ಹೃದಯಾಘಾತದ ಈ ಲಕ್ಷಣಗಳನ್ನ ಅಪ್ಪಿತಪ್ಪಿಯೂ ನಿರ್ಲಕ್ಷಿಸಬೇಡಿ! ಜೀವ ಉಳಿಸುವ ಮಹತ್ವದ ಮಾಹಿತಿ

Heart Attack Symptoms: ಹೃದಯಾಘಾತದ ಲಕ್ಷಣಗಳು ಕಾಣಿಸಿಕೊಂಡಾಗ ಕೆಲವೇ ನಿಮಿಷಗಳ ವಿಳಂಬವೂ ಅಪಾಯವನ್ನ ಹೆಚ್ಚಿಸಬಹುದು. ಎದೆನೋವು ಕಾಣಿಸಿಕೊಂಡರೆ ಗ್ಯಾಸ್ಟ್ರಿಕ್‌ ಸಮಸ್ಯೆ ಇರಬಹುದು ಎಂದು ನಿರ್ಲಕ್ಷಿಸುವುದು ಅಥವಾ ನೋವು ಕಡಿಮೆಯಾಗುತ್ತದೆಯೇ ಎಂದು ಕಾಯುವುದು ಅಪಾಯಕಾರಿ. ಹೃದಯಕ್ಕೆ ರಕ್ತದ ಹರಿವು ತಡೆಯಾದಾಗ ಸಂಭವಿಸುವ ಹೃದಯಾಘಾತಕ್ಕೆ ತಕ್ಷಣದ ವೈದ್ಯಕೀಯ ಚಿಕಿತ್ಸೆ ಅಗತ್ಯ. ಹೀಗಾಗಿ ಹೃದಯಾಘಾತದ ಸಾಮಾನ್ಯ ಲಕ್ಷಣಗಳು ಯಾವುವು? ವ್ಯಕ್ತಿಗೆ ಏಕಾಏಕಿ ಹೃದಯಾಘಾತದ ಅನುಮಾನ ಬಂದರೆ ಆಸ್ಪತ್ರೆಗೆ ತಲುಪುವ ಮೊದಲು ಏನು ಮಾಡಬೇಕು? ಎಂಬುದನ್ನ ಪ್ರತಿಯೊಬ್ಬರೂ ತಿಳಿದುಕೊಳ್ಳುವುದು ಮುಖ್ಯ.

ಹೃದಯಾಘಾತದ ಪ್ರಮುಖ ಲಕ್ಷಣಗಳೇನು?

ಎದೆಭಾಗದಲ್ಲಿ ನೋವು ಅಥವಾ ಒತ್ತಡ: ಎದೆಯ ಮಧ್ಯಭಾಗದಲ್ಲಿ ನೋವು, ಬಿಗಿತ, ಭಾರವಾದ ಅನುಭವ ಅಥವಾ ಏನೋ ಒತ್ತುತ್ತಿರುವಂತೆ ಅನಿಸಬಹುದು. ಕೆಲವರಿಗೆ ನೋವು ಕೆಲವು ನಿಮಿಷಗಳ ಕಾಲ ಮುಂದುವರಿಯಬಹುದು ಅಥವಾ ಕಡಿಮೆಯಾಗಿ ಮತ್ತೆ ಕಾಣಿಸಿಕೊಳ್ಳಬಹುದು.

ಕೈ, ಭುಜ ಮತ್ತು ದವಡೆಗೆ ನೋವು ಹರಡುವುದು: ಎದೆಯಲ್ಲಿ ಆರಂಭವಾದ ನೋವು ಒಂದು ಅಥವಾ ಎರಡೂ ಕೈಗಳು, ಭುಜ, ಬೆನ್ನು, ಕುತ್ತಿಗೆ ಅಥವಾ ದವಡೆಯವರೆಗೆ ಹರಡಬಹುದು. ಕೆಲವರಿಗೆ ಹೊಟ್ಟೆಯ ಮೇಲ್ಭಾಗದಲ್ಲಿಯೂ ಅಸ್ವಸ್ಥತೆ ಕಾಣಿಸಿಕೊಳ್ಳಬಹುದು.

ಉಸಿರಾಟದ ತೊಂದರೆ: ಯಾವುದೇ ಕಠಿಣ ಕೆಲಸ ಮಾಡದಿದ್ದರೂ ಉಸಿರಾಡಲು ಕಷ್ಟವಾಗುವುದು ಅಥವಾ ಉಸಿರಾಟ ಕಡಿಮೆಯಾದಂತೆ ಅನಿಸುವುದು ಹೃದಯಾಘಾತದ ಎಚ್ಚರಿಕೆಯ ಲಕ್ಷಣವಾಗಿರಬಹುದು.

ತಣ್ಣನೆಯ ಬೆವರು: ವಾತಾವರಣ ಬಿಸಿಯಾಗಿಲ್ಲದಿದ್ದರೂ ಏಕಾಏಕಿ ತಣ್ಣನೆಯ ಬೆವರು ಕಾಣಿಸಿಕೊಳ್ಳಬಹುದು. ಇದರೊಂದಿಗೆ ಎದೆನೋವು ಅಥವಾ ಉಸಿರಾಟದ ಸಮಸ್ಯೆ ಇದ್ದರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು.

