ಡಯಾಬಿಟಿಸ್‌ ಇದ್ದವರು ಏನು ತಿನ್ನಬೇಕು? ಯಾವುದಕ್ಕೆ ಕಡಿವಾಣ ಹಾಕಬೇಕು? ಇಲ್ಲಿದೆ ಮಾಹಿತಿ

Diabetes Diet: ಮಧುಮೇಹ ಅಥವಾ ಡಯಾಬಿಟಿಸ್‌ ಇರುವುದು ಗೊತ್ತಾದ ತಕ್ಷಣ ಅನೇಕರು ಅನ್ನ, ಹಣ್ಣು ಸೇರಿದಂತೆ ಹಲವು ಆಹಾರಗಳನ್ನ ಸಂಪೂರ್ಣವಾಗಿ ತ್ಯಜಿಸಲು ಮುಂದಾಗುತ್ತಾರೆ. ಆದರೆ ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನ ನಿಯಂತ್ರಿಸಲು ಎಲ್ಲಾ ಆಹಾರಗಳನ್ನೂ ಬಿಟ್ಟುಬಿಡುವುದಕ್ಕಿಂತ, ಯಾವ ಆಹಾರವನ್ನ ಎಷ್ಟು ಪ್ರಮಾಣದಲ್ಲಿ ಸೇವಿಸಬೇಕು ಎಂಬುದನ್ನ ತಿಳಿದುಕೊಳ್ಳುವುದು ಮುಖ್ಯ. ಸಮತೋಲಿತ ಆಹಾರ, ಸರಿಯಾದ ಆಹಾರ ಪ್ರಮಾಣ ಮತ್ತು ನಿಯಮಿತ ಜೀವನಶೈಲಿ ಮಧುಮೇಹ ನಿರ್ವಹಣೆಯಲ್ಲಿ ಮಹತ್ವದ ಪಾತ್ರ ವಹಿಸುತ್ತವೆ.

ತರಕಾರಿ, ಬೇಳೆ, ಧಾನ್ಯಗಳಿಗೆ ಆದ್ಯತೆ ನೀಡಿ

ಮಧುಮೇಹ ಇರುವವರು ತಮ್ಮ ದೈನಂದಿನ ಆಹಾರದಲ್ಲಿ ನಾರಿನಂಶ ಹೆಚ್ಚಿರುವ ತರಕಾರಿಗಳು, ಬೇಳೆಕಾಳುಗಳು ಮತ್ತು ಸಂಪೂರ್ಣ ಧಾನ್ಯಗಳಿಗೆ ಆದ್ಯತೆ ನೀಡಬಹುದು. ಸೊಪ್ಪು, ಬೀನ್ಸ್‌, ಸೌತೆಕಾಯಿ, ಕ್ಯಾರೆಟ್‌, ಬೆಂಡೆಕಾಯಿ, ಬದನೆಕಾಯಿ ಸೇರಿದಂತೆ ವಿವಿಧ ತರಕಾರಿಗಳನ್ನ ಆಹಾರದಲ್ಲಿ ಸೇರಿಸಿಕೊಳ್ಳುವುದು ಉತ್ತಮ. ಇವು ದೇಹಕ್ಕೆ ಅಗತ್ಯವಾದ ಪೋಷಕಾಂಶಗಳನ್ನ ಒದಗಿಸುತ್ತವೆ. ಹೆಸರುಬೇಳೆ, ತೊಗರಿಬೇಳೆ, ಕಡಲೆ, ರಾಜ್ಮಾ ಮುಂತಾದವು ಪ್ರೋಟೀನ್‌ ಮತ್ತು ನಾರಿನಂಶದ ಉತ್ತಮ ಮೂಲಗಳಾಗಿವೆ. ಇವುಗಳನ್ನ ಸೂಕ್ತ ಪ್ರಮಾಣದಲ್ಲಿ ಸೇವಿಸುವುದರಿಂದ ಆಹಾರದಲ್ಲಿ ಪೋಷಕಾಂಶಗಳ ಸಮತೋಲನ ಕಾಪಾಡಿಕೊಳ್ಳಲು ಸಹಾಯವಾಗುತ್ತದೆ. 

