ಪೋಸ್ಟ್ ಆಫೀಸ್ PPF ಯೋಜನೆ: ಇಲ್ಲಿ ಹೂಡಿಕೆ ಮಾಡಿದ್ರೆ ಸಿಗಲಿದೆ ಭರ್ಜರಿ ಲಾಭ!

ಅಂಚೆ ಕಚೇರಿಯ ಸಾರ್ವಜನಿಕ ಭವಿಷ್ಯ ನಿಧಿ (PPF) ಯೋಜನೆಯಲ್ಲಿ ಪ್ರಸ್ತುತ ವಾರ್ಷಿಕ ಶೇ.7.1ರಷ್ಟು ಬಡ್ಡಿ ನೀಡಲಾಗುತ್ತಿದೆ. ಈ ಯೋಜನೆಯ ಅವಧಿ 15 ವರ್ಷಗಳಾಗಿದ್ದು, ವರ್ಷಕ್ಕೆ ಕನಿಷ್ಠ ₹500ರಿಂದ ಗರಿಷ್ಠ ₹1.5 ಲಕ್ಷದವರೆಗೆ ಹೂಡಿಕೆ ಮಾಡಬಹುದು. ಬಡ್ಡಿಯ ಮೇಲೆ ಬಡ್ಡಿ ಸಿಗುವ ಸೌಲಭ್ಯದಿಂದ ದೀರ್ಘಾವಧಿಯಲ್ಲಿ ಉಳಿತಾಯ ಹೆಚ್ಚಿಸಿಕೊಳ್ಳಬಹುದು.

Written ByPuttaraj K Alur

Published: Oct 20, 2026, 08:30 PM IST|Updated: Oct 20, 2026, 08:49 PM IST

join share

ಪೋಸ್ಟ್ ಆಫೀಸ್ PPF ಯೋಜನೆ: ಇಲ್ಲಿ ಹೂಡಿಕೆ ಮಾಡಿದ್ರೆ ಸಿಗಲಿದೆ ಭರ್ಜರಿ ಲಾಭ!

Image Credit: Post Office PPF Scheme

Post Office PPF Scheme: ಭವಿಷ್ಯಕ್ಕಾಗಿ ಸುರಕ್ಷಿತವಾಗಿ ಹಣ ಉಳಿತಾಯ ಮಾಡಲು ಬಯಸುವವರಿಗೆ ಅಂಚೆ ಕಚೇರಿಯ ಸಾರ್ವಜನಿಕ ಭವಿಷ್ಯ ನಿಧಿ (Public Provident Fund - PPF) ಯೋಜನೆ ಉತ್ತಮ ಆಯ್ಕೆಗಳಲ್ಲಿ ಒಂದಾಗಿದೆ. ಸರ್ಕಾರದ ಬೆಂಬಲ ಹೊಂದಿರುವ ಈ ಯೋಜನೆಯಲ್ಲಿ ದೀರ್ಘಾವಧಿಗೆ ಹಣ ಹೂಡಿಕೆ ಮಾಡುವ ಮೂಲಕ ಬಡ್ಡಿ ಆದಾಯ ಪಡೆಯಬಹುದು. ಪ್ರಸ್ತುತ PPF ಯೋಜನೆಗೆ ವಾರ್ಷಿಕ ಶೇ.7.1ರಷ್ಟು ಬಡ್ಡಿದರ ಅನ್ವಯಿಸುತ್ತಿದ್ದು, ಯೋಜನೆಯ ಮೂಲ ಅವಧಿ 15 ವರ್ಷಗಳಾಗಿದೆ.

PPF ಯೋಜನೆಯ ಬಡ್ಡಿದರ ಎಷ್ಟು?

