ಲವರ್‌ ಜೊತೆ ಬೆಡ್‌ ಮೇಲೆ ಮಗಳು.. ನೆತ್ತಿಗೇರಿತು ಕಣ್ಣಾರೆ ಕಂಡ ಅಪ್ಪನ ಸಿಟ್ಟು..! ಮುಂದಾಗಿದ್ದು ಮಾತ್ರ ದುರಂತ

ಬೆಂಗಳೂರು : ಹರೆಯದ ವಯಸ್ಸು ಹುಚ್ಚುಕೋಡಿ ಮನಸ್ಸು ಅಂತಾರೆ. ಅಂತೆಯೇ ಮೈಸೂರಲ್ಲಿ ಇದ್ಕೊಂಡು ಓದುತ್ತಿದ್ದ ಯುವತಿ ತನ್ನ ಅಪ್ಪನ ಕೈಕೆಳಗೆ ಕೆಲಸ ಮಾಡುತ್ತಿದ್ದ ಯುವಕನ ಸ್ನೇಹ, ಸಲುಗೆ ಬೆಳೆಸಿಬಿಟ್ಟಿದ್ಲು‌. ‌ಇದು ಅಪ್ಪ ಆನಂದನಿಗೆ ಗೊತ್ತಿಲ್ಲ ಅಂತಾ ಅಂದುಕೊಂಡು ಮೈಸೂರಿನಿಂದ ರಜೆಗೆ ಬಂದವಳು ಅಪ್ಪ-ಅಮ್ಮ ಮನೆಯಲ್ಲಿ ಇಲ್ಲಾ ಅಂತಾ ಪ್ರಿಯಕರನನ್ನು ಮನೆಗೆ ಕರೆಸಿಕೊಂಡಿದ್ಲು. ಆಗಲೇ ನೋಡಿ ನಡೆದಿದ್ದು ಘನಘೋರ.

ಹೌದು.. ಸ್ವೀಟ್ ಕಾರ್ನ್ ತಯಾರಿಸುವ ಯಂತ್ರಗಳ ತಯಾರಿ ಮಾಡುವ ಫ್ಯಾಕ್ಟರಿಯನ್ನು ತಮಿಳುನಾಡು ಮೂಲದ ಆನಂದ್ ಇಟ್ಟುಕೊಂಡಿದ್ದ. ಕೇರಳ ಮೂಲದ ಕಿರಣ್ ಆನಂದ್ ಬಳಿ ಕೆಲಸ ಮಾಡುತ್ತಿದ್ದ. ಈ ಆನಂದ್ ಗೆ ಮೂವರು ಮಕ್ಕಳು. ಎಲ್ಲರನ್ನು ಚೆನ್ನಾಗಿ ಓದಿಸಬೇಕು ಎಂಬ ಉದ್ದೇಶದಿಂದ ಮೈಸೂರಲ್ಲಿ ಹಾಸ್ಟೆಲ್ ನಲ್ಲಿಟ್ಟು ಓದಿಸುತ್ತಿದ್ದ. ಆದಾಗಲೇ ಕಿರಣ್ ಹಾಗೂ ಆನಂದನ ಹಿರಿ ಮಗಳ ನಡುವೆ ಸ್ನೇಹ, ಸಂಬಂಧ ಬೆಳೆದುಬಿಟ್ಟಿತ್ತು. ತನ್ನ ಮಗಳ ಜೊತೆ ಸ್ನೇಹ, ಸಲುಗೆಯಿಂದ ಇರುವ ವಿಚಾರ ತಿಳಿದಿದ್ದ ಆನಂದ್ ಇಬ್ಬರನ್ನು ರೆಡ್ ಹ್ಯಾಂಡಾಗಿ ಹಿಡಿಯಲು ಪ್ಲಾನ್ ಮಾಡಿದ್ದ.

