ಪದೇಪದೇ ಲೂಸ್ ಮೋಷನ್ ಆಗಿ ಸುಸ್ತಾಗುತ್ತಿದ್ದೀರಾ? ಈ ಸಿಂಪಲ್‌ ಟಿಪ್ಸ್‌ ಫಾಲೋ ಮಾಡಿ

Loose Motion Home Care: ಲೂಸ್ ಮೋಷನ್ ಅಥವಾ ಅತಿಸಾರ ಸಾಮಾನ್ಯವಾಗಿ ಕಾಣಿಸಿಕೊಳ್ಳುವ ಜೀರ್ಣಾಂಗ ಸಂಬಂಧಿ ಆರೋಗ್ಯ ಸಮಸ್ಯೆಗಳಲ್ಲಿ ಒಂದಾಗಿದೆ. ಕಲುಷಿತ ಆಹಾರ, ಅಶುದ್ಧ ನೀರು, ವೈರಸ್ ಅಥವಾ ಬ್ಯಾಕ್ಟೀರಿಯಾ ಸೋಂಕು ಸೇರಿದಂತೆ ಹಲವು ಕಾರಣಗಳಿಂದ ಅತಿಸಾರ ಉಂಟಾಗಬಹುದು. ಪದೇಪದೇ ಮಲವಿಸರ್ಜನೆಯಾಗುವುದರಿಂದ ದೇಹದಲ್ಲಿನ ನೀರು ಮತ್ತು ಅಗತ್ಯ ಲವಣಾಂಶಗಳು ಕಡಿಮೆಯಾಗುತ್ತವೆ. ಪರಿಣಾಮ ಸುಸ್ತು, ನಿಶ್ಶಕ್ತಿ, ತಲೆಸುತ್ತು ಹಾಗೂ ನಿರ್ಜಲೀಕರಣದಂತಹ ಸಮಸ್ಯೆಗಳು ಕಾಣಿಸಿಕೊಳ್ಳಬಹುದು. ಇಂತಹ ಸಂದರ್ಭದಲ್ಲಿ ಸರಿಯಾದ ಆಹಾರ ಸೇವನೆ ಮತ್ತು ದೇಹದಲ್ಲಿ ನೀರಿನ ಸಮತೋಲನ ಕಾಪಾಡಿಕೊಳ್ಳುವುದು ಅತ್ಯಂತ ಮುಖ್ಯ.

ಅತಿಸಾರ ಕಾಣಿಸಿಕೊಂಡಾಗ ಕೆಲವರು ಆಹಾರ ಸೇವಿಸುವುದನ್ನೇ ನಿಲ್ಲಿಸುತ್ತಾರೆ. ಆದರೆ ಇದರಿಂದ ದೇಹಕ್ಕೆ ಅಗತ್ಯವಾದ ಶಕ್ತಿ ದೊರೆಯದೆ ಮತ್ತಷ್ಟು ನಿಶ್ಶಕ್ತಿ ಉಂಟಾಗಬಹುದು. ಹೀಗಾಗಿ ಸುಲಭವಾಗಿ ಜೀರ್ಣವಾಗುವ ಆಹಾರಗಳನ್ನ ಸೇವಿಸುವುದು ಮತ್ತು ಅಗತ್ಯ ಪ್ರಮಾಣದಲ್ಲಿ ದ್ರವ ಪದಾರ್ಥಗಳನ್ನ ಕುಡಿಯುವುದು ಚೇತರಿಕೆಗೆ ನೆರವಾಗುತ್ತದೆ.

ಲೂಸ್ ಮೋಷನ್ ಆದಾಗ ಬಾಳೆಹಣ್ಣು ತಿನ್ನುವುದು ಒಳ್ಳೆಯದೇ?

