದಿದೆ. ತನ್ನ 125ನೇ ವಾರ್ಷಿಕೋತ್ಸವದ ಸಂಭ್ರಮದ ಅಂಗವಾಗಿ ಕಂಪನಿಯು ಹೊಸ Royal Enfield Classic 650 Hypershift ಬೈಕ್‌ ಅನ್ನ ಭಾರತೀಯ ಮಾರುಕಟ್ಟೆಗೆ ಪರಿಚಯಿಸಿದೆ. ಈ ವಿಶೇಷ ಆವೃತ್ತಿಯ ಎಕ್ಸ್‌ ಶೋರೂಂ ಬೆಲೆ ₹4,25,589 ಆಗಿದ್ದು, ಭಾರತದಲ್ಲಿ ಕೇವಲ 125 ಬೈಕ್‌ಗಳನ್ನ ಮಾತ್ರ ಮಾರಾಟಕ್ಕೆ ಮೀಸಲಿಡಲಾಗಿದೆ. 

ಬೈಕ್‌ನ ಬಣ್ಣವು ಬೆಳಕಿನ ಕೋನಕ್ಕೆ ಅನುಗುಣವಾಗಿ ಬದಲಾಗುವ ವಿಶಿಷ್ಟ ಪೇಂಟ್‌ ಫಿನಿಷ್‌ ಇದರ ಪ್ರಮುಖ ಆಕರ್ಷಣೆಯಾಗಿದೆ. ರಾಯಲ್ ಎನ್‌ಫೀಲ್ಡ್‌ನ ಇತಿಹಾಸದಲ್ಲಿ 125 ವರ್ಷಗಳ ಮೈಲಿಗಲ್ಲನ್ನ ಸ್ಮರಿಸುವ ಉದ್ದೇಶದಿಂದ ಈ ಲಿಮಿಟೆಡ್ ಎಡಿಷನ್‌ ರೂಪಿಸಲಾಗಿದೆ. ವಿಶಿಷ್ಟ ವಿನ್ಯಾಸ, ಪ್ರೀಮಿಯಂ ಲುಕ್‌ ಮತ್ತು ಸೀಮಿತ ಉತ್ಪಾದನೆಯಿಂದ ಈ ಬೈಕ್‌ ಸಂಗ್ರಹಯೋಗ್ಯ ಮಾದರಿಯನ್ನ ಇಷ್ಟಪಡುವವರ ಗಮನ ಸೆಳೆಯುವ ನಿರೀಕ್ಷೆಯಿದೆ.

ಬೆಳಕಿಗೆ ತಕ್ಕಂತೆ ಬಣ್ಣ ಬದಲಿಸುವ ಬೈಕ್‌!

Classic 650 Hypershift ಬೈಕ್‌ನ ಪ್ರಮುಖ ವಿಶೇಷತೆ ಅದರ ವಿಭಿನ್ನ ಬಣ್ಣದ ವಿನ್ಯಾಸ. ಬೈಕ್‌ಗೆ ನೀಡಿರುವ ವಿಶೇಷ ‘ಹೈಪರ್‌ಶಿಫ್ಟ್‌’ ಪೇಂಟ್‌ ಫಿನಿಷ್‌ ಬೆಳಕಿನ ಪ್ರಮಾಣ ಮತ್ತು ನೋಡುವ ಕೋನಕ್ಕೆ ಅನುಗುಣವಾಗಿ ಕೆಂಪು, ಹಸಿರು ಹಾಗೂ ಚಿನ್ನದ ಛಾಯೆಗಳಲ್ಲಿ ಕಾಣಿಸಿಕೊಳ್ಳುತ್ತದೆ. ಈ ಬಣ್ಣದ ವಿನ್ಯಾಸಕ್ಕೆ ರಾಯಲ್ ಎನ್‌ಫೀಲ್ಡ್‌ನ ಐತಿಹಾಸಿಕ ಶೈಲಿ ಮತ್ತು ಕಂಪನಿಯ ಆರಂಭಿಕ ಮೋಟಾರ್‌ಸೈಕಲ್‌ಗಳ ವಿನ್ಯಾಸದಿಂದ ಪ್ರೇರಣೆ ಪಡೆಯಲಾಗಿದೆ. ಬೈಕ್‌ನ ಟಿಯರ್‌ಡ್ರಾಪ್‌ ಆಕಾರದ ಇಂಧನ ಟ್ಯಾಂಕ್‌ ಮೇಲೆ 125ನೇ ವಾರ್ಷಿಕೋತ್ಸವದ ವಿಶೇಷ ಚಿಹ್ನೆ ನೀಡಲಾಗಿದೆ. ಜೊತೆಗೆ ಸೈಡ್‌ ಪ್ಯಾನೆಲ್‌ಗಳಲ್ಲಿ ವಿಶೇಷ ಬ್ಯಾಡ್ಜಿಂಗ್‌ ಹಾಗೂ ಕೈಯಿಂದ ಬಿಡಿಸಿದ ಪಿನ್‌ಸ್ಟ್ರೈಪ್‌ಗಳಿವೆ. ಈ ವಿನ್ಯಾಸವು ಬೈಕ್‌ಗೆ ವಿಶಿಷ್ಟ ಹಾಗೂ ಪ್ರೀಮಿಯಂ ಲುಕ್‌ ನೀಡುತ್ತದೆ. 

