'ರಾಮಾಯಣ' ಮುಂಗಡ ಬುಕಿಂಗ್‌ನಲ್ಲಿ ದಾಖಲೆ ಕಲೆಕ್ಷನ್! ಕರ್ನಾಟಕದಿಂದ ಎಷ್ಟು ಕೋಟಿ ಬಂದಿದೆ ಗೊತ್ತಾ?

Ramayana Box Office Collection: ಬಾಲಿವುಡ್‌ ನಟ ರಣಬೀರ್ ಕಪೂರ್ ಮತ್ತು ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹುನಿರೀಕ್ಷಿತ 'ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್' ಸಿನಿಮಾ ಬಿಡುಗಡೆಗೂ ಮುನ್ನವೇ ಮುಂಗಡ ಟಿಕೆಟ್ ಮಾರಾಟದಲ್ಲಿ ಭರ್ಜರಿ ಪ್ರತಿಕ್ರಿಯೆ ಪಡೆದುಕೊಂಡಿದೆ. ನಿತೇಶ್ ತಿವಾರಿ ನಿರ್ದೇಶನದ ಈ ಸಿನಿಮಾ ನವೆಂಬರ್ 5ರಂದು ಚಿತ್ರಮಂದಿರಗಳಿಗೆ ಬರಲು ಸಜ್ಜಾಗಿದ್ದು, ದೇಶದಾದ್ಯಂತ ಮುಂಗಡ ಬುಕಿಂಗ್ ಮೂಲಕ 10 ಕೋಟಿ ರೂಪಾಯಿಗೂ ಅಧಿಕ ಮೊತ್ತ ದಾಖಲಿಸಿದೆ. ವಿಶೇಷವಾಗಿ ಹಿಂದಿ ಆವೃತ್ತಿಯ ಟಿಕೆಟ್‌ಗಳಿಗೆ ಹೆಚ್ಚಿನ ಬೇಡಿಕೆ ಕಂಡುಬಂದಿದೆ.

ಭಾರತೀಯ ಚಿತ್ರೋದ್ಯಮದ ಬಾಕ್ಸ್ ಆಫೀಸ್ ಟ್ರ್ಯಾಕಿಂಗ್ ಸಂಸ್ಥೆ ಸಕ್ನಿಲ್ಕ್ ವರದಿ ಮಾಡಿರುವ ಅಂಕಿಅಂಶಗಳ ಪ್ರಕಾರ, ಅಕ್ಟೋಬರ್ 24ರ ಮಧ್ಯಾಹ್ನ 3 ಗಂಟೆಯ ವೇಳೆಗೆ 'ರಾಮಾಯಣ' ಚಿತ್ರದ ಮುಂಗಡ ಬುಕಿಂಗ್ ಒಟ್ಟು 10.15 ಕೋಟಿ ರೂಪಾಯಿ ತಲುಪಿದೆ. ಈ ಮೊತ್ತದಲ್ಲಿ ಬ್ಲಾಕ್ ಮಾಡಲಾದ ಸೀಟುಗಳ ಮೌಲ್ಯವೂ ಸೇರಿದೆ. ಬ್ಲಾಕ್ ಮಾಡಲಾದ ಸೀಟುಗಳನ್ನ ಹೊರತುಪಡಿಸಿದರೆ, ಮುಂಗಡ ಟಿಕೆಟ್ ಮಾರಾಟದಿಂದ 7.98 ಕೋಟಿ ರೂಪಾಯಿ ಸಂಗ್ರಹವಾಗಿದೆ.

1.81 ಲಕ್ಷ ಟಿಕೆಟ್ ಮಾರಾಟ!

ದೇಶದ 134 ನಗರಗಳಲ್ಲಿ ಒಟ್ಟು 4,352 ಪ್ರದರ್ಶನಗಳನ್ನ ಟ್ರ್ಯಾಕ್ ಮಾಡಲಾಗಿದ್ದು, ಸುಮಾರು 1.81 ಲಕ್ಷ ಟಿಕೆಟ್‌ಗಳು ಮುಂಗಡವಾಗಿ ಮಾರಾಟವಾಗಿವೆ. ಸಿನಿಮಾ ಬಿಡುಗಡೆಗೆ ಇನ್ನೂ 12 ದಿನಗಳು ಬಾಕಿ ಇರುವ ಸಂದರ್ಭದಲ್ಲಿಯೇ ಈ ಪ್ರಮಾಣದ ಟಿಕೆಟ್ ಮಾರಾಟ ದಾಖಲಾಗಿದೆ. ಚಿತ್ರದ ಮುಂಗಡ ಬುಕಿಂಗ್‌ನಲ್ಲಿ ಹಿಂದಿ ಆವೃತ್ತಿಯೇ ಮುಂಚೂಣಿಯಲ್ಲಿದೆ. ಹಿಂದಿ ಭಾಷೆಯ ಪ್ರದರ್ಶನಗಳಿಂದ ಸುಮಾರು 8.91 ಕೋಟಿ ರೂಪಾಯಿ ಮುಂಗಡ ಮಾರಾಟ ದಾಖಲಾಗಿದ್ದು, ಇದು ಒಟ್ಟು ಬುಕಿಂಗ್ ಮೊತ್ತದ ಸುಮಾರು ಶೇ.88ರಷ್ಟಿದೆ. ಉಳಿದ ಭಾಷೆಗಳ ಆವೃತ್ತಿಗಳೂ ಮುಂಗಡ ಟಿಕೆಟ್ ಮಾರಾಟದಲ್ಲಿ ತಮ್ಮದೇ ಆದ ಕೊಡುಗೆ ನೀಡಿವೆ.

