ಭಾರತ ಮಹಿಳಾ ತಂಡದ ಕ್ಯಾಪ್ಟನ್‌ ಹುದ್ದೆಗೆ ಹರ್ಮನ್‌ ಪ್ರೀತ್‌ ಕೌರ್ ರಾಜೀನಾಮೆ
ಭಾರತದ ಮಹಿಳಾ ತಂಡದ ನಾಯಕಿ ಹರ್ಮನ್‌ ಪ್ರೀತ್‌ ಕೌರ್ ಮೂರೂ ಮಾದರಿಯ ನಾಯಕತ್ವಕ್ಕೆ ರಾಜೀನಾಮೆ ಘೋಷಿಸಿದ್ದಾರೆ.
Harman Preet Kaur resign: ಭಾರತದ ಮಹಿಳಾ ಕ್ರಿಕೆಟ್ ತಂಡದ ನಾಯಕಿಯರಲ್ಲಿ ಅತಿ ಹೆಚ್ಚು ಕಾಲ ಸೇವೆ ಸಲ್ಲಿಸಿದ ಹರ್ಮನ್‌ಪ್ರೀತ್ ಕೌರ್ ಮಂಗಳವಾರ (ಅ. 6) ಎಲ್ಲಾ ಸ್ವರೂಪದ ನಾಯಕಿ ಹುದ್ದೆಗೆ ರಾಜೀನಾಮೆ ಘೋಷಿಸಿದ್ದು, ʼತಂಡ ಉತ್ತಮ ಸ್ಥಾನದಲ್ಲಿದೆ; ನಾನು ನನ್ನ ಕರ್ತವ್ಯ ಮಾಡಿದ್ದೇನೆ, ಆಟದ ಪ್ರೀತಿಗಾಗಿ ಮತ್ತೆ ಕ್ರೀಡೆಗೆ ಮರಳಬಹುದು ಎಂದಿದ್ದಾರೆ. ಗುವಾಹಟಿಯಲ್ಲಿ ನಡೆದ ಬಿಸಿಸಿಐ ಪರಿಶೀಲನಾ ಸಭೆಯ ಬಳಿಕ ಹರ್ಮನ್‌ಪ್ರೀತ್ ಕೌರ್ ಅವರ ಈ ಘೋಷಣೆ ಹೊರಬಿದ್ದಿದೆ.
ಇನ್ಸ್ಟಾ ಖಾತೆಯಲ್ಲಿ ಹರ್ಮನ್‌ಪ್ರೀತ್ ಕೌರ್ ಪೋಸ್ಟ್:
ತಮ್ಮ ರಾಜೀನಾಮೆ ಬಗ್ಗೆ ಇನ್ಸ್ಟಾಗ್ರಾಮ್‌ ಖಾತೆಯಲ್ಲಿ ಬರೆದುಕೊಂಡಿರುವ ಹರ್ಮನ್‌ಪ್ರೀತ್ ಕೌರ್, "ಇಂದು, ನಾನು ಎಲ್ಲಾ ಸ್ವರೂಪದ ಭಾರತೀಯ ಮಹಿಳಾ ಕ್ರಿಕೆಟ್ ತಂಡದ ನಾಯಕತ್ವದಿಂದ ಕೆಳಗಿಳಿಯುತ್ತಿದ್ದೇನೆ" ಎಂದಿದ್ದಾರೆ.
"ಇದು ಸುಲಭದ ನಿರ್ಧಾರವಲ್ಲ. ಇದು ವರ್ಷಗಳ ನೆನಪುಗಳು, ಭಾವನೆಗಳು, ತ್ಯಾಗಗಳು ಮತ್ತು ನನ್ನ ಜೀವನದುದ್ದಕ್ಕೂ ನನ್ನೊಂದಿಗೆ ಉಳಿಯುವ ಕ್ಷಣಗಳನ್ನು ಹೊಂದಿದೆ" ಎಂದು ಹರ್ಮನ್‌ಪ್ರೀತ್ ಸುದೀರ್ಘ ಹೇಳಿಕೆಯಲ್ಲಿ ತಿಳಿಸಿದ್ದಾರೆ.
