ಗೊರಕೆ ಹೃದಯಾಘಾತಕ್ಕೆ ಕಾರಣವೇ..? ನಿರ್ಲಕ್ಷಿಸಬೇಡಿ ಪ್ರಾಣಕ್ಕೆ ಅಪಾಯ.. ಇಲ್ಲಿವೆ ಕಾರಣ
ಗೊರಕೆ ಹೊಡೆಯುವುದು ಸಾಮಾನ್ಯ ಸಂಗತಿಯಾಗಿ ಕಂಡುಬರುತ್ತದೆ. ಆದರೆ, ವೈದ್ಯಕೀಯ ವಲಯದ ಪ್ರಕಾರ, ಎಲ್ಲಾ ಗೊರಕೆಗಳೂ ಸಾಮಾನ್ಯವಲ್ಲ. ಕೆಲವು ಪ್ರಕರಣಗಳಲ್ಲಿ ಇದು ಸ್ಲೀಪ್ ಅಪ್ನಿಯಾ ಎಂಬ ಗಂಭೀರ ನಿದ್ರೆಗೆ ಸಂಬಂಧಿಸಿದ ಆರೋಗ್ಯ ಸಮಸ್ಯೆಯ ಮುನ್ಸೂಚನೆಯಾಗಿರಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ. ಈ ಕುರಿತ ಸಂಪೂರ್ಣ ಮಾಹಿತಿ ಇಲ್ಲಿದೆ..
ಬೆಂಗಳೂರು: ರಾತ್ರಿ ಮಲಗುವಾಗ ಅನೇಕ ಜನರಲ್ಲಿ ಗೊರಕೆ ಹೊಡೆಯುವುದು ಸಾಮಾನ್ಯ ಸಂಗತಿ. ಇದನ್ನು ಹಲವರು ಕೇವಲ ಆಯಾಸ ಅಥವಾ ಸಾಮಾನ್ಯ ಅಭ್ಯಾಸ ಅಂತ ಭಾವಿಸಿ ನಿರ್ಲಕ್ಷಿಸುತ್ತಾರೆ. ಆದರೆ ವೈದ್ಯಕೀಯದ ಪ್ರಕಾರ, ಎಲ್ಲಾ ಗೊರಕೆಗಳೂ ಸಾಮಾನ್ಯವಲ್ಲ, ಕೆಲವು ಪ್ರಕರಣಗಳಲ್ಲಿ ಇದು ಸ್ಲೀಪ್ ಅಪ್ನಿಯಾ ಎಂಬ ಗಂಭೀರ ನಿದ್ರೆಗೆ ಸಂಬಂಧಿಸಿದ ಆರೋಗ್ಯ ಸಮಸ್ಯೆಯ ಮುನ್ಸೂಚನೆಯಾಗಿರಬಹುದು ಎಂದು ತಜ್ಞರು ಎಚ್ಚರಿಸಿದ್ದಾರೆ.
ವಾಯುಮಾರ್ಗದಲ್ಲಿ ಅಡಚಣೆ: ಸಮಸ್ಯೆಯ ಮೂಲವೇನು?
ಸ್ಲೀಪ್ ಅಪ್ನಿಯಾದ ಪ್ರಮುಖ ಲಕ್ಷಣವೆಂದರೆ ನಿದ್ರೆಯ ಸಮಯದಲ್ಲಿ ವ್ಯಕ್ತಿಯ ವಾಯುಮಾರ್ಗದಲ್ಲಿ ತಾತ್ಕಾಲಿಕ ಅಡಚಣೆ ಉಂಟಾಗುವುದು. ಇದರಿಂದಾಗಿ ಉಸಿರಾಟವು ಕೆಲಕಾಲ ನಿಂತುಹೋಗಬಹುದು ಅಥವಾ ಅತ್ಯಂತ ನಿಧಾನವಾಗಬಹುದು. ನಿದ್ರೆಯ ಗುಣಮಟ್ಟವನ್ನು ಕುಗ್ಗಿಸುವ ಈ ಸ್ಥಿತಿಯು ದೇಹದ ದೈನಂದಿನ ಕಾರ್ಯಚಟುವಟಿಕೆಗಳ ಮೇಲೂ ನೇರ ಪರಿಣಾಮ ಬೀರುತ್ತದೆ.
