RC Transfer Rules: ವಾಹನ ಮಾರಾಟ ಮಾಡಿದ ನಂತರ RC Transfer ಮಾಡದಿದ್ದರೆ ಯಾರಿಗೆ ಸಮಸ್ಯೆ?

RC Transfer Rules India: ಹಳೆಯ ಬೈಕ್, ಕಾರು ಅಥವಾ ಇತರ ವಾಹನಗಳನ್ನು ಮಾರಾಟ ಮಾಡುವಾಗ ಬಹುತೇಕರು ಹಣ ಪಡೆದು, ವಾಹನ ಹಸ್ತಾಂತರಿಸಿ, ಮಾರಾಟದ ಒಪ್ಪಂದ ಅಥವಾ ರಸೀದಿ ಪಡೆದುಕೊಂಡರೆ ತಮ್ಮ ಜವಾಬ್ದಾರಿ ಮುಗಿಯಿತು ಎಂದುಕೊಳ್ಳುತ್ತಾರೆ. ಆದರೆ ವಾಹನ ಮಾರಾಟವಾದ ನಂತರವೂ ಅದರ ನೋಂದಣಿ ಪ್ರಮಾಣಪತ್ರದಲ್ಲಿ (RC) ಹಳೆಯ ಮಾಲೀಕರ ಹೆಸರೇ ಮುಂದುವರಿದಿದ್ದರೆ, ಮುಂದಿನ ದಿನಗಳಲ್ಲಿ ಕಾನೂನು ಮತ್ತು ಆಡಳಿತಾತ್ಮಕ ಸಮಸ್ಯೆಗಳು ಎದುರಾಗುವ ಸಾಧ್ಯತೆ ಇರುತ್ತದೆ.

ವಾಹನವನ್ನು ಮಾರಾಟ ಮಾಡಿದ ಬಳಿಕ RCಯಲ್ಲಿ ಹೊಸ ಮಾಲೀಕರ ಹೆಸರನ್ನು ಬದಲಾಯಿಸುವುದು ಅತ್ಯಂತ ಮುಖ್ಯ. ಇಲ್ಲದಿದ್ದರೆ ವಾಹನವನ್ನು ಖರೀದಿಸಿದ ವ್ಯಕ್ತಿ ಅಪಘಾತ ಮಾಡಿದರೂ, ಸಂಚಾರ ನಿಯಮ ಉಲ್ಲಂಘಿಸಿದರೂ ಅಥವಾ ಬೇರೆ ಯಾವುದೇ ಕಾನೂನು ಸಮಸ್ಯೆಯಲ್ಲಿ ಸಿಲುಕಿದರೂ, ದಾಖಲೆಗಳಲ್ಲಿ ಹೆಸರು ಇರುವ ಹಳೆಯ ಮಾಲೀಕರಿಗೆ ಮೊದಲು ಪ್ರಶ್ನೆಗಳು ಎದುರಾಗಬಹುದು.

RC Transfer ಎಂದರೇನು?

ವಾಹನದ ಮಾಲೀಕತ್ವ ಬದಲಾವಣೆಯನ್ನು ಅಧಿಕೃತವಾಗಿ ಸಾರಿಗೆ ಇಲಾಖೆಯ ದಾಖಲೆಗಳಲ್ಲಿ ದಾಖಲಿಸುವ ಪ್ರಕ್ರಿಯೆಯೇ RC Transfer. ವಾಹನ ಮಾರಾಟವಾದ ನಂತರ ನೋಂದಣಿ ಪ್ರಮಾಣಪತ್ರದಲ್ಲಿ ಹಿಂದಿನ ಮಾಲೀಕರ ಬದಲು ಖರೀದಿದಾರರ ಹೆಸರು ಸೇರ್ಪಡೆಯಾಗುತ್ತದೆ. ಕೇವಲ ಮಾರಾಟ ಪತ್ರ ಬರೆದಿರುವುದು ಅಥವಾ ವಾಹನದ ಕೀಲಿ ಹಸ್ತಾಂತರಿಸಿರುವುದರಿಂದ ಸರ್ಕಾರಿ ದಾಖಲೆಗಳಲ್ಲಿ ಮಾಲೀಕತ್ವ ಬದಲಾದಂತಾಗುವುದಿಲ್ಲ. ಆರ್‌ಟಿಒ ದಾಖಲೆಗಳಲ್ಲಿ ಹೊಸ ಮಾಲೀಕರ ಹೆಸರು ದಾಖಲಾಗುವುದು ಮುಖ್ಯ.  