ಕನ್ನಡ ಆವೃತ್ತಿಯಿಂದ 96.57 ಲಕ್ಷ ರೂ.!

ಹಿಂದಿ ಆವೃತ್ತಿಯ ನಂತರ ಕನ್ನಡ ಭಾಷೆಯ ಆವೃತ್ತಿಯಲ್ಲೂ ಟಿಕೆಟ್ ಮಾರಾಟ ದಾಖಲಾಗಿದೆ. ಕನ್ನಡ ಆವೃತ್ತಿಯಿಂದ ಸುಮಾರು 96.57 ಲಕ್ಷ ರೂಪಾಯಿ ಮುಂಗಡ ಬುಕಿಂಗ್ ಆಗಿದೆ. ತೆಲುಗು ಆವೃತ್ತಿಯು ಸುಮಾರು 28.11 ಲಕ್ಷ ರೂಪಾಯಿ ಸಂಗ್ರಹಿಸಿದೆ. ಹೀಗೆ ಹಿಂದಿ ಭಾಷೆಯ ಜೊತೆಗೆ ಕನ್ನಡ ಮತ್ತು ತೆಲುಗು ಆವೃತ್ತಿಗಳ ಮುಂಗಡ ಟಿಕೆಟ್ ಮಾರಾಟವೂ ಚಿತ್ರದ ಒಟ್ಟಾರೆ ಬುಕಿಂಗ್ ಮೊತ್ತದಲ್ಲಿ ಸೇರಿಕೊಂಡಿದೆ. ಬಿಡುಗಡೆ ದಿನಾಂಕ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಮುಂಗಡ ಟಿಕೆಟ್ ಮಾರಾಟದ ಅಂಕಿಅಂಶಗಳು ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ.

ಕರ್ನಾಟಕದಿಂದ 1.45 ಕೋಟಿ ರೂ. ಮುಂಗಡ ಬುಕಿಂಗ್!

🚨 #RAMAYANA ADVANCE BOOKING UPDATE – 7 AM 🏹🔥 The EPIC is gathering momentum : • ₹9.85 CRORE GROSS • 1.73 LAKH TICKETS SOLD • ₹7.75 Cr Gross (Excluding Blocked Seats) • 70.8K Tickets Sold in National Chains ⏳ 12 DAYS TO GO! With almost two weeks still remaining, the advance booking journey has just begun. The BIG SURGE is what everyone will be watching.

— Pan India Review (@PanIndiaReview) October 24, 2026

 ರಾಜ್ಯವಾರು ಮುಂಗಡ ಬುಕಿಂಗ್ ಅಂಕಿಅಂಶಗಳಲ್ಲಿ ಮಹಾರಾಷ್ಟ್ರ ಮೊದಲ ಸ್ಥಾನದಲ್ಲಿದೆ. ಮಹಾರಾಷ್ಟ್ರದಿಂದ ಸುಮಾರು 2.31 ಕೋಟಿ ರೂಪಾಯಿ ಮುಂಗಡ ಟಿಕೆಟ್ ಮಾರಾಟ ದಾಖಲಾಗಿದೆ. ಎರಡನೇ ಸ್ಥಾನದಲ್ಲಿರುವ ದೆಹಲಿಯಿಂದ 2.13 ಕೋಟಿ ರೂಪಾಯಿ ಸಂಗ್ರಹವಾಗಿದೆ. ಇನ್ನು ಕರ್ನಾಟಕವೂ ಮುಂಗಡ ಬುಕಿಂಗ್‌ನಲ್ಲಿ ಗಮನಾರ್ಹ ಮೊತ್ತ ದಾಖಲಿಸಿದೆ. ರಾಜ್ಯದಿಂದ ಸುಮಾರು 1.45 ಕೋಟಿ ರೂಪಾಯಿ ಮುಂಗಡ ಟಿಕೆಟ್ ಮಾರಾಟವಾಗಿದ್ದು, ಪ್ರಮುಖ ಮಾರುಕಟ್ಟೆಗಳ ಪೈಕಿ ಕರ್ನಾಟಕವೂ ಸ್ಥಾನ ಪಡೆದಿದೆ.