ಈ ತಂಡ ಮತ್ತು ಭಾರತೀಯ ಮಹಿಳಾ ಕ್ರಿಕೆಟ್‌ಗಾಗಿ ನಾನು ನನ್ನ ಸರ್ವಸ್ವವನ್ನೂ ಮುಡಿಪಾಗಿಟ್ಟಿದ್ದೇನೆ — ನನ್ನ ರಕ್ತ, ಬೆವರು, ಸಮಯ ಮತ್ತು ಅನೇಕ ಬಾರಿ ನನ್ನ ಸ್ವಂತ ಆಟ ಹಾಗೂ ವೈಯಕ್ತಿಕ ಆಕಾಂಕ್ಷೆಗಳನ್ನೂ ಸಹ. ತಂಡದ ಹಿತವೇ ಮುಖ್ಯ ಎಂದು ನಂಬಿದ್ದರಿಂದ, ನನ್ನ ವೈಯಕ್ತಿಕ ಪ್ರದರ್ಶನ, ಸ್ವಂತ ಬೆಳವಣಿಗೆ ಮತ್ತು ನನ್ನ ವೈಯಕ್ತಿಕ ಆಸೆಗಳನ್ನು ಬದಿಗಿರಿಸಬೇಕಾದ ಸಂದರ್ಭಗಳೂ ಬಂದಿದ್ದವು.
ನಾಯಕಿಯಾಗಿ, ನಾನು ಕಠಿಣ ನಿರ್ಧಾರಗಳನ್ನು ತೆಗೆದುಕೊಳ್ಳಬೇಕಾಯಿತು.
ಆ ನಿರ್ಧಾರಗಳು ಯಾವಾಗಲೂ ಎಲ್ಲರಿಗೂ ಅರ್ಥವಾಗುತ್ತಿರಲಿಲ್ಲ, ಸುಲಭವಾಗಿರುತ್ತಿರಲಿಲ್ಲ ಮತ್ತು ಕೆಲವೊಮ್ಮೆ ಅದಕ್ಕಾಗಿ ನಾನು ವೈಯಕ್ತಿಕವಾಗಿ ಬೆಲೆ ತೆರಬೇಕಾಗುತ್ತಿತ್ತು. ಆದರೆ ನಾನು ತೆಗೆದುಕೊಂಡ ಪ್ರತಿಯೊಂದು ನಿರ್ಧಾರದ ಹಿಂದೆಯೂ ಒಂದೇ ಉದ್ದೇಶವಿತ್ತು - ಈ ತಂಡವನ್ನು ಇನ್ನಷ್ಟು ಉತ್ತಮಗೊಳಿಸುವುದು ಮತ್ತು ಇತರ ಆಟಗಾರ್ತಿಯರಿಗೆ ಬೆಳೆಯಲು, ತಮ್ಮಲ್ಲಿ ತಾವು ನಂಬಿಕೆ ಇರಿಸಿಕೊಳ್ಳಲು ಹಾಗೂ ತಮ್ಮ ಅತ್ಯುತ್ತಮ ಸಾಮರ್ಥ್ಯವನ್ನು ಹೊರತರುವ ಅವಕಾಶವನ್ನು ಕಲ್ಪಿಸಿಕೊಡುವುದು.
ನಾನು ಎಲ್ಲವನ್ನೂ ಕಂಡಿದ್ದೇನೆ.
