ಬಸ್‌ನಲ್ಲಿ ಮೊಬೈಲ್‌ನಲ್ಲಿ ಜೋರಾಗಿ ಹಾಡು, ರೀಲ್ಸ್ ನೋಡಿದ್ರೆ ಹುಷಾರ್! ವಾರ್ನಿಂಗ್‌ಗೂ ಬಗ್ಗದಿದ್ರೆ ಬಸ್‌ನಿಂದಲೇ ಔಟ್! ‌

BMTC Bus Loudspeaker Ban: ಬೆಂಗಳೂರಿನಲ್ಲಿ ಪ್ರತಿದಿನ ಲಕ್ಷಾಂತರ ಜನರ ಪ್ರಯಾಣಕ್ಕೆ ಆಸರೆಯಾಗಿರುವ ಬೆಂಗಳೂರು ಮಹಾನಗರ ಸಾರಿಗೆ ಸಂಸ್ಥೆ (BMTC) ಇದೀಗ ಪ್ರಯಾಣಿಕರ ಹಿತದೃಷ್ಟಿಯಿಂದ ಮಹತ್ವದ ಕ್ರಮಕ್ಕೆ ಮುಂದಾಗಿದೆ. ಬಸ್‌ಗಳಲ್ಲಿ ಮೊಬೈಲ್‌ ಲೌಡ್‌ಸ್ಪೀಕರ್‌ ಮೂಲಕ ಜೋರಾಗಿ ಹಾಡು ಕೇಳುವುದು, ರೀಲ್ಸ್‌ ನೋಡುವುದು ಹಾಗೂ ವಿಡಿಯೋಗಳನ್ನ ಪ್ಲೇ ಮಾಡುವ ಮೂಲಕ ಸಹ ಪ್ರಯಾಣಿಕರಿಗೆ ತೊಂದರೆ ನೀಡುವವರ ವಿರುದ್ಧ ಕ್ರಮ ಕೈಗೊಳ್ಳಲು ನಿರ್ಧರಿಸಿದೆ. ನಮ್ಮ ಮೆಟ್ರೋ ಮಾದರಿಯಲ್ಲಿ ಬಸ್‌ಗಳಲ್ಲಿಯೂ ಶಬ್ದ ಮಾಲಿನ್ಯ ನಿಯಂತ್ರಿಸಿ, ಪ್ರಯಾಣಿಕರಿಗೆ ನೆಮ್ಮದಿಯ ಪ್ರಯಾಣದ ಅನುಭವ ನೀಡುವುದು ಈ ಕ್ರಮದ ಪ್ರಮುಖ ಉದ್ದೇಶವಾಗಿದೆ.

ಬಿಎಂಟಿಸಿ ಬಸ್‌ಗಳಲ್ಲಿ ಮೊಬೈಲ್ ಬಳಕೆ ಸಾಮಾನ್ಯವಾಗಿದ್ದರೂ, ಕೆಲವರು ಹೆಡ್‌ಫೋನ್ ಬಳಸದೆ ಜೋರಾಗಿ ಹಾಡು ಕೇಳುವುದು ಅಥವಾ ಸಾಮಾಜಿಕ ಜಾಲತಾಣಗಳ ವಿಡಿಯೋಗಳನ್ನ ವೀಕ್ಷಿಸುವುದರಿಂದ ಇತರ ಪ್ರಯಾಣಿಕರಿಗೆ ಕಿರಿಕಿರಿ ಉಂಟಾಗುತ್ತಿದೆ ಎಂಬ ದೂರುಗಳು ಕೇಳಿಬಂದಿವೆ. ಈ ಹಿನ್ನೆಲೆಯಲ್ಲಿ ನಿಯಮ ಉಲ್ಲಂಘಿಸುವವರಿಗೆ ಮೊದಲು ಎಚ್ಚರಿಕೆ ನೀಡಿ, ಅದಕ್ಕೂ ಸ್ಪಂದಿಸದಿದ್ದರೆ ಬಸ್‌ನಿಂದ ಇಳಿಸುವಂತೆ ನಿರ್ವಾಹಕರಿಗೆ ಸೂಚಿಸಲಾಗಿದೆ ಎಂದು ತಿಳಿದುಬಂದಿದೆ.

ಬಸ್‌ನಲ್ಲಿ ಜೋರಾಗಿ ಹಾಡು ಕೇಳಿದರೆ ಕ್ರಮ!

