ಪ್ರಯಾಣಿಕರಿಗೆ ʼಡಬಲ್‌ʼ ಬಿಗ್‌ ಶಾಕ್‌! ದಸರಾ ಹಬ್ಬಕ್ಕೆ ಬಸ್‌ಗಳ ದರ ಏರಿಕೆ ಬಿಸಿ!

Dasara Bus Fares: ದಸರಾ ಹಬ್ಬದ ಸಂಭ್ರಮದ ನಡುವೆ ಊರಿಗೆ ತೆರಳಲು ಸಿದ್ಧರಾಗಿರುವ ಪ್ರಯಾಣಿಕರಿಗೆ ಖಾಸಗಿ ಬಸ್‌ಗಳ ಟಿಕೆಟ್‌ ದರ ಏರಿಕೆ ಬಿಗ್‌ ಶಾಕ್‌ ನೀಡಿದೆ. ಹಬ್ಬದ ಹಿನ್ನೆಲೆಯಲ್ಲಿ ಬೆಂಗಳೂರಿನಿಂದ ರಾಜ್ಯದ ವಿವಿಧ ನಗರಗಳಿಗೆ ತೆರಳುವ ಪ್ರಯಾಣಿಕರ ಸಂಖ್ಯೆ ಹೆಚ್ಚಾಗುತ್ತಿದ್ದು, ಖಾಸಗಿ ಬಸ್‌ಗಳ ಟಿಕೆಟ್‌ ದರದಲ್ಲೂ ಭಾರೀ ವ್ಯತ್ಯಾಸ ಕಂಡುಬಂದಿದೆ. 

ಕೆಲವು ಮಾರ್ಗಗಳಲ್ಲಿ ಸಾಮಾನ್ಯ ದಿನಗಳಿಗೆ ಹೋಲಿಸಿದರೆ ನೂರಾರು ರೂಪಾಯಿ ಹೆಚ್ಚುವರಿ ಹಣ ಪಾವತಿಸಬೇಕಾದ ಪರಿಸ್ಥಿತಿ ನಿರ್ಮಾಣವಾಗಿದೆ. ವಿಶೇಷವಾಗಿ ಬೆಂಗಳೂರು–ಹುಬ್ಬಳ್ಳಿ ಮಾರ್ಗದಲ್ಲಿ ಟಿಕೆಟ್‌ ದರದ ವ್ಯತ್ಯಾಸ ₹937 ತಲುಪಿರುವುದು ಪ್ರಯಾಣಿಕರ ಜೇಬಿಗೆ ಕತ್ತರಿ ಹಾಕುವಂತಾಗಿದೆ.

ಖಾಸಗಿ ಬಸ್‌ ಪ್ರಯಾಣಿಕರಿಗೆ ದರ ಏರಿಕೆ ಬಿಸಿ!

ದಸರಾ ಹಬ್ಬದ ಹಿನ್ನೆಲೆಯಲ್ಲಿ ಬೆಂಗಳೂರಿನಿಂದ ಮಂಗಳೂರು, ಹುಬ್ಬಳ್ಳಿ, ಹೊಸಪೇಟೆ ಹಾಗೂ ಶಿವಮೊಗ್ಗ ಸೇರಿದಂತೆ ವಿವಿಧ ನಗರಗಳಿಗೆ ತೆರಳುವ ಖಾಸಗಿ ಬಸ್‌ಗಳ ಟಿಕೆಟ್‌ ದರದಲ್ಲಿ ಏರಿಕೆ ಕಂಡುಬಂದಿದೆ. ಹಬ್ಬದ ಪ್ರಯಾಣದ ದಿನಗಳು ಹಾಗೂ ಸಾಮಾನ್ಯ ದಿನಗಳ ಟಿಕೆಟ್‌ ದರವನ್ನ ಹೋಲಿಸಿದಾಗ ಕೆಲವು ಮಾರ್ಗಗಳಲ್ಲಿ ಶೇ.30ಕ್ಕಿಂತಲೂ ಹೆಚ್ಚಿನ ವ್ಯತ್ಯಾಸ ಕಂಡುಬರುತ್ತಿದೆ.

ಬೆಂಗಳೂರು–ಹುಬ್ಬಳ್ಳಿ ಮಾರ್ಗದಲ್ಲಿ ಅತಿ ಹೆಚ್ಚು ದರ ವ್ಯತ್ಯಾಸ ಕಂಡುಬಂದಿದ್ದು, ಅಕ್ಟೋಬರ್ 17ರಂದು ಟಿಕೆಟ್‌ ದರ ₹1,600ರಿಂದ ಆರಂಭವಾಗುತ್ತಿದೆ. ಇದೇ ಮಾರ್ಗದಲ್ಲಿ ಅಕ್ಟೋಬರ್ 21ರಂದು ಟಿಕೆಟ್‌ ದರ ₹663ರಿಂದ ಆರಂಭವಾಗುತ್ತಿದೆ. ಅಂದರೆ ಎರಡು ದಿನಗಳ ಆರಂಭಿಕ ದರಗಳ ನಡುವೆ ಬರೋಬ್ಬರಿ ₹937 ವ್ಯತ್ಯಾಸವಿದೆ.

