ನಿಮಗೂ ಮೈಗ್ರೇನ್ ಕಾಡುತ್ತಿದೆಯೇ? ಮಾತ್ರೆ ಮಾತ್ರವಲ್ಲ, ಈ ಸರಳ ಅಭ್ಯಾಸಗಳಿಂದಲೂ ಸಿಗುತ್ತೆ ಪರಿಹಾರ

Migraine Relief Tips: ಇತ್ತೀಚಿನ ಜೀವನಶೈಲಿಯಲ್ಲಿ ಒತ್ತಡ, ನಿದ್ರೆಯ ಕೊರತೆ, ಸಮಯಕ್ಕೆ ಸರಿಯಾಗಿ ಊಟ ಮಾಡದಿರುವುದು ಹಾಗೂ ಸಾಕಷ್ಟು ನೀರು ಕುಡಿಯದಿರುವುದು ಸೇರಿದಂತೆ ಹಲವು ಕಾರಣಗಳಿಂದ ತಲೆನೋವಿನ ಸಮಸ್ಯೆ ಹೆಚ್ಚಾಗುತ್ತಿದೆ. ಅದರಲ್ಲೂ ಮೈಗ್ರೇನ್ ಸಾಮಾನ್ಯ ತಲೆನೋವಿಗಿಂತ ಭಿನ್ನವಾಗಿದ್ದು, ಕೆಲವರಿಗೆ ತೀವ್ರ ನೋವು, ಬೆಳಕು ಅಥವಾ ಶಬ್ದ ಸಹಿಸಲಾಗದ ಸ್ಥಿತಿ ಹಾಗೂ ದೈನಂದಿನ ಕೆಲಸಗಳಿಗೆ ಅಡ್ಡಿಯಾಗುವಂತಹ ಸಮಸ್ಯೆಗಳನ್ನ ಉಂಟುಮಾಡಬಹುದು. ಮೈಗ್ರೇನ್ ಸಮಸ್ಯೆಯನ್ನ ನಿಯಂತ್ರಿಸಲು ಕೆಲವು ಸರಳ ಜೀವನಶೈಲಿ ಕ್ರಮಗಳ ಬಗ್ಗೆ ತಿಳಿಯಿರಿ...  

ಮೈಗ್ರೇನ್ ಎಂದರೇನು?

ಮೈಗ್ರೇನ್‌ಅನ್ನ ಕೇವಲ ಸಾಮಾನ್ಯ ತಲೆನೋವು ಎಂದು ಪರಿಗಣಿಸಲಾಗುವುದಿಲ್ಲ. ಇದು ನರಮಂಡಲಕ್ಕೆ ಸಂಬಂಧಿಸಿದ ಸಮಸ್ಯೆಯಾಗಿದ್ದು, ತಲೆಯ ಒಂದು ಭಾಗದಲ್ಲಿ ತೀವ್ರವಾದ ಅಥವಾ ಮಿಡಿಯುವ ರೀತಿಯ ನೋವು ಕಾಣಿಸಿಕೊಳ್ಳಬಹುದು. ಕೆಲವರಿಗೆ ವಾಂತಿ, ಬೆಳಕು ಅಥವಾ ಶಬ್ದದ ಬಗ್ಗೆ ಹೆಚ್ಚು ಸಂವೇದನೆ ಸೇರಿದಂತೆ ಇತರ ಲಕ್ಷಣಗಳೂ ಕಾಣಿಸಿಕೊಳ್ಳಬಹುದು. ಒತ್ತಡ, ನಿದ್ರೆಯಲ್ಲಿನ ಬದಲಾವಣೆ, ಊಟ ತಪ್ಪಿಸುವುದು, ದೇಹದಲ್ಲಿ ನೀರಿನ ಕೊರತೆ, ತೀವ್ರ ಬೆಳಕು ಅಥವಾ ಕೆಲವು ಆಹಾರಗಳು ಕೆಲವರಲ್ಲಿ ಮೈಗ್ರೇನ್‌ಅನ್ನ ಪ್ರಚೋದಿಸಬಹುದು. ಹೀಗಾಗಿ ಮೈಗ್ರೇನ್ ಇರುವವರು ತಮ್ಮದೇ ಆದ ಟ್ರಿಗರ್‌ಗಳನ್ನ ಗುರುತಿಸುವುದು ಮುಖ್ಯ. ನಿಯಮಿತ ನಿದ್ರೆ, ಸರಿಯಾದ ಆಹಾರ ಮತ್ತು ಸಾಕಷ್ಟು ನೀರು ಕುಡಿಯುವಂತಹ ಅಭ್ಯಾಸಗಳು ಮೈಗ್ರೇನ್ ನಿರ್ವಹಣೆಯಲ್ಲಿ ಸಹಾಯಕವಾಗಬಹುದು. 