ಬಿಎಂಟಿಸಿ ಬಸ್‌ಗಳಲ್ಲಿ ಪ್ರಯಾಣಿಸುವಾಗ ಮೊಬೈಲ್‌ ಬಳಸುವುದಕ್ಕೆ ಸಂಪೂರ್ಣ ನಿರ್ಬಂಧ ವಿಧಿಸಲಾಗಿಲ್ಲ. ಆದರೆ ಮೊಬೈಲ್‌ನ ಸ್ಪೀಕರ್ ಮೂಲಕ ದೊಡ್ಡ ಶಬ್ದದಲ್ಲಿ ಹಾಡು ಕೇಳುವುದು, ರೀಲ್ಸ್ ವೀಕ್ಷಿಸುವುದು ಅಥವಾ ವಿಡಿಯೋಗಳನ್ನ ಪ್ಲೇ ಮಾಡುವುದರಿಂದ ಇತರ ಪ್ರಯಾಣಿಕರಿಗೆ ತೊಂದರೆ ಉಂಟಾಗಬಾರದು ಎಂಬುದು ನಿಗಮದ ಉದ್ದೇಶವಾಗಿದೆ. ವಿಶೇಷವಾಗಿ ಕಚೇರಿಗೆ ತೆರಳುವವರು, ವಿದ್ಯಾರ್ಥಿಗಳು, ಹಿರಿಯ ನಾಗರಿಕರು ಹಾಗೂ ದೂರದ ಪ್ರಯಾಣ ಮಾಡುವವರು ಬಸ್‌ಗಳಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಸಂಚರಿಸುತ್ತಾರೆ. ಇಂತಹ ಸಂದರ್ಭದಲ್ಲಿ ಮೊಬೈಲ್‌ನಿಂದ ನಿರಂತರವಾಗಿ ದೊಡ್ಡ ಶಬ್ದ ಕೇಳಿಬಂದರೆ ಪ್ರಯಾಣಿಕರ ನೆಮ್ಮದಿಗೆ ಅಡ್ಡಿಯಾಗಬಹುದು. ಹೀಗಾಗಿ ಸಾರ್ವಜನಿಕ ಸಾರಿಗೆಯಲ್ಲಿ ಪ್ರತಿಯೊಬ್ಬರೂ ಸಹ ಪ್ರಯಾಣಿಕರ ಅನುಕೂಲವನ್ನ ಗಮನದಲ್ಲಿಟ್ಟುಕೊಂಡು ಮೊಬೈಲ್ ಬಳಸಬೇಕು ಎಂಬ ಸಂದೇಶವನ್ನ ಬಿಎಂಟಿಸಿ ನೀಡುತ್ತಿದೆ.

ಮೊದಲು ವಾರ್ನಿಂಗ್‌, ನಂತರ ಬಸ್‌ನಿಂದ ಕೆಳಗೆ!

ಲೌಡ್‌ಸ್ಪೀಕರ್ ಮೂಲಕ ಹಾಡು ಅಥವಾ ವಿಡಿಯೋ ಪ್ಲೇ ಮಾಡುವ ಪ್ರಯಾಣಿಕರನ್ನ ಕಂಡಕ್ಟರ್‌ಗಳು ಮೊದಲು ಎಚ್ಚರಿಸಲಿದ್ದಾರೆ. ಶಬ್ದವನ್ನ ಕಡಿಮೆ ಮಾಡುವಂತೆ ಅಥವಾ ಹೆಡ್‌ಫೋನ್ ಬಳಸುವಂತೆ ಸೂಚಿಸಲಿದ್ದಾರೆ. ಆದರೆ ಎಚ್ಚರಿಕೆ ನೀಡಿದ ನಂತರವೂ ಪ್ರಯಾಣಿಕರು ತಮ್ಮ ವರ್ತನೆಯನ್ನ ಮುಂದುವರಿಸಿದರೆ, ಅಂತಹವರನ್ನ ಬಸ್‌ನಿಂದ ಇಳಿಸುವಂತೆ ನಿರ್ವಾಹಕರಿಗೆ ಸೂಚಿಸಲಾಗಿದೆ ಎಂಬ ಮಾಹಿತಿ ಲಭ್ಯವಾಗಿದೆ. ಕೆಲವು ಸಂದರ್ಭಗಳಲ್ಲಿ ಕಂಡಕ್ಟರ್‌ಗಳು ಶಬ್ದ ಕಡಿಮೆ ಮಾಡುವಂತೆ ಹೇಳಿದಾಗ ಪ್ರಯಾಣಿಕರು ವಾಗ್ವಾದಕ್ಕೆ ಇಳಿಯುತ್ತಿರುವ ಆರೋಪಗಳೂ ಕೇಳಿಬಂದಿವೆ. ಇಂತಹ ಘಟನೆಗಳಿಂದ ಸಿಬ್ಬಂದಿಗೆ ಅನಗತ್ಯ ತೊಂದರೆಯಾಗುವುದರ ಜೊತೆಗೆ ಬಸ್‌ನಲ್ಲಿರುವ ಇತರ ಪ್ರಯಾಣಿಕರಿಗೂ ಅಸೌಕರ್ಯ ಉಂಟಾಗುತ್ತಿದೆ.

