ಟೆಸ್ಲಾದಿಂದ ಹಾರುವ ಕಾರು: ರಾಕೆಟ್ ತಂತ್ರಜ್ಞಾನದೊಂದಿಗೆ ಹೊಸ ರೋಡ್‌ಸ್ಟರ್ ಅನಾವರಣ!

Tesla Flying Car: ಅಮೆರಿಕದ ಟೆಸ್ಲಾ ಕಂಪನಿಯು ತನ್ನ ಬಹುನಿರೀಕ್ಷಿತ 2ನೇ ತಲೆಮಾರಿನ ರೋಡ್‌ಸ್ಟರ್ ಎಲೆಕ್ಟ್ರಿಕ್ ಸ್ಪೋರ್ಟ್ಸ್ ಕಾರನ್ನ ಅಕ್ಟೋಬರ್ 15ರಂದು ಟೆಕ್ಸಾಸ್‌ನಲ್ಲಿ ಅನಾವರಣಗೊಳಿಸಿದೆ. ಸ್ಪೇಸ್‌ಎಕ್ಸ್‌ನ ರಾಕೆಟ್ ತಂತ್ರಜ್ಞಾನ ಬಳಸಿಕೊಂಡು ಕಾರನ್ನ ಗಾಳಿಯಲ್ಲಿ ಮೇಲಕ್ಕೆತ್ತುವ ಮತ್ತು ತಿರುಗಿಸುವ ಪ್ರದರ್ಶನ ಈ ಅನಾವರಣದ ಪ್ರಮುಖ ಆಕರ್ಷಣೆಯಾಗಿತ್ತು. ಈ ಕಾರಿನ ಉತ್ಪಾದನೆಯನ್ನ 2028ರಲ್ಲಿ ಆರಂಭಿಸುವುದಾಗಿ ಕಂಪನಿ ತಿಳಿಸಿದೆ.

ರಾಕೆಟ್ ತಂತ್ರಜ್ಞಾನದೊಂದಿಗೆ ಹಾರುವ ಕಾರು!

ಸಾಮಾನ್ಯವಾಗಿ ಕಾರುಗಳು ರಸ್ತೆ ಮೇಲೆ ಸಂಚರಿಸುತ್ತವೆ. ಆದರೆ ಹೊಸ ಟೆಸ್ಲಾ ರೋಡ್‌ಸ್ಟರ್ ಕಾರು ಅಲ್ಪಾವಧಿಗೆ ಗಾಳಿಯಲ್ಲಿ ಮೇಲಕ್ಕೆ ಹಾರುವ ರೀತಿಯಲ್ಲಿ ಪ್ರದರ್ಶನ ನೀಡಿದೆ. ಇದಕ್ಕಾಗಿ ಸ್ಪೇಸ್‌ಎಕ್ಸ್‌ನ ಸಹಯೋಗದಲ್ಲಿ ಅಭಿವೃದ್ಧಿಪಡಿಸಿರುವ ವಿಶೇಷ ಥ್ರಸ್ಟರ್‌ಗಳನ್ನ ಬಳಸಲಾಗಿದೆ. ಅನಾವರಣ ಕಾರ್ಯಕ್ರಮದಲ್ಲಿ ಕಾರು ವಿಶೇಷ ಬಾಗಿದ ರ‍್ಯಾಂಪ್ ಮೇಲೆ ಚಲಿಸಿ, ತಲೆಕೆಳಗಿನ ಸ್ಥಿತಿಯಲ್ಲಿಯೂ ಸಾಗುವ ಪ್ರದರ್ಶನ ನೀಡಿತು. ನಂತರ ಥ್ರಸ್ಟರ್‌ಗಳ ನೆರವಿನಿಂದ ಗಾಳಿಯಲ್ಲಿ ಮೇಲಕ್ಕೆದ್ದು ತಿರುಗಿ ಮತ್ತೆ ನೆಲದ ಮೇಲೆ ಇಳಿಯಿತು. 

