ಮೈಸೂರು ದಸರಾಗೆ ರೈಲ್ವೆ ಇಲಾಖೆಯಿಂದ ಭರ್ಜರಿ ಗುಡ್‌ನ್ಯೂಸ್‌! ವಿಶೇಷ ರೈಲುಗಳ ಸಂಪೂರ್ಣ ವೇಳಾಪಟ್ಟಿ ಇಲ್ಲಿದೆ

Dasara Special Trains: ವಿಶ್ವವಿಖ್ಯಾತ ಮೈಸೂರು ದಸರಾ ಹಬ್ಬಕ್ಕೆ ದಿನಗಣನೆ ಆರಂಭವಾಗಿರುವ ಬೆನ್ನಲ್ಲೇ, ರಾಜ್ಯದ ವಿವಿಧ ಭಾಗಗಳಿಂದ ಮೈಸೂರಿಗೆ ಆಗಮಿಸುವ ಪ್ರಯಾಣಿಕರಿಗೆ ನೈಋತ್ಯ ರೈಲ್ವೆ ಸಿಹಿಸುದ್ದಿ ನೀಡಿದೆ. ದಸರಾ ಸಂದರ್ಭದಲ್ಲಿ ಉಂಟಾಗುವ ಭಾರೀ ಪ್ರಯಾಣಿಕರ ದಟ್ಟಣೆಯನ್ನ ನಿಯಂತ್ರಿಸುವ ಉದ್ದೇಶದಿಂದ ಬೆಂಗಳೂರು, ಮೈಸೂರು, ಅಶೋಕಪುರಂ ಹಾಗೂ ಚಾಮರಾಜನಗರ ನಡುವೆ ಹೆಚ್ಚುವರಿ ಕಾಯ್ದಿರಿಸದ ವಿಶೇಷ ರೈಲುಗಳ ಸಂಚಾರವನ್ನ ಘೋಷಿಸಲಾಗಿದೆ. ಈ ವಿಶೇಷ ರೈಲುಗಳು ಅಕ್ಟೋಬರ್ 16ರಿಂದ 22ರವರೆಗೆ ವಿವಿಧ ದಿನಗಳಲ್ಲಿ ಸಂಚರಿಸಲಿವೆ.  

ಮೈಸೂರು ದಸರಾ 2026ರ ಪ್ರಮುಖ ಕಾರ್ಯಕ್ರಮಗಳು ಅಕ್ಟೋಬರ್ 11ರಿಂದ 21ರವರೆಗೆ ನಡೆಯಲಿವೆ. ಅಕ್ಟೋಬರ್ 21ರಂದು ಜಂಬೂ ಸವಾರಿ ನಡೆಯಲಿದ್ದು, ದಸರಾ ಹಿನ್ನೆಲೆಯಲ್ಲಿ ಮೈಸೂರಿಗೆ ಬರುವ ಪ್ರವಾಸಿಗರು ಹಾಗೂ ಸ್ಥಳೀಯ ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗುವ ನಿರೀಕ್ಷೆಯಿದೆ. ಈ ಹಿನ್ನೆಲೆಯಲ್ಲಿ ಬೆಂಗಳೂರು–ಮೈಸೂರು ಮಾರ್ಗದಲ್ಲಿ ಹೆಚ್ಚುವರಿ ರೈಲು ಸೇವೆ ಒದಗಿಸುವ ನಿರ್ಧಾರವನ್ನು ನೈಋತ್ಯ ರೈಲ್ವೆ ಕೈಗೊಂಡಿದೆ.  