2026ರ ಅಕ್ಟೋಬರ್‌ನಿಂದ ಡಿಸೆಂಬರ್‌ವರೆಗಿನ ತ್ರೈಮಾಸಿಕದಲ್ಲಿಯೂ PPF ಬಡ್ಡಿದರವನ್ನು ಶೇ. 7.1ರಲ್ಲೇ ಮುಂದುವರಿಸಲಾಗಿದೆ. ಕೇಂದ್ರ ಸರ್ಕಾರವು ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿದರಗಳನ್ನ ಪ್ರತಿ ಮೂರು ತಿಂಗಳಿಗೊಮ್ಮೆ ಪರಿಶೀಲಿಸುತ್ತದೆ. ಹೀಗಾಗಿ ಭವಿಷ್ಯದಲ್ಲಿ ಬಡ್ಡಿದರ ಬದಲಾಗುವ ಸಾಧ್ಯತೆ ಇರುತ್ತದೆ. ಪ್ರಸ್ತುತ ದರವು ಮುಂದಿನ 15 ವರ್ಷಗಳಿಗೂ ಇದೇ ರೀತಿ ಮುಂದುವರಿಯುತ್ತದೆ ಎಂಬ ಖಾತರಿ ಇಲ್ಲ. PPF ಖಾತೆಯಲ್ಲಿ ಬಡ್ಡಿಯನ್ನ ವಾರ್ಷಿಕವಾಗಿ ಸಂಯೋಜಿಸಲಾಗುತ್ತದೆ. ಇದರಿಂದ ಬಡ್ಡಿಯ ಮೇಲೆಯೂ ಮುಂದಿನ ವರ್ಷಗಳಲ್ಲಿ ಬಡ್ಡಿ ಗಳಿಸುವ ಅವಕಾಶ ಸಿಗುತ್ತದೆ. ದೀರ್ಘಾವಧಿಯ ಉಳಿತಾಯ ಗುರಿಗಳನ್ನ ಹೊಂದಿರುವವರಿಗೆ ಈ ವಿಧಾನ ಸಹಾಯಕವಾಗಬಹುದು.

ಕನಿಷ್ಠ ₹500ರಿಂದ ಹೂಡಿಕೆ ಆರಂಭಿಸಬಹುದು

PPF ಖಾತೆಯನ್ನ ತೆರೆಯಲು ಒಂದು ಹಣಕಾಸು ವರ್ಷದಲ್ಲಿ ಕನಿಷ್ಠ ₹500 ಠೇವಣಿ ಮಾಡಬೇಕು. ಒಂದು ವರ್ಷದಲ್ಲಿ ಗರಿಷ್ಠ ₹1.5 ಲಕ್ಷದವರೆಗೆ ಹೂಡಿಕೆ ಮಾಡಬಹುದು. ಹಣವನ್ನ ಒಂದೇ ಬಾರಿಗೆ ಅಥವಾ ನಿಯಮಗಳಿಗೆ ಅನುಗುಣವಾಗಿ ಹಲವು ಕಂತುಗಳಲ್ಲಿ ಠೇವಣಿ ಮಾಡಬಹುದು. ಸಣ್ಣ ಮೊತ್ತದಿಂದ ಉಳಿತಾಯ ಆರಂಭಿಸಲು ಬಯಸುವವರಿಗೂ ಈ ಯೋಜನೆ ಅವಕಾಶ ನೀಡುತ್ತದೆ. ಉದಾಹರಣೆಗೆ ಪ್ರತಿವರ್ಷ ₹50,000 ಹೂಡಿಕೆ ಮಾಡಿದರೆ 15 ವರ್ಷಗಳಲ್ಲಿ ನಿಮ್ಮ ಒಟ್ಟು ಮೂಲ ಹೂಡಿಕೆ ₹7.5 ಲಕ್ಷವಾಗುತ್ತದೆ. ಅಂತಿಮವಾಗಿ ದೊರೆಯುವ ಮೊತ್ತವು ಪ್ರತಿ ವರ್ಷ ಅನ್ವಯಿಸುವ ಬಡ್ಡಿದರ ಮತ್ತು ಠೇವಣಿಯ ಸಮಯವನ್ನ ಅವಲಂಬಿಸಿರುತ್ತದೆ.