ಮಾರಾಟ ಮಾಡಿದ ಹಳೆಯ ಮಾಲೀಕರಿಗೆ ಏನು ಸಮಸ್ಯೆ?

ವಾಹನ ಮಾರಾಟವಾದ ಬಳಿಕವೂ RCಯಲ್ಲಿ ನಿಮ್ಮ ಹೆಸರೇ ಇದ್ದರೆ, ಆ ವಾಹನದ ಬಗ್ಗೆ ಬರುವ ಅಧಿಕೃತ ನೋಟಿಸ್‌ಗಳು, ದಂಡದ ವಿಚಾರಣೆ ಅಥವಾ ಅಪಘಾತಕ್ಕೆ ಸಂಬಂಧಿಸಿದ ಪ್ರಶ್ನೆಗಳು ಮೊದಲು ನಿಮ್ಮವರೆಗೆ ಬರಬಹುದು. ಉದಾಹರಣೆಗೆ ನೀವು ಬೈಕ್‌ವೊಂದನ್ನು ಮಾರಾಟ ಮಾಡಿದ್ದೀರಿ ಎಂದುಕೊಳ್ಳಿ. ಖರೀದಿದಾರರು RC Transfer ಮಾಡಿಸದೆ ಅದೇ ವಾಹನವನ್ನು ಬಳಸುತ್ತಿದ್ದಾರೆ. ನಂತರ ಆ ವಾಹನ ಸಂಚಾರ ನಿಯಮ ಉಲ್ಲಂಘನೆಯಲ್ಲಿ ಸಿಲುಕಿದರೆ ಅಥವಾ ಅಪಘಾತ ಸಂಭವಿಸಿದರೆ, ನೋಂದಣಿ ದಾಖಲೆಗಳಲ್ಲಿ ನಿಮ್ಮ ಹೆಸರಿರುವ ಕಾರಣ ಅಧಿಕಾರಿಗಳು ನಿಮ್ಮನ್ನು ಸಂಪರ್ಕಿಸುವ ಸಾಧ್ಯತೆ ಇರುತ್ತದೆ. ಇದರಿಂದ ನೀವು ವಾಹನವನ್ನು ಮಾರಾಟ ಮಾಡಿರುವುದನ್ನು ಸಾಬೀತುಪಡಿಸಲು ಮಾರಾಟ ಒಪ್ಪಂದ, ಹಣ ಸ್ವೀಕರಿಸಿದ ದಾಖಲೆ, ಹಸ್ತಾಂತರದ ವಿವರಗಳು ಮತ್ತು ಆರ್‌ಟಿಒಗೆ ಸಲ್ಲಿಸಿದ ದಾಖಲೆಗಳನ್ನು ತೋರಿಸಬೇಕಾದ ಪರಿಸ್ಥಿತಿ ಬರಬಹುದು.

ಅಪಘಾತವಾದರೆ ಯಾರಿಗೆ ಹೊಣೆ?

