ಸ್ವದೇಶಿ ಬುಲೆಟ್‌ ಟ್ರೈನ್‌ ನಿರ್ಮಾಣದತ್ತ ಐತಿಹಾಸಿಕ ಹೆಜ್ಜೆ: ಬೆಂಗಳೂರಿನಲ್ಲಿ ಸ್ಕ್ವೀಜ್ ಟೆಸ್ಟ್‌ ಪರೀಕ್ಷೆ ಯಶಸ್ವಿ

ಬೆಂಗಳೂರು: ಭಾರತದ ರೈಲ್ವೆ ಇತಿಹಾಸದಲ್ಲೇ ಮತ್ತೊಂದು ಸುವರ್ಣ ಅಧ್ಯಾಯ ಬರೆಯಲಾಗಿದೆ. ದೇಶದ ಮೊದಲ ಸ್ವದೇಶಿ ನಿರ್ಮಿತ ಹೈ-ಸ್ಪೀಡ್ ಬುಲೆಟ್ ಟ್ರೈನ್ 'B28' , ಬೆಂಗಳೂರಿನ ಬಿಇಎಂಎಲ್ ಘಟಕದಲ್ಲಿ ಅತ್ಯಂತ ನಿರ್ಣಾಯಕವಾದ 'ಸ್ಕ್ವೀಜ್ ಟೆಸ್ಟ್'  ಪ್ರಕ್ರಿಯೆಯನ್ನು ಯಶಸ್ವಿಯಾಗಿ ಪೂರ್ಣಗೊಳಿಸಿದೆ. ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಅವರ ನೇರ ಸಮ್ಮುಖದಲ್ಲಿ ಹೈ-ಸ್ಪೀಡ್‌ ಬುಲೆಟ್‌ ಟ್ರೈನ್‌ B28 ನ ಸುರಕ್ಷತಾ ಪರೀಕ್ಷೆ ನಡೆದಿದ್ದು, ರೈಲಿನ ಅಧಿಕೃತ ನಿರ್ಮಾಣ ಹಂತಕ್ಕೆ ಹಸಿರು ನಿಶಾನೆ ಸಿಕ್ಕಂತಾಗಿದೆ.

ಭಾರತದಲ್ಲೇ ತಯಾರಾಗುತ್ತಿರುವ ಈ ಬುಲೆಟ್ ರೈಲಿನೊಂದಿಗೆ ದೇಶವು ಸ್ವದೇಶಿ ಅತಿವೇಗದ ರೈಲು ತಂತ್ರಜ್ಞಾನದತ್ತ ಮಹತ್ವದ ಹೆಜ್ಜೆ ಇಡುತ್ತಿದೆ. ಮುಂಬೈ-ಅಹಮದಾಬಾದ್ ಬುಲೆಟ್ ರೈಲು ಕಾರಿಡಾರ್‌ಗಾಗಿ ಈ ರೈಲನ್ನು ನಿರ್ಮಿಸಲಾಗುತ್ತಿದ್ದು, ಇದು ಜಪಾನ್‌ನ ಶಿಂಕನ್ಸೆನ್ ರೈಲುಗಳಿಗಿಂತ ಅತ್ಯಂತ ಕಡಿಮೆ ವೆಚ್ಚದಲ್ಲಿ ನಿರ್ಮಾಣವಾಗಲಿದೆ ಎಂದು ತಿಳಿದುಬಂದಿದೆ. ಜಪಾನ್ ನೀಡಿದ ಹೆಚ್ಚಿನ ಬೆಲೆಯ ಪ್ರಸ್ತಾವನೆ ಮತ್ತು ವಿಳಂಬದ ಸಾಧ್ಯತೆ ಹಿನ್ನೆಲೆಯಲ್ಲಿ ಭಾರತ ಸರ್ಕಾರವು ಸ್ವಾವಲಂಬಿ ಮಾರ್ಗವನ್ನು ಆಯ್ಕೆ ಮಾಡಿಕೊಂಡಿತು. ಆದರೂ, ಮುಂದಿನ ಪರೀಕ್ಷೆಗಳಿಗಾಗಿ ಜಪಾನ್ ದೇಶವು ಎರಡು ಶಿಂಕನ್ಸೆನ್ ರೈಲು ಸೆಟ್‌ಗಳನ್ನು ಉಚಿತವಾಗಿ ನೀಡಲಿದೆ ಎಂದು ರೈಲ್ವೆ ಇಲಾಖೆ ತಿಳಿಸಿದೆ.