15 ವರ್ಷಗಳ ನಂತರ ಹಣ ಹಿಂಪಡೆಯಬಹುದು

PPF ಯೋಜನೆಯ ಮೂಲ ಅವಧಿ 15 ವರ್ಷಗಳು. ಸಾಮಾನ್ಯವಾಗಿ ಖಾತೆ ತೆರೆದ ಹಣಕಾಸು ವರ್ಷದ ಅಂತ್ಯದಿಂದ 15 ವರ್ಷಗಳ ಅವಧಿಯನ್ನ ಲೆಕ್ಕ ಹಾಕಲಾಗುತ್ತದೆ. ಅವಧಿ ಪೂರ್ಣಗೊಂಡ ನಂತರ ನಿಯಮಗಳಿಗೆ ಅನುಗುಣವಾಗಿ ಹಣವನ್ನ ಹಿಂಪಡೆಯಬಹುದು. ಹೂಡಿಕೆಯನ್ನ ಇನ್ನಷ್ಟು ವರ್ಷ ಮುಂದುವರಿಸಲು ಬಯಸುವವರು ಐದು ವರ್ಷಗಳ ಅವಧಿಯ ಬ್ಲಾಕ್‌ಗಳಲ್ಲಿ ಖಾತೆಯನ್ನ ವಿಸ್ತರಿಸಿಕೊಳ್ಳುವ ಅವಕಾಶವೂ ಇದೆ. ಹೀಗಾಗಿ ನಿವೃತ್ತಿ ಜೀವನ, ಮಕ್ಕಳ ಶಿಕ್ಷಣ ಅಥವಾ ಭವಿಷ್ಯದ ಪ್ರಮುಖ ವೆಚ್ಚಗಳಿಗೆ ಹಣ ಸಂಗ್ರಹಿಸಲು ಈ ಯೋಜನೆ ನೆರವಾಗಬಹುದು.

ತೆರಿಗೆ ಪ್ರಯೋಜನವೂ ಲಭ್ಯ

PPF ಯೋಜನೆಯ ಮತ್ತೊಂದು ಪ್ರಮುಖ ಆಕರ್ಷಣೆ ತೆರಿಗೆ ಪ್ರಯೋಜನವಾಗಿದೆ. ಅರ್ಹ ಠೇವಣಿಗಳಿಗೆ ಹಳೆಯ ಆದಾಯ ತೆರಿಗೆ ಪದ್ಧತಿಯಲ್ಲಿ ಸೆಕ್ಷನ್‌ 80C ಅಡಿಯಲ್ಲಿ ನಿಯಮಾನುಸಾರ ಕಡಿತ ಪಡೆಯಬಹುದು. PPF ಮೇಲಿನ ಬಡ್ಡಿ ಮತ್ತು ನಿಯಮಾನುಸಾರ ದೊರೆಯುವ ಮೆಚ್ಯೂರಿಟಿ ಮೊತ್ತವೂ ತೆರಿಗೆ ವಿನಾಯಿತಿಗೆ ಒಳಪಡುತ್ತವೆ. ಆದರೆ ಸೆಕ್ಷನ್‌ 80C ಕಡಿತವು ಹೊಸ ತೆರಿಗೆ ಪದ್ಧತಿಯಲ್ಲಿ ಸಾಮಾನ್ಯವಾಗಿ ಲಭ್ಯವಿರುವುದಿಲ್ಲ. ಆದ್ದರಿಂದ ಹೂಡಿಕೆ ಮಾಡುವ ಮೊದಲು ತಮ್ಮ ತೆರಿಗೆ ಪದ್ಧತಿ ಮತ್ತು ವೈಯಕ್ತಿಕ ಅರ್ಹತೆಯನ್ನ ಪರಿಶೀಲಿಸಬೇಕು.

