ಪ್ರತಿಯೊಬ್ಬರ ಆರೋಗ್ಯಕ್ಕೆ ಯಾವ ಅಡುಗೆ ಎಣ್ಣೆ ಉತ್ತಮ? ಇಲ್ಲಿದೆ ಮಾಹಿತಿ
ಅಡುಗೆಗೆ ಬಳಸುವ ಎಣ್ಣೆಯ ಆಯ್ಕೆ ಮತ್ತು ಪ್ರಮಾಣವು ಕೊಲೆಸ್ಟ್ರಾಲ್ ಹಾಗೂ ಹೃದಯದ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು. ಆಲಿವ್, ಶೇಂಗಾ, ಸೂರ್ಯಕಾಂತಿ, ಸೋಯಾಬೀನ್ ಮತ್ತು ಕನೋಲಾ ಎಣ್ಣೆಗಳಲ್ಲಿ ಆರೋಗ್ಯಕರ ಅಪರ್ಯಾಪ್ತ ಕೊಬ್ಬುಗಳಿದ್ದು, ಇವುಗಳನ್ನು ಮಿತವಾಗಿ ಬಳಸುವುದು ಕೆಟ್ಟ ಕೊಲೆಸ್ಟ್ರಾಲ್ ನಿಯಂತ್ರಣಕ್ಕೆ ಸಹಾಯ ಮಾಡಬಹುದು.
Healthy Cooking Oils: ನಮ್ಮ ದೈನಂದಿನ ಅಡುಗೆಯಲ್ಲಿ ಎಣ್ಣೆ ಪ್ರಮುಖ ಪಾತ್ರ ವಹಿಸುತ್ತದೆ. ಆದರೆ ಯಾವ ಎಣ್ಣೆಯನ್ನ ಬಳಸುತ್ತಿದ್ದೇವೆ, ಎಷ್ಟು ಪ್ರಮಾಣದಲ್ಲಿ ಬಳಸುತ್ತಿದ್ದೇವೆ ಮತ್ತು ಅದನ್ನ ಹೇಗೆ ಬಳಸುತ್ತಿದ್ದೇವೆಂಬುದು ಆರೋಗ್ಯದ ದೃಷ್ಟಿಯಿಂದ ಬಹಳ ಮುಖ್ಯ. ಅಡುಗೆಗೆ ಬಳಸುವ ಎಣ್ಣೆಯ ಆಯ್ಕೆ ಸರಿಯಾಗಿಲ್ಲದಿದ್ದರೆ ದೇಹದಲ್ಲಿ ಕೆಟ್ಟ ಕೊಲೆಸ್ಟ್ರಾಲ್ ಹೆಚ್ಚಾಗುವ ಸಾಧ್ಯತೆಯಿದೆ. ಇದು ಹೃದಯದ ಆರೋಗ್ಯದ ಮೇಲೆಯೂ ಪರಿಣಾಮ ಬೀರಬಹುದು. ಹೀಗಾಗಿ ಅಡುಗೆ ಎಣ್ಣೆಯ ಆಯ್ಕೆ ಮತ್ತು ಬಳಕೆಯ ವಿಧಾನದಲ್ಲಿ ಎಚ್ಚರಿಕೆ ವಹಿಸುವುದು ಅಗತ್ಯವಾಗಿದೆ.
ಆಲಿವ್, ಶೇಂಗಾ, ಸೂರ್ಯಕಾಂತಿ ಸೇರಿದಂತೆ ಕೆಲವು ಎಣ್ಣೆಗಳಲ್ಲಿ ಆರೋಗ್ಯಕ್ಕೆ ಪ್ರಯೋಜನಕಾರಿಯಾದ ಅಪರ್ಯಾಪ್ತ ಕೊಬ್ಬುಗಳು ಕಂಡುಬರುತ್ತವೆ. ಇವುಗಳನ್ನ ಸ್ಯಾಚುರೇಟೆಡ್ ಕೊಬ್ಬುಗಳ ಬದಲಿಗೆ ಮಿತವಾಗಿ ಬಳಸುವುದರಿಂದ ಕೆಟ್ಟ ಕೊಲೆಸ್ಟ್ರಾಲ್ ನಿಯಂತ್ರಣಕ್ಕೆ ಸಹಾಯವಾಗಬಹುದು. ಹಾಗಾದರೆ ಯಾವ ಎಣ್ಣೆಗಳನ್ನ ಅಡುಗೆಗೆ ಬಳಸಬಹುದು? ಎಣ್ಣೆ ಬಳಕೆಯಲ್ಲಿ ಯಾವ ತಪ್ಪುಗಳನ್ನ ಮಾಡಬಾರದು? ಎಂಬುದರ ಮಾಹಿತಿ ಇಲ್ಲಿದೆ.