ಅತ್ಯಂತ ಕಠಿಣ ಕ್ಷಣಗಳು, ನೋವು, ಟೀಕೆಗಳು, ಸಂದೇಹಗಳು ಮತ್ತು ಯಾವುದೂ ನಮ್ಮ ಪರವಾಗಿ ನಡೆಯದ ದಿನಗಳನ್ನು ನಾನು ನೋಡಿದ್ದೇನೆ. ಹಾಗೆಯೇ, ಅತ್ಯಂತ ಸಂತೋಷದ ಕ್ಷಣಗಳನ್ನೂ ಅನುಭವಿಸಿದ್ದೇನೆ - ಗೆಲುವುಗಳು, ಸಂಭ್ರಮಾಚರಣೆಗಳು, ದೇಶವನ್ನು ಪ್ರತಿನಿಧಿಸುವ ಹೆಮ್ಮೆ ಮತ್ತು ಮಾಡಿದ ಪ್ರತಿಯೊಂದು ತ್ಯಾಗಕ್ಕೂ ಸಾರ್ಥಕತೆ ತಂದುಕೊಟ್ಟ ಕ್ಷಣಗಳು.
ಇಂದು ನಾನು ಭಾವಪೂರ್ಣ ಹೃದಯದಿಂದ, ಆದರೆ ಸಂಪೂರ್ಣ ನೆಮ್ಮದಿಯೊಂದಿಗೆ ನಾಯಕತ್ವದಿಂದ ಕೆಳಗಿಳಿಯುತ್ತಿದ್ದೇನೆ. ಏಕೆಂದರೆ, ನನ್ನ ತಂಡವು ಈಗ ಉತ್ತಮ ಸ್ಥಿತಿಯಲ್ಲಿದೆ ಎಂದು ನಾನು ಬಲವಾಗಿ ನಂಬುತ್ತೇನೆ. ಪ್ರತಿಭೆ, ವ್ಯಕ್ತಿತ್ವ ಮತ್ತು ದೃಢ ನಂಬಿಕೆ ಇರುವ ತಂಡವಿದು; ಇದರ ಭವಿಷ್ಯವನ್ನು ವೀಕ್ಷಿಸಲು ಮತ್ತು ಅದರ ಭಾಗವಾಗಲು ನಾನು ಅತ್ಯಂತ ಉತ್ಸುಕಳಾಗಿದ್ದೇನೆ. ನನ್ನ ಕರ್ತವ್ಯವನ್ನು ನಾನು ಪೂರೈಸಿದ್ದೇನೆ ಎಂಬ ಭಾವನೆ ನನಗಿದೆ.
ಈ ತಂಡಕ್ಕಾಗಿ ನಾನು ನನ್ನೆಲ್ಲವನ್ನೂ ನೀಡಿದ್ದೇನೆ. ಹೆಮ್ಮೆಯಿಂದ ಜವಾಬ್ದಾರಿಯನ್ನು ನಿರ್ವಹಿಸಿದ್ದೇನೆ ಮತ್ತು ಭಾರತೀಯ ಮಹಿಳಾ ಕ್ರಿಕೆಟ್ ತಂಡವನ್ನು ಮುನ್ನಡೆಸುವ ಅವಕಾಶ ಸಿಕ್ಕಿದ್ದಕ್ಕಾಗಿ ನಾನು ಸದಾ ಕೃತಜ್ಞಳಾಗಿರುತ್ತೇನೆ.
ಈಗ, ನನ್ನ ಜೀವನದ ಮುಂದಿನ ಅಧ್ಯಾಯದತ್ತ ಸಾಗುವ ಸಮಯ ಬಂದಿದೆ. ನಾಯಕತ್ವದ ಅವಧಿ ಇಂದು ಮುಗಿಯಬಹುದು, ಆದರೆ ಭಾರತೀಯ ಕ್ರಿಕೆಟ್ ಮೇಲಿರುವ ನನ್ನ ಪ್ರೀತಿ ಎಂದಿಗೂ ಕಡಿಮೆಯಾಗುವುದಿಲ್ಲ.