ಗೋಧಿ, ಓಟ್ಸ್‌ ಮತ್ತು ಇತರ ಸಂಪೂರ್ಣ ಧಾನ್ಯಗಳನ್ನೂ ವೈಯಕ್ತಿಕ ಆಹಾರ ಯೋಜನೆಗೆ ಅನುಗುಣವಾಗಿ ಬಳಸಬಹುದು. ಆದರೆ ಸಿರಿಧಾನ್ಯಗಳು ಅಥವಾ ಕಂದು ಅಕ್ಕಿಯಂತಹ ಆಹಾರಗಳು ಆರೋಗ್ಯಕರವೆಂದು ಅವುಗಳನ್ನ ಬೇಕಾದಷ್ಟು ತಿನ್ನುವುದು ಸರಿಯಲ್ಲ. ಇವುಗಳಲ್ಲಿಯೂ ಕಾರ್ಬೋಹೈಡ್ರೇಟ್‌ಗಳಿರುತ್ತವೆ. ಹೀಗಾಗಿ ಸೇವಿಸುವ ಪ್ರಮಾಣ ಮತ್ತು ಇತರ ಆಹಾರಗಳೊಂದಿಗೆ ಅವುಗಳನ್ನ ಹೇಗೆ ಸಂಯೋಜಿಸಲಾಗುತ್ತದೆ ಎಂಬುದೂ ಮುಖ್ಯವಾಗುತ್ತದೆ.

ಅನ್ನ, ರೊಟ್ಟಿ ಸಂಪೂರ್ಣವಾಗಿ ಬಿಡಬೇಕೇ?

ಮಧುಮೇಹ ಇರುವವರು ಅನ್ನ ಅಥವಾ ರೊಟ್ಟಿಯನ್ನ ಸಂಪೂರ್ಣವಾಗಿ ತ್ಯಜಿಸಬೇಕು ಎಂಬುದು ಎಲ್ಲರಿಗೂ ಅನ್ವಯಿಸುವ ನಿಯಮವಲ್ಲ. ಅಕ್ಕಿ, ಗೋಧಿ, ರಾಗಿ ಸೇರಿದಂತೆ ಹಲವು ಧಾನ್ಯಗಳು ದೇಹಕ್ಕೆ ಶಕ್ತಿಯನ್ನ ನೀಡುತ್ತವೆ. ಆದರೆ ಇವುಗಳ ಪ್ರಮಾಣ ಹೆಚ್ಚಾದರೆ ರಕ್ತದಲ್ಲಿನ ಗ್ಲೂಕೋಸ್‌ ಮಟ್ಟದ ಮೇಲೆ ಪರಿಣಾಮ ಬೀರಬಹುದು. ಆದ್ದರಿಂದ ತಟ್ಟೆಯಲ್ಲಿ ಅನ್ನ ಅಥವಾ ರೊಟ್ಟಿಯ ಪ್ರಮಾಣವನ್ನ ಗಮನದಲ್ಲಿಟ್ಟುಕೊಂಡು, ಅದರ ಜೊತೆಗೆ ತರಕಾರಿ, ಬೇಳೆ ಮತ್ತು ಸೂಕ್ತ ಪ್ರೋಟೀನ್‌ಯುಕ್ತ ಆಹಾರಗಳನ್ನ ಸೇರಿಸಿಕೊಳ್ಳುವುದು ಉಪಯುಕ್ತ. ಊಟದ ಪ್ರಮಾಣವನ್ನ ವ್ಯಕ್ತಿಯ ದೈಹಿಕ ಚಟುವಟಿಕೆ, ತೂಕ, ರಕ್ತದಲ್ಲಿನ ಸಕ್ಕರೆ ಮಟ್ಟ ಮತ್ತು ವೈದ್ಯರ ಸಲಹೆಗೆ ಅನುಗುಣವಾಗಿ ನಿರ್ಧರಿಸಬೇಕು.