ಅತಿಸಾರದ ಸಂದರ್ಭದಲ್ಲಿ ಬಾಳೆಹಣ್ಣು ಸೇವಿಸುವುದು ಉಪಯುಕ್ತವಾಗಬಹುದು. ಬಾಳೆಹಣ್ಣಿನಲ್ಲಿ ಪೊಟ್ಯಾಸಿಯಂ ಮತ್ತು ಕರಗುವ ನಾರಿನಾಂಶವಿದ್ದು, ದೇಹಕ್ಕೆ ಶಕ್ತಿ ಒದಗಿಸಲು ಹಾಗೂ ಮಲದ ಸ್ಥಿರತೆ ಸುಧಾರಿಸಲು ನೆರವಾಗಬಹುದು. ಪದೇಪದೇ ಮಲವಿಸರ್ಜನೆಯಾಗುವುದರಿಂದ ದೇಹದಲ್ಲಿ ಪೊಟ್ಯಾಸಿಯಂ ಸೇರಿದಂತೆ ಕೆಲವು ಲವಣಗಳ ಕೊರತೆ ಉಂಟಾಗಬಹುದು. ಬಾಳೆಹಣ್ಣು ಇಂತಹ ಪೋಷಕಾಂಶಗಳನ್ನ ಒದಗಿಸುವ ಆಹಾರಗಳಲ್ಲಿ ಒಂದಾಗಿದೆ. ಆದರೆ ಬಾಳೆಹಣ್ಣು ಮಾತ್ರ ಸೇವಿಸುವುದರಿಂದ ಅತಿಸಾರ ಸಂಪೂರ್ಣ ಗುಣವಾಗುತ್ತದೆ ಎಂದು ಭಾವಿಸಬಾರದು. ದೇಹದಲ್ಲಿ ಕಳೆದುಹೋದ ನೀರು ಮತ್ತು ಲವಣಗಳನ್ನ ಮರುಪೂರಣ ಮಾಡುವುದು ಅತ್ಯಂತ ಅಗತ್ಯ.

ಬಿಳಿ ಅನ್ನ ಸೇವನೆಯಿಂದ ಏನು ಪ್ರಯೋಜನ?

ಲೂಸ್ ಮೋಷನ್ ಸಮಸ್ಯೆ ಎದುರಾದಾಗ ಸರಳವಾಗಿ ಬೇಯಿಸಿದ ಬಿಳಿ ಅನ್ನ ಉತ್ತಮ ಆಹಾರ ಆಯ್ಕೆಯಾಗಬಹುದು. ಇದು ಸುಲಭವಾಗಿ ಜೀರ್ಣವಾಗುವುದರ ಜೊತೆಗೆ ದೇಹಕ್ಕೆ ಅಗತ್ಯವಾದ ಕಾರ್ಬೋಹೈಡ್ರೇಟ್‌ಗಳನ್ನ ಒದಗಿಸುತ್ತದೆ. ಅತಿಸಾರದ ಸಂದರ್ಭದಲ್ಲಿ ಹೊಟ್ಟೆಗೆ ತೊಂದರೆಯಾಗದಂತೆ ಮೃದುವಾಗಿ ಬೇಯಿಸಿದ ಅನ್ನವನ್ನ ಸ್ವಲ್ಪ ಪ್ರಮಾಣದಲ್ಲಿ ಸೇವಿಸಬಹುದು. ಅನ್ನಕ್ಕೆ ಅತಿಯಾದ ಮಸಾಲೆ, ಎಣ್ಣೆ ಅಥವಾ ಖಾರ ಸೇರಿಸದಿರುವುದು ಉತ್ತಮ. ಆದರೆ, ದೀರ್ಘಕಾಲ ಕೇವಲ ಅನ್ನವನ್ನೇ ಸೇವಿಸುವ ಬದಲು ಆರೋಗ್ಯ ಸುಧಾರಿಸಿದಂತೆ ಇತರ ಪೌಷ್ಟಿಕ ಆಹಾರಗಳನ್ನ ಸೇರಿಸಿಕೊಳ್ಳುವುದು ಮುಖ್ಯ.

ಮೊಸರು ಸೇವಿಸಿದರೆ ಲೂಸ್ ಮೋಷನ್ ಕಡಿಮೆಯಾಗುತ್ತದೆಯೇ?

