SOCIAL MEDIA

Newsletter

PARTNER SITES
Select Language Select State

108 ಕಿ.ಮೀ ರೇಂಜ್‌, 16 ಇಂಚಿನ ಚಕ್ರಗಳು! ಯಮಹಾದ ಹೊಸ ಎಲೆಕ್ಟ್ರಿಕ್ ಸ್ಕೂಟರ್‌ Xenter E ಅನಾವರಣ

ಯಮಹಾ ಅನಾವರಣಗೊಳಿಸಿರುವ Xenter E ಎಲೆಕ್ಟ್ರಿಕ್ ಸ್ಕೂಟರ್ ಒಂದೇ ಚಾರ್ಜ್‌ನಲ್ಲಿ 108 ಕಿ.ಮೀ.ವರೆಗೆ ಸಂಚರಿಸುವ ಸಾಮರ್ಥ್ಯ ಹೊಂದಿದೆ. ಇದರಲ್ಲಿ 3.5 kWh ಬ್ಯಾಟರಿ, 7.5 kW ಎಲೆಕ್ಟ್ರಿಕ್ ಮೋಟಾರ್ ಹಾಗೂ 16 ಇಂಚಿನ ದೊಡ್ಡ ಚಕ್ರಗಳನ್ನ ನೀಡಲಾಗಿದೆ. 5 ಇಂಚಿನ TFT ಡಿಸ್‌ಪ್ಲೇ, ನ್ಯಾವಿಗೇಷನ್, ABS, ಟ್ರಾಕ್ಷನ್ ಕಂಟ್ರೋಲ್, ರಿವರ್ಸ್ ಫಂಕ್ಷನ್ ಸೇರಿದಂತೆ ಹಲವು ಆಧುನಿಕ ವೈಶಿಷ್ಟ್ಯಗಳಿವೆ. ಬ್ಯಾಟರಿಯನ್ನ ಸಂಪೂರ್ಣ ಚಾರ್ಜ್ ಮಾಡಲು ಸುಮಾರು 5.5 ಗಂಟೆ ಬೇಕಾಗುತ್ತದೆ.

Written By Puttaraj K Alur
Published: Nov 15, 2026, 17:39 IST | Updated: Nov 15, 2026, 17:47 IST
Image Credit: Yamaha Xenter E
Join

Yamaha Electric Scooter: ಎಲೆಕ್ಟ್ರಿಕ್ ವಾಹನಗಳ ಮಾರುಕಟ್ಟೆಯಲ್ಲಿ ತನ್ನ ಹೊಸ ಮಾದರಿಯೊಂದಿಗೆ ಯಮಹಾ (Yamaha) ಗಮನ ಸೆಳೆದಿದೆ. ಕಂಪನಿಯು 'Xenter E' ಹೆಸರಿನ ನೂತನ ಎಲೆಕ್ಟ್ರಿಕ್ ಸ್ಕೂಟರ್ ಅನ್ನ ಅನಾವರಣಗೊಳಿಸಿದ್ದು, ಒಂದೇ ಬಾರಿ ಸಂಪೂರ್ಣ ಚಾರ್ಜ್ ಮಾಡಿದರೆ 108 ಕಿಲೋಮೀಟರ್‌ವರೆಗೆ ಸಂಚರಿಸುವ ಸಾಮರ್ಥ್ಯ ಹೊಂದಿದೆ. ವಿಭಿನ್ನ ವಿನ್ಯಾಸ, ದೊಡ್ಡ ಚಕ್ರಗಳು, ಶಕ್ತಿಶಾಲಿ ಎಲೆಕ್ಟ್ರಿಕ್ ಮೋಟಾರ್ ಮತ್ತು ಆಧುನಿಕ ತಂತ್ರಜ್ಞಾನದ ವೈಶಿಷ್ಟ್ಯಗಳು ಈ ಸ್ಕೂಟರ್‌ನ ಪ್ರಮುಖ ಆಕರ್ಷಣೆಗಳಾಗಿವೆ.