ಸಿಹಿ ತಿನಿಸು, ತಂಪು ಪಾನೀಯಗಳ ಬಗ್ಗೆ ಎಚ್ಚರಿಕೆ

ಸಕ್ಕರೆ ಸೇರಿಸಿದ ಪಾನೀಯಗಳು, ಸಿಹಿ ಚಹಾ ಅಥವಾ ಕಾಫಿ, ಸಿಹಿತಿಂಡಿಗಳು, ಕೇಕ್‌, ಬಿಸ್ಕತ್‌ ಮತ್ತು ಐಸ್‌ಕ್ರೀಮ್‌ಗಳನ್ನ ಆಗಾಗ್ಗೆ ಅಥವಾ ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವುದರಿಂದ ರಕ್ತದಲ್ಲಿನ ಸಕ್ಕರೆ ನಿಯಂತ್ರಣ ಕಷ್ಟವಾಗಬಹುದು. ಹಣ್ಣಿನ ರಸದಲ್ಲಿಯೂ ಸಕ್ಕರೆ ಅಂಶ ವೇಗವಾಗಿ ದೇಹಕ್ಕೆ ಸೇರುವ ಸಾಧ್ಯತೆ ಇದೆ. ಹೀಗಾಗಿ ಸಕ್ಕರೆ ಸೇರಿಸಿದ ಪಾನೀಯಗಳ ಬದಲಿಗೆ ನೀರನ್ನ ಆಯ್ಕೆ ಮಾಡುವುದು ಉತ್ತಮ. ಹುರಿದ ತಿಂಡಿಗಳು, ಹೆಚ್ಚು ಎಣ್ಣೆ ಹೊಂದಿರುವ ಆಹಾರಗಳು ಮತ್ತು ಉಪ್ಪಿನಂಶ ಹೆಚ್ಚಿರುವ ಪ್ಯಾಕೆಟ್‌ ತಿಂಡಿಗಳ ಸೇವನೆಯನ್ನೂ ಮಿತಿಗೊಳಿಸಬೇಕು. ಇವು ದೇಹದ ಒಟ್ಟಾರೆ ಆರೋಗ್ಯದ ಮೇಲೆ ಪರಿಣಾಮ ಬೀರುವುದರ ಜೊತೆಗೆ ಹೃದಯ ಸಂಬಂಧಿ ಅಪಾಯಗಳನ್ನೂ ಹೆಚ್ಚಿಸಬಹುದು.

ಹಣ್ಣು ತಿನ್ನಬಹುದೇ?

ಮಧುಮೇಹ ಇರುವವರು ಎಲ್ಲಾ ಹಣ್ಣುಗಳನ್ನೂ ಸಂಪೂರ್ಣವಾಗಿ ಬಿಡಬೇಕೆಂದಿಲ್ಲ. ಹಣ್ಣುಗಳಲ್ಲಿ ನಾರಿನಂಶ, ಜೀವಸತ್ವಗಳು ಮತ್ತು ಇತರ ಪೋಷಕಾಂಶಗಳಿರುತ್ತವೆ. ಆದರೆ ಹಣ್ಣಿನ ವಿಧ, ಪ್ರಮಾಣ ಮತ್ತು ವೈಯಕ್ತಿಕ ರಕ್ತದ ಸಕ್ಕರೆ ಪ್ರತಿಕ್ರಿಯೆಯನ್ನ ಗಮನಿಸಬೇಕು. ಹಣ್ಣಿನ ರಸಕ್ಕಿಂತ ಸಂಪೂರ್ಣ ಹಣ್ಣನ್ನ ಸೂಕ್ತ ಪ್ರಮಾಣದಲ್ಲಿ ಸೇವಿಸುವುದು ಸಾಮಾನ್ಯವಾಗಿ ಉತ್ತಮ ಆಯ್ಕೆಯಾಗಿದೆ. ಒಂದೇ ಸಮಯದಲ್ಲಿ ಹೆಚ್ಚಿನ ಪ್ರಮಾಣದ ಹಣ್ಣುಗಳನ್ನ ತಿನ್ನುವುದನ್ನ ತಪ್ಪಿಸಿ, ದಿನದ ಆಹಾರ ಯೋಜನೆಯಲ್ಲಿ ಅವುಗಳನ್ನ ಸಮತೋಲನದಿಂದ ಸೇರಿಸಿಕೊಳ್ಳಬೇಕು. ಯಾವ ಹಣ್ಣು ಎಷ್ಟು ಪ್ರಮಾಣದಲ್ಲಿ ಸೂಕ್ತ ಎಂಬುದನ್ನ ವೈದ್ಯರು ಅಥವಾ ನೋಂದಾಯಿತ ಆಹಾರ ತಜ್ಞರ ಸಲಹೆಯೊಂದಿಗೆ ನಿರ್ಧರಿಸಬಹುದು.

