ದೊಡ್ಮನೆಯಲ್ಲಿ ಸ್ನೇಹಿತರ ಮಧ್ಯ ಬಿರುಕು : ತಾಂಡವ್‌ಗೆ ಮುಲಾಜಿಲ್ಲದೆ ಕಠಿಣ ಶಿಕ್ಷೆ ನೀಡಿದ ಗಗನ್!

Bigg Boss Kannada 13 updates : 'ಬಿಗ್ ಬಾಸ್ ಕನ್ನಡ ಸೀಸನ್ 13' ರಿಯಾಲಿಟಿ ಶೋ ದಿನದಿಂದ ದಿನಕ್ಕೆ ರೋಚಕತೆ ಪಡೆಯುತ್ತಿದೆ. ಮನೆಯಲ್ಲಿ ಸ್ಪರ್ಧಿಗಳ ನಡುವಿನ ಸಂಬಂಧ ಕ್ಷಣಕ್ಕೊಂದು ತಿರುವು ಪಡೆಯುತ್ತಿವೆ. ಅದರಲ್ಲೂ ಆರಂಭದಿಂದಲೂ ಆಪ್ತ ಸ್ನೇಹಿತರೆಂದು ಗುರುತಿಸಿಕೊಂಡಿರುವ ಗಗನ್ ಚಿನ್ನಪ್ಪ ಹಾಗೂ ತಾಂಡವ್ ರಾಮ್ ನಡುವೆ ಈಗ ಆಟದ ವಿಚಾರಕ್ಕೆ ಬಿರುಕು ಮೂಡುತ್ತಿದೆಯಾ ಎಂಬ ಪ್ರಶ್ನೆ ಉದ್ಭವವಾಗಿದೆ. ಟಾಸ್ಕ್‌ ಗೆಲ್ಲಲು ಸ್ನೇಹವನ್ನು ಬದಿಗಿಡಲೇಬೇಕಾದ ಅನಿವಾರ್ಯತೆ ಎದುರಾಗಿದ್ದು, ಗಗನ್ ಚಿನ್ನಪ್ಪ ಅವರು ತಮ್ಮ ಆತ್ಮೀಯ ಸ್ನೇಹಿತ ತಾಂಡವ್ ರಾಮ್‌ಗೆ ಕಠಿಣ ಶಿಕ್ಷೆ ವಿಧಿಸುವ ಮೂಲಕ ಅಚ್ಚರಿ ಮೂಡಿಸಿದ್ದಾರೆ.

ಹೌದು... ಈ ಶೋಗೆ ಬರುವುದಕ್ಕೂ ಮುನ್ನವೇ ಗಗನ್ ಚಿನ್ನಪ್ಪ ಮತ್ತು ತಾಂಡವ್ ರಾಮ್ ನಡುವೆ ಒಳ್ಳೆಯ ಸ್ನೇಹವಿತ್ತು. ಅದೇ ಬಾಂಧವ್ಯ ಬಿಗ್ ಬಾಸ್ ಮನೆಯಲ್ಲೂ ಮುಂದುವರಿದುಕೊಂಡು ಬಂದಿತ್ತು. ಆದರೆ, ದೊಡ್ಮನೆಯ ಆಟದಲ್ಲಿ ಸ್ನೇಹ ಅಂತ ಕುಳಿತರೆ ಗೆಲ್ಲುವುದು ಕಷ್ಟಕರ, ಈ ವಿಚಾರ ಈಗಾಗಲೇ ಸ್ಪರ್ಧಿಗಳಿಗೆ ಅರ್ಥವಾಗಿದೆ. ಹೀಗಾಗಿ, ಆಟದ ದೃಷ್ಟಿಯಿಂದ ಆ ಬಂಧವನ್ನು ಸ್ವಲ್ಪ ಮಟ್ಟಿಗೆ ಸಡಿಲ ಮಾಡಿಕೊಳ್ಳಲು ಇಬ್ಬರೂ ಪ್ರಯತ್ನಿಸುತ್ತಿದ್ದಾರೆ.

ಪ್ರಸ್ತುತ ವಾರ ಬಿಗ್ ಬಾಸ್ ಮನೆಯಲ್ಲಿ 'ಲೂಟಿಕೋರರು ಮತ್ತು ಕಾವಲುಗಾರರು' ಎಂಬ ವಿನೂತನ ಥೀಮ್ ಆಧಾರಿತ ಟಾಸ್ಕ್ ನೀಡಲಾಗಿದೆ. ಮ್ಯೂಸಿಯಂ ಒಳಗೆ ಕೆಲವು ಅಮೂಲ್ಯವಾದ ವಸ್ತುಗಳನ್ನು ಇಡಲಾಗಿದ್ದು, ನಾಮಿನೇಟ್ ಆಗಿರುವ ಸ್ಪರ್ಧಿಗಳು ಲೂಟಿಕೋರರ ತಂಡದಲ್ಲಿದ್ದಾರೆ. ಇತ್ತ ಆ ವಸ್ತುಗಳನ್ನು ಕಾವಲು ಕಾಯುವ ಜವಾಬ್ದಾರಿಯನ್ನು ಕಾವಲುಗಾರರಿಗೆ ವಹಿಸಲಾಗಿದೆ. ಈ ಇಡೀ ಆಟದಲ್ಲಿ ಗಗನ್ ಚಿನ್ನಪ್ಪ ಅವರು ಉಸ್ತುವಾರಿಯಾಗಿ ಜವಾಬ್ದಾರಿ ನಿರ್ವಹಿಸುತ್ತಿದ್ದಾರೆ.