Real life, baby https://t.co/3QEqn18wig

— Tesla (@Tesla) October 16, 2026

 ಇತರ ಟೆಸ್ಲಾ ವಾಹನಗಳು ಮತ್ತು ಟ್ರಕ್‌ಗಳ ಮೇಲಿನಿಂದ ಹಾರುವ ರೀತಿಯ ಪ್ರದರ್ಶನವೂ ನಡೆಯಿತು. ಈ ದೃಶ್ಯಗಳು ವಾಹನ ತಂತ್ರಜ್ಞಾನದ ಹೊಸ ಸಾಧ್ಯತೆಗಳ ಬಗ್ಗೆ ಚರ್ಚೆ ಹುಟ್ಟುಹಾಕಿವೆ. ಆದರೆ, ಈ ಕಾರು ಸಾಂಪ್ರದಾಯಿಕ ಅರ್ಥದಲ್ಲಿ ನಿರಂತರವಾಗಿ ಹಾರಬಲ್ಲ ವಿಮಾನವಲ್ಲ ಎಂಬುದನ್ನ ಗಮನಿಸಬೇಕು. ಈಗ ತೋರಿಸಿರುವುದು ನಿಯಂತ್ರಿತ ಪ್ರದರ್ಶನದಲ್ಲಿ ಅಲ್ಪಾವಧಿಗೆ ಮೇಲಕ್ಕೆದ್ದು ಚಲಿಸುವ ಸಾಮರ್ಥ್ಯವಾಗಿದೆ. ಇಂತಹ ವ್ಯವಸ್ಥೆಯನ್ನ ಸಾರ್ವಜನಿಕ ರಸ್ತೆಗಳಲ್ಲಿ ಬಳಸಲು ಅನುಮತಿ ದೊರೆತಿದೆಯೇ ಎಂಬುದು ಇನ್ನೂ ಸ್ಪಷ್ಟವಾಗಿಲ್ಲ. 

ಒಂದು ಸೆಕೆಂಡ್‌ಗಿಂತ ಕಡಿಮೆ ಅವಧಿಯಲ್ಲಿ 0–100 ಕಿ.ಮೀ ವೇಗ?

0-60 mph in 0.81 seconds https://t.co/7Pp4oqJVzq

— Tesla (@Tesla) October 16, 2026

 ಹೊಸ ರೋಡ್‌ಸ್ಟರ್‌ನ ವೇಗವೂ ಪ್ರಮುಖ ಆಕರ್ಷಣೆಯಾಗಿದೆ. ಟೆಸ್ಲಾ ಎಂಜಿನಿಯರಿಂಗ್ ವಿಭಾಗದ ಮುಖ್ಯಸ್ಥರ ಪ್ರಕಾರ, ಕಾರು ಗಂಟೆಗೆ ಸುಮಾರು 97 ಕಿ.ಮೀ ವೇಗವನ್ನ ಒಂದು ಸೆಕೆಂಡ್‌ಗಿಂತ ಕಡಿಮೆ ಅವಧಿಯಲ್ಲಿ ತಲುಪುವ ಸಾಮರ್ಥ್ಯ ಹೊಂದಿದೆ ಎಂದು ಕಂಪನಿ ಹೇಳಿದೆ. ಕಾರಿನ ಗರಿಷ್ಠ ವೇಗ ಗಂಟೆಗೆ 370 ಕಿ.ಮೀ.ಗಿಂತ ಹೆಚ್ಚಿರಬಹುದು ಎಂಬ ಮಾಹಿತಿಯನ್ನೂ ನೀಡಲಾಗಿದೆ. ಈ ಅಂಕಿಅಂಶಗಳು ಕಂಪನಿ ನೀಡಿರುವ ಮಾಹಿತಿಯನ್ನ ಆಧರಿಸಿವೆ. ವಾಣಿಜ್ಯ ಮಾದರಿಯ ಅಂತಿಮ ಕಾರ್ಯಕ್ಷಮತೆ ಮತ್ತು ಅದರ ಸ್ವತಂತ್ರ ಪರೀಕ್ಷೆಗಳ ವಿವರಗಳು ಲಭ್ಯವಾದ ಬಳಿಕವೇ ನಿಖರ ಸಾಮರ್ಥ್ಯದ ಬಗ್ಗೆ ಸ್ಪಷ್ಟ ಚಿತ್ರಣ ದೊರೆಯಲಿದೆ. 

