ರಾಜ್ಯಕ್ಕೆ ಮಹಾ ಚಂಡಮಾರುತ "ಮುರುಸು" ಭೀತಿ: ಮುಂದಿನ 5 ದಿನ ಈ ಭಾಗಕ್ಕೆ ಭಾರೀ ಮಳೆ ಮುನ್ಸೂಚನೆ

ಬೆಂಗಳೂರು : ಈ ಚಂಡಮಾರುತದ ಅಸಲಿ ಶಾಕ್ ತಟ್ಟುತ್ತಿರುವುದು ನಮ್ಮ ಕರ್ನಾಟಕಕ್ಕೆ!.. ಆಂಧ್ರದ ನೆಲ್ಲೂರು ಕರಾವಳಿಯ ಮೂಲಕ ಭೂಪ್ರವೇಶಿಸಲಿರುವ ಈ ವಾಯುಭಾರ ಕುಸಿತ ಮತ್ತು ಅರಬ್ಬಿ ಸಮುದ್ರದ ತಿರುಗುವಿಕೆಯಿಂದಾಗಿ ರಾಜ್ಯದಲ್ಲಿ ಇಂದಿನಿಂದಲೇ ಹಿಂಗಾರು ಮಳೆ ರುದ್ರನರ್ತನ ಆರಂಭಿಸಿದೆ.. ಸಿಲಿಕಾನ್ ಸಿಟಿ ಬೆಂಗಳೂರಿಗೆ ಹವಾಮಾನ ಇಲಾಖೆ 'ಯೆಲ್ಲೋ ಅಲರ್ಟ್' ಘೋಷಿಸಿದ್ದು, ಕರಾವಳಿ, ಮಲೆನಾಡು ಹಾಗೂ ಒಳನಾಡಿನ ಬಹುತೇಕ ಜಿಲ್ಲೆಗಳಲ್ಲಿ ಮುಂದಿನ 5 ದಿನ ಗುಡುಗು, ಸಿಡಿಲು ಸಹಿತ ಧಾರಾಕಾರ ಮಳೆಯಾಗಲಿದೆ..

ಪೂರ್ವ ಕರಾವಳಿಯಲ್ಲಿ ಚಂಡಮಾರುತಗಳ ಸರಣಿ ದಾಳಿ ಮುಂದುವರಿದಿದೆ. ಆಂಧ್ರ-ಯಾಣಂನಲ್ಲಿ ವಿನಾಶ ಸೃಷ್ಟಿಸಿದ್ದ ಅರ್ನಬ್ ಚಂಡಮಾರುತ ದುರ್ಬಲಗೊಂಡ ಬೆನ್ನಲ್ಲೇ, ಅದೇ ಬಂಗಾಳಕೊಲ್ಲಿಯಲ್ಲಿ 'ಮುರುಸು' ಎಂಬ ಹೊಸ ಚಂಡಮಾರುತ ತೀವ್ರ ಸ್ವರೂಪ ಪಡೆದುಕೊಂಡಿದೆ. ಹವಾಮಾನ ಇಲಾಖೆಯ ಪ್ರಕಾರ, ಸೋಮವಾರ ಸಂಜೆಯ ವೇಳೆಗೆ ಇದು ಆಂಧ್ರಪ್ರದೇಶ ಕರಾವಳಿಯ ಅತ್ಯಂತ ಸಮೀಪಕ್ಕೆ ಬರಲಿದೆ. ಈ ವ್ಯವಸ್ಥೆಯು ಕರಾವಳಿ ಆಂಧ್ರ ಮತ್ತು ಯಾಣಂ ವ್ಯಾಪ್ತಿಯಲ್ಲಿ ಭಾರೀ ಆಸ್ತಿಪಾಸ್ತಿ ಹಾನಿ ಮಾಡುವ ಆತಂಕ ಮೂಡಿಸಿದ್ದು, ಕರಾವಳಿ ಭಾಗದಲ್ಲಿ ಹೈ-ಅಲರ್ಟ್ ಘೋಷಿಸಲಾಗಿದೆ.