ಯಾವ ಮಾರ್ಗದಲ್ಲಿ ಎಷ್ಟು ದರ ವ್ಯತ್ಯಾಸ?

ಎಲ್ಲಾ ದರಗಳು ಆರಂಭಿಕ ಟಿಕೆಟ್‌ ದರಗಳಾಗಿದ್ದು, ಒದಗಿಸಿದ ಮಾಹಿತಿಯ ಆಧಾರದಲ್ಲಿವೆ. ಬುಕಿಂಗ್‌ ಸಮಯಕ್ಕೆ ಬದಲಾಗಬಹುದು.

ಹುಬ್ಬಳ್ಳಿ, ಹೊಸಪೇಟೆ ಪ್ರಯಾಣಿಕರಿಗೆ ಹೆಚ್ಚಿನ ಹೊರೆ!

ಬೆಂಗಳೂರು–ಹೊಸಪೇಟೆ ಮಾರ್ಗದಲ್ಲಿಯೂ ಖಾಸಗಿ ಬಸ್‌ ಪ್ರಯಾಣ ದುಬಾರಿಯಾಗಿದೆ. ಅಕ್ಟೋಬರ್ 17ರಂದು ಟಿಕೆಟ್‌ ದರ ₹1,299ರಿಂದ ಆರಂಭವಾಗುತ್ತಿದ್ದರೆ, ಅಕ್ಟೋಬರ್ 21ರಂದು ₹799ರಿಂದ ಆರಂಭವಾಗುತ್ತಿದೆ. ಎರಡು ದಿನಗಳ ದರಗಳ ನಡುವೆ ₹500 ವ್ಯತ್ಯಾಸವಿದೆ.

ಇನ್ನು ಬೆಂಗಳೂರು–ಮಂಗಳೂರು ಮಾರ್ಗದಲ್ಲಿ ಅಕ್ಟೋಬರ್ 17ರಂದು ಆರಂಭಿಕ ಟಿಕೆಟ್‌ ದರ ₹1,436 ಆಗಿದ್ದರೆ, ಅಕ್ಟೋಬರ್ 21ರಂದು ₹1,076ರಿಂದ ಆರಂಭವಾಗುತ್ತಿದೆ. ಈ ಮಾರ್ಗದಲ್ಲಿ ₹360 ವ್ಯತ್ಯಾಸ ಕಂಡುಬಂದಿದೆ. ಬೆಂಗಳೂರು–ಶಿವಮೊಗ್ಗ ಮಾರ್ಗದಲ್ಲಿ ಅಕ್ಟೋಬರ್ 17ರ ಟಿಕೆಟ್‌ ದರ ₹1,000ರಿಂದ ಆರಂಭವಾಗುತ್ತಿದ್ದು, ಅಕ್ಟೋಬರ್ 21ರ ದರದ ಮಾಹಿತಿ ಲಭ್ಯವಾಗಿಲ್ಲ.

ಹಬ್ಬದ ದಿನಗಳಲ್ಲಿ ಪ್ರಯಾಣಿಕರ ಬೇಡಿಕೆ ಹೆಚ್ಚಾಗುವುದರಿಂದ ಖಾಸಗಿ ಬಸ್‌ಗಳ ದರದಲ್ಲಿ ವ್ಯತ್ಯಾಸ ಕಂಡುಬರುವುದು ಸಾಮಾನ್ಯ. ಆದರೆ ಹಬ್ಬದ ಸಂದರ್ಭದಲ್ಲಿ ಕುಟುಂಬ ಸಮೇತ ಊರಿಗೆ ತೆರಳುವವರಿಗೆ ಈ ಹೆಚ್ಚುವರಿ ವೆಚ್ಚ ಆರ್ಥಿಕ ಹೊರೆಯಾಗಿ ಪರಿಣಮಿಸಬಹುದು.

ಪ್ರಯಾಣಿಕರ ನೆರವಿಗೆ KSRTCಯಿಂದ 3,000 ಹೆಚ್ಚುವರಿ ಬಸ್‌ಗಳು!

ಒಂದೆಡೆ ಖಾಸಗಿ ಬಸ್‌ಗಳ ದುಬಾರಿ ಟಿಕೆಟ್‌ ದರ ಪ್ರಯಾಣಿಕರಿಗೆ ಹೊರೆಯಾಗುತ್ತಿದ್ದರೆ, ಮತ್ತೊಂದೆಡೆ ದಸರಾ ಹಬ್ಬದ ಪ್ರಯಾಣಿಕರ ಅನುಕೂಲಕ್ಕಾಗಿ ಕರ್ನಾಟಕ ರಾಜ್ಯ ರಸ್ತೆ ಸಾರಿಗೆ ನಿಗಮ (KSRTC) ಒಟ್ಟು 3,000 ಹೆಚ್ಚುವರಿ ಬಸ್‌ಗಳ ವ್ಯವಸ್ಥೆ ಮಾಡಿದೆ. ಅಕ್ಟೋಬರ್ 16ರಿಂದ 20ರವರೆಗೆ ಬೆಂಗಳೂರಿನಿಂದ ರಾಜ್ಯದ ವಿವಿಧ ಜಿಲ್ಲೆಗಳು ಹಾಗೂ ಹೊರರಾಜ್ಯದ ಪ್ರಮುಖ ನಗರಗಳಿಗೆ ವಿಶೇಷ ಬಸ್‌ಗಳು ಸಂಚರಿಸಲಿವೆ. ಹಬ್ಬದ ಪ್ರಯುಕ್ತ ಹೆಚ್ಚಾಗುವ ಪ್ರಯಾಣಿಕರ ದಟ್ಟಣೆಯನ್ನ ನಿಭಾಯಿಸುವ ಉದ್ದೇಶದಿಂದ ಈ ವ್ಯವಸ್ಥೆ ಕಲ್ಪಿಸಲಾಗಿದೆ.