ಗಮನಿಸಬೇಕಾದ ಪ್ರಮುಖ ಚಿಹ್ನೆಗಳು
ಆರೋಗ್ಯ ತಜ್ಞರ ಪ್ರಕಾರ, ಗೊರಕೆಯ ಜೊತೆಗೆ ಹಲವು ಗಂಭೀರ ಚಿಹ್ನೆಗಳು ಕಂಡುಬರಬಹುದು. ಸಾಮಾನ್ಯ ಗೊರಕೆಗಿಂತ ಭಿನ್ನವಾಗಿ ಅತ್ಯಂತ ಜೋರಾದ ಗೊರಕೆ ಕೇಳಿಬರುತ್ತದೆ ಮತ್ತು ಗೊರಕೆಯ ನಡುವೆ ಕೆಲವು ಸೆಕೆಂಡುಗಳ ಕಾಲ ಉಸಿರಾಟ ನಿಂತು, ನಂತರ ಮತ್ತೆ ಜೋರಾದ ಶಬ್ದದೊಂದಿಗೆ ಉಸಿರಾಟ ಆರಂಭವಾಗುತ್ತದೆ. ಮಲಗಿದ್ದಾಗ ಇದ್ದಕ್ಕಿದ್ದಂತೆ ಉಸಿರಾಟದ ತೊಂದರೆ, ವೇಗವಾದ ಹೃದಯ ಬಡಿತ ಮತ್ತು ಬಾಯಿ ಒಣಗುವಿಕೆಯ ಸಮಸ್ಯೆಯೊಂದಿಗೆ ಜನರು ಎಚ್ಚರಗೊಳ್ಳಬಹುದು.
ರಾತ್ರಿಯಿಡೀ ಸಾಕಷ್ಟು ಸಮಯ ಮಲಗಿದ್ದರೂ ಬೆಳಗ್ಗೆ ಎದ್ದಾಗ ತಲೆನೋವು, ಅತಿಯಾದ ಆಯಾಸ, ಕೆಲಸ ಮಾಡುವಾಗ ಅಥವಾ ಪ್ರಯಾಣಿಸುವಾಗ ಹಗಲಿನಲ್ಲಿ ನಿದ್ರೆ ತೂಗುವುದು ಹಾಗೂ ಏಕಾಗ್ರತೆ ಕಡಿಮೆಯಾಗುವುದು ಕಂಡುಬರಬಹುದು. ದೇಹದ ಅಧಿಕ ತೂಕ, ಕುತ್ತಿಗೆಯ ಸುತ್ತ ಹೆಚ್ಚಿನ ಕೊಬ್ಬಿನಂಶ, ಅನಿಯಂತ್ರಿತ ರಕ್ತದೊತ್ತಡ ಅಥವಾ ಮಧುಮೇಹ ಹೊಂದಿರುವವರಲ್ಲಿ ಈ ಸಮಸ್ಯೆ ಹೆಚ್ಚು ಕಾಣಿಸಿಕೊಳ್ಳಬಹುದು. ಜೊತೆಗೆ, ರಾತ್ರಿಯಲ್ಲಿ ಮೂತ್ರ ವಿಸರ್ಜನೆಗಾಗಿ ಪದೇಪದೇ ಎಚ್ಚರಗೊಳ್ಳುವುದೂ ಇದಕ್ಕೆ ಸಂಬಂಧಿಸಿರಬಹುದು.