ನಿದ್ರೆಯ ಸಮಯ ಸರಿಪಡಿಸಿಕೊಳ್ಳಿ

ಮೈಗ್ರೇನ್‌ ಸಮಸ್ಯೆ ಇರುವವರು ಪ್ರತಿದಿನ ಒಂದೇ ಸಮಯಕ್ಕೆ ಮಲಗುವುದು ಮತ್ತು ಏಳುವುದಕ್ಕೆ ಆದ್ಯತೆ ನೀಡಬೇಕು ಎಂದು ತಜ್ಞರು ಸಲಹೆ ನೀಡುತ್ತಾರೆ. ನಿದ್ರೆಯ ಸಮಯದಲ್ಲಿ ಪದೇಪದೇ ಬದಲಾವಣೆ ಆಗುವುದು ಕೆಲವರಲ್ಲಿ ಮೈಗ್ರೇನ್ ದಾಳಿಯನ್ನ ಪ್ರಚೋದಿಸಬಹುದು. ವಿಶೇಷವಾಗಿ ಮಲಗುವ ಮುನ್ನ ಮೊಬೈಲ್‌, ಟಿವಿ ಅಥವಾ ಇತರ ಸ್ಕ್ರೀನ್‌ಗಳ ಬಳಕೆಯನ್ನ ಕಡಿಮೆ ಮಾಡುವುದು ಉತ್ತಮ. ಉತ್ತಮ ಗುಣಮಟ್ಟದ ಮತ್ತು ನಿಯಮಿತ ನಿದ್ರೆ ಮೈಗ್ರೇನ್ ನಿರ್ವಹಣೆಯ ಪ್ರಮುಖ ಭಾಗವಾಗಿದೆ.  

ಊಟ ತಪ್ಪಿಸಬೇಡಿ

ದೀರ್ಘ ಸಮಯ ಊಟ ಮಾಡದೆ ಇರುವುದು ಕೆಲವರಿಗೆ ಮೈಗ್ರೇನ್ ಟ್ರಿಗರ್ ಆಗಬಹುದು. ಹೀಗಾಗಿ ಕೆಲಸದ ಒತ್ತಡ ಅಥವಾ ಇತರ ಕಾರಣಗಳಿಂದ ಊಟವನ್ನ ಪದೇಪದೇ ಮುಂದೂಡುವ ಅಭ್ಯಾಸವಿದ್ದರೆ ಅದನ್ನ ಬದಲಾಯಿಸುವುದು ಒಳ್ಳೆಯದು. ಸಮಯಕ್ಕೆ ಸರಿಯಾಗಿ ಸಮತೋಲಿತ ಆಹಾರ ಸೇವಿಸುವುದು ಹಾಗೂ ದೇಹಕ್ಕೆ ಅಗತ್ಯವಿರುವ ಪೋಷಕಾಂಶಗಳನ್ನ ಒದಗಿಸುವುದು ಮುಖ್ಯ. ಯಾವ ಆಹಾರ ಸೇವಿಸಿದ ನಂತರ ಮೈಗ್ರೇನ್ ಹೆಚ್ಚಾಗುತ್ತದೆ ಎಂಬುದನ್ನ ಗಮನಿಸಿ, ಅಂತಹ ಆಹಾರಗಳನ್ನ ಸಾಧ್ಯವಾದಷ್ಟು ತಪ್ಪಿಸುವುದೂ ಸಹಾಯಕವಾಗಬಹುದು.  