Do a kickflip! https://t.co/DJ1Bq1yu8m

— Tesla (@Tesla) October 16, 2026

 ಮೂರು ಮಾದರಿಗಳಲ್ಲಿ ಲಭ್ಯವಾಗುವ ನಿರೀಕ್ಷೆ

ಟೆಸ್ಲಾ ರೋಡ್‌ಸ್ಟರ್ ಅನ್ನ ಮೂರು ವಿಭಿನ್ನ ಮಾದರಿಗಳಲ್ಲಿ ಪರಿಚಯಿಸುವ ಯೋಜನೆ ಹೊಂದಿದೆ.

- Performance: ಇಬ್ಬರು ಪ್ರಯಾಣಿಕರಿಗೆ ಆಸನ ವ್ಯವಸ್ಥೆ ಹೊಂದಿರುವ ಮಾದರಿ. ಕಾರ್ಯಕ್ಷಮತೆ ಮತ್ತು ರಸ್ತೆ ಬಳಕೆಯನ್ನ ಗಮನದಲ್ಲಿಟ್ಟುಕೊಂಡಿದೆ.
- Thrust: ವೇಗವರ್ಧನೆಗೆ ನೆರವಾಗುವ ವಿಶೇಷ ಥ್ರಸ್ಟರ್‌ಗಳನ್ನ ಹೊಂದಿರುವ ಮಾದರಿ.
- Rocket: ಹಾರಾಟಕ್ಕೆ ಸಂಬಂಧಿಸಿದ ವಿಶೇಷ ವ್ಯವಸ್ಥೆಗಳನ್ನ ಹೊಂದಿರುವ ಏಕ ಆಸನದ ಮಾದರಿ. ಇದು ಆಹ್ವಾನದ ಮೂಲಕ ಮಾತ್ರ ಲಭ್ಯವಾಗುವ ಆವೃತ್ತಿ ಎಂದು ವರದಿಯಾಗಿದೆ.

ಈ ಮಾದರಿಗಳ ವೈಶಿಷ್ಟ್ಯಗಳು ಮತ್ತು ಲಭ್ಯತೆಯ ಕುರಿತು ಕಂಪನಿ ನೀಡಿರುವ ಮಾಹಿತಿಯ ಆಧಾರದಲ್ಲಿ ಮುಂದಿನ ವಿವರಗಳು ಬದಲಾಗುವ ಸಾಧ್ಯತೆಯಿದೆ. ವಿಶೇಷವಾಗಿ Rocket ಆವೃತ್ತಿಯ ಹಾರಾಟದ ಸಾಮರ್ಥ್ಯವನ್ನ ಸಾಮಾನ್ಯ ರಸ್ತೆ ಬಳಕೆಯ ಅನುಮತಿಯೊಂದಿಗೆ ಸಮೀಕರಿಸಬಾರದು. 

ಬೆಲೆ ಎಷ್ಟು? ಉತ್ಪಾದನೆ ಯಾವಾಗ?