ರೈಲ್ವೆ ಸಚಿವರು ವೀಕ್ಷಿಸಿದ ಈ ‘ಸ್ಕ್ವೀಝ್ ಟೆಸ್ಟ್’ ರೈಲಿನ ಸುರಕ್ಷತೆಯನ್ನು ಪರೀಕ್ಷಿಸುವ ಪ್ರಮುಖ ಪ್ರಕ್ರಿಯೆಯಾಗಿದೆ. ಇದರಲ್ಲಿ ರೈಲಿನ ಬೋಗಿಯ ರಚನಾತ್ಮಕ ಬಲ, ದೃಢತೆ ಮತ್ತು ಆಯಾಮಗಳ ಸ್ಥಿರತೆಯನ್ನು ಪರಿಶೀಲಿಸಲು ನಿಯಂತ್ರಿತ ಒತ್ತಡ ಹಾಗೂ ಎಳೆತದ ಬಲವನ್ನು ಪ್ರಯೋಗಿಸಲಾಗುತ್ತದೆ. ಇದೀಗ ಬಿ28 ರೈಲು ಈ ಪರೀಕ್ಷೆಯಲ್ಲಿ ಪಾಸ್ ಆಗಿದ್ದು, ಇದರ ಗರಿಷ್ಠ ಪ್ರಾಯೋಗಿಕ ವೇಗ ಗಂಟೆಗೆ 280 ಕಿ.ಮೀ. ಇರಲಿದೆ.

ಈ ತಂತ್ರಜ್ಞಾನದ ರೈಲು ಪ್ರಸಕ್ತ ವರ್ಷದ ಅಂತ್ಯದ ವೇಳೆಗೆ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ನಿರ್ಮಾಣ ಘಟಕದಿಂದ ಹೊರಬರುವ ನಿರೀಕ್ಷೆಯಿದೆ. 2027ರ ಆಗಸ್ಟ್ 15ರಂದು ಸೂರತ್-ವಾಪಿ ನಡುವಿನ 97 ಕಿ.ಮೀ. ಮಾರ್ಗದಲ್ಲಿ ಇದರ ಪ್ರಾಯೋಗಿಕ ಉದ್ಘಾಟನಾ ಸಂಚಾರ ನಡೆಯಲಿದ್ದು, ಮುಂಬೈ-ಅಹಮದಾಬಾದ್ ಸಂಪೂರ್ಣ ಕಾರಿಡಾರ್ ಕಾಮಗಾರಿ 2029-30ರ ವೇಳೆಗೆ ಪೂರ್ಣಗೊಳ್ಳುವ ನೀರಿಕ್ಷೆಯಿದೆ.

ಮುಂದಿನ ಯೋಜನೆ ಬೆಂಗಳೂರು-ಪುಣೆ ಕಾರಿಡಾರ್?
ಬೆಂಗಳೂರು-ಪುಣೆ ನಡುವೆ ಪ್ರಸ್ತಾಪಿಸಲಾಗಿರುವ ಬುಲೆಟ್ ರೈಲು ಕಾರಿಡಾರ್ ಮುಂದಿನ ಅತಿವೇಗದ ರೈಲು ಯೋಜನೆಗಳ ಪೈಕಿ ಒಂದಾಗಿರಬಹುದು ಎಂದು ಕೇಂದ್ರ ರೈಲ್ವೆ ಸಚಿವ ಅಶ್ವಿನಿ ವೈಷ್ಣವ್ ಭಾನುವಾರ ಸುಳಿವು ನೀಡಿದ್ದಾರೆ.
 

🚄 The Making of Bharat’s First Bullet Train 📍BEML Factory, Bengaluru #Bharat_BulletTrain https://t.co/L3WhfXMXfG

— Ashwini Vaishnaw (@AshwiniVaishnaw) November 1, 2026