ಆಹಾರದ ಜೊತೆಗೆ ಜೀವನಶೈಲಿಯೂ ಮುಖ್ಯ

ಆಹಾರದಲ್ಲಿ ಬದಲಾವಣೆ ಮಾಡುವುದಷ್ಟೇ ಸಾಕಾಗುವುದಿಲ್ಲ. ನಿಯಮಿತ ದೈಹಿಕ ಚಟುವಟಿಕೆ, ಸಾಕಷ್ಟು ನಿದ್ರೆ, ಆರೋಗ್ಯಕರ ತೂಕ ಕಾಪಾಡಿಕೊಳ್ಳುವುದು ಮತ್ತು ವೈದ್ಯರು ಸೂಚಿಸಿದಂತೆ ರಕ್ತದಲ್ಲಿನ ಗ್ಲೂಕೋಸ್‌ ಮಟ್ಟವನ್ನ ಪರಿಶೀಲಿಸುವುದು ಮುಖ್ಯ. ದೀರ್ಘಕಾಲ ಕುಳಿತುಕೊಳ್ಳುವ ಅಭ್ಯಾಸವನ್ನ ಕಡಿಮೆ ಮಾಡಿ, ಸಾಧ್ಯವಾದಷ್ಟು ನಿಯಮಿತವಾಗಿ ನಡೆಯುವುದು ಸಹಾಯಕವಾಗಬಹುದು. ಇನ್ಸುಲಿನ್‌ ಅಥವಾ ಸಕ್ಕರೆ ಕಡಿಮೆ ಮಾಡುವ ಔಷಧಗಳನ್ನ ಸೇವಿಸುವವರು ಆಹಾರದ ಪ್ರಮಾಣವನ್ನ ಹಠಾತ್ತನೆ ಕಡಿಮೆ ಮಾಡುವ ಮೊದಲು ವೈದ್ಯರ ಸಲಹೆ ಪಡೆಯಬೇಕು. ಆಹಾರದಲ್ಲಿ ಕಾರ್ಬೋಹೈಡ್ರೇಟ್‌ಗಳನ್ನ ಗಣನೀಯವಾಗಿ ಕಡಿಮೆ ಮಾಡುವುದರಿಂದ ಕೆಲವರಲ್ಲಿ ರಕ್ತದ ಸಕ್ಕರೆ ಅಪಾಯಕಾರಿಯಾಗಿ ಇಳಿಯುವ ಸಾಧ್ಯತೆಯಿದೆ.

ಒಟ್ನಲ್ಲಿ ಮಧುಮೇಹ ನಿರ್ವಹಣೆಗೆ ಒಂದೇ ಆಹಾರ ಎಲ್ಲರಿಗೂ ಸೂಕ್ತವಾಗುವುದಿಲ್ಲ. ವಯಸ್ಸು, ದೇಹದ ತೂಕ, ಔಷಧೋಪಚಾರ, ದೈಹಿಕ ಚಟುವಟಿಕೆ ಮತ್ತು ಇತರ ಆರೋಗ್ಯ ಸಮಸ್ಯೆಗಳನ್ನ ಪರಿಗಣಿಸಿ ಆಹಾರ ಯೋಜನೆ ರೂಪಿಸಬೇಕು. ಸರಿಯಾದ ಆಹಾರ ಆಯ್ಕೆ, ನಿಯಂತ್ರಿತ ಪ್ರಮಾಣ ಮತ್ತು ವೈದ್ಯಕೀಯ ಮಾರ್ಗದರ್ಶನದ ಮೂಲಕ ರಕ್ತದಲ್ಲಿನ ಸಕ್ಕರೆಯನ್ನ ಉತ್ತಮವಾಗಿ ನಿರ್ವಹಿಸಲು ಸಾಧ್ಯ.

(ಸೂಚನೆ: ಈ ವರದಿ ಸಾಮಾನ್ಯ ಆರೋಗ್ಯ ಮಾಹಿತಿಗಾಗಿ ಮಾತ್ರ. ವೈಯಕ್ತಿಕ ಆಹಾರ ಮತ್ತು ಚಿಕಿತ್ಸಾ ನಿರ್ಧಾರಗಳಿಗೆ ವೈದ್ಯರು ಅಥವಾ ಅರ್ಹ ಆಹಾರ ತಜ್ಞರನ್ನ ಸಂಪರ್ಕಿಸಿ. Zee Kannada News ಇದನ್ನ ದೃಢಪಡಿಸುವುದಿಲ್ಲ.)