ಕೆಎಸ್ಆರ್ ಬೆಂಗಳೂರು–ಅಶೋಕಪುರಂ ವಿಶೇಷ ರೈಲು

ರೈಲು ಸಂಖ್ಯೆ 06285/06286 ಕೆಎಸ್ಆರ್ ಬೆಂಗಳೂರು ಮತ್ತು ಅಶೋಕಪುರಂ ನಡುವೆ ಮೂರು ಟ್ರಿಪ್‌ಗಳನ್ನ ನಡೆಸಲಿದೆ. 06285 ಸಂಖ್ಯೆಯ ಕೆಎಸ್ಆರ್ ಬೆಂಗಳೂರು–ಅಶೋಕಪುರಂ ಕಾಯ್ದಿರಿಸದ ವಿಶೇಷ ರೈಲು ಅಕ್ಟೋಬರ್ 19, 20 ಮತ್ತು 21ರಂದು ಮಧ್ಯಾಹ್ನ 12:15ಕ್ಕೆ ಕೆಎಸ್ಆರ್ ಬೆಂಗಳೂರಿನಿಂದ ಹೊರಟು, ಅದೇ ದಿನ ಮಧ್ಯಾಹ್ನ 3:40ಕ್ಕೆ ಅಶೋಕಪುರಂ ತಲುಪಲಿದೆ. ಮರುಪ್ರಯಾಣದಲ್ಲಿ 06286 ಸಂಖ್ಯೆಯ ಅಶೋಕಪುರಂ–ಕೆಎಸ್ಆರ್ ಬೆಂಗಳೂರು ವಿಶೇಷ ರೈಲು ಇದೇ ದಿನಗಳಲ್ಲಿ ಸಂಜೆ 4:10ಕ್ಕೆ ಅಶೋಕಪುರಂನಿಂದ ಹೊರಟು ರಾತ್ರಿ 8ಕ್ಕೆ ಕೆಎಸ್ಆರ್ ಬೆಂಗಳೂರು ತಲುಪಲಿದೆ. ಈ ರೈಲು ಎಂಟು MEMU ಬೋಗಿಗಳನ್ನ ಹೊಂದಿರಲಿದೆ. ಈ ರೈಲು ಕೆಂಗೇರಿ, ಬಿಡದಿ, ರಾಮನಗರ, ಚನ್ನಪಟ್ಟಣ, ಮದ್ದೂರು, ಮಂಡ್ಯ, ಎಲಿಯೂರು, ಬ್ಯಾಡರಹಳ್ಳಿ, ಪಾಂಡವಪುರ, ಶ್ರೀರಂಗಪಟ್ಟಣ, ನಾಗನಹಳ್ಳಿ, ಮೈಸೂರು ಹಾಗೂ ಚಾಮರಾಜಪುರಂ ನಿಲ್ದಾಣಗಳಲ್ಲಿ ನಿಲುಗಡೆ ಹೊಂದಿರಲಿದೆ.

ಕೆಎಸ್ಆರ್ ಬೆಂಗಳೂರು–ಮೈಸೂರು ನಡುವೆ 6 ಟ್ರಿಪ್

ರೈಲು ಸಂಖ್ಯೆ 06287/06288 ಕೆಎಸ್ಆರ್ ಬೆಂಗಳೂರು–ಮೈಸೂರು ನಡುವೆ ಆರು ಟ್ರಿಪ್‌ಗಳನ್ನ ನಡೆಸಲಿದೆ. 06287 ಸಂಖ್ಯೆಯ ರೈಲು ಅಕ್ಟೋಬರ್ 16ರಿಂದ 21ರವರೆಗೆ ರಾತ್ರಿ 9:15ಕ್ಕೆ ಕೆಎಸ್ಆರ್ ಬೆಂಗಳೂರಿನಿಂದ ಹೊರಟು, ಮರುದಿನ ಮಧ್ಯರಾತ್ರಿ 12:20ಕ್ಕೆ ಮೈಸೂರು ತಲುಪಲಿದೆ. ಮರುಪ್ರಯಾಣದ 06288 ರೈಲು ಅಕ್ಟೋಬರ್ 17ರಿಂದ 22ರವರೆಗೆ ಮಧ್ಯರಾತ್ರಿ 12:30ಕ್ಕೆ ಮೈಸೂರಿನಿಂದ ಹೊರಟು, ಅದೇ ದಿನ ಮುಂಜಾನೆ 3:30ಕ್ಕೆ ಕೆಎಸ್ಆರ್ ಬೆಂಗಳೂರು ತಲುಪಲಿದೆ. ಈ ಸೇವೆಯಲ್ಲೂ ಎಂಟು MEMU ಬೋಗಿಗಳು ಇರಲಿವೆ. ಕೆಂಗೇರಿ, ಬಿಡದಿ, ರಾಮನಗರ, ಚನ್ನಪಟ್ಟಣ, ಮದ್ದೂರು, ಮಂಡ್ಯ ಹಾಗೂ ಪಾಂಡವಪುರ ಈ ರೈಲಿನ ಪ್ರಮುಖ ನಿಲುಗಡೆಗಳಾಗಿವೆ.  