ಹೃದಯದ ಆರೋಗ್ಯಕ್ಕೆ ಯಾವ ಎಣ್ಣೆ ಉತ್ತಮ?
ಮೊನೊ ಅನ್ಸ್ಯಾಚುರೇಟೆಡ್ ಮತ್ತು ಪಾಲಿ ಅನ್ಸ್ಯಾಚುರೇಟೆಡ್ ಕೊಬ್ಬುಗಳು ಹೆಚ್ಚಿರುವ ಎಣ್ಣೆಗಳಿಗೆ ಆದ್ಯತೆ ನೀಡುವುದು ಉತ್ತಮ. ಆಲಿವ್ ಎಣ್ಣೆ, ಶೇಂಗಾ ಎಣ್ಣೆ, ಸೂರ್ಯಕಾಂತಿ ಎಣ್ಣೆ, ಸೋಯಾಬೀನ್ ಎಣ್ಣೆ ಮತ್ತು ಕನೋಲಾ ಎಣ್ಣೆಗಳಲ್ಲಿ ಈ ರೀತಿಯ ಕೊಬ್ಬುಗಳು ಇರುತ್ತವೆ. ಇವುಗಳನ್ನ ಸ್ಯಾಚುರೇಟೆಡ್ ಕೊಬ್ಬುಗಳ ಬದಲಿಗೆ ಮಿತವಾಗಿ ಬಳಸುವುದರಿಂದ ಕೆಟ್ಟ ಕೊಲೆಸ್ಟ್ರಾಲ್ ಪ್ರಮಾಣ ಕಡಿಮೆ ಮಾಡಲು ನೆರವಾಗಬಹುದು.
ಆಲಿವ್ ಎಣ್ಣೆ (Olive Oil)
ಆಲಿವ್ ಎಣ್ಣೆಯಲ್ಲಿ ಮೊನೊ ಅನ್ಸ್ಯಾಚುರೇಟೆಡ್ ಕೊಬ್ಬುಗಳು ಸಮೃದ್ಧವಾಗಿವೆ. ವಿಶೇಷವಾಗಿ ಎಕ್ಸ್ಟ್ರಾ ವರ್ಜಿನ್ ಆಲಿವ್ ಎಣ್ಣೆಯಲ್ಲಿ ಉತ್ಕರ್ಷಣ ನಿರೋಧಕ ಅಂಶಗಳೂ ಇರುತ್ತವೆ. ಇದನ್ನ ಸಲಾಡ್ಗಳಿಗೆ, ಕಡಿಮೆ ಉರಿಯಲ್ಲಿ ತಯಾರಿಸುವ ಅಡುಗೆಗಳಿಗೆ ಮತ್ತು ಇತರ ಆಹಾರ ಪದಾರ್ಥಗಳಿಗೆ ಬಳಸಬಹುದು. ಸಂಸ್ಕರಿಸಿದ ಆಲಿವ್ ಎಣ್ಣೆಯನ್ನ ಸಾಮಾನ್ಯ ಅಡುಗೆಗೂ ಬಳಸಬಹುದಾಗಿದೆ.