ಮುರುಸು ಚಂಡಮಾರುತದ ತೀವ್ರತೆಗೆ ಬೆಚ್ಚಿಬಿದ್ದಿರುವ ಒಡಿಶಾ ಸರ್ಕಾರ ಸಮರೋಪಾದಿಯಲ್ಲಿ ಸಿದ್ಧತೆ ನಡೆಸಿದೆ. ರಾಜ್ಯ ಕಂದಾಯ ಮತ್ತು ವಿಪತ್ತು ನಿರ್ವಹಣಾ ಸಚಿವ ಸುರೇಶ್ ಪೂಜಾರಿ ಅವರ ನೇತೃತ್ವದಲ್ಲಿ ಉನ್ನತ ಮಟ್ಟದ ಸಭೆ ನಡೆದಿದ್ದು, ಬೆಟ್ಟಗುಡ್ಡಗಳ ತಪ್ಪಲಿನಲ್ಲಿರುವ ದುರ್ಬಲ ಗ್ರಾಮಸ್ಥರನ್ನು ಕಾಳಜಿ ಕೇಂದ್ರಗಳಿಗೆ ಕಳುಹಿಸಲಾಗುತ್ತಿದೆ. ಗ್ರಾಮಸ್ಥರು ಮನೆ ಬಿಟ್ಟು ಬರುವಾಗ ಕಳ್ಳತನದ ಭಯ ಪಡಬಾರದು ಎಂಬ ಕಾರಣಕ್ಕೆ ತೆರವಾದ ಮನೆಗಳಿಗೆ ಖುದ್ದು ಪೊಲೀಸರೇ ಕಾವಲು ಕಾಯುತ್ತಿದ್ದಾರೆ. ತಗ್ಗು ಪ್ರದೇಶಗಳಲ್ಲಿ ಪ್ರವಾಹ ಮತ್ತು ಗುಡ್ಡ ಕುಸಿತ ತಡೆಯಲು ಎಲ್ಲಾ ಆಡಳಿತ ಯಂತ್ರಗಳು ಸನ್ನದ್ಧವಾಗಿವೆ.

ಈ ಚಂಡಮಾರುತದ ಪರಿಣಾಮ ಕೇವಲ ಆಂಧ್ರ-ಒಡಿಶಾಗೆ ಸೀಮಿತವಾಗಿಲ್ಲ, ಬದಲಾಗಿ ಇಡೀ ಕರ್ನಾಟಕದ ಹವಾಮಾನವನ್ನೇ ತಲೆಕೆಳಗಾಗಿಸಿದೆ. ಬಂಗಾಳಕೊಲ್ಲಿಯಲ್ಲಿರುವ ಮುರುಸು ಸೈಕ್ಲೋನ್ ವ್ಯವಸ್ಥೆಯು ದುರ್ಬಲಗೊಂಡು ಆಂಧ್ರದ ನೆಲ್ಲೂರು ಕರಾವಳಿಯ ಮೂಲಕ ಭೂಪ್ರವೇಶ ಮಾಡಿ ಪಶ್ಚಿಮಕ್ಕೆ ಸಾಗಲಿದೆ. ಇದರ ಬೆನ್ನಲ್ಲೇ ಅರಬ್ಬಿ ಸಮುದ್ರದ ವಾಯುಭಾರ ತಿರುಗುವಿಕೆಯೂ ಸಾಥ್ ನೀಡಿದ್ದು, ಕರ್ನಾಟಕದಲ್ಲಿ ಹಿಂಗಾರು ಮಾರುತಗಳು ತೀವ್ರ ಚುರುಕುಗೊಂಡಿವೆ. ಪರಿಣಾಮವಾಗಿ ನವೆಂಬರ್ 5ರವರೆಗೆ ಇಡೀ ರಾಜ್ಯದಲ್ಲಿ ಅಬ್ಬರದ ಮಳೆಯಾಗಲಿದೆ.

ರಾಜ್ಯ ರಾಜಧಾನಿ ಬೆಂಗಳೂರಿನಲ್ಲೂ ಮುರುಸು ಚಂಡಮಾರುತದ ತಂಪಾದ ಮತ್ತು ತೇವಾಂಶಭರಿತ ಮೋಡಗಳು ಆವರಿಸಿಕೊಂಡಿವೆ. ನಗರದಲ್ಲಿ ಕಳೆದ ಎರಡು ದಿನಗಳಿಂದ ಕಂಡುಬರುತ್ತಿದ್ದ ಬಿಸಿಲಿನ ವಾತಾವರಣ ಮಾಯವಾಗಿದ್ದು, ನವೆಂಬರ್ 2 ಮತ್ತು 3 ರಂದು ನಗರದಲ್ಲಿ ಭಾರಿ ಗುಡುಗು ಸಹಿತ ಮಳೆಯಾಗುವ ಮುನ್ಸೂಚನೆ ಇದೆ. ಹೀಗಾಗಿ ಹವಾಮಾನ ಇಲಾಖೆಯು ಸಿಲಿಕಾನ್ ಸಿಟಿಗೆ 'ಯೆಲ್ಲೋ ಅಲರ್ಟ್' ಘೋಷಿಸಿದೆ. ಮಳೆಯಿಂದಾಗಿ ನಗರದಲ್ಲಿ ಟ್ರಾಫಿಕ್ ಜಾಮ್ ಹಾಗೂ ತಗ್ಗು ಪ್ರದೇಶಗಳಲ್ಲಿ ನೀರು ನಿಲ್ಲುವ ಸಾಧ್ಯತೆ ಇರುವುದರಿಂದ ನಗರ ನಿವಾಸಿಗಳು ಎಚ್ಚರಿಕೆಯಿಂದಿರಲು ಸೂಚಿಸಲಾಗಿದೆ.

