Viral Video: ಬಿಹಾರದ ಯುವಕನ ಪ್ರೀತಿಗಾಗಿ ರಷ್ಯಾದಿಂದ ಭಾರತಕ್ಕೆ ಬಂದ ಯುವತಿ! ಗುಡಿಸಲಿನಲ್ಲೂ ಬದುಕಲು ಸೈ ಎಂದ ಜೂಲಿ

Viral Love Story: ಪ್ರೀತಿಗೆ ದೇಶದ ಗಡಿಗಳಿಲ್ಲ, ಭಾಷೆಯ ಅಡೆತಡೆಗಳಿಲ್ಲ, ಶ್ರೀಮಂತಿಕೆ ಮತ್ತು ಬಡತನದ ಲೆಕ್ಕಾಚಾರವೂ ಇಲ್ಲವೆಂಬ ಮಾತಿಗೆ ಸಾಕ್ಷಿಯಂತಿರುವ ಅಪರೂಪದ ಪ್ರೇಮಕಥೆಯೊಂದು ಸಾಮಾಜಿಕ ಜಾಲತಾಣಗಳಲ್ಲಿ ಗಮನ ಸೆಳೆಯುತ್ತಿದೆ. ಬಿಹಾರದ ಭಾಗಲ್ಪುರ ಜಿಲ್ಲೆಯ ಯುವಕ ರಾಹುಲ್ ಯಾದವ್‌ನನ್ನ ಪ್ರೀತಿಸಿದ ರಷ್ಯಾದ ಯುವತಿ ಜೂಲಿ, ಆತನನ್ನ ಮದುವೆಯಾಗುವ ಉದ್ದೇಶದಿಂದ ಭಾರತಕ್ಕೆ ಬಂದಿದ್ದಾಳೆ ಎನ್ನಲಾಗಿದೆ.

ಐಷಾರಾಮಿ ಜೀವನಕ್ಕಿಂತ ಪ್ರೀತಿ ಮತ್ತು ಸಂತೋಷವೇ ಮುಖ್ಯವೆಂದು ಆಕೆ ಹೇಳಿದ್ದಾಳೆಂಬ ಮಾಹಿತಿ ನೆಟ್ಟಿಗರ ಗಮನ ಸೆಳೆದಿದೆ. ವಿದೇಶದಲ್ಲಿ ಆರಂಭವಾದ ಈ ಪ್ರೇಮಕಥೆ ಇದೀಗ ಭಾರತೀಯ ಸಂಪ್ರದಾಯದಂತೆ ಮದುವೆಯಾಗುವ ಹಂತಕ್ಕೆ ತಲುಪಿದೆ ಎನ್ನಲಾಗಿದ್ದು, ಇಬ್ಬರ ಕುಟುಂಬಗಳೂ ಒಪ್ಪಿಗೆ ಸೂಚಿಸಿವೆ ಎಂಬ ವರದಿಗಳು ವೈರಲ್ ಆಗಿವೆ.

ರಷ್ಯಾದಲ್ಲಿ ಪರಿಚಯ, ಸ್ನೇಹದಿಂದ ಪ್ರೀತಿಗೆ ತಿರುಗಿದ ಸಂಬಂಧ

ಬಿಹಾರದ ಭಾಗಲ್ಪುರ ಜಿಲ್ಲೆಯ ರಾಹುಲ್ ಯಾದವ್ ಉದ್ಯೋಗದ ನಿಮಿತ್ತ ರಷ್ಯಾಕ್ಕೆ ತೆರಳಿದ್ದ ಸಂದರ್ಭದಲ್ಲಿ ಜೂಲಿಯನ್ನ ಭೇಟಿಯಾಗಿದ್ದಾನೆ ಎನ್ನಲಾಗಿದೆ. ಮೊದಲಿಗೆ ಸ್ನೇಹಿತರಾಗಿ ಪರಿಚಯವಾದ ಇಬ್ಬರ ನಡುವೆ ಕ್ರಮೇಣ ಆತ್ಮೀಯತೆ ಬೆಳೆದಿದ್ದು, ಅದು ಪ್ರೀತಿಗೆ ತಿರುಗಿದೆ ಎಂದು ಸಾಮಾಜಿಕ ಜಾಲತಾಣಗಳಲ್ಲಿ ಹಂಚಿಕೊಳ್ಳಲಾದ ಮಾಹಿತಿಯಲ್ಲಿ ತಿಳಿಸಲಾಗಿದೆ. ವಿದೇಶದಲ್ಲಿ ಕೆಲಸ ಮಾಡುತ್ತಿದ್ದ ರಾಹುಲ್‌ಗೆ ಅಲ್ಲಿನ ಜೀವನದ ನಡುವೆ ಜೂಲಿಯ ಪರಿಚಯವಾಗಿತ್ತು.