ಶೇಂಗಾ ಎಣ್ಣೆ (Groundnut Oil)
ಭಾರತೀಯ ಅಡುಗೆಗಳಲ್ಲಿ ಶೇಂಗಾ ಎಣ್ಣೆಯನ್ನ ಹೆಚ್ಚಾಗಿ ಬಳಸಲಾಗುತ್ತದೆ. ಇದರಲ್ಲಿ ಮೊನೊ ಅನ್ಸ್ಯಾಚುರೇಟೆಡ್ ಕೊಬ್ಬುಗಳು ಕಂಡುಬರುತ್ತವೆ. ತರಕಾರಿ ಅಡುಗೆ, ಒಗ್ಗರಣೆ ಮತ್ತು ಹುರಿಯುವ ಪದಾರ್ಥಗಳ ತಯಾರಿಕೆಗೆ ಇದನ್ನ ಬಳಸಬಹುದು. ಆದರೆ ಶೇಂಗಾ ಎಣ್ಣೆಯಲ್ಲಿ ಕ್ಯಾಲೊರಿ ಪ್ರಮಾಣ ಹೆಚ್ಚಿರುವುದರಿಂದ ಅಗತ್ಯಕ್ಕಿಂತ ಹೆಚ್ಚು ಬಳಸಬಾರದು.
ಸೂರ್ಯಕಾಂತಿ ಎಣ್ಣೆ (Sunflower Oil)
ಸೂರ್ಯಕಾಂತಿ ಎಣ್ಣೆಯಲ್ಲಿ ಪಾಲಿ ಅನ್ಸ್ಯಾಚುರೇಟೆಡ್ ಕೊಬ್ಬುಗಳು ಹೆಚ್ಚಾಗಿರುತ್ತವೆ. ಇವು ದೇಹಕ್ಕೆ ಅಗತ್ಯವಾದ ಕೊಬ್ಬಿನಾಮ್ಲಗಳನ್ನ ಒದಗಿಸುತ್ತವೆ. ಆದರೆ ಈ ಎಣ್ಣೆಯನ್ನ ಅತಿಯಾದ ಉಷ್ಣಾಂಶದಲ್ಲಿ ಹೆಚ್ಚು ಹೊತ್ತು ಬಿಸಿ ಮಾಡುವುದು ಸೂಕ್ತವಲ್ಲ. ಅಡುಗೆ ಮಾಡುವ ವಿಧಾನಕ್ಕೆ ಅನುಗುಣವಾಗಿ ಎಣ್ಣೆಯ ಪ್ರಮಾಣ ಮತ್ತು ಬಳಕೆಯನ್ನ ನಿರ್ಧರಿಸಬೇಕು.
ಸೋಯಾಬೀನ್ ಎಣ್ಣೆ (Soybean Oil)
ಸೋಯಾಬೀನ್ ಎಣ್ಣೆಯಲ್ಲಿಯೂ ಪಾಲಿ ಅನ್ಸ್ಯಾಚುರೇಟೆಡ್ ಕೊಬ್ಬುಗಳು ಇರುತ್ತವೆ. ಇವು ದೇಹಕ್ಕೆ ಅಗತ್ಯವಾದ ಕೊಬ್ಬಿನಾಮ್ಲಗಳನ್ನ ಒದಗಿಸಲು ಸಹಾಯ ಮಾಡುತ್ತವೆ. ಹೀಗಾಗಿ ಸರಿಯಾದ ಪ್ರಮಾಣದಲ್ಲಿ ಬಳಸುವುದು ಮುಖ್ಯವಾಗಿದೆ.
ಕನೋಲಾ ಎಣ್ಣೆ (Canola Oil)
ಕನೋಲಾ ಎಣ್ಣೆಯಲ್ಲಿಯೂ ಆರೋಗ್ಯಕ್ಕೆ ಪ್ರಯೋಜನಕಾರಿಯಾದ ಅಪರ್ಯಾಪ್ತ ಕೊಬ್ಬುಗಳು ಕಂಡುಬರುತ್ತವೆ. ಸ್ಯಾಚುರೇಟೆಡ್ ಕೊಬ್ಬುಗಳ ಬದಲಿಗೆ ಇಂತಹ ಎಣ್ಣೆಗಳನ್ನ ಮಿತವಾಗಿ ಬಳಸುವುದು ಕೆಟ್ಟ ಕೊಲೆಸ್ಟ್ರಾಲ್ ನಿಯಂತ್ರಣಕ್ಕೆ ನೆರವಾಗಬಹುದು.
