ಹಾಸನಾಂಬೆ ಜಾತ್ರಾ ಮಹೋತ್ಸವ ಶುರು : ನಾಳೆಯಿಂದ ದೇವಿಯ ದರ್ಶನಕ್ಕೆ ಭಕ್ತರಿಗೆ ಮುಕ್ತ ಅವಕಾಶ

ಹಾಸನ : ಮಧ್ಯಾಹ್ನ ನಿಗದಿತ ಮುಹೂರ್ತವಾದ 12 ಗಂಟೆ 28 ನಿಮಿಷಕ್ಕೆ ಸರಿಯಾಗಿ ವೈದಿಕ ಮಂತ್ರಘೋಷಗಳು ಹಾಗೂ ಧಾರ್ಮಿಕ ಆಚರಣೆಗಳ ನಡುವೆ ಹಾಸನಾಂಬೆ ಗರ್ಭಗುಡಿಯ ಬಾಗಿಲು ತೆರೆಯಲಾಯಿತು. ಸಂಪ್ರದಾಯದಂತೆ ಅರಸು ವಂಶಸ್ಥರಾದ ನರಸಿಂಹರಾಜ ಅರಸ್ ಅವರು ಬಾಳೆಕಂಬ ಕತ್ತರಿಸುತ್ತಿದ್ದಂತೆಯೇ ಗರ್ಭಗುಡಿಯ ಬಾಗಿಲು ತೆರೆದುಕೊಂಡಿತು. ಒಂದು ವರ್ಷದಿಂದ ಮುಚ್ಚಿದ್ದ ಬಾಗಿಲು ತೆರೆದು ದೇವಿಯ ದರ್ಶನ ಪಡೆದ ಆ ಪವಿತ್ರ ಕ್ಷಣದಲ್ಲಿ ಉಪಸ್ಥಿತರಿದ್ದ ಎಲ್ಲರ ಕಣ್ಣುಗಳಲ್ಲೂ ಭಕ್ತಿಯ ಭಾವ ತುಂಬಿತ್ತು.

ಈ ಪವಿತ್ರ ಸಂಭ್ರಮಕ್ಕೆ ಆದಿಚುಂಚನಗಿರಿ ಮಠದ ಪೂಜ್ಯ ಶ್ರೀ ನಿರ್ಮಲಾನಂದನಾಥ ಸ್ವಾಮೀಜಿಗಳು ದಿವ್ಯ ಸಾನ್ನಿಧ್ಯ ವಹಿಸಿದ್ದರು. ಜೊತೆಗೆ ಜಿಲ್ಲಾ ಉಸ್ತುವಾರಿ ಸಚಿವ ಕೆ.ಎಂ. ಶಿವಲಿಂಗೇಗೌಡ, ಮುಜರಾಯಿ ಸಚಿವರು, ಸಂಸದ ಶ್ರೇಯಸ್ ಪಟೇಲ್, ಶಾಸಕ ಸ್ವರೂಪ್ ಪ್ರಕಾಶ್ ಸೇರಿದಂತೆ ಅನೇಕ ಗಣ್ಯರು, ವಿವಿಧ ಮಠಾಧೀಶರು ಹಾಗೂ ಜಿಲ್ಲಾಡಳಿತದ ಹಿರಿಯ ಅಧಿಕಾರಿಗಳು ಈ ಐತಿಹಾಸಿಕ ಕ್ಷಣಕ್ಕೆ ಸಾಕ್ಷಿಯಾದರು. ಗರ್ಭಗುಡಿ ಬಾಗಿಲು ತೆರೆಯುವುದರೊಂದಿಗೆ ಹಾಸನಾಂಬೆಯ ವರ್ಷದ ಬಹುನಿರೀಕ್ಷಿತ ಜಾತ್ರಾ ಮಹೋತ್ಸವಕ್ಕೆ ಅಧಿಕೃತ ಚಾಲನೆ ಸಿಕ್ಕಂತಾಗಿದೆ.