ಯಮಹಾ ಈ ಹೊಸ ಸ್ಕೂಟರ್ ಅನ್ನ 125 ಸಿಸಿ ಪೆಟ್ರೋಲ್ ಸ್ಕೂಟರ್‌ಗೆ ಸಮಾನವಾದ ಎಲೆಕ್ಟ್ರಿಕ್ ಮಾದರಿಯಾಗಿ ಪರಿಚಯಿಸಿದೆ. ಮುಖ್ಯವಾಗಿ ನಗರ ಪ್ರದೇಶಗಳಲ್ಲಿ ಪ್ರತಿನಿತ್ಯ ಪ್ರಯಾಣಿಸುವವರು ಹಾಗೂ ಕಚೇರಿಗೆ ತೆರಳುವವರ ಅಗತ್ಯಗಳನ್ನ ಗಮನದಲ್ಲಿಟ್ಟುಕೊಂಡು ಇದನ್ನ ವಿನ್ಯಾಸಗೊಳಿಸಲಾಗಿದೆ. ಸದ್ದಿಲ್ಲದೆ ಕಾರ್ಯನಿರ್ವಹಿಸುವ ಎಲೆಕ್ಟ್ರಿಕ್ ಮೋಟಾರ್ ಇದರ ಮತ್ತೊಂದು ವಿಶೇಷತೆಯಾಗಿದೆ.

ವಿಭಿನ್ನ ವಿನ್ಯಾಸ, 16 ಇಂಚಿನ ದೊಡ್ಡ ಚಕ್ರಗಳು

ಯಮಹಾ Xenter E ಸ್ಕೂಟರ್‌ನ ವಿನ್ಯಾಸವು ಸಾಮಾನ್ಯ ಸ್ಕೂಟರ್‌ಗಳಿಗಿಂತ ವಿಭಿನ್ನವಾಗಿದೆ. ಮುಂಭಾಗದಲ್ಲಿ ಆಯತಾಕಾರದ ಹೆಡ್‌ಲೈಟ್ ನೀಡಲಾಗಿದ್ದು, ಸರಳ ಮತ್ತು ಆಕರ್ಷಕ ವಿನ್ಯಾಸಕ್ಕೆ ಆದ್ಯತೆ ನೀಡಲಾಗಿದೆ. ವಿಶಾಲವಾದ ಫ್ಲೋರ್‌ಬೋರ್ಡ್ ಇರುವುದರಿಂದ ಸವಾರರಿಗೆ ಕಾಲುಗಳನ್ನ ಆರಾಮವಾಗಿ ಇರಿಸಿಕೊಳ್ಳಲು ಅವಕಾಶವಿದೆ. ಎರಡು ಭಾಗಗಳ ಸೀಟ್ ಹಾಗೂ ಅಲ್ಯೂಮಿನಿಯಂ ಸ್ವಿಂಗ್‌ಆರ್ಮ್ ಕೂಡ ಇದರ ವಿನ್ಯಾಸದ ಪ್ರಮುಖ ಅಂಶಗಳಾಗಿವೆ.

ಈ ಸ್ಕೂಟರ್‌ನ ಪ್ರಮುಖ ವಿಶೇಷತೆಯೆಂದರೆ ಮುಂಭಾಗ ಮತ್ತು ಹಿಂಭಾಗದಲ್ಲಿ ನೀಡಲಾಗಿರುವ 16 ಇಂಚಿನ ದೊಡ್ಡ ಚಕ್ರಗಳು. ಮುಂಭಾಗದಲ್ಲಿ 100 ಸೆಕ್ಷನ್ ಹಾಗೂ ಹಿಂಭಾಗದಲ್ಲಿ 120 ಸೆಕ್ಷನ್ ಟೈರ್‌ಗಳನ್ನ ಅಳವಡಿಸಲಾಗಿದೆ. ರಸ್ತೆಯಲ್ಲಿನ ಗುಂಡಿಗಳು ಮತ್ತು ಅಸಮತಟ್ಟಾದ ಮೇಲ್ಮೈಗಳಲ್ಲಿ ಸವಾರರಿಗೆ ಉತ್ತಮ ಅನುಭವ ನೀಡುವ ಉದ್ದೇಶದಿಂದ ದೊಡ್ಡ ಚಕ್ರಗಳನ್ನ ಬಳಸಲಾಗಿದೆ.