ಸಾಕಷ್ಟು ನೀರು ಕುಡಿಯಿರಿ

ದೇಹದಲ್ಲಿ ನೀರಿನ ಕೊರತೆಯೂ ಕೆಲವರಲ್ಲಿ ತಲೆನೋವು ಅಥವಾ ಮೈಗ್ರೇನ್‌ಅನ್ನ ಪ್ರಚೋದಿಸಬಹುದು. ಹೀಗಾಗಿ ದಿನವಿಡೀ ಸಾಕಷ್ಟು ನೀರು ಕುಡಿಯುವ ಅಭ್ಯಾಸ ಬೆಳೆಸಿಕೊಳ್ಳಬೇಕು. ಬೇಸಿಗೆ ಅಥವಾ ಹೆಚ್ಚು ದೈಹಿಕ ಚಟುವಟಿಕೆ ಇರುವ ಸಂದರ್ಭದಲ್ಲಿ ದೇಹದಲ್ಲಿ ನೀರಿನ ಕೊರತೆ ಉಂಟಾಗದಂತೆ ವಿಶೇಷ ಗಮನ ನೀಡಬೇಕು. ನೀರನ್ನ ಒಂದೇ ಬಾರಿಗೆ ಹೆಚ್ಚು ಕುಡಿಯುವುದಕ್ಕಿಂತ ದಿನವಿಡೀ ನಿಯಮಿತವಾಗಿ ಸೇವಿಸುವುದು ಅನುಕೂಲಕರ.

ತಣ್ಣನೆಯ ಅಥವಾ ಬಿಸಿ ಕಂಪ್ರೆಸ್

ತಲೆಗೆ ತಣ್ಣನೆಯ ಪ್ಯಾಕ್ ಅಥವಾ ಕುತ್ತಿಗೆ ಭಾಗಕ್ಕೆ ಬಿಸಿ ಕಂಪ್ರೆಸ್ ಬಳಸುವ ಬಗ್ಗೆ ತಜ್ಞ ವೈದ್ಯರು ಸಲಹೆ ನೀಡಿದ್ದಾರೆ. ಕೆಲವು ಜನರಿಗೆ ಇಂತಹ ಕಂಪ್ರೆಸ್‌ಗಳಿಂದ ತಾತ್ಕಾಲಿಕ ಆರಾಮ ದೊರೆಯಬಹುದು. ಆದರೆ ಪ್ರತಿಯೊಬ್ಬರಿಗೂ ಒಂದೇ ವಿಧಾನ ಪರಿಣಾಮಕಾರಿಯಾಗಬೇಕೆಂದಿಲ್ಲ. ನಿಮಗೆ ಯಾವುದು ಆರಾಮ ನೀಡುತ್ತದೆ ಎಂಬುದನ್ನ ಗಮನಿಸಿ ಬಳಸುವುದು ಉತ್ತಮ.

