ಲವರ್‌ ವ್ಯಾಮೋಹ, 5 ತಿಂಗಳ ಹಿಂದಷ್ಟೇ ತಾಳಿ ಕಟ್ಟಿದ್ದ ಗಂಡನ ಕತ್ತು ಸೀಳಿದ ಪತ್ನಿ ಬಂಧನ..!

ವಿಜಯಪುರ: ಮದುವೆಯಾದ ಕೇವಲ ಐದೇ ತಿಂಗಳಿಗೆ ಹಳೆ ಪ್ರಿಯಕರನ ಜತೆ ಸೇರಿ ಗಂಡನೊಬ್ಬನ ಭೀಕರವಾಗಿ ಹತ್ಯೆ ಮಾಡಿರುವ ಬೆಚ್ಚಿಬೀಳಿಸುವ ಘಟನೆ ವಿಜಯಪುರ ಜಿಲ್ಲೆಯ ಮುದ್ದೇಬಿಹಾಳ ತಾಲೂಕಿನ ರೂಡಗಿ ಗ್ರಾಮದಲ್ಲಿ ನಡೆದಿದೆ. ಮೃತನನ್ನು 23 ವರ್ಷದ ಗಣೇಶ್ ಕೋಲಕಾರ್ ಎಂದು ಗುರುತಿಸಲಾಗಿದೆ.

ಕೂಲಿ ಕೆಲಸ ಮಾಡಿಕೊಂಡು ಜೀವನ ಸಾಗಿಸುತ್ತಿದ್ದ ಗಣೇಶ್ ಮತ್ತು ಅಕ್ಷತಾ ಅಲಿಯಾಸ್ ಪೂಜಾ (19) ದಂಪತಿಯ ಮದುವೆಯಾಗಿ ಕೇವಲ ಐದು ತಿಂಗಳು ಕಳೆದಿದ್ದವು. ಆದರೆ ಮದುವೆಯ ನಂತರವೂ ಪೂಜಾ ತನ್ನ ಹಳೆ ಪ್ರಿಯಕರನ ಜತೆಗಿನ ಸಂಪರ್ಕವನ್ನು ಕಡಿದುಕೊಂಡಿರಲಿಲ್ಲ. ಆಕೆ ತನ್ನ ಅಪ್ರಾಪ್ತ ವಯಸ್ಸಿನ ಪ್ರಿಯಕರನೊಂದಿಗೆ ನಿರಂತರವಾಗಿ ಫೋನ್‌ನಲ್ಲಿ ಮಾತನಾಡುವುದನ್ನು ಗಂಡ ಗಣೇಶ್ ಗಮನಿಸಿದ್ದನು. ಈ ವಿಷಯವಾಗಿ ದಂಪತಿಗಳ ನಡುವೆ ಪ್ರತಿದಿನವೂ ಜಗಳ ಹಾಗೂ ಗಲಾಟೆಗಳು ನಡೆಯುತ್ತಿದ್ದವು.

ಗಂಡನಿಂದ ನಿತ್ಯದ ಗಲಾಟೆ ಹಾಗೂ ಅಡ್ಡಿ ಹೆಚ್ಚಾಗಿದ್ದರಿಂದ ಹೇಗಾದರೂ ಮಾಡಿ ಗಂಡನ ಕಥೆ ಮುಗಿಸಿದರೆ ಪ್ರಿಯಕರನೊಂದಿಗೆ ಮುಕ್ತವಾಗಿರಬಹುದು ಎಂದು ಪತ್ನಿ ಪೂಜಾ ಕರಾಳ ಸಂಚು ರೂಪಿಸಿದ್ದಾಳೆ. ಈ ಕುರಿತು ಪ್ರಿಯಕರನೊಂದಿಗೂ ಚರ್ಚೆ ನಡೆಸಿದ್ದಾಳೆ.

