ಮೈಸೂರು ದಸರಾ ಏರ್ ಶೋ: ನಾಳೆ ಆಕಾಶದಲ್ಲಿ ಸೂರ್ಯಕಿರಣ್ ತಂಡದ ಅದ್ಭುತ ವೈಮಾನಿಕ ಕಸರತ್ತು

ಬೆಂಗಳೂರು : ಅಕ್ಟೋಬರ್ 19 ರಂದು ಮೈಸೂರಿನ ಆಕಾಶದಲ್ಲಿ ಅದ್ಭುತ ಪ್ರದರ್ಶನ ನೀಡಲು ಸಜ್ಜಾದ ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡ ಪೂರ್ಣ ಸಜ್ಜಾಗಿದೆ.. ಇಂದು ಮೋಡಕವಿದ ವಾತಾವರಣ ಹಿನ್ನಲೆಯಲ್ಲಿ ಪೂರ್ಣ ಪ್ರಮಾದ ಏರ್ ಷೋ ನೀಡಲು ಸಾಧ್ಯವಾಗಿಲ್ಲ ಎಂದು ಯಲಹಂಕ ವಾಯುನೆಲೆಯಲ್ಲಿ ಸೂರ್ಯಕಿರಣ್ ತಂಡ ಮಾಹಿತಿ ನೀಡಿದೆ. ಮೈಸೂರು ನಗರ ಬಹಳ ಸುಂದರವಾಗಿದೆ ನಾಳೆ ಏರೋ ಷೋ ಮೂಲಕ ಜನರನ್ನು ರಂಜಿಸಲಿದ್ದೇವೆ ಅಂತಾ ಸೂರ್ಯ ಕಿರಣ್ ತಂಡ ತಿಳಿಸಿದೆ.

ಭಾರತೀಯ ವಾಯುಪಡೆಯ 'ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡ' ಅಕ್ಟೋಬರ್ 18 ರಂದು ಮೈಸೂರಿನಲ್ಲಿ ತನ್ನ ವೈಮಾನಿಕ ಪ್ರದರ್ಶನವನ್ನು ನಡೆಸಿತು. ಆದರೆ, ಅಂದಿನ ಹವಾಮಾನ ಪರಿಸ್ಥಿತಿಯಿಂದಾಗಿ, ತಂಡಕ್ಕೆ ತಮ್ಮ ಸಂಪೂರ್ಣ ಪ್ರದರ್ಶನವನ್ನು ನಡೆಸಲು ಸಾಧ್ಯವಾಗಲಿಲ್ಲ. ಹವಾಮಾನವು ಅನುಕೂಲಕರವಾಗಿದ್ದರೆ, ಅಕ್ಟೋಬರ್ 19ರಂದು ತಮ್ಮ ಪೂರ್ಣ ಪ್ರಮಾಣದ ಏರೋಬ್ಯಾಟಿಕ್ ಪ್ರದರ್ಶನವನ್ನು ನೀಡಲು ತಂಡವು ಎದುರು ನೋಡುತ್ತಿದೆ ಎಂದು ಸೂರ್ಯಕಿರಣ್ ತಂಡ ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.

ಹಿಂದೂಸ್ತಾನ್ ಏರೋನಾಟಿಕ್ಸ್ ಲಿಮಿಟೆಡ್ ತಯಾರಿಕೆಯ ಒಂಬತ್ತು 'ಹಾಕ್ ಎಂಕೆ 132' ವಿಮಾನಗಳನ್ನು ಬಳಸುವ 'ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡ', ತನ್ನ ನಿಖರತೆ, ಶಿಸ್ತು ಮತ್ತು ಸಾಮೂಹಿಕ ಕಾರ್ಯವೈಖರಿಗೆ ಹೆಸರುವಾಸಿಯಾಗಿದೆ. ಲೂಪ್‌ಗಳು ,ಬ್ಯಾರೆಲ್ ರೋಲ್‌ಗಳು ,ತಲೆಕೆಳಗಾಗಿ ಹಾರಾಟ ನಡೆಸುವುದು ಮತ್ತು ಪ್ರಸಿದ್ಧ 'DNA ಮ್ಯಾನುವರ್' ಸೇರಿದಂತೆ ಇವರ ವಿಶಿಷ್ಟ ಕಸರತ್ತುಗಳು, ಅತ್ಯುತ್ತಮ ಸಮನ್ವಯ, ನಿಯಂತ್ರಣ ಮತ್ತು ಹೊಂದಾಣಿಕೆಯನ್ನು ಪ್ರದರ್ಶಿಸುತ್ತವೆ.

ಒಂಬತ್ತು ವಿಮಾನಗಳು ಒಂದೇ ಘಟಕದಂತೆ ಅತ್ಯಂತ ಹತ್ತಿರದ ರಚನೆಯಲ್ಲಿ  ಡೈಮೆಂಡ್ ರೀತಿಯಲ್ಲಿ ಹಾರಾಟ ನಡೆಸುವಾಗ, ಆಕಾಶದಲ್ಲಿ ಕೇಸರಿ, ಬಿಳಿ ಮತ್ತು ಹಸಿರು ಬಣ್ಣದ ಹೊಗೆಯ ಪಥಗಳು ಮೂಡಿಬರುತ್ತವೆ ...ಈ ಮೂಲಕ ಮೈಸೂರಿನ ಆಕಾಶದಲ್ಲಿ ಅದ್ಭುತ ದೃಶ್ಯವೈಭವವನ್ನು ಸೃಷ್ಟಿಸುತ್ತವೆ.