ಒತ್ತಡ ಕಡಿಮೆ ಮಾಡುವುದು ಮುಖ್ಯ

ಮೈಗ್ರೇನ್‌ ಸಮಸ್ಯೆಯಲ್ಲಿ ಒತ್ತಡವೂ ಪ್ರಮುಖ ಟ್ರಿಗರ್ ಆಗಿರಬಹುದು. ನಿರಂತರ ಕೆಲಸದ ಒತ್ತಡ, ಆತಂಕ ಮತ್ತು ವಿಶ್ರಾಂತಿಯ ಕೊರತೆ ಕೆಲವರಲ್ಲಿ ನೋವನ್ನ ಹೆಚ್ಚಿಸಬಹುದು. ಹೀಗಾಗಿ ದಿನನಿತ್ಯ ಸ್ವಲ್ಪ ಸಮಯ ವಿಶ್ರಾಂತಿ, ಧ್ಯಾನ, ಯೋಗ ಅಥವಾ ಉಸಿರಾಟದ ವ್ಯಾಯಾಮಗಳಿಗೆ ಮೀಸಲಿಡಬಹುದು. ನಿಯಮಿತ ದೈಹಿಕ ಚಟುವಟಿಕೆ ಮತ್ತು ಒತ್ತಡ ನಿರ್ವಹಣೆಯ ಕ್ರಮಗಳು ಮೈಗ್ರೇನ್ ದಾಳಿಗಳ ಪ್ರಮಾಣ ಅಥವಾ ತೀವ್ರತೆಯನ್ನ ಕಡಿಮೆ ಮಾಡಲು ಕೆಲವು ಜನರಿಗೆ ಸಹಾಯ ಮಾಡಬಹುದು.  

ಶುಂಠಿ, ಕೊತ್ತಂಬರಿ ಕಷಾಯದ ಬಗ್ಗೆ ಏನು?

ಆಯುರ್ವೇದದ ದೃಷ್ಟಿಕೋನದಿಂದ ಕೊತ್ತಂಬರಿ ಬೀಜ ನೆನೆಸಿದ ನೀರು, ಶುಂಠಿ-ಅರಿಶಿನದ ಮಿಶ್ರಣ ಮತ್ತು ಲ್ಯಾವೆಂಡರ್ ಬಳಕೆಯಂತಹ ಕೆಲವು ವಿಧಾನಗಳನ್ನೂ ಟ್ರೈ ಮಾಡಬಹುದು. ಆದರೆ ಇಂತಹ ಮನೆಮದ್ದುಗಳನ್ನ ಮೈಗ್ರೇನ್‌ಗೆ ಖಚಿತ ಚಿಕಿತ್ಸೆ ಎಂದು ಪರಿಗಣಿಸಬಾರದು. ವಿಶೇಷವಾಗಿ ನಿಯಮಿತವಾಗಿ ಔಷಧಿ ಸೇವಿಸುತ್ತಿರುವವರು ಅಥವಾ ಬೇರೆ ಆರೋಗ್ಯ ಸಮಸ್ಯೆ ಹೊಂದಿರುವವರು ಯಾವುದೇ ಗಿಡಮೂಲಿಕೆ ಅಥವಾ ಪೂರಕ ವಿಧಾನವನ್ನ ಆರಂಭಿಸುವ ಮೊದಲು ವೈದ್ಯರ ಸಲಹೆ ಪಡೆಯುವುದು ಸುರಕ್ಷಿತ. ಅದೇ ರೀತಿ ವರದಿಯಲ್ಲಿ ಉಲ್ಲೇಖಿಸಿರುವ ಕೆಲವು ಆಯುರ್ವೇದ ವಿಧಾನಗಳನ್ನ ಎಲ್ಲರಿಗೂ ಅನ್ವಯಿಸುವ ಸಾಮಾನ್ಯ ಚಿಕಿತ್ಸೆಯಾಗಿ ನೋಡಬಾರದು.

ಮೈಗ್ರೇನ್ ಬಂದಾಗ ಏನು ಮಾಡಬೇಕು?