ಮುಂಭಾಗದಲ್ಲಿ ಟೆಲಿಸ್ಕೋಪಿಕ್ ಫೋರ್ಕ್ ಮತ್ತು ಹಿಂಭಾಗದಲ್ಲಿ ಶಾಕ್ ಅಬ್ಸಾರ್ಬರ್ ವ್ಯವಸ್ಥೆ ನೀಡಲಾಗಿದೆ. ಬ್ರೇಕಿಂಗ್‌ಗಾಗಿ ಎರಡೂ ಚಕ್ರಗಳಲ್ಲಿ 245 ಎಂಎಂ ಡಿಸ್ಕ್ ಬ್ರೇಕ್‌ಗಳನ್ನ ಅಳವಡಿಸಲಾಗಿದೆ. ಸ್ಕೂಟರ್‌ನ ಒಟ್ಟಾರೆ ತೂಕ 121 ಕೆ.ಜಿ. ಇದ್ದು, ಸೀಟ್ ಎತ್ತರ 790 ಎಂಎಂ ಆಗಿದೆ. ಗ್ರೌಂಡ್ ಕ್ಲಿಯರೆನ್ಸ್ 145 ಎಂಎಂ ನೀಡಲಾಗಿದೆ.

108 ಕಿ.ಮೀ ರೇಂಜ್ ನೀಡುವ ಬ್ಯಾಟರಿ

Xenter E ಎಲೆಕ್ಟ್ರಿಕ್ ಸ್ಕೂಟರ್‌ನಲ್ಲಿ 3.5 kWh ಸಾಮರ್ಥ್ಯದ ಲಿಥಿಯಂ-ಐಯಾನ್ ಬ್ಯಾಟರಿ ಅಳವಡಿಸಲಾಗಿದೆ. ಕಂಪನಿ ನೀಡಿರುವ ಮಾಹಿತಿಯ ಪ್ರಕಾರ, ಸಂಪೂರ್ಣ ಚಾರ್ಜ್‌ನಲ್ಲಿ ಈ ಸ್ಕೂಟರ್ ಗರಿಷ್ಠ 108 ಕಿಲೋಮೀಟರ್‌ವರೆಗೆ ಸಂಚರಿಸಬಲ್ಲದು. ಇದರಲ್ಲಿ 7.5 kW ಗರಿಷ್ಠ ಸಾಮರ್ಥ್ಯದ ಎಲೆಕ್ಟ್ರಿಕ್ ಮೋಟಾರ್ ಬಳಸಲಾಗಿದೆ. ಈ ಮೋಟಾರ್ 33.3 Nm ಟಾರ್ಕ್ ಉತ್ಪಾದಿಸುವ ಸಾಮರ್ಥ್ಯ ಹೊಂದಿದೆ. ಬ್ಯಾಟರಿಯನ್ನ ಸ್ಕೂಟರ್‌ನ ಫ್ರೇಮ್‌ಗೆ ಹೊಂದಿಸಲಾಗಿದ್ದು, ಹಿಂಬದಿ ಚಕ್ರಕ್ಕೆ ಶಕ್ತಿ ರವಾನಿಸಲು ಬೆಲ್ಟ್ ಡ್ರೈವ್ ವ್ಯವಸ್ಥೆ ಬಳಸಲಾಗಿದೆ. 

ಬ್ಯಾಟರಿ ಫಿಕ್ಸ್‌ಡ್ ಮಾದರಿಯದ್ದಾಗಿದೆ. ಅಂದರೆ, ಬಳಕೆದಾರರು ಅದನ್ನು ಸುಲಭವಾಗಿ ತೆಗೆದು ಪ್ರತ್ಯೇಕವಾಗಿ ಚಾರ್ಜ್ ಮಾಡಲು ಸಾಧ್ಯವಿಲ್ಲ. ಚಾರ್ಜಿಂಗ್ ವಿಚಾರದಲ್ಲಿಯೂ ಕಂಪನಿ ಗಮನ ಹರಿಸಿದೆ. ಸ್ಕೂಟರ್‌ನಲ್ಲಿ ಆನ್‌ಬೋರ್ಡ್ ಚಾರ್ಜರ್ ನೀಡಲಾಗಿದ್ದು, ಬ್ಯಾಟರಿಯನ್ನ ಶೇ.0ರಿಂದ ಶೇ.100ರಷ್ಟು ಚಾರ್ಜ್ ಮಾಡಲು ಸುಮಾರು 5.5 ಗಂಟೆಗಳ ಸಮಯ ಬೇಕಾಗುತ್ತದೆ. ಬ್ರೇಕ್ ಹಾಕುವಾಗ ಉತ್ಪತ್ತಿಯಾಗುವ ಶಕ್ತಿಯನ್ನ ಮರಳಿ ಬ್ಯಾಟರಿಗೆ ಸೇರಿಸುವ ರೀಜೆನರೇಟಿವ್ ಬ್ರೇಕಿಂಗ್ ವ್ಯವಸ್ಥೆಯೂ ಇದರಲ್ಲಿದೆ.