ಮತ್ತೊಂದೆಡೆ ತಾಂಡವ್ ರಾಮ್ ಅವರು ಲೂಟಿಕೋರರ ತಂಡದಲ್ಲಿ ಆಡುತ್ತಿದ್ದಾರೆ. ಇವರ ಜೊತೆಗೆ ಸೌಂದರ್ಯಾ ಶೆಟ್ಟಿ, ಆಸಿಯಾ, ಲಕ್ಷ್ಮಿ ಗೌಡ, ಕುಮಾರಿ ಹಾಗೂ ಸೋನಿಕಾ ಕೂಡ ಇದ್ದಾರೆ. ಈ ಟಾಸ್ಕ್ ನಡೆಯುತ್ತಿದ್ದ ವೇಳೆ ತಾಂಡವ್ ರಾಮ್ ಅವರು ಆಟದ ಒಂದು ನಿಯಮವನ್ನು ಉಲ್ಲಂಘನೆ ಮಾಡಿದರು. ನಿಯಮ ಮುರಿದ ಕಾರಣ ಅವರಿಗೆ ಶಿಕ್ಷೆ ನೀಡುವುದು ಅನಿವಾರ್ಯವಾಯಿತು. ಸ್ನೇಹದ ಸಲುಗೆ ಬಳಸಿ ಹೇಗಾದರೂ ಮಾಡಿ ಶಿಕ್ಷೆಯಿಂದ ತಪ್ಪಿಸಿಕೊಳ್ಳಲು ತಾಂಡವ್ ರಾಮ್ ಸಾಕಷ್ಟು ಪ್ರಯತ್ನ ಪಟ್ಟರಾದರೂ, ಗಗನ್ ಚಿನ್ನಪ್ಪ ಅವರ ಮುಂದೆ ಅವರ ಯಾವುದೇ ತಂತ್ರ ನಡೆಯಲಿಲ್ಲ.

ನಿಯಮ ಉಲ್ಲಂಘನೆ ಮಾಡಿದ್ದಕ್ಕಾಗಿ ತಾಂಡವ್ ರಾಮ್ ಅವರು 30 ನಿಮಿಷಗಳ ಕಾಲ ಜೈಲಿಗೆ ಹೋಗಲೇಬೇಕು ಎಂದು ಗಗನ್ ಚಿನ್ನಪ್ಪ ಕಡಕ್ ಆದೇಶ ಹೊರಡಿಸಿದರು. ಸ್ನೇಹಿತನಾಗಿದ್ದರೂ ಆಟದ ನಿಯಮಗಳಿಗೆ ಬೆಲೆ ಕೊಟ್ಟು, ಸ್ನೇಹದ ಮುಲಾಜಿಗೆ ಅವಕಾಶ ನೀಡದೆ ಗಗನ್ ಅವರು ತಾಂಡವ್ ಅವರನ್ನು ಜೈಲಿಗೆ ಕಳುಹಿಸಿದರು. ಈ ಘಟನೆ ಮನೆ ಮಂದಿಗೆ ಸ್ನೇಹಕ್ಕಿಂತ ನ್ಯಾಯವೇ ಮೇಲು ಎಂಬುವುದನ್ನು ಎತ್ತಿ ತೋರಿತು.

ಮತ್ತೊಂದೆಡೆ, ಕಾವಲುಗಾರರ ತಂಡದಲ್ಲಿ ಗಾನವಿ, ಯಶಸ್, ಕಿರಣ್, ಪ್ರಶಾಂತ್, ಜಗದೀಶ್ ಮತ್ತು ಧನುಷ್ ಇದ್ದಾರೆ. ಆದರೆ ಪ್ರಶಾಂತ್ ಹಾಗೂ ಗಾನವಿ ಅವರು ಲೂಟಿಕೋರರ ತಂಡದ ಪರವಾಗಿ ನಿಂತು ಆಡುತ್ತಿದ್ದಾರೆ ಎಂಬ ಅನುಮಾನ ಕೆಲ ಸ್ಪರ್ಧಿಗಳಲ್ಲಿ ಮೂಡಿದೆ. ಅದರಲ್ಲೂ ಯಶಸ್ ಅವರು ಈ ಕುರಿತು ಬಲವಾದ ಅನುಮಾನವನ್ನು ವ್ಯಕ್ತಪಡಿಸಿದ್ದಾರೆ. ಇದರಿಂದ ಮನನೊಂದ ಗಾನವಿ ಅವರು ಕಣ್ಣೀರು ಹಾಕಿದ್ದು, ಮನೆಯಲ್ಲಿ ಹೊಸದಾದ ಮನಸ್ತಾಪಗಳಿಗೆ ಹಾಗೂ ಹೈಡ್ರಾಮಾಗೆ ಇದು ದಾರಿ ಮಾಡಿ ಕೊಟ್ಟಿದೆ. ಮುಂದಿನ ದಿನಗಳಲ್ಲಿ ಈ ಸ್ನೇಹ ಮತ್ತು ಆಟದ ತಿರುವುಗಳು ಬಿಗ್ ಬಾಸ್ ಮನೆಯಲ್ಲಿ ಯಾವೆಲ್ಲಾ ಬದಲಾವಣೆ ತರಲಿವೆ ಎಂಬುದನ್ನು ಕಾದು ನೋಡಬೇಕಿದೆ.