ನಮ್ಮ ಮೆಟ್ರೋ ಮಾದರಿಯಲ್ಲಿ ಬಿಎಂಟಿಸಿ ಕ್ರಮ

ಬೆಂಗಳೂರಿನ ನಮ್ಮ ಮೆಟ್ರೋದಲ್ಲಿ ಮೊಬೈಲ್‌ ಲೌಡ್‌ಸ್ಪೀಕರ್‌ ಮೂಲಕ ಜೋರಾಗಿ ಹಾಡು ಕೇಳುವುದು ಅಥವಾ ವಿಡಿಯೋಗಳನ್ನ ವೀಕ್ಷಿಸಿ ಸಹ ಪ್ರಯಾಣಿಕರಿಗೆ ತೊಂದರೆ ಉಂಟುಮಾಡುವುದಕ್ಕೆ ನಿರ್ಬಂಧವಿದೆ. ಪ್ರಯಾಣಿಕರು ಮೊಬೈಲ್‌ ಬಳಸಬಹುದಾದರೂ ಇತರರಿಗೆ ಕಿರಿಕಿರಿ ಉಂಟಾಗದಂತೆ ನೋಡಿಕೊಳ್ಳಬೇಕು. ಇದೇ ರೀತಿಯ ಶಿಸ್ತನ್ನ ಬಿಎಂಟಿಸಿ ಬಸ್‌ಗಳಲ್ಲಿಯೂ ಜಾರಿಗೆ ತರಲು ನಿಗಮ ಮುಂದಾಗಿದೆ. ಮೆಟ್ರೋದಲ್ಲಿ ಪ್ರಯಾಣಿಸುವಾಗ ಸಾರ್ವಜನಿಕ ಶಿಸ್ತಿಗೆ ನೀಡುವ ಮಹತ್ವವನ್ನ ಬಸ್‌ ಪ್ರಯಾಣದಲ್ಲಿಯೂ ಅನುಸರಿಸಬೇಕು ಎಂಬುದು ಈ ಕ್ರಮದ ಆಶಯವಾಗಿದೆ. ಆದರೆ ಬಿಎಂಟಿಸಿ ಬಸ್‌ಗಳಲ್ಲಿ ಮೆಟ್ರೋ ಮಾದರಿಯ ದಂಡದ ವ್ಯವಸ್ಥೆಯೂ ಜಾರಿಗೆ ಬಂದಿದೆ ಎಂಬ ಅಧಿಕೃತ ಮಾಹಿತಿ ಲಭ್ಯವಿಲ್ಲ. ಸದ್ಯ ನೀಡಿರುವ ಮಾಹಿತಿಯಲ್ಲಿ ಎಚ್ಚರಿಕೆ ಹಾಗೂ ಸೂಚನೆ ಪಾಲಿಸದವರನ್ನ ಬಸ್‌ನಿಂದ ಇಳಿಸುವ ಕ್ರಮದ ಬಗ್ಗೆ ಉಲ್ಲೇಖಿಸಲಾಗಿದೆ.

ಹೆಡ್‌ಫೋನ್ ಬಳಸಿ ಹಾಡು ಕೇಳಬಹುದೇ?