ಮೈಸೂರು–ಕೆಎಸ್ಆರ್ ಬೆಂಗಳೂರು ನಡುವೆ ಮತ್ತೊಂದು ವಿಶೇಷ ಸೇವೆ

ಇದರ ಜೊತೆಗೆ 06297/06298 ರೈಲುಗಳ ಮೂಲಕ ಮೈಸೂರು–ಕೆಎಸ್ಆರ್ ಬೆಂಗಳೂರು ನಡುವೆ ಆರು ಟ್ರಿಪ್‌ಗಳ ಮತ್ತೊಂದು ಕಾಯ್ದಿರಿಸದ ವಿಶೇಷ ಸೇವೆ ಇರಲಿದೆ. 06297 ಸಂಖ್ಯೆಯ ಮೈಸೂರು–ಕೆಎಸ್ಆರ್ ಬೆಂಗಳೂರು ರೈಲು ಅಕ್ಟೋಬರ್ 16ರಿಂದ 21ರವರೆಗೆ ರಾತ್ರಿ 11:15ಕ್ಕೆ ಮೈಸೂರಿನಿಂದ ಹೊರಟು, ಮರುದಿನ ಮುಂಜಾನೆ 2:50ಕ್ಕೆ ಕೆಎಸ್ಆರ್ ಬೆಂಗಳೂರು ತಲುಪಲಿದೆ. ಮರುಪ್ರಯಾಣದಲ್ಲಿ 06298 ಸಂಖ್ಯೆಯ ರೈಲು ಅಕ್ಟೋಬರ್ 17ರಿಂದ 22ರವರೆಗೆ ಮುಂಜಾನೆ 3:15ಕ್ಕೆ ಕೆಎಸ್ಆರ್ ಬೆಂಗಳೂರಿನಿಂದ ಹೊರಟು ಬೆಳಗ್ಗೆ 6:30ಕ್ಕೆ ಮೈಸೂರು ತಲುಪಲಿದೆ. ಈ ವಿಶೇಷ ರೈಲುಗಳು 19 ಬೋಗಿಗಳನ್ನ ಹೊಂದಿದ್ದು, ಶ್ರೀರಂಗಪಟ್ಟಣ, ಪಾಂಡವಪುರ, ಬ್ಯಾಡರಹಳ್ಳಿ, ಮಂಡ್ಯ, ಮದ್ದೂರು, ಚನ್ನಪಟ್ಟಣ, ರಾಮನಗರ, ಬಿಡದಿ ಹಾಗೂ ಕೆಂಗೇರಿ ನಿಲ್ದಾಣಗಳಲ್ಲಿ ನಿಲುಗಡೆ ಹೊಂದಿರಲಿವೆ. 

ಮೈಸೂರು–ಚಾಮರಾಜನಗರ ನಡುವೆ ಎರಡು ವಿಶೇಷ ರೈಲು ಸೇವೆ

ದಸರಾ ಸಂದರ್ಭದಲ್ಲಿ ಮೈಸೂರು–ಚಾಮರಾಜನಗರ ಮಾರ್ಗದಲ್ಲಿಯೂ ಹೆಚ್ಚುವರಿ ರೈಲು ವ್ಯವಸ್ಥೆ ಮಾಡಲಾಗಿದೆ. ರೈಲು ಸಂಖ್ಯೆ 06293/06294 ಅಕ್ಟೋಬರ್ 21ರಂದು ಸಂಚರಿಸಲಿದೆ. 06293 ಸಂಖ್ಯೆಯ ಮೈಸೂರು–ಚಾಮರಾಜನಗರ ವಿಶೇಷ ರೈಲು ರಾತ್ರಿ 9:30ಕ್ಕೆ ಮೈಸೂರಿನಿಂದ ಹೊರಟು ರಾತ್ರಿ 11:20ಕ್ಕೆ ಚಾಮರಾಜನಗರ ತಲುಪಲಿದೆ. ಮರುಪ್ರಯಾಣದ 06294 ರೈಲು ರಾತ್ರಿ 11:50ಕ್ಕೆ ಚಾಮರಾಜನಗರದಿಂದ ಹೊರಟು ಮರುದಿನ ಮುಂಜಾನೆ 1:50ಕ್ಕೆ ಮೈಸೂರು ತಲುಪಲಿದೆ. ಈ ರೈಲುಗಳು ಚಾಮರಾಜಪುರಂ, ಅಶೋಕಪುರಂ, ಕಡಕೊಳ, ತಾಂಡವಪುರ ಹಾಲ್ಟ್, ಸುಜಾತಾಪುರ ಹಾಲ್ಟ್, ನಂಜನಗೂಡು ಟೌನ್, ಚಿನ್ನದಗುಡಿಹುಂಡಿ ಹಾಲ್ಟ್, ನರಸಾಂಬುಧಿ ಹಾಲ್ಟ್, ಕವಲಂದೆ ಹಾಲ್ಟ್, ಕೊಣನೂರು ಹಾಲ್ಟ್, ಬದನಗುಪ್ಪೆ ಹಾಲ್ಟ್ ಮತ್ತು ಮರಿಯಾಲ ಗಂಗವಾಡಿ ಹಾಲ್ಟ್‌ಗಳಲ್ಲಿ ನಿಲುಗಡೆ ಹೊಂದಿರಲಿವೆ. ಈ ಸೇವೆಗಳಿಗೆ 20 ಬೋಗಿಗಳ ಸಂಯೋಜನೆ ಇರಲಿದೆ.  