ನಾಳೆಯಿಂದಲೇ ಸಾರ್ವಜನಿಕರಿಗೆ ಮುಕ್ತ ದರ್ಶನ
ಇಂದು ಕೇವಲ ಧಾರ್ಮಿಕ ವಿಧಿವಿಧಾನಗಳು ಹಾಗೂ ಗಣ್ಯರ ಭೇಟಿ ಮಾತ್ರವಿದ್ದು, ನಾಳೆ (ಅಕ್ಟೋಬರ್ 30) ಬೆಳಗ್ಗೆ 6 ಗಂಟೆಯಿಂದ ಸಾರ್ವಜನಿಕ ಭಕ್ತರಿಗೆ ತಾಯಿಯ ದರ್ಶನಕ್ಕೆ ಸಂಪೂರ್ಣ ಅವಕಾಶ ಕಲ್ಪಿಸಲಾಗಿದೆ. ನವೆಂಬರ್ 11ರವರೆಗೆ ಈ ಜಾತ್ರಾ ಮಹೋತ್ಸವ ವಿಜೃಂಭಣೆಯಿಂದ ನಡೆಯಲಿದೆ. ಈ ಬಾರಿ ರಾಜ್ಯದ ಮೂಲೆ ಮೂಲೆಗಳಿಂದ ಹಾಗೂ ಹೊರರಾಜ್ಯಗಳಿಂದಲೂ ಸುಮಾರು 25 ಲಕ್ಷಕ್ಕೂ ಅಧಿಕ ಭಕ್ತರು ಆಗಮಿಸುವ ನಿರೀಕ್ಷೆಯಿದೆ.

ಭಕ್ತರ ದಂಡೇ ಹರಿದುಬರುವ ಮುನ್ಸೂಚನೆ ಇರುವುದರಿಂದ, ಜಿಲ್ಲಾಡಳಿತವು ಯಾವುದೇ ಗೊಂದಲ ಅಥವಾ ತೊಂದರೆಯಾಗದಂತೆ ಸಕಲ ಸಿದ್ಧತೆಗಳನ್ನು ಕೈಗೊಂಡಿದೆ. ಸಾಲು ಸಾಲಾಗಿ ನಿಂತು ತಾಯಿಯ ದರ್ಶನ ಪಡೆಯಲು ಬ್ಯಾರಿಕೇಡ್‌ ವ್ಯವಸ್ಥೆ, ಕುಡಿಯುವ ನೀರು, ಮಹಿಳೆಯರು ಮತ್ತು ಹಿರಿಯ ನಾಗರಿಕರಿಗೆ ಪ್ರತ್ಯೇಕ ವ್ಯವಸ್ಥೆ ಹಾಗೂ ಬಿಗಿ ಪೊಲೀಸ್ ಭದ್ರತೆಯನ್ನು ಕಲ್ಪಿಸಲಾಗಿದೆ. ವರ್ಷವಿಡೀ ಮುಚ್ಚಿದ್ದು, ವಿಶೇಷ ಹೂವು-ದೀಪಗಳೊಂದಿಗೆ ಹಾಗೇ ಉಳಿಯುವ ತಾಯಿಯ ಗರ್ಭಗುಡಿಯಲ್ಲಿ ಇಂದಿಗೂ ದೀಪ ಹಾಗೂ ನೈವೇದ್ಯ ಹಾಗೇ ಇರುವುದು ಇಲ್ಲಿನ ವಿಶೇಷತೆಯಾಗಿದೆ.

ತಾಯಿ ಹಾಸನಾಂಬೆಯು ಕೇವಲ ಹಾಸನ ಜಿಲ್ಲೆಯಷ್ಟೇ ಅಲ್ಲದೆ, ಲಕ್ಷಾಂತರ ಕನ್ನಡಿಗರ ಅಚಲ ನಂಬಿಕೆಯ ಆರಾಧ್ಯ ದೈವ. ಕಷ್ಟಗಳನ್ನು ನಿವಾರಿಸುವ ತಾಯಿಯ ದರ್ಶನ ಪಡೆದು, ಕುಟುಂಬದ ಒಳಿತಿಗಾಗಿ ಪ್ರಾರ್ಥಿಸಲು ಭಕ್ತರು ತುದಿಗಾಲಿನಲ್ಲಿ ಕಾಯುತ್ತಿದ್ದಾರೆ. ನವೆಂಬರ್ 11ರವರೆಗೆ ನಡೆಯಲಿರುವ ಈ ಧಾರ್ಮಿಕ ಉತ್ಸವದಲ್ಲಿ ನಾಡಿನ ಸುಖ, ಶಾಂತಿ ಮತ್ತು ಸಮೃದ್ಧಿಗಾಗಿ ಎಲ್ಲರೂ ತಾಯಿಯ ಮೊರೆಹೋಗುತ್ತಿದ್ದಾರೆ.