ಎಣ್ಣೆಯನ್ನ ಮತ್ತೆ ಮತ್ತೆ ಬಿಸಿ ಮಾಡುವ ಅಭ್ಯಾಸ ಬಿಡಿ!
ಅನೇಕ ಮನೆಗಳಲ್ಲಿ ಪೂರಿ, ಪಕೋಡ ಸೇರಿದಂತೆ ಕರಿದ ತಿಂಡಿಗಳನ್ನ ತಯಾರಿಸಿದ ನಂತರ ಉಳಿದ ಎಣ್ಣೆಯನ್ನ ಮತ್ತೆ ಅಡುಗೆಗೆ ಬಳಸುವ ಅಭ್ಯಾಸವಿದೆ. ಆದರೆ ಇದು ಆರೋಗ್ಯದ ದೃಷ್ಟಿಯಿಂದ ಒಳ್ಳೆಯದಲ್ಲ. ಎಣ್ಣೆಯನ್ನ ಪದೇಪದೇ ಬಿಸಿ ಮಾಡುವುದರಿಂದ ಅದರಲ್ಲಿ ಹಾನಿಕಾರಕ ಆಕ್ಸಿಡೀಕರಣ ಸಂಯುಕ್ತಗಳು ಉತ್ಪತ್ತಿಯಾಗಬಹುದು. ಹೀಗಾಗಿ ಒಮ್ಮೆ ಕರಿಯಲು ಬಳಸಿದ ಎಣ್ಣೆಯನ್ನ ಮತ್ತೆ ಮತ್ತೆ ಬಿಸಿ ಮಾಡಿ ಬಳಸುವುದನ್ನ ತಪ್ಪಿಸುವುದು ಉತ್ತಮ. ಎಣ್ಣೆಯ ಮರುಬಳಕೆಯ ಬಗ್ಗೆ ವಿಶೇಷ ಎಚ್ಚರಿಕೆ ವಹಿಸಬೇಕು.
ತುಪ್ಪ, ಬೆಣ್ಣೆ ಮತ್ತು ವನಸ್ಪತಿ ಬಳಕೆ ಎಷ್ಟಿರಬೇಕು?
ತುಪ್ಪ, ಬೆಣ್ಣೆ ಮತ್ತು ವನಸ್ಪತಿಯಲ್ಲಿ ಸ್ಯಾಚುರೇಟೆಡ್ ಕೊಬ್ಬು ಹೆಚ್ಚಾಗಿರುತ್ತದೆ. ಇವುಗಳನ್ನ ಅತಿಯಾಗಿ ಸೇವಿಸುವುದರಿಂದ ಕೆಟ್ಟ ಕೊಲೆಸ್ಟ್ರಾಲ್ ಹೆಚ್ಚಾಗುವ ಸಾಧ್ಯತೆಯಿದೆ. ವಿಶೇಷವಾಗಿ ಹೃದಯ ಸಂಬಂಧಿತ ಸಮಸ್ಯೆ ಇರುವವರು ಇವುಗಳ ಸೇವನೆಯನ್ನ ಮಿತಿಗೊಳಿಸಬೇಕು. ಟ್ರಾನ್ಸ್ ಫ್ಯಾಟ್ ಹೊಂದಿರುವ ಹೈಡ್ರೋಜನೀಕರಿಸಿದ ಕೊಬ್ಬುಗಳನ್ನ ಸಾಧ್ಯವಾದಷ್ಟು ದೂರವಿಡುವುದು ಉತ್ತಮ.
ದಿನಕ್ಕೆ ಎಷ್ಟು ಅಡುಗೆ ಎಣ್ಣೆ ಬಳಸಬೇಕು?