ನನ್ನೊಂದಿಗೆ ಹೆಗಲಿಗೆ ಹೆಗಲು ಕೊಟ್ಟು ನಿಂತ ಪ್ರತಿಯೊಬ್ಬ ಸಹ ಆಟಗಾರ್ತಿ, ತರಬೇತುದಾರರು, ಸಹಾಯಕ ಸಿಬ್ಬಂದಿ, ಆಡಳಿತ ಮಂಡಳಿ, ಬಿಸಿಸಿಐ (BCCI), ಕುಟುಂಬದ ಸದಸ್ಯರು ಮತ್ತು ಪ್ರತಿಯೊಬ್ಬ ಅಭಿಮಾನಿಗೂ ಧನ್ಯವಾದಗಳು ಎಂದು ಹರ್ಮನ್‌ಪ್ರೀತ್ ಸಾಮಾಜಿಕ ಜಾಲತಾಣದಲ್ಲಿ ತಮ್ಮ ಸುದೀರ್ಘ ಹೇಳಿಕೆಯಲ್ಲಿ ಉಲ್ಲೇಖಿಸಿದ್ದಾರೆ.
ಇದೇ ಸಂದರ್ಭದಲ್ಲಿ ಭಾರತದ ಮಹಿಳಾ ಕ್ರಿಕೆಟ್‌ನಲ್ಲಿ ಆಡುವುದನ್ನು ಮುಂದುವರೆಸುವುದಾಗಿ ಸ್ಪಷ್ಟಪಡಿಸಿರುವ ಹರ್ಮನ್‌ಪ್ರೀತ್ ಕೌರ್, "ಈಗ, ನಾನು ಆಟದ ಪ್ರೀತಿಗಾಗಿ ಮತ್ತೆ ಆಡಲು ಸಿದ್ಧಳಿದ್ದೇನೆ. ಆದರೆ ನಾಯಕತ್ವ ಮಾತ್ರ ಕೊನೆಗೊಳ್ಳುತ್ತದೆ. ಪ್ರಯಾಣ ಮುಂದುವರಿಯುತ್ತದೆ" ಎಂದು ಬರೆದುಕೊಂಡಿದ್ದಾರೆ.
2012ರಲ್ಲಿ ಮೊದಲ ಬಾರಿಗೆ ಭಾರತ ತಂಡವನ್ನು ಮುನ್ನಡೆಸಿದ್ದ ಹರ್ಮನ್‌ಪ್ರೀತ್ ಕೌರ್:
ಹರ್ಮನ್‌ಪ್ರೀತ್ ಕೌರ್ 2012 ರಲ್ಲಿ ಗುವಾಂಗ್‌ಝೌನಲ್ಲಿ ಪಾಕಿಸ್ತಾನ ವಿರುದ್ಧದ ಏಷ್ಯಾಕಪ್ ಪಂದ್ಯದಲ್ಲಿ ಮೊದಲ ಬಾರಿಗೆ ಭಾರತ ತಂಡವನ್ನು ಟಿ20 ಸ್ವರೂಪದಲ್ಲಿ ಮುನ್ನಡೆಸಿದ್ದರು. ಬಳಿಕ 2016 ರಲ್ಲಿ ಅಧಿಕೃತವಾಗಿ ಈ ಸ್ವರೂಪದಲ್ಲಿ ನಾಯಕತ್ವ ವಹಿಸಿಕೊಂಡರು ಮತ್ತು 2022 ರಲ್ಲಿ ಮಿಥಾಲಿ ರಾಜ್ ನಿವೃತ್ತಿಯ ನಂತರ ಪೂರ್ಣ ಸಮಯದ ಏಕದಿನ ಪಂದ್ಯಗಳ ನಾಯಕತ್ವ ವಹಿಸಿದ್ದರು. ನಂತರ 2023 ರಲ್ಲಿ ಎಲ್ಲಾ ಮೂರು ಸ್ವರೂಪದ ಪಂದ್ಯಗಳಿಗೂ ಕ್ಯಾಪ್ಟನ್‌ ಆಗಿ ನೇಮಕಗೊಂಡಿದ್ದರು.