ಮೊಸರಿನಲ್ಲಿ ಕೆಲವು ಪ್ರಯೋಜನಕಾರಿ ಬ್ಯಾಕ್ಟೀರಿಯಾಗಳಿದ್ದು, ಅವು ಕರುಳಿನ ಆರೋಗ್ಯಕ್ಕೆ ನೆರವಾಗಬಹುದು. ಹೀಗಾಗಿ ಅತಿಸಾರದ ಸಂದರ್ಭದಲ್ಲಿ ಕೆಲವರಿಗೆ ಸಾದಾ ಮೊಸರು ಸೇವಿಸುವುದು ಅನುಕೂಲಕರವಾಗಿರಬಹುದು. ಆದರೆ ಪ್ರತಿಯೊಬ್ಬರಿಗೂ ಮೊಸರು ಒಂದೇ ರೀತಿಯಲ್ಲಿ ಹೊಂದಿಕೊಳ್ಳುವುದಿಲ್ಲ. ವಿಶೇಷವಾಗಿ ಅತಿಸಾರದ ಸಂದರ್ಭದಲ್ಲಿ ಕೆಲವರಿಗೆ ಹಾಲಿನ ಉತ್ಪನ್ನಗಳನ್ನ ಸೇವಿಸಿದ ನಂತರ ಹೊಟ್ಟೆ ಉಬ್ಬರ, ಗ್ಯಾಸ್ ಅಥವಾ ಮಲವಿಸರ್ಜನೆಯ ಸಮಸ್ಯೆ ಹೆಚ್ಚಾಗಬಹುದು. ಆದ್ದರಿಂದ ಮೊಸರು ಸೇವಿಸಿದ ನಂತರ ತೊಂದರೆ ಹೆಚ್ಚಾದರೆ ಅದನ್ನ ತಾತ್ಕಾಲಿಕವಾಗಿ ತಪ್ಪಿಸುವುದು ಉತ್ತಮ. ಮೊಸರು ಅತಿಸಾರಕ್ಕೆ ಖಚಿತ ಚಿಕಿತ್ಸೆ ಎಂಬುದಕ್ಕೆ ಬದಲಾಗಿ, ಸಹಿಸಿಕೊಳ್ಳಲು ಸಾಧ್ಯವಾಗುವ ಆಹಾರ ಆಯ್ಕೆಯೆಂದು ಪರಿಗಣಿಸಬೇಕು.

ಹೆಸರುಬೇಳೆ ಖಿಚಡಿ ಸೇವನೆಯಿಂದ ದೇಹಕ್ಕೆ ಶಕ್ತಿ

ಅತಿಸಾರದಿಂದ ಚೇತರಿಸಿಕೊಳ್ಳುವ ಸಂದರ್ಭದಲ್ಲಿ ಅಕ್ಕಿ ಮತ್ತು ಹೆಸರುಬೇಳೆಯಿಂದ ತಯಾರಿಸಿದ ಮೃದುವಾದ ಖಿಚಡಿ ಉತ್ತಮ ಆಹಾರವಾಗಬಹುದು. ಅಕ್ಕಿಯಿಂದ ಕಾರ್ಬೋಹೈಡ್ರೇಟ್ ಹಾಗೂ ಹೆಸರುಬೇಳೆಯಿಂದ ಸ್ವಲ್ಪ ಪ್ರೋಟೀನ್ ದೊರೆಯುತ್ತದೆ. ಇದರಿಂದ ದೇಹಕ್ಕೆ ಅಗತ್ಯವಾದ ಶಕ್ತಿಯನ್ನ ಒದಗಿಸಲು ನೆರವಾಗಬಹುದು. ಖಿಚಡಿ ತಯಾರಿಸುವಾಗ ಹೆಚ್ಚಿನ ಎಣ್ಣೆ, ಖಾರ ಮತ್ತು ಮಸಾಲೆ ಬಳಸುವುದನ್ನ ತಪ್ಪಿಸುವುದು ಉತ್ತಮ. ಚೆನ್ನಾಗಿ ಬೇಯಿಸಿದ ಮೃದುವಾದ ಖಿಚಡಿಯನ್ನ ಕಡಿಮೆ ಪ್ರಮಾಣದಲ್ಲಿ ಸೇವಿಸಿ, ದೇಹದ ಪ್ರತಿಕ್ರಿಯೆಗೆ ಅನುಗುಣವಾಗಿ ಆಹಾರದ ಪ್ರಮಾಣ ಹೆಚ್ಚಿಸಬಹುದು.

ಅತಿಸಾರದ ಸಂದರ್ಭದಲ್ಲಿ ORS ಏಕೆ ಮುಖ್ಯ?