ಆಧುನಿಕ ತಂತ್ರಜ್ಞಾನ ಮತ್ತು ಮೂರು ರೈಡಿಂಗ್ ಮೋಡ್‌ಗಳು

ವೈಶಿಷ್ಟ್ಯಗಳ ವಿಚಾರದಲ್ಲೂ Xenter E ಗಮನ ಸೆಳೆಯುತ್ತದೆ. ಸವಾರರಿಗೆ ಅಗತ್ಯ ಮಾಹಿತಿಯನ್ನ ಒದಗಿಸಲು 5 ಇಂಚಿನ TFT ಡಿಸ್‌ಪ್ಲೇ ಅಳವಡಿಸಲಾಗಿದೆ. ಸ್ಮಾರ್ಟ್‌ಫೋನ್ ಸಂಪರ್ಕದ ಮೂಲಕ ಟರ್ನ್-ಬೈ-ಟರ್ನ್ ನ್ಯಾವಿಗೇಷನ್ ಸೇರಿದಂತೆ ಹಲವು ಸೌಲಭ್ಯಗಳನ್ನ ಬಳಸಿಕೊಳ್ಳಬಹುದು. ಬ್ಯಾಟರಿ ಸ್ಥಿತಿ, ಸರ್ವಿಸ್ ಮಾಹಿತಿ ಮತ್ತು ವಾಹನದ ಪಾರ್ಕಿಂಗ್ ಸ್ಥಳದ ವಿವರಗಳನ್ನ ತಿಳಿದುಕೊಳ್ಳಲು ಸಂಪರ್ಕ ವ್ಯವಸ್ಥೆ ನೆರವಾಗುತ್ತದೆ.

ಇದರೊಂದಿಗೆ ABS, ಟ್ರಾಕ್ಷನ್ ಕಂಟ್ರೋಲ್ ಸಿಸ್ಟಮ್, ಕೀಲೆಸ್ ಇಗ್ನಿಷನ್ ಮತ್ತು ಮೊಬೈಲ್ ಚಾರ್ಜ್ ಮಾಡಲು USB Type-C ಪೋರ್ಟ್ ನೀಡಲಾಗಿದೆ. ಸವಾರರ ಅಗತ್ಯಕ್ಕೆ ಅನುಗುಣವಾಗಿ S, T ಮತ್ತು E ಎಂಬ ಮೂರು ರೈಡಿಂಗ್ ಮೋಡ್‌ಗಳನ್ನ ಆಯ್ಕೆ ಮಾಡಿಕೊಳ್ಳಬಹುದು. ರಿವರ್ಸ್ ಫಂಕ್ಷನ್ ಕೂಡ ಲಭ್ಯವಿದ್ದು, ಕಿರಿದಾದ ಸ್ಥಳಗಳಲ್ಲಿ ಸ್ಕೂಟರ್ ಅನ್ನ ಹಿಂದಕ್ಕೆ ಚಲಿಸಲು ಸಹಾಯ ಮಾಡುತ್ತದೆ.