ಬೆಂಗಳೂರೊಂದರಲ್ಲೇ 1.20 ಕೋಟಿ ರೂ. ಕಲೆಕ್ಷನ್!

ನಗರವಾರು ಟಿಕೆಟ್ ಮಾರಾಟವನ್ನ ಗಮನಿಸಿದರೆ, ರಾಷ್ಟ್ರೀಯ ರಾಜಧಾನಿ ಪ್ರದೇಶವಾದ ಎನ್‌ಸಿಆರ್ ಮೊದಲ ಸ್ಥಾನದಲ್ಲಿದೆ. ಇಲ್ಲಿ ಒಟ್ಟು 27,177 ಟಿಕೆಟ್‌ಗಳು ಮಾರಾಟವಾಗಿದ್ದು, ಸುಮಾರು 2.13 ಕೋಟಿ ರೂಪಾಯಿ ಮುಂಗಡ ಬುಕಿಂಗ್ ದಾಖಲಾಗಿದೆ. ಮುಂಬೈ ನಗರದಲ್ಲಿ 22,864 ಟಿಕೆಟ್‌ಗಳ ಮಾರಾಟದ ಮೂಲಕ ಸುಮಾರು 1.60 ಕೋಟಿ ರೂಪಾಯಿ ಸಂಗ್ರಹವಾಗಿದೆ. ಬೆಂಗಳೂರಿನಲ್ಲಿಯೂ 'ರಾಮಾಯಣ' ಚಿತ್ರದ ಮುಂಗಡ ಟಿಕೆಟ್‌ಗಳಿಗೆ ಉತ್ತಮ ಬೇಡಿಕೆ ಕಂಡುಬಂದಿದೆ.

ಬೆಂಗಳೂರಿನಲ್ಲಿ ಒಟ್ಟು 18,147 ಟಿಕೆಟ್‌ಗಳು ಮಾರಾಟವಾಗಿದ್ದು, ಸುಮಾರು 1.20 ಕೋಟಿ ರೂಪಾಯಿ ಮುಂಗಡ ಬುಕಿಂಗ್ ದಾಖಲಾಗಿದೆ. ಕರ್ನಾಟಕದ ಒಟ್ಟು 1.45 ಕೋಟಿ ರೂಪಾಯಿ ಮುಂಗಡ ಮಾರಾಟದಲ್ಲಿ ಬೆಂಗಳೂರಿನ ಕೊಡುಗೆ ಪ್ರಮುಖವಾಗಿದೆ. ಇದೇ ವೇಳೆ ಹೈದರಾಬಾದ್‌ನಲ್ಲಿ ಸುಮಾರು 62 ಲಕ್ಷ ರೂಪಾಯಿ ಮುಂಗಡ ಬುಕಿಂಗ್ ದಾಖಲಾಗಿದ್ದರೆ, ಪುಣೆಯಲ್ಲಿ ಸುಮಾರು 45.72 ಲಕ್ಷ ರೂಪಾಯಿ ಟಿಕೆಟ್ ಮಾರಾಟವಾಗಿದೆ.

ರಣಬೀರ್ ಕಪೂರ್ ಮತ್ತು ಯಶ್ ಅಭಿನಯದ, ನಿತೇಶ್ ತಿವಾರಿ ನಿರ್ದೇಶನದ 'ರಾಮಾಯಣ: ರೈಸ್ ಆಫ್ ಎ ಲೆಜೆಂಡ್' ಸಿನಿಮಾ ನವೆಂಬರ್ 5ರಂದು ಬಿಡುಗಡೆಯಾಗಲಿದೆ. ಅಕ್ಟೋಬರ್ 24ರವರೆಗಿನ ಮುಂಗಡ ಬುಕಿಂಗ್ ಅಂಕಿಅಂಶಗಳಲ್ಲಿ ಹಿಂದಿ ಆವೃತ್ತಿ ಮುಂಚೂಣಿಯಲ್ಲಿದ್ದು, ಮಹಾರಾಷ್ಟ್ರ, ದೆಹಲಿ ಮತ್ತು ಕರ್ನಾಟಕ ಪ್ರಮುಖ ಕೊಡುಗೆ ನೀಡಿರುವ ರಾಜ್ಯಗಳಾಗಿವೆ.