ಟಿವಿ, ಮೊಬೈಲ್ ನೋಡುತ್ತಾ ಊಟ ಮಾಡ್ತೀರಾ? ಹಾಗಿದ್ರೆ ಇಂದಿನಿಂದಲೇ ಈ ಟಿಪ್ಸ್‌ ಫಾಲೋ ಮಾಡಿ

Eating Habits: ಟಿವಿ ವೀಕ್ಷಿಸುತ್ತಾ ಅಥವಾ ಮೊಬೈಲ್‌ನಲ್ಲಿ ವಿಡಿಯೋ ನೋಡುತ್ತಾ ಊಟ ಮಾಡುವ ಅಭ್ಯಾಸ ಅನೇಕರಲ್ಲಿದೆ. ಕೆಲವರು ಊಟದ ಸಮಯದಲ್ಲಿ ಧಾರಾವಾಹಿ, ಸಿನಿಮಾ ಅಥವಾ ಸುದ್ದಿಗಳನ್ನ ವೀಕ್ಷಿಸಿದರೆ, ಇನ್ನೂ ಕೆಲವರು ಮೊಬೈಲ್‌ನಲ್ಲಿ ತೊಡಗಿಕೊಂಡೇ ಆಹಾರ ಸೇವಿಸುತ್ತಾರೆ. ಆದರೆ ಆಹಾರ ಸೇವಿಸುವಾಗ ಅದರ ಮೇಲೆಯೇ ಗಮನ ಹರಿಸುವುದು ಮುಖ್ಯವೆಂದು ಆಯುರ್ವೇದದ ಆಹಾರ ಪದ್ಧತಿಗಳು ತಿಳಿಸುತ್ತವೆ. ಆಹಾರವನ್ನ ಹೇಗೆ ಸೇವಿಸುತ್ತೇವೆ ಎಂಬುದೂ ನಮ್ಮ ದೈನಂದಿನ ಆಹಾರ ಕ್ರಮದಲ್ಲಿ ಮಹತ್ವ ಹೊಂದಿದೆ.

ಊಟ ಮಾಡುವಾಗ ಬೇರೆ ಚಟುವಟಿಕೆಗಳಲ್ಲಿ ತೊಡಗಿಕೊಂಡರೆ ಆಹಾರವನ್ನ ಸರಿಯಾಗಿ ಅಗಿಯುವುದರ ಕಡೆಗೆ ಗಮನ ಕಡಿಮೆಯಾಗಬಹುದು. ಹೀಗಾಗಿ ಊಟದ ಸಮಯದಲ್ಲಿ ಶಾಂತ ವಾತಾವರಣಕ್ಕೆ ಆದ್ಯತೆ ನೀಡುವುದು, ಆಹಾರವನ್ನ ನಿಧಾನವಾಗಿ ಅಗಿಯುವುದು ಮತ್ತು ನಿಯಮಿತ ಆಹಾರ ಕ್ರಮವನ್ನ ಪಾಲಿಸುವುದಕ್ಕೆ ಮಹತ್ವ ನೀಡಲಾಗಿದೆ.

ಟಿವಿ, ಮೊಬೈಲ್ ನೋಡುತ್ತಾ ಊಟ ಮಾಡುವುದು ತಪ್ಪಿಸಿ

ಆಯುರ್ವೇದದ ಪ್ರಕಾರ, ಆಹಾರ ಸೇವಿಸುವಾಗ ಶಾಂತವಾದ ಮತ್ತು ಸ್ವಚ್ಛವಾದ ಸ್ಥಳದಲ್ಲಿ ಕುಳಿತುಕೊಳ್ಳುವುದು ಉತ್ತಮ. ಊಟದ ಸಮಯದಲ್ಲಿ ಟಿವಿ ನೋಡುವುದು, ಮೊಬೈಲ್ ಬಳಸುವುದು ಅಥವಾ ಜೋರಾಗಿ ಮಾತನಾಡುವುದನ್ನ ತಪ್ಪಿಸುವಂತೆ ಸಲಹೆ ನೀಡಲಾಗಿದೆ. ಆಹಾರದ ಕಡೆಗೆ ಗಮನ ಹರಿಸಿ, ಪ್ರತಿಯೊಂದು ತುತ್ತನ್ನೂ ಚೆನ್ನಾಗಿ ಅಗಿದು ತಿನ್ನಬೇಕು. ತುಂಬಾ ವೇಗವಾಗಿ ಆಹಾರ ನುಂಗುವುದನ್ನೂ ತಪ್ಪಿಸಬೇಕು.