648cc ಎಂಜಿನ್‌, 47 bhp ಪವರ್‌!

ವಿನ್ಯಾಸದಲ್ಲಿ ಹೊಸತನ ಹೊಂದಿದ್ದರೂ Classic 650 Hypershift ಬೈಕ್‌ನ ಎಂಜಿನ್‌ ಮತ್ತು ಕಾರ್ಯಕ್ಷಮತೆಯಲ್ಲಿ ಬದಲಾವಣೆ ಮಾಡಲಾಗಿಲ್ಲ. ಇದು 648cc ಸಾಮರ್ಥ್ಯದ ಏರ್‌-ಕೂಲ್ಡ್‌, ಪ್ಯಾರಲಲ್‌-ಟ್ವಿನ್‌ ಎಂಜಿನ್‌ ಹೊಂದಿದ್ದು, 47 bhp ಪವರ್‌ ಹಾಗೂ 52.3 Nm ಟಾರ್ಕ್‌ ಉತ್ಪಾದಿಸುತ್ತದೆ. ಆರು-ಸ್ಪೀಡ್‌ ಗೇರ್‌ಬಾಕ್ಸ್‌ ಇದರಲ್ಲಿದೆ. 

ಬೈಕ್‌ನ ಪ್ರಮುಖ ತಾಂತ್ರಿಕ ವಿಶೇಷತೆಗಳು ಇಲ್ಲಿವೆ:

- ಎಂಜಿನ್‌: 648cc, ಪ್ಯಾರಲಲ್‌-ಟ್ವಿನ್‌
- ಗರಿಷ್ಠ ಪವರ್‌: 47 bhp
- ಗರಿಷ್ಠ ಟಾರ್ಕ್‌: 52.3 Nm
- ಗೇರ್‌ಬಾಕ್ಸ್‌: 6-ಸ್ಪೀಡ್‌
- ಸೀಟ್‌ ಎತ್ತರ: 800 ಮಿ.ಮೀ.
- ಮುಂಭಾಗದ ಸಸ್ಪೆನ್ಷನ್‌: ಟೆಲಿಸ್ಕೋಪಿಕ್‌ ಫೋರ್ಕ್‌
- ಹಿಂಭಾಗದ ಸಸ್ಪೆನ್ಷನ್‌: ಟ್ವಿನ್‌ ಶಾಕ್‌ ಅಬ್ಸಾರ್ಬರ್‌ಗಳು