ಹೀಗೆ ಮಗಳು ರಜೆಗೆ ಅಂತಾ ಮನೆಗೆ ಬಂದಿದ್ಲು. ಇದೇ ಸರಿಯಾದ ಸಮಯ ಎಂದು ಅರಿತ ಆನಂದ್ ನಿನ್ನೆ ಪತ್ನಿಯನ್ನು ಕರೆದುಕೊಂಡು ತಮಿಳುನಾಡಿಗೆ ಹೋಗುವುದಾಗಿ ಹೇಳಿ ಮನೆಯಿಂದ ಹೊರಟಿದ್ದ. ಅಪ್ಪ, ಅಮ್ಮ ಮನೆಯಲ್ಲಿ ಇಲ್ಲಾ ಅಂತಾ ಪ್ರಿಯಕರನ ಜೊತೆ ಏಕಾಂತದಲ್ಲಿ ಇರಲು ಯುವತಿ ಕಿರಣ್ ನನ್ನು ಮನೆಗೆ ಕರೆಸಿಕೊಂಡಿದ್ದಳು. ಆದರೆ ತಮಿಳುನಾಡಿಗೆ ಹೋಗ್ತಿವಿ ಎಂದಿದ್ದ ಆನಂದ್ ಕೆಲವೇ ಗಂಟೆಗಳಲ್ಲಿ ವಾಪಸ್ ಬಂದಿದ್ದಾನೆ. ಈ ವೇಳೆ ಮನೆಯಲ್ಲಿ ಮಗಳು ಹಾಗೂ ಕಿರಣ್ ಒಂದೇ ಕೊಠಡಿಯಲ್ಲಿ ಏಕಾಂತದಲ್ಲಿರವುದನ್ನು ಕಂಡು ನಿಗಿನಿಗಿ ಕೆಂಡವಾಗಿದ್ದ‌. ತಕ್ಷಣ ಮಗಳಿಗೆ ಬೈದು ಚಿಕ್ಕಬಳ್ಳಾಪುರದಲ್ಲಿರುವ ಸಂಬಂಧಿಕರ ಮನೆಗೆ ಕಳುಹಿಸಿದ್ದಾನೆ.

ಬಳಿಕ ನನ್ನ ಮಗಳೇ‌ ನಿನಗೆ ಬೇಕಾ ಎಂದು ಕಿರಣ್ ಮೇಲೆ ಬ್ಯಾಟ್ ಹಾಗೂ ಪೈಪ್‌ನಿಂದ ಮನಬಂದಂತೆ ಹಲ್ಲೆ ನಡೆಸಿದ್ದಾನೆ. ನಿನ್ನೆ ಹೊಟ್ಟೆ, ಎದೆ ಸೇರಿದಂತೆ ದೇಹದ ಹಲವು ಭಾಗಗಳಿಗೆ ಹಲ್ಲೆ ನಡೆಸಿದ ಪರಿಣಾಮ ಕಿರಣ್ ಪ್ರಜ್ಞೆ ತಪ್ಪಿ ಕುಸಿದುಬಿದ್ದಿದ್ದಾನೆ. ಇನ್ನು ಗಂಭೀರವಾಗಿ ಗಾಯಗೊಂಡಿದ್ದ ಕಿರಣ್‌ನನ್ನು ಆರೋಪಿ ಆನಂದ್ ಆಟೋದಲ್ಲಿ ಆಸ್ಪತ್ರೆಗೆ ದಾಖಲಿಸಿದ್ದಾನೆ. ಆದರೆ ಆಂತರಿಕ ರಕ್ತಸ್ರಾವವಾಗಿ ಚಿಕಿತ್ಸೆ ಫಲಕಾರಿಯಾಗದೆ ಕಿರಣ್ ಮೃತಪಟ್ಟಿದ್ದಾನೆ.

ಆಸ್ಪತ್ರೆಯಲ್ಲಿ ವ್ಯಕ್ತಿಯೊಬ್ಬ ಮೃತಪಟ್ಟಿರುವ ಬಗ್ಗೆ ಮಾಹಿತಿ ಪಡೆದ ಪೊಲೀಸರು ಪರಿಶೀಲನೆ ನಡೆಸಿದಾಗ ಪ್ರಕರಣ ಬೆಳಕಿಗೆ ಬಂದಿದೆ. ಸದ್ಯ ಯಲಹಂಕ ಪೊಲೀಸರು ಆರೋಪಿ ಆನಂದ್‌ನನ್ನು ವಶಕ್ಕೆ ಪಡೆದು ಮುಂದಿನ ತನಿಖೆ ಕೈಗೊಂಡಿದ್ದಾರೆ. ಅದೆನೇ ಹೇಳಿ... ಮಗಳು ಚೆನ್ನಾಗಿ ಓದಿ, ದೊಡ್ಡ ಹೆಸರು ಮಾಡ್ತಾಳೆ ಎಂಬ ಕನಸು ಕಟ್ಟಿಕೊಂಡಿದ್ದ ತಂದೆ ಮಗಳು ಮಾಡಿದ ತಪ್ಪಿನಿಂದ ಕೋಪದ ಕೈಗೆ ಬುದ್ದಿ ಕೊಟ್ಟು ಜೈಲು ಸೇರಿದ್ದು ದುರಂತವೇ ಸರಿ.