ಅತಿಯಾಗಿ ಬಿಸಿಯಾದ ಅಥವಾ ತಣ್ಣನೆಯ ಆಹಾರ ಬೇಡ

ಆಹಾರ ಸೇವಿಸುವಾಗ ಅದರ ತಾಪಮಾನದ ಬಗ್ಗೆಯೂ ಗಮನ ನೀಡಬೇಕು. ತುಂಬಾ ಬಿಸಿಯಾದ ಆಹಾರ ಅಥವಾ ಫ್ರಿಜ್‌ನಿಂದ ತೆಗೆದ ಅತಿಯಾದ ತಣ್ಣನೆಯ ಆಹಾರದ ಬದಲಿಗೆ, ಸಾಮಾನ್ಯ ತಾಪಮಾನದಲ್ಲಿರುವ ಅಥವಾ ಸ್ವಲ್ಪ ಬೆಚ್ಚಗಿರುವ ಆಹಾರವನ್ನ ಆಯ್ಕೆ ಮಾಡಿಕೊಳ್ಳುವಂತೆ ಆಯುರ್ವೇದ ಪದ್ಧತಿ ಸೂಚಿಸುತ್ತದೆ.

ಊಟದಲ್ಲಿ ಆರು ರುಚಿಗಳಿಗೆ ಆದ್ಯತೆ ನೀಡಿ

ಆಯುರ್ವೇದದಲ್ಲಿ ಸಿಹಿ, ಹುಳಿ, ಉಪ್ಪು, ಖಾರ, ಕಹಿ ಮತ್ತು ಒಗರು ಎಂಬ ಆರು ರುಚಿಗಳನ್ನ ಉಲ್ಲೇಖಿಸಲಾಗಿದೆ. ಊಟದಲ್ಲಿ ವಿವಿಧ ರುಚಿಗಳನ್ನ ಒಳಗೊಂಡ ಆಹಾರ ಪದಾರ್ಥಗಳನ್ನ ಸೇರಿಸಿಕೊಳ್ಳುವುದಕ್ಕೆ ಮಹತ್ವ ನೀಡಲಾಗಿದೆ. ಹಣ್ಣುಗಳು, ಬೇಳೆಕಾಳುಗಳು, ತರಕಾರಿಗಳು ಮತ್ತು ಸಲಾಡ್‌ಗಳನ್ನ ಆಹಾರದಲ್ಲಿ ಸೇರಿಸುವ ಮೂಲಕ ಊಟದಲ್ಲಿ ವೈವಿಧ್ಯತೆ ಕಾಪಾಡಿಕೊಳ್ಳಬಹುದು.

ಊಟದ ಸಮಯದಲ್ಲಿ ನೀರು ಕುಡಿಯುವ ಕ್ರಮ

ಊಟ ಮಾಡುವುದಕ್ಕಿಂತ ಸ್ವಲ್ಪ ಮೊದಲು ಅಥವಾ ಊಟ ಮುಗಿಸಿದ ತಕ್ಷಣ ಹೆಚ್ಚಿನ ಪ್ರಮಾಣದಲ್ಲಿ ನೀರು ಕುಡಿಯುವುದನ್ನ ತಪ್ಪಿಸುವಂತೆ ವೈದ್ಯರ ಸಲಹೆ ನೀಡುತ್ತಾರೆ. ಊಟದ ಸಮಯದಲ್ಲಿ ಬಾಯಾರಿಕೆಯಾದರೆ ಸ್ವಲ್ಪ ಸ್ವಲ್ಪವಾಗಿ ನೀರು ಕುಡಿಯುವುದು ಉತ್ತಮವೆಂದು ಹೇಳಲಾಗಿದೆ.

ರಾತ್ರಿ ಊಟ ಹೇಗಿರಬೇಕು?