ಯೋಜನೆಯಂತೆ ಕಳೆದ ಅಕ್ಟೋಬರ್ 21 ರಂದು ತಡರಾತ್ರಿ ಮನೆಯಲ್ಲಿ ಗಾಢ ನಿದ್ರೆಯಲ್ಲಿದ್ದ ಗಣೇಶ್ ಮೇಲೆ ಇವರದ್ದೇ ದುಷ್ಕೃತ್ಯ ನಡೆದಿದೆ. ಪ್ರಿಯಕರನನ್ನು ಕತ್ತಲಲ್ಲಿ ಮನೆಗೆ ಕರೆಸಿಕೊಂಡ ಪೂಜಾ, ಮಲಗಿದ್ದ ಗಣೇಶ್‌ನ ಕುತ್ತಿಗೆಯನ್ನು ಕುಡುಗೋಲು (ಇಳಿಗೆ) ಬಳಸಿ ಭೀಕರವಾಗಿ ಕೊಯ್ದು ಹತ್ಯೆ ಮಾಡಿದ್ದಾರೆ. ಕೊಲೆ ಮಾಡಿದ ಬಳಿಕ ರಾತ್ರೋರಾತ್ರಿ ಇಬ್ಬರೂ ಅಲ್ಲಿಂದ ಪರಾರಿಯಾಗಿದ್ದರು.

ಮನೆಯಲ್ಲಿ ನಡೆದ ಈ ಭೀಕರ ಹತ್ಯೆಯ ಸುಳಿವು ಪಡೆದ ಮುದ್ದೇಬಿಹಾಳ ಪೊಲೀಸರು ತನಿಖೆಯನ್ನು ತೀವ್ರಗೊಳಿಸಿದ್ದರು. ಕೇವಲ 24 ಗಂಟೆಗಳ ಒಳಗಾಗಿ ಮಹಾರಾಷ್ಟ್ರ ಗಡಿ ಭಾಗದಲ್ಲಿ ತಲೆಮರೆಸಿಕೊಂಡಿದ್ದ ಹೆಂಡತಿ ಪೂಜಾ ಹಾಗೂ ಆಕೆಯ ಅಪ್ರಾಪ್ತ ಪ್ರಿಯಕರನನ್ನು ಪೊಲೀಸರು ಹೆಡೆಮುರಿಕಟ್ಟಿ ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಬಂಧನದ ಬಳಿಕ ಪೊಲೀಸ್ ವಿಚಾರಣೆಯಲ್ಲಿ ಆರೋಪಿ ಪೂಜಾ ಹಲವು ಭಯಾನಕ ಸತ್ಯಗಳನ್ನು ಬಾಯ್ಬಿಟ್ಟಿದ್ದಾಳೆ. ಕೊಲೆ ಬಳಿಕ ಸ್ಥಳ ಮಹಜರು ಮಾಡಲು ಪೊಲೀಸರು ಆರೋಪಿಯನ್ನು ಗ್ರಾಮಕ್ಕೆ ಕರೆತಂದಾಗ ಆಕ್ರೋಶಗೊಂಡ ಸ್ಥಳೀಯ ಗ್ರಾಮಸ್ಥರು ಆಕೆಯ ವಿರುದ್ಧ ತೀವ್ರ ಆಕ್ರೋಶ ವ್ಯಕ್ತಪಡಿಸಿದರು. "ಆಕೆಯನ್ನು ನಮ್ಮ ಕೈಗೆ ಕೊಡಿ" ಎಂದು ಆಕ್ರೋಶದಿಂದ ಕೂಗಾಡಿದರು. ಒಟ್ಟಿನಲ್ಲಿ ಹೆಣ್ಣಿನ ಮೋಹ ಹಾಗೂ ದುರ್ಬುದ್ಧಿಯಿಂದಾಗಿ ಮುಗ್ಧ ಯುವಕನೊಬ್ಬ ಪ್ರಾಣ ಕಳೆದುಕೊಂಡಿರುವುದಕ್ಕೆ ಗ್ರಾಮಸ್ಥರು ಮಮ್ಮಲಗಿ ಮರುಗಿದ್ದಾರೆ. ತಪ್ಪಿತಸ್ಥರಿಗೆ ನ್ಯಾಯಾಲಯದಿಂದ ಕಠಿಣ ಶಿಕ್ಷೆಯಾಗಬೇಕು ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.