ಹೂಡಿಕೆ ಮಾಡುವ ಮೊದಲು ಗಮನಿಸಬೇಕಾದ ಅಂಶಗಳು

PPF ದೀರ್ಘಾವಧಿಯ ಉಳಿತಾಯ ಯೋಜನೆಯಾಗಿರುವುದರಿಂದ ತುರ್ತು ಅಗತ್ಯಗಳಿಗೆ ಬೇಕಾಗುವ ಹಣವನ್ನ ಸಂಪೂರ್ಣವಾಗಿ ಇದರಲ್ಲಿ ಹೂಡಿಕೆ ಮಾಡುವುದು ಸೂಕ್ತವಲ್ಲ. ನಿಗದಿತ ನಿಯಮಗಳಡಿ ಸಾಲ ಮತ್ತು ಅವಧಿಗೂ ಮುನ್ನ ಹಣ ಹಿಂಪಡೆಯುವ ಸೌಲಭ್ಯಗಳಿದ್ದರೂ, ಅವುಗಳಿಗೆ ಷರತ್ತುಗಳು ಅನ್ವಯಿಸುತ್ತವೆ. ಬಡ್ಡಿಯನ್ನ ಲೆಕ್ಕ ಹಾಕುವಾಗ ಪ್ರತಿ ತಿಂಗಳ 5ನೇ ದಿನದ ಅಂತ್ಯದಿಂದ ತಿಂಗಳ ಕೊನೆಯ ದಿನದವರೆಗಿನ ಕನಿಷ್ಠ ಬ್ಯಾಲೆನ್ಸ್‌ ಪರಿಗಣಿಸಲಾಗುತ್ತದೆ. ಆದ್ದರಿಂದ ಸಾಧ್ಯವಾದರೆ ತಿಂಗಳ 5ನೇ ದಿನದೊಳಗೆ ಹಣ ಠೇವಣಿ ಮಾಡುವುದರಿಂದ ಆ ತಿಂಗಳ ಬಡ್ಡಿ ಲೆಕ್ಕಾಚಾರಕ್ಕೆ ಅನುಕೂಲವಾಗಬಹುದು.

ಒಟ್ನಲ್ಲಿ ಪೋಸ್ಟ್ ಆಫೀಸ್ PPF ಯೋಜನೆಯು ಶಿಸ್ತುಬದ್ಧ ದೀರ್ಘಾವಧಿಯ ಉಳಿತಾಯಕ್ಕೆ ಉಪಯುಕ್ತ ಆಯ್ಕೆಯಾಗಿದೆ. ಹೂಡಿಕೆ ಆರಂಭಿಸುವ ಮುನ್ನ ಪ್ರಸ್ತುತ ಬಡ್ಡಿದರ, ಹಣ ಹಿಂಪಡೆಯುವ ನಿಯಮಗಳು ಮತ್ತು ತೆರಿಗೆ ಪ್ರಯೋಜನಗಳನ್ನ ಅಧಿಕೃತ ಮೂಲಗಳಲ್ಲಿ ಪರಿಶೀಲಿಸುವುದು ಉತ್ತಮ.

(ಗಮನಿಸಿರಿ: ಈ ಲೇಖನವನ್ನು ಮಾಹಿತಿ ಉದ್ದೇಶಗಳಿಗಾಗಿ ಮಾತ್ರ ಬರೆಯಲಾಗಿದೆ. ಯಾವುದೇ ರೀತಿಯ ಹೂಡಿಕೆ ಮಾಡುವ ಮೊದಲು ಅಥವಾ ಯಾವುದೇ ಹಣಕಾಸಿನ ಅಪಾಯವನ್ನು ತೆಗೆದುಕೊಳ್ಳುವ ಮೊದಲು ನಿಮ್ಮ ಹಣಕಾಸು ಸಲಹೆಗಾರರನ್ನು ಸಂಪರ್ಕಿಸಿ. ಯಾವುದೇ ರೀತಿಯ ಅಪಾಯಕ್ಕೆ Zee Kannada News ಜವಾಬ್ದಾರನಾಗಿರುವುದಿಲ್ಲ.)