ಇದೇ ಮಾರ್ಗದಲ್ಲಿ 06289/06290 ಸಂಖ್ಯೆಯ ಮತ್ತೊಂದು ವಿಶೇಷ ರೈಲು ಕೂಡ ಅಕ್ಟೋಬರ್ 21ರಂದು ಸಂಚರಿಸಲಿದೆ. 06289 ರೈಲು ಮಧ್ಯರಾತ್ರಿ 12:10ಕ್ಕೆ ಮೈಸೂರಿನಿಂದ ಹೊರಟು ಮುಂಜಾನೆ 2ಕ್ಕೆ ಚಾಮರಾಜನಗರ ತಲುಪಲಿದೆ. 06290 ಸಂಖ್ಯೆಯ ಮರುಪ್ರಯಾಣದ ರೈಲು ಮುಂಜಾನೆ 2:30ಕ್ಕೆ ಚಾಮರಾಜನಗರದಿಂದ ಹೊರಟು 4:15ಕ್ಕೆ ಮೈಸೂರು ತಲುಪಲಿದೆ. ಈ ರೈಲುಗಳೂ ಚಾಮರಾಜಪುರಂ, ಅಶೋಕಪುರಂ, ಕಡಕೊಳ, ತಾಂಡವಪುರ ಹಾಲ್ಟ್, ಸುಜಾತಾಪುರ ಹಾಲ್ಟ್, ನಂಜನಗೂಡು ಟೌನ್ ಸೇರಿದಂತೆ ಹಲವು ನಿಲ್ದಾಣಗಳಲ್ಲಿ ನಿಲ್ಲಲಿವೆ. ಈ ಸೇವೆಯ ರೈಲುಗಳು 19 ಬೋಗಿಗಳನ್ನು ಹೊಂದಿರಲಿವೆ. 

ಪ್ರಯಾಣಿಕರಿಗೆ ಮಹತ್ವದ ಮಾಹಿತಿ

ದಸರಾ ಸಮಯದಲ್ಲಿ ಮೈಸೂರು ನಗರಕ್ಕೆ ಪ್ರವಾಸಿಗರು ಮತ್ತು ಭಕ್ತರ ಸಂಖ್ಯೆ ಹೆಚ್ಚಾಗುವ ಹಿನ್ನೆಲೆಯಲ್ಲಿ ಈ ವಿಶೇಷ ರೈಲುಗಳು ಸಾಕಷ್ಟು ನೆರವಾಗುವ ನಿರೀಕ್ಷೆಯಿದೆ. ವಿಶೇಷವಾಗಿ ಅಕ್ಟೋಬರ್ 20 ಮತ್ತು 21ರಂದು ಮೈಸೂರಿನಲ್ಲಿ ಪ್ರಮುಖ ದಸರಾ ಕಾರ್ಯಕ್ರಮಗಳು ನಡೆಯಲಿದ್ದು, ಜಂಬೂ ಸವಾರಿ ಅಕ್ಟೋಬರ್ 21ರಂದು ನಡೆಯಲಿದೆ. ಈ ಎಲ್ಲಾ ಸೇವೆಗಳು ಕಾಯ್ದಿರಿಸದ ವಿಶೇಷ ರೈಲುಗಳಾಗಿರುವುದರಿಂದ, ಪ್ರಯಾಣಿಕರು ನಿಗದಿತ ದಿನಾಂಕ ಮತ್ತು ಸಮಯವನ್ನ ಮುಂಚಿತವಾಗಿ ಪರಿಶೀಲಿಸಿ ಪ್ರಯಾಣ ಯೋಜಿಸುವುದು ಸೂಕ್ತ. ರೈಲುಗಳ ಸಮಯ ಅಥವಾ ಸೇವೆಯಲ್ಲಿ ಕೊನೆಯ ಕ್ಷಣದಲ್ಲಿ ಬದಲಾವಣೆಗಳಾಗುವ ಸಾಧ್ಯತೆ ಇರುವುದರಿಂದ ಪ್ರಯಾಣಕ್ಕೂ ಮುನ್ನ ನೈಋತ್ಯ ರೈಲ್ವೆಯ ಅಧಿಕೃತ ಮಾಹಿತಿ ಅಥವಾ ರೈಲ್ವೆ ಸೇವಾ ವೇದಿಕೆಗಳಲ್ಲಿ ವೇಳಾಪಟ್ಟಿಯನ್ನ ಪರಿಶೀಲಿಸುವುದು ಪ್ರಯಾಣಿಕರಿಗೆ ಅನುಕೂಲಕರವಾಗಲಿದೆ.