ಈ ಮೂಲಕ ಯಮಹಾ ತನ್ನ ಎಲೆಕ್ಟ್ರಿಕ್ ಸ್ಕೂಟರ್ ವಿಭಾಗಕ್ಕೆ ಹೊಸ ಮಾದರಿಯನ್ನ ಪರಿಚಯಿಸಿದೆ. 108 ಕಿ.ಮೀ ರೇಂಜ್, 16 ಇಂಚಿನ ಚಕ್ರಗಳು, 7.5 kW ಮೋಟಾರ್ ಮತ್ತು ಹಲವು ಆಧುನಿಕ ವೈಶಿಷ್ಟ್ಯಗಳನ್ನ ಒಳಗೊಂಡಿರುವ Xenter E ಸದ್ಯ ವಾಹನ ಪ್ರಿಯರ ಗಮನ ಸೆಳೆದಿದೆ.

Add Zee News as a Preferred Source
TAGS:

About the Author

ಪುಟ್ಟರಾಜ ಕೆ. ಆಲೂರ (Puttaraj K Alur) ಅನುಭವಿ ಪತ್ರಕರ್ತರಾಗಿದ್ದು, ಪ್ರಸ್ತುತ ಜೀ ಕನ್ನಡ ನ್ಯೂಸ್‌ನ ಡಿಜಿಟಲ್ ವಿಭಾಗದಲ್ಲಿ ಸೀನಿಯರ್ ಸಬ್ ಎಡಿಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಮುದ್ರಣ, ದೂರದರ್ಶನ ಮತ್ತು ಡಿಜಿಟಲ್ ಮಾಧ್ಯಮ ಸೇರಿದಂತೆ ಪತ್ರಿಕೋದ್ಯಮದ ವಿವಿಧ ಕ್ಷೇತ್ರಗಳಲ್ಲಿ 10ಕ್ಕೂ ಹೆಚ್ಚು ವರ್ಷಗಳ ವೃತ್ತಿಪರ ಅನುಭವ ಹೊಂದಿದ್ದಾರೆ. ಮೈಸೂರಿನ ರಾಜ್ಯಧರ್ಮ ಮತ್ತು ಮೈಸೂರು ಮಿತ್ರ ದಿನಪತ್ರಿಕೆಗಳಲ್ಲಿ ವೃತ್ತಿಜೀವನ ಆರಂಭಿಸಿದ ಅವರು, ಬೆಂಗಳೂರಿನ ದಿಗ್ವಿಜಯ ನ್ಯೂಸ್, ದೆಹಲಿಯ ಒಪೇರಾ ನ್ಯೂಸ್, ಯುಸಿ ನ್ಯೂಸ್ ಮತ್ತು ಒಪೊಯಿ ನ್ಯೂಸ್ ಸೇರಿದಂತೆ ಹಲವು ಮಾಧ್ಯಮ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ.ಕಳೆದ 5 ವರ್ಷಗಳಿಂದ ಜೀ ಕನ್ನಡ ನ್ಯೂಸ್‌ನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅವರು, ವಿವಿಧ ವಿಷಯಗಳ ಸುದ್ದಿಗಳನ್ನು ಸರಳ, ಸ್ಪಷ್ಟ ಮತ್ತು ಓದುಗರಿಗೆ ಆಸಕ್ತಿದಾಯಕವಾಗಿ ಪ್ರಸ್ತುತಪಡಿಸುವಲ್ಲಿ ಪರಿಣತಿ ಹೊಂದಿದ್ದಾರೆ. ಮೈಸೂರು ವಿಶ್ವವಿದ್ಯಾನಿಲಯದ ಮಾನಸಗಂಗೋತ್ರಿಯಲ್ಲಿ M.Sc. in Electronic Media ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಮನರಂಜನೆ, ಕ್ರೀಡೆ, ಜ್ಯೋತಿಷ್ಯ ಮತ್ತು ಆಧ್ಯಾತ್ಮಿಕತೆ, ಆರೋಗ್ಯ, ಲೈಫ್‌ಸ್ಟೈಲ್, ವೈರಲ್ ಸುದ್ದಿಗಳು, ಬ್ಯುಸಿನೆಸ್ ಹಾಗೂ ಷೇರು ಮಾರುಕಟ್ಟೆ ಸೇರಿದಂತೆ ಹಲವು ವಿಭಾಗಗಳಲ್ಲಿ ಸುದ್ದಿ ಬರವಣಿಗೆಯ ಅನುಭವ ಹೊಂದಿದ್ದಾರೆ. 
Read More

ZEENEWS TRENDING STORIES