Add Zee News as a Preferred Source

TAGS:

Business

Kannada News

About the Author

Puttaraj K Alur

ಪುಟ್ಟರಾಜ ಕೆ. ಆಲೂರ (Puttaraj K Alur) ಅನುಭವಿ ಪತ್ರಕರ್ತರಾಗಿದ್ದು, ಪ್ರಸ್ತುತ ಜೀ ಕನ್ನಡ ನ್ಯೂಸ್‌ನ ಡಿಜಿಟಲ್ ವಿಭಾಗದಲ್ಲಿ ಸೀನಿಯರ್ ಸಬ್ ಎಡಿಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಮುದ್ರಣ, ದೂರದರ್ಶನ ಮತ್ತು ಡಿಜಿಟಲ್ ಮಾಧ್ಯಮ ಸೇರಿದಂತೆ ಪತ್ರಿಕೋದ್ಯಮದ ವಿವಿಧ ಕ್ಷೇತ್ರಗಳಲ್ಲಿ 10ಕ್ಕೂ ಹೆಚ್ಚು ವರ್ಷಗಳ ವೃತ್ತಿಪರ ಅನುಭವ ಹೊಂದಿದ್ದಾರೆ. ಮೈಸೂರಿನ ರಾಜ್ಯಧರ್ಮ ಮತ್ತು ಮೈಸೂರು ಮಿತ್ರ ದಿನಪತ್ರಿಕೆಗಳಲ್ಲಿ ವೃತ್ತಿಜೀವನ ಆರಂಭಿಸಿದ ಅವರು, ಬೆಂಗಳೂರಿನ ದಿಗ್ವಿಜಯ ನ್ಯೂಸ್, ದೆಹಲಿಯ ಒಪೇರಾ ನ್ಯೂಸ್, ಯುಸಿ ನ್ಯೂಸ್ ಮತ್ತು ಒಪೊಯಿ ನ್ಯೂಸ್ ಸೇರಿದಂತೆ ಹಲವು ಮಾಧ್ಯಮ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ.ಕಳೆದ 5 ವರ್ಷಗಳಿಂದ ಜೀ ಕನ್ನಡ ನ್ಯೂಸ್‌ನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅವರು, ವಿವಿಧ ವಿಷಯಗಳ ಸುದ್ದಿಗಳನ್ನು ಸರಳ, ಸ್ಪಷ್ಟ ಮತ್ತು ಓದುಗರಿಗೆ ಆಸಕ್ತಿದಾಯಕವಾಗಿ ಪ್ರಸ್ತುತಪಡಿಸುವಲ್ಲಿ ಪರಿಣತಿ ಹೊಂದಿದ್ದಾರೆ. ಮೈಸೂರು ವಿಶ್ವವಿದ್ಯಾನಿಲಯದ ಮಾನಸಗಂಗೋತ್ರಿಯಲ್ಲಿ M.Sc. in Electronic Media ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಮನರಂಜನೆ, ಕ್ರೀಡೆ, ಜ್ಯೋತಿಷ್ಯ ಮತ್ತು ಆಧ್ಯಾತ್ಮಿಕತೆ, ಆರೋಗ್ಯ, ಲೈಫ್‌ಸ್ಟೈಲ್, ವೈರಲ್ ಸುದ್ದಿಗಳು, ಬ್ಯುಸಿನೆಸ್ ಹಾಗೂ ಷೇರು ಮಾರುಕಟ್ಟೆ ಸೇರಿದಂತೆ ಹಲವು ವಿಭಾಗಗಳಲ್ಲಿ ಸುದ್ದಿ ಬರವಣಿಗೆಯ ಅನುಭವ ಹೊಂದಿದ್ದಾರೆ.