ಆರೋಗ್ಯಕರ ಎಣ್ಣೆ ಎಂದು ತಿಳಿದುಕೊಂಡು ಬೇಕಾದಷ್ಟು ಬಳಸುವುದು ಸರಿಯಲ್ಲ. ಏಕೆಂದರೆ ಎಲ್ಲಾ ಅಡುಗೆ ಎಣ್ಣೆಗಳಲ್ಲಿಯೂ ಕ್ಯಾಲೊರಿ ಪ್ರಮಾಣ ಹೆಚ್ಚಿರುತ್ತದೆ. ಹೀಗಾಗಿ ಪ್ರತಿದಿನದ ಆಹಾರದಲ್ಲಿ ಎಣ್ಣೆಯ ಪ್ರಮಾಣವನ್ನ ನಿಯಂತ್ರಿಸಬೇಕು. ಕರಿದ ಆಹಾರಗಳನ್ನ ಆಗಾಗ ಸೇವಿಸುವುದನ್ನ ಕಡಿಮೆ ಮಾಡಿ, ಆಹಾರವನ್ನ ಬೇಯಿಸುವುದು, ಹಬೆಯಲ್ಲಿ ಬೇಯಿಸುವುದು ಮತ್ತು ಗ್ರಿಲ್ ಮಾಡುವಂತಹ ವಿಧಾನಗಳಿಗೆ ಆದ್ಯತೆ ನೀಡಬೇಕು.
ಹೃದಯದ ಆರೋಗ್ಯಕ್ಕೆ ಈ ಅಭ್ಯಾಸಗಳೂ ಮುಖ್ಯ
ಅಡುಗೆ ಎಣ್ಣೆಯ ಆಯ್ಕೆಯಷ್ಟೇ ಅದರ ಬಳಕೆಯ ವಿಧಾನವೂ ಮುಖ್ಯವಾಗಿದೆ. ಎಣ್ಣೆಯನ್ನ ಮಿತವಾಗಿ ಬಳಸುವುದು, ಪದೇಪದೇ ಬಿಸಿ ಮಾಡದಿರುವುದು, ಸಮತೋಲಿತ ಆಹಾರ ಸೇವಿಸುವುದು ಮತ್ತು ನಿಯಮಿತವಾಗಿ ವ್ಯಾಯಾಮ ಮಾಡುವುದು ಹೃದಯದ ಆರೋಗ್ಯವನ್ನ ಕಾಪಾಡಿಕೊಳ್ಳಲು ಸಹಾಯ ಮಾಡುತ್ತದೆ.
ಒಟ್ನಲ್ಲಿ ದುಬಾರಿ ಎಣ್ಣೆ ಬಳಸುವುದರಿಂದ ಮಾತ್ರ ಆರೋಗ್ಯ ಸುಧಾರಿಸುತ್ತದೆ ಎಂದರ್ಥವಲ್ಲ. ಯಾವ ಎಣ್ಣೆಯನ್ನ ಆಯ್ಕೆ ಮಾಡುತ್ತೇವೆ, ಎಷ್ಟು ಬಳಸುತ್ತೇವೆ ಮತ್ತು ಹೇಗೆ ಅಡುಗೆ ಮಾಡುತ್ತೇವೆ ಎಂಬುದರ ಬಗ್ಗೆ ಗಮನ ನೀಡಬೇಕು. ಕೊಲೆಸ್ಟ್ರಾಲ್ ಅಥವಾ ಹೃದಯದ ಸಮಸ್ಯೆ ಇರುವವರು ವೈದ್ಯರು ಅಥವಾ ಆಹಾರ ತಜ್ಞರ ಸಲಹೆಯಂತೆ ಆಹಾರ ಪದ್ಧತಿಯಲ್ಲಿ ಬದಲಾವಣೆ ಮಾಡಿಕೊಳ್ಳುವುದು ಉತ್ತಮ.
(ಸೂಚನೆ: ಇಲ್ಲಿ ನೀಡಲಾದ ಮಾಹಿತಿಯು ಸಾಮಾನ್ಯ ಜ್ಞಾನ ಹಾಗೂ ತಜ್ಞ ಮೂಲಗಳ ಮಾಹಿತಿಯನ್ನ ಆಧರಿಸಿದೆ. ಇದನ್ನ Zee Kannada News ದೃಢಪಡಿಸುವುದಿಲ್ಲ. ಇಲ್ಲಿನ ಸಲಹೆಗಳನ್ನ ಪಾಲಿಸುವ ಮುನ್ನ ತಜ್ಞರ ಸಲಹೆ ಪಡೆಯುವುದು ಉತ್ತಮ.)