ರಾಖಿ ಸಾವಂತ್‌ ವಿರುದ್ಧ ಜಾಮೀನು ರಹಿತ ಅರೆಸ್ಟ್‌ ವಾರೆಂಟ್‌ ಜಾರಿ..! 16 ವರ್ಷದ ಹಳೆ ಕೇಸ್‌ಗೆ ಮಹತ್ವದ ತಿರುವು

Rakhi Sawant case : ಬಾಲಿವುಡ್‌ನ 'ಡ್ರಾಮಾ ಕ್ವೀನ್' ನಟಿ ರಾಖಿ ಸಾವಂತ್ ಮತ್ತೊಮ್ಮೆ ಕಾನೂನು ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಬಡ ಯುವಕನೊಬ್ಬನ ಸಾವಿಗೆ ಸಂಬಂಧಿಸಿದ 16 ವರ್ಷಗಳ ಹಳೆಯ ಪ್ರಕರಣದಲ್ಲಿ ಝಾನ್ಸಿ ನ್ಯಾಯಾಲಯವು ರಾಖಿ ಸಾವಂತ್ ವಿರುದ್ಧ ಜಾಮೀನು ರಹಿತ ಅರೆಸ್ಟ್‌ ವಾರೆಂಟ್ ಜಾರಿ ಮಾಡಿದೆ.

ಏನಿದು ಹಳೆ ಪ್ರಕರಣ?
2010ರಲ್ಲಿ ಬಾಲಿವುಡ್ ನಟಿ ರಾಖಿ ಸಾವಂತ್ ನಡೆಸಿಕೊಟ್ಟ ಜನಪ್ರಿಯ ರಿಯಾಲಿಟಿ ಶೋ 'ರಖಾ ಕಾ ಇನ್ಸಾಫ್' (Rakhi Ka Insaaf) ಕಾರ್ಯಕ್ರಮದಲ್ಲಿ ಝಾನ್ಸಿಯ ಲಕ್ಷ್ಮಣ್ ಅಹಿರ್ವರ್ ಎಂಬ ಯುವಕ ಭಾಗವಹಿಸಿದ್ದನು. ಪತ್ನಿಯೊಂದಿಗೆ ಉಂಟಾದ ಕೌಟುಂಬಿಕ ಕಲಹದ ಹಿನ್ನೆಲೆಯಲ್ಲಿ ಈ ಶೋಗೆ ತೆರಳಿದ್ದ ಆ ಯುವಕನನ್ನು, ಶೋನಲ್ಲಿದ್ದ ರಾಖಿ ಸಾವಂತ್ ಸಾರ್ವಜನಿಕವಾಗಿ ಅವಮಾನಿಸಿದ್ದರು ಮತ್ತು ಶಕ್ತಿಹೀನ ಎಂದು ಬೈದಿದ್ದರು ಎಂಬ ಗಂಭೀರ ಆರೋಪವಿತ್ತು.

ಅಕ್ಟೋಬರ್ 23, 2010ರಂದು ಈ ಕಾರ್ಯಕ್ರಮ ಪ್ರಸಾರವಾದ ಬಳಿಕ, ಸಾರ್ವಜನಿಕವಾಗಿ ಅವಮಾನಕ್ಕೊಳಗಾದ ಲಕ್ಷ್ಮಣ್ ತೀವ್ರ ಮಾನಸಿಕ ಖಿನ್ನತೆಗೆ ಒಳಗಾದರು. ಜನರನ್ನು ಎದುರಿಸಲು ಹೆದರುತ್ತಿದ್ದ ಅವರು ಊಟ-ತಿಂಡಿಯನ್ನು ಕೂಡ ಬಿಟ್ಟಿದ್ದರು. ರಾಖಿ ತಮ್ಮ ಜೀವನವನ್ನು ಹಾಳುಮಾಡಿದ್ದಾರೆ ಎಂದು ಅಳಲು ತೋಡಿಕೊಳ್ಳುತ್ತಿದ್ದ ಅವರ ಆರೋಗ್ಯ ತೀವ್ರವಾಗಿ ಹದಗೆಟ್ಟಿತು. ಕೊನೆಗೆ ನವೆಂಬರ್ 9ರಂದು ಆಸ್ಪತ್ರೆಗೆ ದಾಖಲಿಸಲ್ಪಟ್ಟ ಅವರು, ಚಿಕಿತ್ಸೆ ಫಲಕಾರಿಯಾಗದೆ ನವೆಂಬರ್ 10, 2010ರಂದು ಕೊನೆಯುಸಿರೆಳೆದರು.