1996 ರಲ್ಲಿ ಸ್ಥಾಪನೆಯಾದ 'ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡ', ಭಾರತ ಮತ್ತು ವಿದೇಶಗಳಲ್ಲಿ ನಡೆಯುವ ಏರ್ ಶೋಗಳು ಹಾಗೂ ಸಾರ್ವಜನಿಕ ಕಾರ್ಯಕ್ರಮಗಳಲ್ಲಿ ಭಾರತೀಯ ವಾಯುಪಡೆಯನ್ನು ಮತ್ತು ರಾಷ್ಟ್ರವನ್ನು ಪ್ರತಿನಿಧಿಸುವ ಹೆಮ್ಮೆಯ ಪರಂಪರೆಯನ್ನು ಹೊಂದಿದೆ. ಇಲ್ಲಿಯವರೆಗೆ 850 ಕ್ಕೂ ಹೆಚ್ಚು ಪ್ರದರ್ಶನಗಳನ್ನು ನೀಡಿರುವ ಈ ತಂಡವು, ವಾಯುಪಡೆಯ ಶ್ರೇಷ್ಠ ಹಾರಾಟ ಕೌಶಲ್ಯ, ಶಿಸ್ತು ಮತ್ತು ವೃತ್ತಿಪರತೆಯ ಸಂಕೇತವಾಗಿದೆ. ಇದು ವಿಮಾನಯಾನ ಆಸಕ್ತರಿಗೆ ಮತ್ತು ಯುವ ಭಾರತೀಯರಿಗೆ ಸ್ಫೂರ್ತಿಯ ಸೆಲೆಯಾಗಿದೆ. ಇವರ ಪ್ರತಿಯೊಂದು ಪ್ರದರ್ಶನವೂ ಕಠಿಣ ತರಬೇತಿ, ನಿಖರವಾದ ಯೋಜನೆ ಮತ್ತು ಪೈಲಟ್‌ಗಳು ಹಾಗೂ ಸಹಾಯಕ ಸಿಬ್ಬಂದಿಯ ನಡುವಿನ ಸಂಪೂರ್ಣ ನಂಬಿಕೆಯ ಫಲಿತಾಂಶವಾಗಿದೆ.

'ಸೂರ್ಯಕಿರಣ್ ಏರೋಬ್ಯಾಟಿಕ್ ತಂಡ'ವು ಗ್ರೂಪ್ ಕ್ಯಾಪ್ಟನ್ ಅಜಯ್ ದಶರಥಿ ಅವರ ನೇತೃತ್ವದಲ್ಲಿ ಕಾರ್ಯನಿರ್ವಹಿಸುತ್ತಿದೆ. ಫ್ಲೈಟ್ ಕಮಾಂಡರ್ ವಿಂಗ್ ಕಮಾಂಡರ್ ತೇಜೇಶ್ವರ್ ಸಿಂಗ್ ಮತ್ತು ಹಿರಿಯ ಎಂಜಿನಿಯರಿಂಗ್ ಅಧಿಕಾರಿ ವಿಂಗ್ ಕಮಾಂಡರ್ ಅಭಿಮನ್ಯು ತ್ಯಾಗಿ, ಸ್ಕ್ವಾಡ್ರನ್ ಕಾರ್ಯಾಚರಣೆಗಳಲ್ಲಿ ಪ್ರಮುಖ ಪಾತ್ರ ವಹಿಸುತ್ತಾರೆ.

ಫ್ಲೈಟ್ ಕಮಾಂಡರ್ ಹಾರಾಟದ ನಾಯಕತ್ವ ಮತ್ತು ಕಾರ್ಯಗತಗೊಳಿಸುವಿಕೆಯನ್ನು ಬೆಂಬಲಿಸಿದರೆ, ಹಿರಿಯ ಎಂಜಿನಿಯರಿಂಗ್ ಅಧಿಕಾರಿ ವಿಮಾನ ನಿರ್ವಹಣೆಯನ್ನು ನೋಡಿಕೊಳ್ಳುತ್ತಾರೆ ಮತ್ತು ವಿಮಾನದ ಸೇವಾಶೀಲತೆ ಮತ್ತು ತಾಂತ್ರಿಕ ಸಿದ್ಧತೆಯನ್ನು ಕಾಪಾಡಿಕೊಳ್ಳುವ ಜವಾಬ್ದಾರಿಯುತ ತಾಂತ್ರಿಕ ತಂಡವನ್ನು ಮುನ್ನಡೆಸುತ್ತಾರೆ. ಒಟ್ಟಾರೆ ಮೈಸೂರು ತನ್ನ ಭವ್ಯವಾದ ಅರಮನೆಗಳು, ವಾಸ್ತುಶಿಲ್ಪದ ವೈಭವ ಮತ್ತು ಶ್ರೀಮಂತ ಸಾಂಸ್ಕೃತಿಕ ಪರಂಪರೆಗೆ ಹೆಸರುವಾಸಿಯಾಗಿದ್ದು, ಈ ವೈಮಾನಿಕ ಪ್ರದರ್ಶನಕ್ಕೆ ವಿಶಿಷ್ಟವಾದ ವಾತಾವರಣವನ್ನು ಸೃಷ್ಟಿಸಲಿದೆ.