ಲೂಸ್ ಮೋಷನ್ ಸಮಸ್ಯೆಯಲ್ಲಿ ಆಹಾರಕ್ಕಿಂತಲೂ ಪ್ರಮುಖವಾಗಿ ಗಮನಿಸಬೇಕಾದ ವಿಷಯವೆಂದರೆ ನಿರ್ಜಲೀಕರಣವನ್ನ ತಡೆಯುವುದು. ಪದೇಪದೇ ಮಲವಿಸರ್ಜನೆಯಾಗುವುದರಿಂದ ದೇಹದಲ್ಲಿನ ನೀರು ಮತ್ತು ಅಗತ್ಯ ಲವಣಗಳು ಹೊರಹೋಗುತ್ತವೆ. ಈ ಕೊರತೆಯನ್ನ ತುಂಬಲು ಓರಲ್ ರೀಹೈಡ್ರೇಷನ್ ಸಾಲ್ಟ್ಸ್ (ORS) ದ್ರಾವಣ ಅತ್ಯಂತ ಉಪಯುಕ್ತವಾಗಿದೆ. ಔಷಧ ಅಂಗಡಿಯಲ್ಲಿ ದೊರೆಯುವ ORS ಪ್ಯಾಕೆಟ್ ಅನ್ನ ಅದರ ಮೇಲಿನ ಸೂಚನೆಯಂತೆ ನಿಗದಿತ ಪ್ರಮಾಣದ ಶುದ್ಧ ನೀರಿನಲ್ಲಿ ಬೆರೆಸಿ ಕುಡಿಯಬೇಕು. ಪ್ಯಾಕೆಟ್‌ನಲ್ಲಿ ಸೂಚಿಸಿದ ನೀರಿನ ಪ್ರಮಾಣವನ್ನ ಬದಲಾಯಿಸಬಾರದು. ಎಳನೀರು ಮತ್ತು ಸಾಮಾನ್ಯ ನೀರು ದೇಹಕ್ಕೆ ದ್ರವಾಂಶ ಒದಗಿಸಬಹುದು. ಆದರೆ ಅತಿಸಾರದಿಂದ ಕಳೆದುಹೋದ ನೀರು ಮತ್ತು ಲವಣಗಳನ್ನ ತುಂಬುವಲ್ಲಿ ಇವು ORS‌ಗೆ ಸಂಪೂರ್ಣ ಪರ್ಯಾಯವಲ್ಲ.

ಯಾವ ಆಹಾರಗಳನ್ನ ತಪ್ಪಿಸಬೇಕು?

ಅತಿಸಾರದ ಸಂದರ್ಭದಲ್ಲಿ ಅತಿಯಾದ ಎಣ್ಣೆ, ಖಾರ ಮತ್ತು ಮಸಾಲೆಯುಕ್ತ ಆಹಾರಗಳು ಕೆಲವರಿಗೆ ಜೀರ್ಣಾಂಗದ ಅಸ್ವಸ್ಥತೆಯನ್ನ ಹೆಚ್ಚಿಸಬಹುದು. ಅದೇ ರೀತಿ ಹೆಚ್ಚು ಸಕ್ಕರೆ ಇರುವ ತಂಪು ಪಾನೀಯಗಳು, ಪ್ಯಾಕ್ ಮಾಡಿದ ಸಿಹಿ ಜ್ಯೂಸ್‌ಗಳು ಮತ್ತು ಕೆಲವು ಕೃತಕ ಸಿಹಿಕಾರಕಗಳನ್ನ ಹೊಂದಿರುವ ಪಾನೀಯಗಳು ಅತಿಸಾರವನ್ನ ಹೆಚ್ಚಿಸುವ ಸಾಧ್ಯತೆಯಿದೆ. ಕೆಲವರಿಗೆ ಹಾಲು ಮತ್ತು ಹಾಲಿನ ಉತ್ಪನ್ನಗಳು ತಾತ್ಕಾಲಿಕವಾಗಿ ಹೊಂದಿಕೊಳ್ಳದಿರಬಹುದು. ಹೀಗಾಗಿ ದೇಹಕ್ಕೆ ಯಾವ ಆಹಾರ ಅನುಕೂಲಕರವಾಗಿದೆ ಎಂಬುದನ್ನ ಗಮನಿಸಿ ಆಹಾರ ಆಯ್ಕೆ ಮಾಡಿಕೊಳ್ಳುವುದು ಸೂಕ್ತ.