ಇದು ಅತ್ಯಂತ ಪ್ರಮುಖ ಪ್ರಶ್ನೆ. ವಾಹನ ಮಾರಾಟವಾದರೂ RCಯಲ್ಲಿ ಹಳೆಯ ಮಾಲೀಕರ ಹೆಸರೇ ಇದ್ದರೆ, ಕಾನೂನು ವಿಚಾರಣೆಯಲ್ಲಿ ನೋಂದಾಯಿತ ಮಾಲೀಕರ ಸ್ಥಾನ ಮಹತ್ವ ಪಡೆಯುತ್ತದೆ. ವಾಹನದ ಮಾರಾಟ ನಡೆದಿರುವುದು ಮಾತ್ರ ಸಾಕಾಗುವುದಿಲ್ಲ; ನೋಂದಣಿ ದಾಖಲೆಗಳಲ್ಲಿ ಮಾಲೀಕತ್ವ ಬದಲಾವಣೆಯ ಪ್ರಕ್ರಿಯೆ ಪೂರ್ಣಗೊಂಡಿದೆಯೇ ಎಂಬುದೂ ಮುಖ್ಯವಾಗುತ್ತದೆ. ಸುಪ್ರೀಂಕೋರ್ಟ್‌ನ ತೀರ್ಪುಗಳಲ್ಲಿಯೂ ನೋಂದಾಯಿತ ಮಾಲೀಕರ ಹೆಸರಿನ ಮಹತ್ವ ಮತ್ತು ವಾಹನದ ಹೊಣೆಗಾರಿಕೆಗೆ ಸಂಬಂಧಿಸಿದ ವಿಚಾರಗಳನ್ನು ವಿವರಿಸಲಾಗಿದೆ.  

ಆದರೆ ಪ್ರತಿಯೊಂದು ಅಪಘಾತದಲ್ಲೂ ಹಳೆಯ ಮಾಲೀಕರೇ ಅಂತಿಮವಾಗಿ ಹೊಣೆಗಾರರು ಎಂದು ಸರಳವಾಗಿ ಹೇಳಲು ಸಾಧ್ಯವಿಲ್ಲ. ಪ್ರಕರಣದ ವಾಸ್ತವಾಂಶಗಳು, ಮಾರಾಟದ ದಾಖಲೆಗಳು, ವಿಮೆ, ಚಾಲಕನ ತಪ್ಪು ಮತ್ತು ಅನ್ವಯಿಸುವ ಕಾನೂನುಗಳ ಆಧಾರದ ಮೇಲೆ ಹೊಣೆಗಾರಿಕೆ ನಿರ್ಧಾರವಾಗುತ್ತದೆ. ಆದರೂ RC Transfer ಮಾಡಿಸದೆ ಇರುವುದು ಹಳೆಯ ಮಾಲೀಕರಿಗೆ ಅನಗತ್ಯ ಕಾನೂನು ತೊಂದರೆ ಉಂಟುಮಾಡಬಹುದು.

ಖರೀದಿದಾರರಿಗೂ ಸಮಸ್ಯೆ ತಪ್ಪಿದ್ದಲ್ಲ

RC Transfer ಮಾಡಿಸದಿದ್ದರೆ ಖರೀದಿದಾರರಿಗೂ ಸಮಸ್ಯೆಗಳಿವೆ. ವಾಹನವನ್ನು ತಮ್ಮ ಹೆಸರಿಗೆ ವರ್ಗಾಯಿಸದೆ ಇದ್ದರೆ, ಮುಂದಿನ ದಿನಗಳಲ್ಲಿ ವಾಹನವನ್ನು ಮತ್ತೊಬ್ಬರಿಗೆ ಮಾರಾಟ ಮಾಡುವಾಗ ದಾಖಲೆ ಸಮಸ್ಯೆ ಎದುರಾಗಬಹುದು. ಅಲ್ಲದೆ ವಿಮೆ, ಸಾಲ, ವಿಳಾಸ ಬದಲಾವಣೆ, ವಾಹನದ ಮರುಮಾರಾಟ ಅಥವಾ ಇತರ ಆರ್‌ಟಿಒ ಸೇವೆಗಳನ್ನು ಪಡೆಯುವಾಗ ದಾಖಲೆಗಳಲ್ಲಿ ಹಳೆಯ ಮಾಲೀಕರ ಹೆಸರು ಇರುವುದರಿಂದ ವಿಳಂಬವಾಗಬಹುದು. ಹೀಗಾಗಿ ವಾಹನ ಖರೀದಿಸಿದವರು ಕೂಡ ವಾಹನ ಸಿಕ್ಕಿದೆ, ಇನ್ನು RC Transfer ಬೇಡ ಎಂದು ನಿರ್ಲಕ್ಷಿಸಬಾರದು.