ಕಂಪನಿಯ ಅಧಿಕೃತ ಮಾಹಿತಿಯ ಪ್ರಕಾರ, ಈ ವಿಶೇಷ ಆವೃತ್ತಿಯ ಪ್ರಮುಖ ಬದಲಾವಣೆಗಳು ಬಣ್ಣ, ಬ್ಯಾಡ್ಜಿಂಗ್‌ ಮತ್ತು ವಿನ್ಯಾಸಕ್ಕೆ ಸಂಬಂಧಿಸಿವೆ. ಸಾಮಾನ್ಯ Classic 650 ಮಾದರಿಯ ಎಂಜಿನ್‌ ಪ್ಲಾಟ್‌ಫಾರ್ಮ್‌ ಮತ್ತು ಮೂಲ ತಾಂತ್ರಿಕ ವ್ಯವಸ್ಥೆಯನ್ನೇ ಇದು ಮುಂದುವರಿಸಿದೆ. 

ಪ್ರೀಮಿಯಂ ಸೀಟ್‌, ವಿಶೇಷ ಬ್ಯಾಡ್ಜಿಂಗ್‌!

ಬೈಕ್‌ನ ಹೊರ ವಿನ್ಯಾಸದ ಜೊತೆಗೆ ಆಸನದ ವಿನ್ಯಾಸಕ್ಕೂ ವಿಶೇಷ ಗಮನ ನೀಡಲಾಗಿದೆ. ಕ್ವಿಲ್ಟೆಡ್‌ ವಿನ್ಯಾಸದ ಪ್ರೀಮಿಯಂ ಸೀಟ್‌, ವಾರ್ಷಿಕೋತ್ಸವದ ವಿಶೇಷ ಲೋಗೋ ಮತ್ತು ಕೈಯಿಂದ ಬಿಡಿಸಿದ ಪಿನ್‌ಸ್ಟ್ರೈಪ್‌ಗಳು ಇದರ ಆಕರ್ಷಣೆಯನ್ನ ಹೆಚ್ಚಿಸುತ್ತವೆ. ಕ್ಲಾಸಿಕ್‌ ವಿನ್ಯಾಸದ ಇಂಧನ ಟ್ಯಾಂಕ್‌, ದುಂಡನೆಯ ಹೆಡ್‌ಲ್ಯಾಂಪ್‌ ಮತ್ತು ಸಾಂಪ್ರದಾಯಿಕ ವಿನ್ಯಾಸದ ಅಂಶಗಳನ್ನ ಉಳಿಸಿಕೊಳ್ಳಲಾಗಿದೆ. ಹೀಗಾಗಿ ಹಳೆಯ ಕಾಲದ ರೆಟ್ರೋ ಲುಕ್‌ ಇಷ್ಟಪಡುವವರಿಗೂ, ವಿಭಿನ್ನ ಬಣ್ಣದ ಬೈಕ್‌ ಬಯಸುವವರಿಗೂ ಈ ಮಾದರಿ ಆಕರ್ಷಕ ಆಯ್ಕೆಯಾಗಬಹುದು. 

ಬುಕ್ಕಿಂಗ್‌ ಯಾವಾಗ? ಬೈಕ್‌ ಖರೀದಿಸುವುದು ಹೇಗೆ?