ಚಿಕಿತ್ಸೆ ನೀಡದೆ ಬಿಟ್ಟರೆ ಗಂಭೀರ ಅಪಾಯ
ಸ್ಲೀಪ್ ಅಪ್ನಿಯಾವನ್ನು ದೀರ್ಘಕಾಲದವರೆಗೆ ನಿರ್ಲಕ್ಷಿಸಿ ಚಿಕಿತ್ಸೆ ಪಡೆಯದಿದ್ದರೆ, ಅದು ದೇಹದಲ್ಲಿ ಆಮ್ಲಜನಕದ ಮಟ್ಟದಲ್ಲಿ ನಿರಂತರ ಏರಿಳಿತಗಳಿಗೆ ಕಾರಣವಾಗುತ್ತದೆ ಎಂದು ವೈದ್ಯಕೀಯ ತಜ್ಞರು ತಿಳಿಸಿದ್ದಾರೆ. ಇದರಿಂದ ಮುಂದಿನ ದಿನಗಳಲ್ಲಿ ಅಧಿಕ ರಕ್ತದೊತ್ತಡ, ಮಧುಮೇಹ, ಹೃದಯ ಸಂಬಂಧಿ ಕಾಯಿಲೆಗಳು ಮತ್ತು ಪಾರ್ಶ್ವವಾಯು (ಸ್ಟ್ರೋಕ್) ಬರುವ ಅಪಾಯ ಹೆಚ್ಚಾಗುತ್ತದೆ.
ಮುನ್ನೆಚ್ಚರಿಕೆ ಕ್ರಮಗಳು ಮತ್ತು ವೈದ್ಯಕೀಯ ಸಲಹೆ
ಗೊರಕೆ ಹಾಗೂ ಅದಕ್ಕೆ ಸಂಬಂಧಿಸಿದ ಸಮಸ್ಯೆಗಳನ್ನು ತಗ್ಗಿಸಲು ಜೀವನಶೈಲಿಯಲ್ಲಿ ಕೆಲವು ಬದಲಾವಣೆಗಳನ್ನು ಮಾಡಿಕೊಳ್ಳುವುದು ಸಹಕಾರಿ. ಅಂಗಾತ ಮಲಗುವ ಬದಲು ಪಕ್ಕಕ್ಕೆ ತಿರುಗಿ ಮಲಗುವುದು, ತಲೆಯನ್ನು ಸ್ವಲ್ಪ ಎತ್ತರದ ಸ್ಥಾನದಲ್ಲಿ ಇಟ್ಟುಕೊಳ್ಳುವುದು ಮತ್ತು ಅಗತ್ಯವಿದ್ದಲ್ಲಿ ದೇಹದ ತೂಕವನ್ನು ಇಳಿಸಿಕೊಳ್ಳಲು ಪ್ರಯತ್ನಿಸುವುದು ಉತ್ತಮ. ವೈದ್ಯರ ಸಲಹೆಯಿಲ್ಲದೆ ರಾತ್ರಿಯಲ್ಲಿ ಮದ್ಯಪಾನ ಅಥವಾ ನಿದ್ರೆ ಮಾತ್ರೆಗಳನ್ನು ಸೇವಿಸಬಾರದು ಹಾಗೂ ಧೂಮಪಾನವನ್ನು ಸಂಪೂರ್ಣವಾಗಿ ತ್ಯಜಿಸಬೇಕು.
ಗಮನಿಸಿ.. ಗೊರಕೆಯೊಂದಿಗೆ ಮೇಲೆ ತಿಳಿಸಲಾದ ಯಾವುದೇ ಲಕ್ಷಣಗಳು ಕಂಡುಬಂದಲ್ಲಿ, ಸ್ವಯಂ ನಿರ್ಧಾರಗಳಿಗೆ ಮುಂದಾಗದೆ ನಿಖರವಾದ ರೋಗನಿರ್ಣಯ ಮತ್ತು ಸೂಕ್ತ ಚಿಕಿತ್ಸೆಗಾಗಿ ತಕ್ಷಣವೇ ವೈದ್ಯರನ್ನು ಸಂಪರ್ಕಿಸುವುದು ಅತ್ಯಂತ ಮುಖ್ಯವಾಗಿದೆ ಎಂದು ಆರೋಗ್ಯ ತಜ್ಞರು ಸಲಹೆ ನೀಡಿದ್ದಾರೆ.