ಪರಸ್ಪರ ಒಡನಾಟ ಹೆಚ್ಚಾದಂತೆ ಇಬ್ಬರೂ ಒಬ್ಬರನ್ನೊಬ್ಬರು ಇಷ್ಟಪಡಲು ಆರಂಭಿಸಿದರು ಎನ್ನಲಾಗಿದೆ. ಆದರೆ ಕೆಲವು ಸಮಯದ ಬಳಿಕ ರಾಹುಲ್ ತನ್ನ ಊರಾದ ಬಿಹಾರಕ್ಕೆ ಮರಳಬೇಕಾದ ಪರಿಸ್ಥಿತಿ ಎದುರಾಯಿತು. ರಾಹುಲ್ ಭಾರತಕ್ಕೆ ವಾಪಸಾದ ಬಳಿಕವೂ ಇಬ್ಬರ ನಡುವಿನ ಸಂಬಂಧ ಮುಂದುವರಿದಿದೆ ಎಂದು ಹೇಳಲಾಗುತ್ತಿದೆ. ದೂರದ ದೇಶಗಳಲ್ಲಿದ್ದರೂ ಪ್ರೀತಿಯನ್ನ ಉಳಿಸಿಕೊಂಡಿದ್ದ ಈ ಜೋಡಿಯ ಕಥೆ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗೆ ಕಾರಣವಾಗಿದೆ.

ಪ್ರಿಯಕರನನ್ನ ಹುಡುಕಿಕೊಂಡು ಭಾರತಕ್ಕೆ ಬಂದ ಜೂಲಿ

ರಾಹುಲ್ ಭಾರತಕ್ಕೆ ಮರಳಿದ ಸುಮಾರು ಆರು ತಿಂಗಳ ಬಳಿಕ ಜೂಲಿ ಆತನನ್ನ ಮದುವೆಯಾಗುವ ಉದ್ದೇಶದಿಂದ ಭಾರತಕ್ಕೆ ಬಂದಿದ್ದಾಳೆ ಎನ್ನಲಾಗಿದೆ. ಆಕೆ ತನ್ನ ಕುಟುಂಬದ ಸದಸ್ಯರೊಂದಿಗೆ ಭಾರತಕ್ಕೆ ಬಂದು ರಾಹುಲ್ ಮನೆಗೆ ಭೇಟಿ ನೀಡಿದ್ದಾಳೆ ಎಂಬ ಮಾಹಿತಿ ವೈರಲ್ ಆಗಿರುವ ಪೋಸ್ಟ್‌ಗಳಲ್ಲಿ ಕಾಣಿಸಿಕೊಂಡಿದೆ. ವಿದೇಶದಲ್ಲಿ ಬೆಳೆದ ಯುವತಿಯೊಬ್ಬಳು ತನ್ನ ಪ್ರೀತಿಗಾಗಿ ಸಾವಿರಾರು ಕಿಲೋಮೀಟರ್ ದೂರ ಪ್ರಯಾಣಿಸಿ ಭಾರತಕ್ಕೆ ಬಂದಿರುವುದು ಅನೇಕರ ಕುತೂಹಲಕ್ಕೆ ಕಾರಣವಾಗಿದೆ. ಈ ಪ್ರೇಮಕಥೆಯನ್ನ ‘ಘರ್ ಕೆ ಕಲೇಶ್’ (Ghar Ke Kalesh) ಹೆಸರಿನ ಎಕ್ಸ್ (X) ಖಾತೆಯಲ್ಲಿ ಹಂಚಿಕೊಳ್ಳಲಾಗಿದೆ. 

ಗುಡಿಸಲಿನಲ್ಲೂ ಬದುಕಲು ಸಿದ್ಧ ಎಂದ ಯುವತಿ!