ಕಾನೂನಿನ ಪ್ರಕಾರ ಎಷ್ಟು ದಿನಗಳಲ್ಲಿ Transfer ಮಾಡಬೇಕು?

ಮೋಟಾರು ವಾಹನ ಕಾಯ್ದೆಯ ಸೆಕ್ಷನ್ 50 ಮತ್ತು ಸಂಬಂಧಿತ ನಿಯಮಗಳ ಪ್ರಕಾರ, ವಾಹನ ಮಾರಾಟವಾದಾಗ ಮಾರಾಟಗಾರ ಮತ್ತು ಖರೀದಿದಾರರು ಮಾಲೀಕತ್ವ ಬದಲಾವಣೆಯ ಮಾಹಿತಿಯನ್ನು ಸಂಬಂಧಪಟ್ಟ ನೋಂದಣಿ ಪ್ರಾಧಿಕಾರಕ್ಕೆ ಸಲ್ಲಿಸಬೇಕು. ಸಾಮಾನ್ಯವಾಗಿ, ಅದೇ ರಾಜ್ಯದಲ್ಲಿ ನೋಂದಾಯಿತ ವಾಹನದ ಮಾಲೀಕತ್ವ ಬದಲಾವಣೆಗೆ ಖರೀದಿದಾರರು 14 ದಿನಗಳೊಳಗೆ ಅರ್ಜಿ ಸಲ್ಲಿಸಬೇಕು ಎಂದು ಪರಿವಾಹನ್ ಮಾರ್ಗಸೂಚಿಗಳಲ್ಲಿ ವಿವರಿಸಲಾಗಿದೆ. ಬೇರೆ ರಾಜ್ಯಕ್ಕೆ ಸಂಬಂಧಿಸಿದ ವಾಹನ ವರ್ಗಾವಣೆಗೆ 45 ದಿನಗಳ ಅವಧಿಯ ನಿಯಮ ಉಲ್ಲೇಖಿಸಲಾಗಿದೆ. ಮೋಟಾರು ವಾಹನ ಕಾಯ್ದೆಯ ಸೆಕ್ಷನ್ 50ರಲ್ಲಿ ಮಾರಾಟಗಾರ ಮತ್ತು ಖರೀದಿದಾರರ ಜವಾಬ್ದಾರಿಗಳನ್ನೂ ಪ್ರತ್ಯೇಕವಾಗಿ ವಿವರಿಸಲಾಗಿದೆ.  

ಯಾವ ದಾಖಲೆಗಳು ಬೇಕಾಗುತ್ತವೆ?

ವಾಹನದ ಮಾಲೀಕತ್ವ ಬದಲಾವಣೆಗೆ ಸಾಮಾನ್ಯವಾಗಿ ಫಾರ್ಮ್ 29 ಮತ್ತು ಫಾರ್ಮ್ 30 ಅಗತ್ಯವಿರುತ್ತವೆ. ಇದರ ಜೊತೆಗೆ RC, ವಿಮೆ, ಮಾಲಿನ್ಯ ನಿಯಂತ್ರಣ ಪ್ರಮಾಣಪತ್ರ ಮತ್ತು ಇತರ ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕಾಗಬಹುದು. ಪರಿವಾಹನ್ ಸೇವೆಯ ಮೂಲಕ ವಾಹನದ ನೋಂದಣಿ ಸಂಖ್ಯೆಯನ್ನು ನಮೂದಿಸಿ, ಆನ್‌ಲೈನ್ ಮಾಲೀಕತ್ವ ವರ್ಗಾವಣೆ ಪ್ರಕ್ರಿಯೆಯನ್ನು ಆರಂಭಿಸುವ ವ್ಯವಸ್ಥೆಯೂ ಇದೆ. ರಾಜ್ಯ ಮತ್ತು ಪ್ರಕರಣದ ಪ್ರಕಾರ ಹೆಚ್ಚುವರಿ ದಾಖಲೆಗಳು ಬೇಕಾಗಬಹುದು. 

ವಾಹನ ಮಾರಾಟ ಮಾಡಿದವರು ಏನು ಮಾಡಬೇಕು?