ಹೊಸ ರೋಡ್‌ಸ್ಟರ್‌ಗಾಗಿ ಕಂಪನಿಯ ವೆಬ್‌ಸೈಟ್‌ನಲ್ಲಿ ಮುಂಗಡ ಕಾಯ್ದಿರಿಸುವ ವ್ಯವಸ್ಥೆ ತೋರಿಸಲಾಗಿದೆ. Performance ಮಾದರಿಗೆ 50,000 ಡಾಲರ್ ಹಾಗೂ Thrust ಮಾದರಿಗೆ 2,50,000 ಡಾಲರ್ ಮುಂಗಡ ಠೇವಣಿ ಅಗತ್ಯವಿದೆ ಎಂದು ವರದಿಯಾಗಿದೆ. Rocket ಆವೃತ್ತಿ ಆಹ್ವಾನದ ಮೂಲಕ ಲಭ್ಯವಾಗಲಿದೆ. ಇವು ಮುಂಗಡ ಕಾಯ್ದಿರಿಸುವ ಮೊತ್ತಗಳೇ ಹೊರತು, ಅಂತಿಮ ಮಾರಾಟ ಬೆಲೆ ಎಂದು ಪರಿಗಣಿಸಬಾರದು. ಕಾರಿನ ಸಂಪೂರ್ಣ ಬೆಲೆ ಮತ್ತು ಎಲ್ಲಾ ಮಾರುಕಟ್ಟೆಗಳಲ್ಲಿನ ಲಭ್ಯತೆಯ ಕುರಿತು ಸ್ಪಷ್ಟ ಮಾಹಿತಿ ಇನ್ನಷ್ಟೇ ಬರಬೇಕಿದೆ. ಉತ್ಪಾದನೆ 2028ರಲ್ಲಿ ಆರಂಭವಾಗುವ ನಿರೀಕ್ಷೆಯಿದೆ. 

ಹಲವು ವರ್ಷಗಳಿಂದ ಮುಂದೂಡಲ್ಪಟ್ಟಿದ್ದ ಯೋಜನೆ

ಟೆಸ್ಲಾ ಎರಡನೇ ತಲೆಮಾರಿನ ರೋಡ್‌ಸ್ಟರ್ ಪರಿಕಲ್ಪನೆಯನ್ನ 2017ರಲ್ಲೇ ಪರಿಚಯಿಸಿತ್ತು. ಆರಂಭದಲ್ಲಿ 2020ರ ವೇಳೆಗೆ ವಿತರಣೆ ಆರಂಭವಾಗಬಹುದು ಎಂಬ ನಿರೀಕ್ಷೆಯಿತ್ತು. ಆದರೆ ಹಲವು ಬಾರಿ ಯೋಜನೆ ಮುಂದೂಡಲ್ಪಟ್ಟಿತ್ತು. ಇದೀಗ ಹೊಸ ವಿನ್ಯಾಸ ಮತ್ತು ರಾಕೆಟ್ ತಂತ್ರಜ್ಞಾನದ ಪ್ರದರ್ಶನದೊಂದಿಗೆ ಮತ್ತೆ ಸುದ್ದಿಯಲ್ಲಿದೆ. 

ಒಟ್ನಲ್ಲಿ ಟೆಸ್ಲಾದ ಹೊಸ ರೋಡ್‌ಸ್ಟರ್ ಎಲೆಕ್ಟ್ರಿಕ್ ಕಾರುಗಳ ವೇಗ ಮತ್ತು ಕಾರ್ಯಕ್ಷಮತೆಯ ಜೊತೆಗೆ ಗಾಳಿಯಲ್ಲಿ ಅಲ್ಪಾವಧಿಗೆ ಮೇಲಕ್ಕೆದ್ದು ಚಲಿಸುವ ಸಾಮರ್ಥ್ಯವನ್ನ ಪ್ರದರ್ಶಿಸಿರುವುದರಿಂದ ಗಮನ ಸೆಳೆದಿದೆ. ಆದರೆ ಇದು ಗ್ರಾಹಕರಿಗೆ ಯಾವಾಗ ಲಭ್ಯವಾಗಲಿದೆ, ಹಾರಾಟದ ವೈಶಿಷ್ಟ್ಯಕ್ಕೆ ಯಾವ ರೀತಿಯ ಸುರಕ್ಷತಾ ನಿಯಮಗಳು ಅನ್ವಯಿಸುತ್ತವೆ ಮತ್ತು ಅಂತಿಮ ಬೆಲೆ ಎಷ್ಟಿರಲಿದೆ ಎಂಬ ಪ್ರಶ್ನೆಗಳಿಗೆ ಇನ್ನೂ ಉತ್ತರ ಸಿಗಬೇಕಿದೆ.