ಮುಂದಿನ 4 ದಿನಗಳ ಕಾಲ ರಾಜ್ಯದ ಎಲ್ಲಾ ದಿಕ್ಕುಗಳಲ್ಲೂ ಮಳೆಯ ಆರ್ಭಟ ಜೋರಾಗಿರಲಿದೆ. ಕರಾವಳಿಯ ಮೂರು ಜಿಲ್ಲೆಗಳಿಗೆ ನವೆಂಬರ್ 3ರಂದು ಯೆಲ್ಲೋ ಅಲರ್ಟ್ ನೀಡಲಾಗಿದ್ದು, ನವೆಂಬರ್ 5ರವರೆಗೆ ಕಡಲ ತೀರದಲ್ಲಿ ಬಿರುಗಾಳಿ ಮಳೆ ಅಬ್ಬರಿಸಲಿದೆ. ಮಲೆನಾಡಿನ ಕೊಡಗು, ಚಿಕ್ಕಮಗಳೂರಿನಲ್ಲಿ ಕಾಫಿ ಮತ್ತು ಅಡಿಕೆ ಬೆಳೆಗಾರರಿಗೆ ಮಳೆಯ ಆತಂಕ ಶುರುವಾಗಿದೆ. ಇತ್ತ ಉತ್ತರ ಒಳನಾಡಿನ ಕಲಬುರ್ಗಿ, ಬೀದರ್ ಹಾಗೂ ದಕ್ಷಿಣ ಒಳನಾಡಿನ ಮೈಸೂರು, ಚಾಮರಾಜನಗರ ಜಿಲ್ಲೆಗಳಲ್ಲಿ ಗುಡುಗು-ಸಿಡಿಲಿನ ಸಮೇತ ಭಾರೀ ಮಳೆಯಾಗುವ ಸಾಧ್ಯತೆ ಇರುವುದರಿಂದ ಜನತೆ ಎಚ್ಚರಿಕೆಯಿಂದಿರುವಂತೆ ಹವಾಮಾನ ಇಲಾಖೆ ಕಟ್ಟುನಿಟ್ಟಿನ ಸೂಚನೆ ನೀಡಿದೆ.

ಒಟ್ಟಿನಲ್ಲಿ, ಬಂಗಾಳಕೊಲ್ಲಿಯ ಆಳ ಸಮುದ್ರದಲ್ಲಿ ಜನಿಸಿರುವ 'ಮುರುಸು' ಚಂಡಮಾರುತ ಆಂಧ್ರ ಮತ್ತು ಒಡಿಶಾ ಕರಾವಳಿಯ ಬಾಗಿಲು ತಟ್ಟುತ್ತಿದ್ದರೆ, ಅದರ ಬಾಲದ ಹೊಡೆತಕ್ಕೆ ಕರ್ನಾಟಕದ ಹಿಂಗಾರು ಮಳೆ ಈಗ ರಣಕಹಳೆ ಊದಿದೆ.. ಕರಾವಳಿಯ ಅಲೆಗಳಿಂದ ಹಿಡಿದು ಮಲೆನಾಡಿನ ಬೆಟ್ಟಗಳು, ರಾಜಧಾನಿ ಬೆಂಗಳೂರು ಹಾಗೂ ಉತ್ತರ ಕರ್ನಾಟಕದ ಗಡಿ ಜಿಲ್ಲೆಗಳವರೆಗೆ ಮುಂದಿನ 5 ದಿನ ವರುಣನ ರುದ್ರನರ್ತನ ನಡೆಯಲಿದೆ.. ಈಗಾಗಲೇ ಕೊಯ್ಲಿಗೆ ಬಂದಿರುವ ಬೆಳೆಗಳನ್ನು ಉಳಿಸಿಕೊಳ್ಳಲು ರೈತರು ಹರಸಾಹಸ ಪಡುತ್ತಿದ್ದರೆ, ಚಂಡಮಾರುತದ ನೇರ ಹೊಡೆತಕ್ಕೆ ಸಿಲುಕಲಿರುವ ಆಂಧ್ರ-ಒಡಿಶಾ ಕರಾವಳಿ ಜನತೆ ನಡುಗುತ್ತಿದ್ದಾರೆ.. ಮುಂದಿನ 48 ಗಂಟೆಗಳಲ್ಲಿ ಈ ಮುರುಸು ಚಂಡಮಾರುತ ಎಷ್ಟು ದೊಡ್ಡ ಅನಾಹುತ ಸೃಷ್ಟಿಸಲಿದೆ ಎಂಬುದನ್ನು ಕಾದುನೋಡಬೇಕಿದೆ.