ವಾಹನ ಮಾರಾಟ ಮಾಡಿದ ತಕ್ಷಣ ಈ ಕ್ರಮಗಳನ್ನು ಕೈಗೊಳ್ಳುವುದು ಉತ್ತಮ:

* ಮಾರಾಟ ಒಪ್ಪಂದ ಅಥವಾ ಹಸ್ತಾಂತರದ ರಸೀದಿ ಪಡೆಯಿರಿ.
* ಖರೀದಿದಾರರ ಗುರುತು ಮತ್ತು ಸಂಪರ್ಕ ವಿವರಗಳನ್ನು ದಾಖಲಿಸಿಕೊಳ್ಳಿ.
* ಫಾರ್ಮ್ 29 ಮತ್ತು ಇತರ ಅಗತ್ಯ ದಾಖಲೆಗಳನ್ನು ಸರಿಯಾಗಿ ಸಲ್ಲಿಸಿ.
* RC Transfer ಅರ್ಜಿ ಸಲ್ಲಿಸಿರುವುದಕ್ಕೆ ಪುರಾವೆ ಇಟ್ಟುಕೊಳ್ಳಿ.
* ವಿಮಾ ಕಂಪನಿಗೆ ವಾಹನ ಮಾರಾಟದ ಮಾಹಿತಿಯನ್ನು ತಿಳಿಸಿ.
* ವಾಹನದ ದಂಡ ಅಥವಾ ಬಾಕಿ ವಹಿವಾಟುಗಳ ಬಗ್ಗೆ ನಂತರವೂ ಪರಿಶೀಲಿಸಿ.

ವಿಮೆಯ ವಿಷಯದಲ್ಲಿಯೂ ಮಾಲೀಕತ್ವ ಬದಲಾವಣೆಯನ್ನು ವಿಮಾ ಕಂಪನಿಗೆ ತಿಳಿಸುವುದು ಮುಖ್ಯ. ವಿಮಾ ಪಾಲಿಸಿಯಲ್ಲಿನ ಮಾಲೀಕತ್ವ ಬದಲಾವಣೆಯ ನಿಯಮಗಳನ್ನು ಪಾಲಿಸದಿದ್ದರೆ ಕ್ಲೇಮ್ ವಿಚಾರದಲ್ಲಿ ಸಮಸ್ಯೆ ಎದುರಾಗಬಹುದು ಎಂದು ವಿಮಾ ನಿಯಂತ್ರಣ ಸಂಸ್ಥೆ ತಿಳಿಸಿದೆ.

ಒಟ್ನಲ್ಲಿ ವಾಹನ ಮಾರಾಟ ಮಾಡಿದ ನಂತರ RC Transfer ಮಾಡಿಸುವುದು ಕೇವಲ ಖರೀದಿದಾರರ ಕೆಲಸವಲ್ಲ; ಮಾರಾಟಗಾರರೂ ತಮ್ಮ ಜವಾಬ್ದಾರಿಯನ್ನು ಸರಿಯಾಗಿ ಪೂರ್ಣಗೊಳಿಸಬೇಕು. ವಾಹನ ಮಾರಾಟವಾಗಿದೆ, ಇನ್ನು ನನ್ನ ಜವಾಬ್ದಾರಿ ಇಲ್ಲವೆಂಬ ನಿರ್ಲಕ್ಷ್ಯ ಮುಂದೆ ಕಾನೂನು ತೊಂದರೆಗೆ ಕಾರಣವಾಗಬಹುದು. ಹೀಗಾಗಿ ಬೈಕ್, ಕಾರು ಅಥವಾ ಯಾವುದೇ ವಾಹನ ಮಾರಾಟ ಮಾಡುವವರು ಮಾರಾಟದ ದಾಖಲೆಗಳನ್ನು ಸುರಕ್ಷಿತವಾಗಿ ಇಟ್ಟುಕೊಂಡು, RCಯಲ್ಲಿ ಹೊಸ ಮಾಲೀಕರ ಹೆಸರು ಬದಲಾಗಿರುವುದನ್ನು ಖಚಿತಪಡಿಸಿಕೊಳ್ಳುವುದು ಅತ್ಯಂತ ಅಗತ್ಯ.