ವಾಕರಿಕೆ, ತಲೆಸುತ್ತು ಮತ್ತು ಸುಸ್ತು: ವಾಕರಿಕೆ, ವಾಂತಿ, ತಲೆಸುತ್ತು, ಅತಿಯಾದ ದೌರ್ಬಲ್ಯ ಅಥವಾ ಅಜೀರ್ಣದಂತಹ ಅನುಭವವೂ ಹೃದಯಾಘಾತದ ಲಕ್ಷಣವಾಗಿರಬಹುದು.

ಎಲ್ಲರಲ್ಲೂ ಒಂದೇ ರೀತಿಯ ಲಕ್ಷಣಗಳು ಕಾಣಿಸಿಕೊಳ್ಳುವುದಿಲ್ಲ. ವಿಶೇಷವಾಗಿ ಮಹಿಳೆಯರು, ವಯಸ್ಸಾದವರು ಮತ್ತು ಮಧುಮೇಹ ಇರುವವರಲ್ಲಿ ಲಕ್ಷಣಗಳು ಸ್ಪಷ್ಟವಾಗಿರದೇ ಇರಬಹುದು. ಎದೆನೋವು ಇಲ್ಲದಿದ್ದರೂ ಉಸಿರಾಟದ ತೊಂದರೆ, ಅಸಾಮಾನ್ಯ ಸುಸ್ತು ಅಥವಾ ಬೆನ್ನು ಮತ್ತು ದವಡೆಯಲ್ಲಿ ನೋವು ಕಾಣಿಸಿಕೊಂಡರೆ ನಿರ್ಲಕ್ಷಿಸಬಾರದು.

ಹೃದಯಾಘಾತದ ಅನುಮಾನ ಬಂದರೆ ಮೊದಲು ಏನು ಮಾಡಬೇಕು?

ತಕ್ಷಣ ತುರ್ತು ವೈದ್ಯಕೀಯ ನೆರವು ಪಡೆಯಿರಿ: ಹೃದಯಾಘಾತದ ಅನುಮಾನ ಬಂದ ಕೂಡಲೇ ಸ್ಥಳೀಯ ತುರ್ತುಸೇವೆಗೆ ಕರೆ ಮಾಡಿ. 112 ಸಂಖ್ಯೆಯ ಮೂಲಕ ತುರ್ತು ನೆರವು ಪಡೆಯಬಹುದು. ಲಕ್ಷಣಗಳು ಕಡಿಮೆಯಾಗುತ್ತವೆಯೇ ಎಂದು ಕಾಯಬೇಡಿ.

ವ್ಯಕ್ತಿಗೆ ವಿಶ್ರಾಂತಿ ನೀಡಿ: ವ್ಯಕ್ತಿಯನ್ನ ಆರಾಮದಾಯಕ ಸ್ಥಿತಿಯಲ್ಲಿ ಕುಳ್ಳಿರಿಸಿ, ದೈಹಿಕ ಚಟುವಟಿಕೆ ನಿಲ್ಲಿಸುವಂತೆ ಮಾಡಿ. ಬಿಗಿಯಾದ ಬಟ್ಟೆಗಳನ್ನ ಸಡಿಲಗೊಳಿಸಿ ಮತ್ತು ಆತಂಕ ಹೆಚ್ಚಾಗದಂತೆ ಶಾಂತವಾಗಿ ಮಾತನಾಡಿ.

ಸ್ವತಃ ವಾಹನ ಚಲಾಯಿಸಲು ಬಿಡಬೇಡಿ: ಸಾಧ್ಯವಾದರೆ ಆಂಬುಲೆನ್ಸ್‌ ಮೂಲಕ ಆಸ್ಪತ್ರೆಗೆ ಕರೆದೊಯ್ಯಿರಿ. ವ್ಯಕ್ತಿಯೇ ವಾಹನ ಚಲಾಯಿಸುವುದು ಅಪಾಯಕಾರಿ. ತುರ್ತುಸೇವೆಯ ಸೂಚನೆಗಳನ್ನ ಅನುಸರಿಸಿ.

ವೈದ್ಯರ ಸಲಹೆಯಿಲ್ಲದೆ ಔಷಧಿ ನೀಡಬೇಡಿ: ಹೃದಯಾಘಾತದ ಅನುಮಾನ ಬಂದಾಗ ಆಸ್ಪಿರಿನ್‌ ಅಥವಾ ಇತರ ಔಷಧಿಗಳನ್ನ ಎಲ್ಲರಿಗೂ ನೀಡುವುದು ಸೂಕ್ತವಲ್ಲ. ತುರ್ತುಸೇವೆಯ ಸಿಬ್ಬಂದಿ ಅಥವಾ ವೈದ್ಯರು ಸೂಚಿಸಿದರೆ ಮಾತ್ರ ಅವರ ಮಾರ್ಗದರ್ಶನದಂತೆ ನಡೆದುಕೊಳ್ಳಿ. ವ್ಯಕ್ತಿ ಪ್ರಜ್ಞಾಹೀನರಾಗಿದ್ದರೆ ಬಾಯಿಯಿಂದ ನೀರು, ಆಹಾರ ಅಥವಾ ಮಾತ್ರೆಗಳನ್ನ ನೀಡಬೇಡಿ.