ಈ ಲಕ್ಷಣಗಳು ಕಂಡುಬಂದರೆ ತಕ್ಷಣ ವೈದ್ಯರನ್ನ ಸಂಪರ್ಕಿಸಿ

ಅತಿಸಾರ ಸಾಮಾನ್ಯವಾಗಿ ಕೆಲವೇ ದಿನಗಳಲ್ಲಿ ಕಡಿಮೆಯಾಗಬಹುದು. ಆದರೆ ಕೆಲವು ಸಂದರ್ಭಗಳಲ್ಲಿ ಅದು ಗಂಭೀರ ಆರೋಗ್ಯ ಸಮಸ್ಯೆಯ ಸೂಚನೆಯಾಗಿರಬಹುದು. ಮಲದಲ್ಲಿ ರಕ್ತ ಕಾಣಿಸಿಕೊಳ್ಳುವುದು, ತೀವ್ರ ಹೊಟ್ಟೆನೋವು, ಹೆಚ್ಚಿನ ಜ್ವರ, ನಿರಂತರ ವಾಂತಿ, ಮೂತ್ರ ಕಡಿಮೆಯಾಗುವುದು, ಅತಿಯಾದ ಬಾಯಾರಿಕೆ, ತಲೆಸುತ್ತು ಅಥವಾ ತೀವ್ರ ನಿಶ್ಶಕ್ತಿ ಕಾಣಿಸಿಕೊಂಡರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು. ವಿಶೇಷವಾಗಿ ಚಿಕ್ಕ ಮಕ್ಕಳು, ವೃದ್ಧರು, ಗರ್ಭಿಣಿಯರು ಮತ್ತು ಈಗಾಗಲೇ ಆರೋಗ್ಯ ಸಮಸ್ಯೆಗಳಿರುವವರು ನಿರ್ಜಲೀಕರಣದ ಅಪಾಯದ ಬಗ್ಗೆ ಹೆಚ್ಚಿನ ಎಚ್ಚರಿಕೆ ವಹಿಸಬೇಕು. ಶಿಶುಗಳಿಗೆ ಸ್ತನ್ಯಪಾನವನ್ನ ಮುಂದುವರಿಸಬೇಕು. ಮಕ್ಕಳಲ್ಲಿ ಅತಿಸಾರ ಕಾಣಿಸಿಕೊಂಡರೆ ORS ಮತ್ತು ಅಗತ್ಯವಿದ್ದಲ್ಲಿ ಜಿಂಕ್ ಚಿಕಿತ್ಸೆಯ ಕುರಿತು ವೈದ್ಯರ ಸಲಹೆ ಪಡೆಯಬೇಕು.

ಒಟ್ನಲ್ಲಿ ಅತಿಸಾರದಿಂದ ಚೇತರಿಸಿಕೊಳ್ಳಲು ಬಾಳೆಹಣ್ಣು, ಬಿಳಿ ಅನ್ನ, ಸಹಿಸಿಕೊಳ್ಳಲು ಸಾಧ್ಯವಾದರೆ ಮೊಸರು ಹಾಗೂ ಮೃದುವಾದ ಖಿಚಡಿಯಂತಹ ಆಹಾರಗಳು ನೆರವಾಗಬಹುದು. ಆದರೆ ದೇಹದಲ್ಲಿ ನೀರು ಮತ್ತು ಲವಣಗಳ ಸಮತೋಲನ ಕಾಪಾಡಿಕೊಳ್ಳುವುದೇ ಅತ್ಯಂತ ಮುಖ್ಯ. ಸಮಸ್ಯೆ ತೀವ್ರವಾಗಿದ್ದರೆ ಮನೆಮದ್ದುಗಳನ್ನ ಮಾತ್ರ ಅವಲಂಬಿಸದೆ ವೈದ್ಯಕೀಯ ಚಿಕಿತ್ಸೆ ಪಡೆಯಬೇಕು.

(ಸೂಚನೆ: ಈ ಮಾಹಿತಿ ಸಾಮಾನ್ಯ ಆರೋಗ್ಯ ಜಾಗೃತಿಗಾಗಿ ಮಾತ್ರ. ಅತಿಸಾರದ ಕಾರಣ ಮತ್ತು ತೀವ್ರತೆಗೆ ಅನುಗುಣವಾಗಿ ಚಿಕಿತ್ಸೆ ಬದಲಾಗಬಹುದು. ವೈದ್ಯರ ಸಲಹೆಯಿಲ್ಲದೆ ಆ್ಯಂಟಿಬಯಾಟಿಕ್ ಅಥವಾ ಅತಿಸಾರ ನಿಲ್ಲಿಸುವ ಔಷಧಗಳನ್ನ ಸೇವಿಸಬೇಡಿ. Zee Kannada News ಇದನ್ನ ದೃಢಪಡಿಸುವುದಿಲ್ಲ.)