ತಾಯಿಯ ಕಾನೂನು ಹೋರಾಟ
ಲಕ್ಷ್ಮಣ್‌ ಅವರ ತಾಯಿ ನೀಡಿದ ದೂರಿನ ಪ್ರಕಾರ, ರಾಖಿ ನಡೆಸಿಕೊಟ್ಟ ಆ ಶೋನಿಂದಾಗಿ ಮಗನ ಮಾನಸಿಕ ಆರೋಗ್ಯ ಸಂಪೂರ್ಣವಾಗಿ ಹದಗೆಟ್ಟಿತ್ತು. ಬಳಿಕ ಅನಾರೋಗ್ಯದಿಂದ ಬಳಲುತ್ತಿದ್ದ ಲಕ್ಷ್ಮಣ್ 2010ರ ನವೆಂಬರ್ 10ರಂದು ಆಸ್ಪತ್ರೆಯಲ್ಲಿ ಸಾವನ್ನಪ್ಪಿದರು. ಮಗನ ಸಾವಿಗೆ ರಾಖಿ ಸಾವಂತ್ ಅವರೇ ಕಾರಣ ಎಂದು ಆರೋಪಿಸಿ ಲಕ್ಷ್ಮಣ್ ತಾಯಿ ಕಾನೂನು ಹೋರಾಟ ಆರಂಭಿಸಿದ್ದರು.

ಕೋರ್ಟ್‌ಗೆ ಗೈರು ಹಾಜರಿ
ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ನ್ಯಾಯಾಲಯವು ಈ ಹಿಂದೆ ಹಲವು ಬಾರಿ ಸಮನ್ಸ್ ಜಾರಿ ಮಾಡಿದ್ದರೂ, ರಾಖಿ ಸಾವಂತ್ ವಿಚಾರಣೆಗೆ ಹಾಜರಾಗಿರಲಿಲ್ಲ. ಸತತ ಗೈರುಹಾಜರಿಯನ್ನು ಗಂಭೀರವಾಗಿ ಪರಿಗಣಿಸಿರುವ ನ್ಯಾಯಾಲಯವು ಈಗ ಅರೆಸ್ಟ್ ವಾರೆಂಟ್ ಹೊರಡಿಸಿದೆ. ಅಲ್ಲದೆ, ಕೂಡಲೇ ನ್ಯಾಯಾಲಯಕ್ಕೆ ಹಾಜರಾಗಿ ಜಾಮೀನು ಪಡೆದುಕೊಳ್ಳುವಂತೆ ಸೂಚನೆ ನೀಡಿದೆ. ಈ ಹೈ-ಪ್ರೊಫೈಲ್ ಪ್ರಕರಣದ ಮುಂದಿನ ವಿಚಾರಣೆಯು ಡಿಸೆಂಬರ್ 1 ರಂದು CAW (FTC) ನ್ಯಾಯಾಲಯದಲ್ಲಿ ನಡೆಯಲಿದೆ.

ಒಟ್ಟಾರೆಯಾಗಿ ಸದಾ ಒಂದಲ್ಲ ಒಂದು ವಿವಾದಗಳಿಂದಲೇ ಸದ್ದು ಮಾಡುವ ಬಿ ಟೌನ್‌ ತಾರೆ ರಾಖಿ ಸಾವಂತ್ ಪಾಲಿಗೆ ಈ ಬಾರಿ ಕಾನೂನಿನ ಬಿಸಿ ತಟ್ಟಿದ್ದು, ಮುಂಬರುವ ದಿನಗಳಲ್ಲಿ ನಟಿಯ ಸಂಕಷ್ಟ ಮತ್ತಷ್ಟು ಹೆಚ್ಚಾಗುವ ಸಾಧ್ಯತೆಯಿದೆ. ಅಲ್ಲದೆ, ಬಂಧನ ಭೀತಿಯೂ ಎದುರಾಗಿದೆ..