ಈ ಬೈಕ್‌ ಸಾಮಾನ್ಯ ಮಾದರಿಯಂತೆ ನಿರಂತರವಾಗಿ ಲಭ್ಯವಿರುವುದಿಲ್ಲ. ಭಾರತದಲ್ಲಿ ಕೇವಲ 125 ಯುನಿಟ್‌ಗಳನ್ನ ಮಾತ್ರ ಮಾರಾಟ ಮಾಡಲಾಗುತ್ತದೆ. ನೋಂದಣಿ ಪ್ರಕ್ರಿಯೆ ಅಕ್ಟೋಬರ್‌ 16, 2026ರಂದು ಆರಂಭವಾಗಿದ್ದು, ಮಾರಾಟದ ದಿನಾಂಕ ಅಕ್ಟೋಬರ್‌ 28 ಎಂದು ಕಂಪನಿ ತಿಳಿಸಿದೆ. ಭಾರತದಲ್ಲಿ ಖರೀದಿಸಲು ಆಸಕ್ತರು ರಾಯಲ್‌ ಎನ್‌ಫೀಲ್ಡ್‌ ಆ್ಯಪ್‌ನಲ್ಲಿರುವ ‘Drop Zone’ ವಿಭಾಗದ ಮೂಲಕ ನೋಂದಣಿ ಮಾಡಿಕೊಳ್ಳಬೇಕು. ಅಕ್ಟೋಬರ್‌ 28ರಂದು ಸಂಜೆ 7 ಗಂಟೆಗೆ ಮಾರಾಟ ಪ್ರಕ್ರಿಯೆ ಆರಂಭವಾಗಲಿದೆ. ಮೊದಲ 125 ಅರ್ಹ ಗ್ರಾಹಕರು ಬುಕ್ಕಿಂಗ್‌ ಮೊತ್ತ ಪಾವತಿಸಿ ಬೈಕ್‌ ಖರೀದಿಸುವ ಅವಕಾಶ ಪಡೆಯಲಿದ್ದಾರೆ. ಕಂಪನಿಯ ಮಾಹಿತಿ ಪ್ರಕಾರ, ವಿತರಣೆಯು ಬುಕ್ಕಿಂಗ್‌ ದಿನಾಂಕದಿಂದ 60ರಿಂದ 120 ದಿನಗಳೊಳಗೆ ನಡೆಯಬಹುದು. 

ಬೆಲೆ ಎಷ್ಟು? ಸಾಮಾನ್ಯ Classic 650ಗಿಂತ ದುಬಾರಿಯೇ?

Classic 650 Hypershift ವಿಶೇಷ ಆವೃತ್ತಿಯ ಎಕ್ಸ್‌ ಶೋರೂಂ ಬೆಲೆ ₹4,25,589. ಸಾಮಾನ್ಯ Classic 650 ಮಾದರಿಯ ಬೆಲೆಗಿಂತ ಇದು ದುಬಾರಿಯಾಗಿದೆ. ಈ ಹೆಚ್ಚುವರಿ ಬೆಲೆಗೆ ಮುಖ್ಯ ಕಾರಣ ವಿಶಿಷ್ಟ ಪೇಂಟ್‌ ಫಿನಿಷ್‌, ವಿಶೇಷ ವಾರ್ಷಿಕೋತ್ಸವದ ವಿನ್ಯಾಸ ಮತ್ತು ಸೀಮಿತ ಉತ್ಪಾದನೆ. ಆದರೆ ಕೇವಲ ಬಣ್ಣ ಮತ್ತು ವಿಶೇಷ ವಿನ್ಯಾಸಕ್ಕಾಗಿ ಹೆಚ್ಚುವರಿ ಹಣ ಖರ್ಚು ಮಾಡಲು ಸಿದ್ಧರಿರುವ ಬೈಕ್‌ ಪ್ರಿಯರಿಗೆ ಇದು ವಿಭಿನ್ನ ಆಯ್ಕೆಯಾಗಬಹುದು. ಸಾಮಾನ್ಯ ಬಳಕೆಗಾಗಿ ಬೈಕ್‌ ಖರೀದಿಸುವವರು ಬೆಲೆ, ನಿರ್ವಹಣಾ ವೆಚ್ಚ ಮತ್ತು ತಮ್ಮ ಅಗತ್ಯಗಳನ್ನ ಪರಿಗಣಿಸಿ ನಿರ್ಧಾರ ತೆಗೆದುಕೊಳ್ಳುವುದು ಉತ್ತಮ. ಒಟ್ನಲ್ಲಿ ರಾಯಲ್‌ ಎನ್‌ಫೀಲ್ಡ್‌ನ 125ನೇ ವಾರ್ಷಿಕೋತ್ಸವದ ಅಂಗವಾಗಿ ಬಿಡುಗಡೆಯಾಗಿರುವ Classic 650 Hypershift ತನ್ನ ಬಣ್ಣ ಬದಲಿಸುವ ವಿನ್ಯಾಸ, 648cc ಎಂಜಿನ್‌ ಮತ್ತು ಸೀಮಿತ ಲಭ್ಯತೆಯಿಂದ ಗಮನ ಸೆಳೆಯುತ್ತಿದೆ.