ಹಗಲಿನ ಊಟಕ್ಕೆ ಹೋಲಿಸಿದರೆ ರಾತ್ರಿ ಊಟವನ್ನ ಹಗುರವಾಗಿ ಸೇವಿಸುವುದು ಉತ್ತಮವೆಂದು ತಿಳಿಸಲಾಗಿದೆ. ಮಲಗುವ ಸಮಯಕ್ಕೂ ಊಟಕ್ಕೂ ನಡುವೆ ಸಾಕಷ್ಟು ಅಂತರವಿರುವಂತೆ ನೋಡಿಕೊಳ್ಳಬೇಕು. ವಿಶೇಷವಾಗಿ ಮಲಗುವ ಕನಿಷ್ಠ ಎರಡರಿಂದ ಮೂರು ಗಂಟೆಗಳ ಮುಂಚಿತವಾಗಿ ರಾತ್ರಿ ಊಟ ಮಾಡುವ ಅಭ್ಯಾಸ ಬೆಳೆಸಿಕೊಳ್ಳುವಂತೆ ಸೂಚಿಸಲಾಗಿದೆ.

ಊಟದ ನಂತರ ಸ್ವಲ್ಪ ನಡೆಯಿರಿ

ಊಟ ಮಾಡಿದ ತಕ್ಷಣ ಮಲಗುವುದು ಅಥವಾ ನಿದ್ರೆಗೆ ಜಾರುವುದನ್ನ ತಪ್ಪಿಸುವಂತೆ ಆಯುರ್ವೇದದ ಆಹಾರ ಕ್ರಮದಲ್ಲಿ ಸಲಹೆ ನೀಡಲಾಗಿದೆ. ರಾತ್ರಿ ಊಟದ ಬಳಿಕ ಸ್ವಲ್ಪ ಸಮಯ ಆರಾಮವಾಗಿ ನಡೆಯಬಹುದು. ಸುಮಾರು 1000 ಹೆಜ್ಜೆ ನಡೆಯುವ ಅಭ್ಯಾಸವನ್ನ ರೂಡಿಸಿಕೊಳ್ಳುವುದು ಉತ್ತಮವೆಂದು ತಿಳಿಸಲಾಗಿದೆ.

ಊಟದ ತಕ್ಷಣ ಭಾರವಾದ ಕೆಲಸ ಬೇಡ

ಊಟ ಮುಗಿಸಿದ ತಕ್ಷಣ ಜಿಮ್‌ಗೆ ಹೋಗುವುದು, ಭಾರವಾದ ತೂಕ ಎತ್ತುವುದು ಅಥವಾ ಕಠಿಣ ದೈಹಿಕ ಚಟುವಟಿಕೆಗಳಲ್ಲಿ ತೊಡಗಿಕೊಳ್ಳುವುದನ್ನ ತಪ್ಪಿಸುವಂತೆ ತಿಳಿಸಲಾಗಿದೆ. ಆಹಾರ ಸೇವಿಸಿದ ಬಳಿಕ ದೇಹಕ್ಕೆ ಸ್ವಲ್ಪ ವಿಶ್ರಾಂತಿ ನೀಡುವುದು ಉತ್ತಮವೆಂದು ಹೇಳಲಾಗಿದೆ.  

ಒಟ್ನಲ್ಲಿ ಊಟದ ಸಮಯದಲ್ಲಿ ಟಿವಿ ಮತ್ತು ಮೊಬೈಲ್‌ನಿಂದ ದೂರವಿದ್ದು, ಆಹಾರದ ಮೇಲೆ ಗಮನ ಹರಿಸುವುದು, ಚೆನ್ನಾಗಿ ಅಗಿಯುವುದು, ಸಮತೋಲಿತ ಆಹಾರಕ್ಕೆ ಆದ್ಯತೆ ನೀಡುವುದು ಹಾಗೂ ಊಟದ ನಂತರದ ಅಭ್ಯಾಸಗಳನ್ನ ಸರಿಯಾಗಿ ಪಾಲಿಸುವುದು ಆರೋಗ್ಯದ ದೃಷ್ಟಿಯಿಂದ ಉತ್ತಮ.

(ಸೂಚನೆ: ಇಲ್ಲಿ ನೀಡಲಾದ ಮಾಹಿತಿಯು ಸಾಮಾನ್ಯ ಜ್ಞಾನ ಹಾಗೂ ತಜ್ಞ ಮೂಲಗಳ ಮಾಹಿತಿಯನ್ನ ಆಧರಿಸಿದೆ. ಇದನ್ನ Zee Kannada News ದೃಢಪಡಿಸುವುದಿಲ್ಲ. ಇಲ್ಲಿನ ಸಲಹೆಗಳನ್ನ ಪಾಲಿಸುವ ಮುನ್ನ ತಜ್ಞರ ಸಲಹೆ ಪಡೆಯುವುದು ಉತ್ತಮ.)