ಮೈಗ್ರೇನ್‌ ದಾಳಿ ಆರಂಭವಾದಾಗ ಸಾಧ್ಯವಾದಷ್ಟು ಶಾಂತ, ಕತ್ತಲೆ ಮತ್ತು ಕಡಿಮೆ ಶಬ್ದವಿರುವ ಸ್ಥಳದಲ್ಲಿ ವಿಶ್ರಾಂತಿ ಪಡೆಯುವುದು ಕೆಲವರಿಗೆ ಸಹಾಯ ಮಾಡಬಹುದು. ಸಾಕಷ್ಟು ನೀರು ಕುಡಿಯುವುದು ಮತ್ತು ತಮ್ಮ ವೈದ್ಯರು ಸೂಚಿಸಿರುವ ಔಷಧಿಗಳನ್ನ ಸರಿಯಾದ ರೀತಿಯಲ್ಲಿ ಬಳಸುವುದು ಮುಖ್ಯ. ಮೈಗ್ರೇನ್ ಪದೇಪದೇ ಬರುತ್ತಿದ್ದರೆ, ನೋವು ಹೆಚ್ಚಾಗುತ್ತಿದ್ದರೆ ಅಥವಾ ಸಾಮಾನ್ಯ ಜೀವನದ ಮೇಲೆ ಪರಿಣಾಮ ಬೀರುತ್ತಿದ್ದರೆ ವೈದ್ಯರನ್ನ ಸಂಪರ್ಕಿಸುವುದು ಅಗತ್ಯ. ಆಗಾಗ ನೋವು ನಿವಾರಕ ಮಾತ್ರೆಗಳನ್ನ ಸ್ವಯಂ ಸೇವಿಸುವುದೂ ಸೂಕ್ತವಲ್ಲ.

ಹಠಾತ್ ಆಗಿ ಜೀವನದಲ್ಲೇ ಕಾಣದಷ್ಟು ತೀವ್ರ ತಲೆನೋವು, ಪ್ರಜ್ಞೆ ಬದಲಾವಣೆ, ದೇಹದ ಒಂದು ಭಾಗದಲ್ಲಿ ದುರ್ಬಲತೆ, ಮಾತನಾಡಲು ತೊಂದರೆ, ದೃಷ್ಟಿಯಲ್ಲಿ ಗಂಭೀರ ಬದಲಾವಣೆ ಅಥವಾ ಇತರ ಅಸಾಮಾನ್ಯ ಲಕ್ಷಣಗಳಿದ್ದರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು. 

ಒಟ್ನಲ್ಲಿ ಮೈಗ್ರೇನ್ ನಿಯಂತ್ರಣದಲ್ಲಿ ಒಂದೇ ಒಂದು ಮನೆಮದ್ದು ಅಥವಾ ವಿಧಾನವನ್ನ ಅವಲಂಬಿಸುವುದಕ್ಕಿಂತ ನಿಯಮಿತ ನಿದ್ರೆ, ಸಮಯಕ್ಕೆ ಸರಿಯಾದ ಆಹಾರ, ಸಾಕಷ್ಟು ನೀರು, ವ್ಯಾಯಾಮ, ಒತ್ತಡ ನಿಯಂತ್ರಣ ಮತ್ತು ಅಗತ್ಯವಿದ್ದಾಗ ವೈದ್ಯಕೀಯ ಚಿಕಿತ್ಸೆ—ಇವೆಲ್ಲವನ್ನೂ ಒಟ್ಟಾಗಿ ಗಮನಿಸುವುದು ಮುಖ್ಯ. ಜೀವನಶೈಲಿಯಲ್ಲಿ ಸಣ್ಣ ಬದಲಾವಣೆಗಳನ್ನ ಮಾಡುವುದರಿಂದ ಕೆಲವರಲ್ಲಿ ಮೈಗ್ರೇನ್ ದಾಳಿಗಳ ಪ್ರಮಾಣ ಮತ್ತು ತೀವ್ರತೆಯನ್ನ ನಿರ್ವಹಿಸಲು ಸಹಾಯವಾಗಬಹುದು.  

(ಸೂಚನೆ: ಇಲ್ಲಿ ನೀಡಲಾದ ಮಾಹಿತಿಯು ಸಾಮಾನ್ಯ ಜ್ಞಾನ ಹಾಗೂ ತಜ್ಞ ಮೂಲಗಳ ಮಾಹಿತಿಯನ್ನ ಆಧರಿಸಿದೆ. ಇದನ್ನ Zee Kannada News ದೃಢಪಡಿಸುವುದಿಲ್ಲ. ಇಲ್ಲಿನ ಸಲಹೆಗಳನ್ನ ಪಾಲಿಸುವ ಮುನ್ನ ತಜ್ಞರ ಸಲಹೆ ಪಡೆಯುವುದು ಉತ್ತಮ.)