ಇಪಿಎಸ್‌ ಕನಿಷ್ಠ ಪಿಂಚಣಿ ಏರಿಕೆ... ದೀಪಾವಳಿ ಬೆನ್ನಲ್ಲೇ ಸಿಗಲಿದ್ಯಾ ಶುಭ ಸುದ್ದಿ!

ಇಪಿಎಸ್‌ ಪಿಂಚಣಿ ಹೆಚ್ಚಳ

ನೌಕರರ ಭವಿಷ್ಯ ನಿಧಿ ಸಂಸ್ಥೆಯ ಲಕ್ಷಾಂತರ ಪಿಂಚಣಿದಾರರು ಇಪಿಎಸ್‌ ಕನಿಷ್ಠ ಪಿಂಚಣಿಯನ್ನು ತಿಂಗಳಿಗೆ ₹ 1,000 ರಿಂದ ₹ 7,500 ಕ್ಕೆ ಹೆಚ್ಷಿಸುವಂತೆ ಹಲವು ವರ್ಷಗಳಿಂದ ಮನವಿ ಮಾಡುತ್ತಾ ಬಂದಿದ್ದಾರೆ. ಇದೀಗ, ದೀಪಾವಳಿ ಬಳಿಕ ನವೆಂಬರ್ 19 ರಂದು ಗುಜರಾತ್‌ನಲ್ಲಿ ಕೇಂದ್ರೀಯ ಟ್ರಸ್ಟಿಗಳ ಮಂಡಳಿ ಸಭೆ ನಡೆಯಲಿದ್ದು, ಆ ಸಭೆಯಲ್ಲಿ ಇಪಿಎಸ್‌ ಕನಿಷ್ಠ ಮಾಸಿಕ ಪಿಂಚಣಿ ಏರಿಕೆ ಕುರಿತು ಚರ್ಚಿಸಬಹುದು ಎನ್ನಲಾಗುತ್ತಿದೆ.

ಸಿಬಿಟಿ 240 ನೇ ಸಭೆ

ಕೇಂದ್ರೀಯ ಟ್ರಸ್ಟಿಗಳ ಮಂಡಳಿ (ಸಿಬಿಟಿ) ತನ್ನ 240 ನೇ ಸಭೆಯನ್ನು ನವೆಂಬರ್ 19 ಗುಜರಾತ್‌ನಲ್ಲಿ ನಡೆಸಲಿದ್ದು, ಈ ಸಭೆಯಲ್ಲಿ ಪಿಂಚಣಿದಾರರು ಮತ್ತು ಕಾರ್ಮಿಕ ಸಂಘಗಳ ಬಹುಕಾಲದಿಂದ ಬಾಕಿ ಇರುವ ಬೇಡಿಕೆಯಾದ, ಇಪಿಎಸ್ ಅಡಿಯಲ್ಲಿ ಕನಿಷ್ಠ ಮಾಸಿಕ ಪಿಂಚಣಿ ಪರಿಷ್ಕರಿಸುವ ವಿಷಯ ಕಾರ್ಯಸೂಚಿಯಲ್ಲಿರಲಿದೆ ಎಂದು ಮೂಲಗಳು ಉಲ್ಲೇಖಿಸಿವೆ.

ಇಪಿಎಸ್‌ ಪಿಂಚಣಿ ಹೆಚ್ಚಳ

ಸೆಪ್ಟೆಂಬರ್ 2014 ರಿಂದ, ಕೇಂದ್ರ ಸರ್ಕಾರವು ತಿಂಗಳಿಗೆ ಕನಿಷ್ಠ ಪಿಂಚಣಿಯನ್ನು ₹ 1,000 ಎಂದು ನಿಗದಿಪಡಿಸಿದೆ. ಆದರೆ ಕಾರ್ಮಿಕ ಮತ್ತು ಪಿಂಚಣಿದಾರರ ಸಂಘಗಳು ಜೀವನ ವೆಚ್ಚ ಮತ್ತು ಹಣದುಬ್ಬರವನ್ನು ನಿಭಾಯಿಸಲು ಇದು ಸಾಕಾಗುವುದಿಲ್ಲ, ಹಾಗಾಗಿ, ಮಾಸಿಕ ಪಿಂಚಣಿಯನ್ನು ಹೆಚ್ಚಿಸಬೇಕು ಎಂದು ವಾದಿಸಿವೆ.

ಪಿಂಚಣಿ ಜೊತೆಗೆ ಡಿಎ ವಿಲೀನ

ಮಾಸಿಕ ಕನಿಷ್ಠ ಪಿಂಚಣಿಯನ್ನು ₹ 7,500/ ತಿಂಗಳಿಗೆ ಹೆಚ್ಚಿಸುವುದರ ಜೊತೆಗೆ ಅದರೊಂದಿಗೆ ತುಟ್ಟಿ ಭತ್ಯೆ (ಡಿಎ) ಅನ್ನು ಸಹ ವಿಲೀನಗೊಳಿಸಬೇಕು ಎಂದು ಕಾರ್ಮಿಕ ಮತ್ತು ಪಿಂಚಣಿದಾರರ ಸಂಘಗಳು ಮನವಿ ಸಲ್ಲಿಸಿವೆ.

ಪಿಂಚಣಿ ಡಿಎ ವಿಲೀನ

ಕನಿಷ್ಠ ಪಿಂಚಣಿಯನ್ನು ಡಿಎ ಜೊತೆಗೆ ವಿಲೀನಗೊಳಿಸಿದರೆ ಪ್ರತಿ ತಿಂಗಳು ಕೈ ಸೇರುವ ಮಾಸಿಕ ಪಿಂಚಣಿ ಹೆಚ್ಚಾಗುತ್ತದೆ. ಇದರಿಂದ ಪಿಂಚಣಿದಾರರ ಜೀವನ ಮಟ್ಟ ಸುಧಾರಿಸಲಿದೆ ಎಂಬುದು ಪಿಂಚಣಿದಾರರ ಸಂಘಗಳ ವಾದವಾಗಿದೆ.

ಮುಂದಿನ ಸಿಬಿಟಿ ಸಭೆ

ಕೇಂದ್ರ ಕಾರ್ಮಿಕ ಸಚಿವಾಲಯವು ಕಳೆದ ವಾರ ಪತ್ರವೊಂದರಲ್ಲಿ ಮುಂದಿನ ಸಿಬಿಟಿ ಸಭೆಯ ದಿನಾಂಕ ಮತ್ತು ಸ್ಥಳವನ್ನು ಪ್ರಕಟಿಸಿದೆ ಎಂದು ವರದಿ ತಿಳಿಸಿದೆ. ಆದಾಗ್ಯೂ, ಪೂರ್ಣ ಕಾರ್ಯಸೂಚಿಯನ್ನು ಇನ್ನೂ ಅಂತಿಮಗೊಳಿಸಲಾಗಿಲ್ಲ ಎಂದು ಮೂಲಗಳನ್ನು ಉಲ್ಲೇಖಿಸಿ ವರದಿ ತಿಳಿಸಿದೆ.