ಈ ಪ್ರೇಮಕಥೆಯಲ್ಲಿ ಹೆಚ್ಚು ಗಮನ ಸೆಳೆದಿರುವುದು ಜೂಲಿಯ ಮನೋಭಾವ ಎನ್ನಲಾಗಿದೆ. ರಾಹುಲ್ ತನ್ನ ಆರ್ಥಿಕ ಪರಿಸ್ಥಿತಿಯ ಬಗ್ಗೆ ಆಕೆಗೆ ತಿಳಿಸಿದ್ದಾನೆ. ದೊಡ್ಡ ಮನೆ ಅಥವಾ ಐಷಾರಾಮಿ ಸೌಲಭ್ಯಗಳಿಲ್ಲದೆ, ಸರಳವಾದ ಮನೆಯಲ್ಲಿ ಜೀವನ ನಡೆಸಬೇಕಾಗಬಹುದು ಎಂಬ ವಿಷಯವನ್ನ ಆತ ವಿವರಿಸಿದ್ದಾನಂತೆ. ಇದಕ್ಕೆ ಪ್ರತಿಕ್ರಿಯಿಸಿದ ಜೂಲಿ, ಪ್ರೀತಿಯೇ ಮುಖ್ಯವಾಗಿದ್ದು, ಐಷಾರಾಮಿ ಬದುಕಿಗಿಂತ ಪ್ರೀತಿಸುವ ವ್ಯಕ್ತಿಯೊಂದಿಗೆ ಸಂತೋಷದಿಂದ ಬದುಕುವುದು ತನಗೆ ಮುಖ್ಯ ಎಂಬ ಭಾವನೆ ವ್ಯಕ್ತಪಡಿಸಿದ್ದಾಳಂತೆ. ರಾಹುಲ್‌ನ ಆರ್ಥಿಕ ಸ್ಥಿತಿಗಿಂತ ಆತನ ಮೇಲಿನ ಪ್ರೀತಿಗೆ ಆದ್ಯತೆ ನೀಡಿದ್ದಾಳೆ ಎನ್ನುವ ಈ ಅಂಶವೇ ನೆಟ್ಟಿಗರ ಗಮನ ಸೆಳೆದಿದೆ.  

ಇಬ್ಬರ ಮದುವೆಗೆ ಕುಟುಂಬಗಳ ಒಪ್ಪಿಗೆ?

ರಾಹುಲ್ ಮತ್ತು ಜೂಲಿಯ ಸಂಬಂಧಕ್ಕೆ ಎರಡೂ ಕುಟುಂಬಗಳು ಒಪ್ಪಿಗೆ ಸೂಚಿಸಿವೆ ಎಂದು ವೈರಲ್ ವರದಿಗಳಲ್ಲಿ ಹೇಳಲಾಗಿದೆ. ಈಗಾಗಲೇ ಕುಟುಂಬದ ಸದಸ್ಯರು ಪರಸ್ಪರ ಭೇಟಿಯಾಗಿ ಮಾತುಕತೆ ನಡೆಸಿದ್ದಾರೆ ಎನ್ನಲಾಗಿದ್ದು, ನವೆಂಬರ್ ತಿಂಗಳಲ್ಲಿ ಭಾರತೀಯ ಸಂಪ್ರದಾಯದಂತೆ ಮದುವೆ ನಡೆಯುವ ಸಾಧ್ಯತೆಯಿದೆ ಎಂಬ ಮಾಹಿತಿಯೂ ಹರಿದಾಡುತ್ತಿದೆ.

ನೆಟ್ಟಿಗರ ಮನಗೆದ್ದ ಅಪರೂಪದ ಪ್ರೇಮಕಥೆ

ಈ ಸ್ಟೋರಿ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದ್ದಂತೆ ಅನೇಕರು ತಮ್ಮ ಅಭಿಪ್ರಾಯಗಳನ್ನ ಹಂಚಿಕೊಳ್ಳುತ್ತಿದ್ದಾರೆ ಎನ್ನಲಾಗಿದೆ. ನಿಜವಾದ ಪ್ರೀತಿಗೆ ಗಡಿಗಳಿಲ್ಲವೆಂದು ಕೆಲವರು ಪ್ರತಿಕ್ರಿಯಿಸಿದ್ದರೆ, ಪ್ರೀತಿ ಮತ್ತು ಪರಸ್ಪರ ಹೊಂದಾಣಿಕೆಯೇ ದಾಂಪತ್ಯ ಜೀವನದ ಮುಖ್ಯ ಅಂಶಗಳು ಎಂದು ಇನ್ನು ಕೆಲವರು ಅಭಿಪ್ರಾಯಪಟ್ಟಿದ್ದಾರೆ. ಇನ್ನೂ ಕೆಲವರು ಈ ಕಥೆಯ ಸತ್ಯಾಸತ್ಯತೆ ಕುರಿತು ಪ್ರಶ್ನೆಗಳನ್ನ ಎತ್ತಿದ್ದಾರೆ. ಒಟ್ನಲ್ಲಿ ರಷ್ಯಾದ ಯುವತಿ ಮತ್ತು ಬಿಹಾರದ ಯುವಕನ ಈ ಪ್ರೇಮಕಥೆ ಅಂತಾರಾಷ್ಟ್ರೀಯ ಸಂಬಂಧಗಳು, ಪ್ರೀತಿ ಮತ್ತು ಜೀವನದ ಆಯ್ಕೆಗಳ ಕುರಿತು ಚರ್ಚೆಗೆ ಕಾರಣವಾಗಿದೆ.