ಬಸ್‌ನಲ್ಲಿ ಪ್ರಯಾಣಿಸುವಾಗ ಹೆಡ್‌ಫೋನ್ ಅಥವಾ ಇಯರ್‌ಫೋನ್ ಬಳಸಿಕೊಂಡು ಹಾಡು ಕೇಳುವುದಕ್ಕೆ ಈ ಸೂಚನೆಯಡಿ ನಿರ್ಬಂಧ ಇರುವುದಾಗಿ ತಿಳಿಸಲಾಗಿಲ್ಲ. ಆದರೆ ಹೆಡ್‌ಫೋನ್‌ನಿಂದ ಹೊರಬರುವ ಶಬ್ದವೂ ಇತರರಿಗೆ ತೊಂದರೆ ಉಂಟುಮಾಡದಂತೆ ಎಚ್ಚರಿಕೆ ವಹಿಸುವುದು ಉತ್ತಮ. ಅದೇ ರೀತಿ ಸಾಮಾಜಿಕ ಜಾಲತಾಣಗಳಲ್ಲಿ ರೀಲ್ಸ್‌ ನೋಡುವುದು ಅಥವಾ ಯೂಟ್ಯೂಬ್ ವಿಡಿಯೋ ವೀಕ್ಷಿಸುವಾಗ ಮೊಬೈಲ್‌ನ ಧ್ವನಿಯನ್ನ ಮ್ಯೂಟ್ ಮಾಡುವುದು ಅಥವಾ ಇಯರ್‌ಫೋನ್ ಬಳಸುವುದು ಸೂಕ್ತ.

ಪ್ರಯಾಣಿಕರ ನೆಮ್ಮದಿಗೆ ಆದ್ಯತೆ

ಬೆಂಗಳೂರಿನ ಟ್ರಾಫಿಕ್ ಸಮಸ್ಯೆಯಿಂದ ಅನೇಕ ಪ್ರಯಾಣಿಕರು ಪ್ರತಿದಿನ ಹೆಚ್ಚಿನ ಸಮಯವನ್ನ ಬಸ್‌ಗಳಲ್ಲಿ ಕಳೆಯುತ್ತಾರೆ. ಈ ಸಂದರ್ಭದಲ್ಲಿ ಮೊಬೈಲ್‌ನ ದೊಡ್ಡ ಶಬ್ದದಿಂದ ಉಂಟಾಗುವ ಕಿರಿಕಿರಿಯನ್ನ ತಡೆಯುವುದು ಸಾರ್ವಜನಿಕ ಸಾರಿಗೆಯ ಗುಣಮಟ್ಟ ಹೆಚ್ಚಿಸುವಲ್ಲಿ ಪ್ರಮುಖ ಪಾತ್ರ ವಹಿಸಬಹುದು. ಬಿಎಂಟಿಸಿಯ ಈ ಕ್ರಮವು ಪ್ರಯಾಣಿಕರ ನಡುವೆ ಪರಸ್ಪರ ಗೌರವ ಮತ್ತು ಸಾರ್ವಜನಿಕ ಶಿಸ್ತನ್ನು ಉತ್ತೇಜಿಸುವ ಉದ್ದೇಶ ಹೊಂದಿದೆ. ಬಸ್‌ನಲ್ಲಿ ಮೊಬೈಲ್ ಬಳಸುವ ಸ್ವಾತಂತ್ರ್ಯ ಇದ್ದರೂ ಅದು ಇತರರ ನೆಮ್ಮದಿಗೆ ಅಡ್ಡಿಯಾಗಬಾರದು ಎಂಬುದು ಇದರ ಮುಖ್ಯ ಸಂದೇಶವಾಗಿದೆ.

ಒಟ್ನಲ್ಲಿ ಬಿಎಂಟಿಸಿ ಬಸ್‌ಗಳಲ್ಲಿ ಲೌಡ್‌ಸ್ಪೀಕರ್ ಮೂಲಕ ಜೋರಾಗಿ ಹಾಡು ಕೇಳುವವರು ಹಾಗೂ ರೀಲ್ಸ್ ನೋಡುವವರು ಎಚ್ಚರಿಕೆ ವಹಿಸಬೇಕಾಗಿದೆ. ಸಹ ಪ್ರಯಾಣಿಕರಿಗೆ ತೊಂದರೆ ಉಂಟುಮಾಡಿ, ನಿರ್ವಾಹಕರ ಸೂಚನೆಯನ್ನೂ ಪಾಲಿಸದಿದ್ದರೆ ಬಸ್‌ನಿಂದ ಇಳಿಸುವ ಕ್ರಮ ಎದುರಾಗಬಹುದು.