ಮೈಸೂರಿಗೆ 700 ವಿಶೇಷ ಬಸ್‌ಗಳ ವ್ಯವಸ್ಥೆ!

ದಸರಾ ಸಂಭ್ರಮದ ಪ್ರಮುಖ ಕೇಂದ್ರವಾದ ಮೈಸೂರಿಗೆ ತೆರಳುವ ಪ್ರವಾಸಿಗರು ಹಾಗೂ ಸಾರ್ವಜನಿಕರ ಅನುಕೂಲಕ್ಕಾಗಿ ಒಟ್ಟು 700 ವಿಶೇಷ ಬಸ್‌ಗಳನ್ನ ವ್ಯವಸ್ಥೆ ಮಾಡಲಾಗಿದೆ. ಬೆಂಗಳೂರಿನ ಮೆಜೆಸ್ಟಿಕ್‌, ಮೈಸೂರು ರಸ್ತೆ ಹಾಗೂ ಶಾಂತಿನಗರ ಬಸ್‌ ನಿಲ್ದಾಣಗಳಿಂದ ವಿಶೇಷ ಬಸ್‌ಗಳು ಕಾರ್ಯಾಚರಣೆ ನಡೆಸಲಿವೆ. ಇದಲ್ಲದೆ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದಿಂದ ಮೈಸೂರಿಗೆ ಫ್ಲೈ ಬಸ್‌ ಸೇವೆಯ ವ್ಯವಸ್ಥೆಯೂ ಇರಲಿದೆ. ಅಕ್ಟೋಬರ್ 20 ಮತ್ತು 21ರಂದು ಹಬ್ಬ ಮುಗಿಸಿಕೊಂಡು ಬೆಂಗಳೂರಿಗೆ ವಾಪಸಾಗುವ ಪ್ರಯಾಣಿಕರಿಗೂ ವಿಶೇಷ ಬಸ್‌ ಸೇವೆ ಒದಗಿಸಲಾಗುತ್ತಿದೆ.

ಖಾಸಗಿ ಬಸ್‌ ದರ ಪರಿಶೀಲಿಸಿ, ಪ್ರಯಾಣ ಯೋಜಿಸಿ!

ದಸರಾ ಹಬ್ಬದ ಪ್ರಯಾಣದ ವೇಳೆ ಖಾಸಗಿ ಬಸ್‌ ಟಿಕೆಟ್‌ ದರದಲ್ಲಿ ಹೆಚ್ಚಿನ ವ್ಯತ್ಯಾಸ ಕಂಡುಬರುತ್ತಿರುವ ಹಿನ್ನೆಲೆಯಲ್ಲಿ ಪ್ರಯಾಣಿಕರು ಮುಂಚಿತವಾಗಿ ಟಿಕೆಟ್‌ ದರಗಳನ್ನ ಪರಿಶೀಲಿಸುವುದು ಉತ್ತಮ. ವಿವಿಧ ಬಸ್‌ ಸೇವೆಗಳ ದರಗಳನ್ನ ಹೋಲಿಕೆ ಮಾಡಿ, ಲಭ್ಯವಿರುವ ಕೆಎಸ್‌ಆರ್‌ಟಿಸಿ ವಿಶೇಷ ಬಸ್‌ಗಳ ಆಯ್ಕೆಯನ್ನೂ ಪರಿಗಣಿಸಬಹುದಾಗಿದೆ.

ಒಟ್ನಲ್ಲಿ ದಸರಾ ಹಬ್ಬಕ್ಕೆ ಊರಿಗೆ ತೆರಳುವ ಸಂಭ್ರಮದಲ್ಲಿರುವ ಪ್ರಯಾಣಿಕರಿಗೆ ಖಾಸಗಿ ಬಸ್‌ಗಳ ದುಬಾರಿ ಟಿಕೆಟ್‌ ದರ ಆತಂಕ ತಂದಿದ್ದರೆ, ಕೆಎಸ್‌ಆರ್‌ಟಿಸಿಯ 3,000 ಹೆಚ್ಚುವರಿ ಬಸ್‌ಗಳ ವ್ಯವಸ್ಥೆ ಪ್ರಯಾಣಿಕರಿಗೆ ಪರ್ಯಾಯ ಆಯ್ಕೆಯಾಗಿ ನೆರವಾಗಲಿದೆ.