ಪ್ರಜ್ಞಾಹೀನರಾದರೆ ಸಿಪಿಆರ್‌ ನೆರವು ನೀಡಿ: ವ್ಯಕ್ತಿ ಪ್ರತಿಕ್ರಿಯಿಸದೆ, ಸಾಮಾನ್ಯವಾಗಿ ಉಸಿರಾಡದಿದ್ದರೆ ತುರ್ತುಸೇವೆಗೆ ಕರೆ ಮಾಡಿ. ತರಬೇತಿ ಪಡೆದವರು ತಕ್ಷಣ ಸಿಪಿಆರ್‌ ಆರಂಭಿಸಬೇಕು. ತರಬೇತಿ ಇಲ್ಲದವರಿಗೂ ಎದೆ ಒತ್ತುವಿಕೆ ಆಧಾರಿತ ಸಿಪಿಆರ್‌ ಬಗ್ಗೆ ತುರ್ತುಸೇವೆಯ ಸಿಬ್ಬಂದಿ ದೂರವಾಣಿ ಮೂಲಕ ಮಾರ್ಗದರ್ಶನ ನೀಡಬಹುದು. ಹತ್ತಿರದಲ್ಲಿ ಎಇಡಿ (AED) ಸಾಧನವಿದ್ದರೆ ಅದರ ಸೂಚನೆಗಳನ್ನ ಅನುಸರಿಸಿ.

ಲಕ್ಷಣಗಳು ಕಡಿಮೆಯಾದರೂ ನಿರ್ಲಕ್ಷಿಸಬೇಡಿ

ಎದೆನೋವು ಕಡಿಮೆಯಾಗಿದೆ ಅಥವಾ ಸ್ವಲ್ಪ ವಿಶ್ರಾಂತಿ ಪಡೆದ ಬಳಿಕ ಆರಾಮವಾಗಿದೆ ಎಂಬ ಕಾರಣಕ್ಕೆ ವೈದ್ಯಕೀಯ ಪರೀಕ್ಷೆಯನ್ನ ಮುಂದೂಡಬಾರದು. ಹೃದಯಾಘಾತದ ಲಕ್ಷಣಗಳು ಕೆಲವೊಮ್ಮೆ ಬಂದು ಹೋಗಬಹುದು. ಸಮಯಕ್ಕೆ ಸರಿಯಾಗಿ ಚಿಕಿತ್ಸೆ ದೊರೆತರೆ ಹೃದಯದ ಸ್ನಾಯುವಿಗೆ ಉಂಟಾಗುವ ಹಾನಿಯನ್ನ ಕಡಿಮೆ ಮಾಡುವ ಸಾಧ್ಯತೆ ಹೆಚ್ಚುತ್ತದೆ.

ಧೂಮಪಾನದಿಂದ ದೂರವಿರುವುದು, ನಿಯಮಿತ ವ್ಯಾಯಾಮ, ಸಮತೋಲಿತ ಆಹಾರ, ಆರೋಗ್ಯಕರ ತೂಕ ಮತ್ತು ರಕ್ತದೊತ್ತಡ, ರಕ್ತದಲ್ಲಿನ ಸಕ್ಕರೆ ಹಾಗೂ ಕೊಲೆಸ್ಟ್ರಾಲ್‌ ನಿಯಂತ್ರಣ ಹೃದಯದ ಆರೋಗ್ಯ ಕಾಪಾಡಲು ಸಹಾಯ ಮಾಡುತ್ತವೆ. ಹೃದಯಾಘಾತವು ತುರ್ತು ವೈದ್ಯಕೀಯ ಸ್ಥಿತಿ. ಲಕ್ಷಣಗಳನ್ನು ಗುರುತಿಸಿ ತಕ್ಷಣ ನೆರವು ಪಡೆಯುವುದು ಮತ್ತು ವೈದ್ಯಕೀಯ ಸಿಬ್ಬಂದಿಯ ಸೂಚನೆಗಳನ್ನ ಪಾಲಿಸುವುದೇ ಜೀವ ಉಳಿಸಲು ಅತ್ಯಂತ ಮುಖ್ಯ.

(ಸೂಚನೆ: ಈ ವರದಿ ಆರೋಗ್ಯ ಜಾಗೃತಿಗಾಗಿ ಮಾತ್ರ. ಇದು ವೈದ್ಯಕೀಯ ಪರೀಕ್ಷೆ ಅಥವಾ ವೈದ್ಯರ ಸಲಹೆಗೆ ಪರ್ಯಾಯವಲ್ಲ. Zee Kannada News ಇದನ್ನ ದೃಢಪಡಿಸುವುದಿಲ್ಲ.)