ಕಿಡ್ನಿ ಸಮಸ್ಯೆ ಇರುವವರಿಗೆ ಈ ಆಹಾರಗಳು ವಿಷಕ್ಕೆ ಸಮ; ಯಾವುದೇ ಕಾರಣಕ್ಕೂ ಸೇವಿಸಬೇಡಿ!

Foods to Avoid for Kidney Disease: ನಮ್ಮ ದೇಹದಲ್ಲಿ ಕಿಡ್ನಿಗಳು ರಕ್ತವನ್ನ ಶುದ್ಧೀಕರಿಸುವುದು, ದೇಹದಲ್ಲಿರುವ ಹೆಚ್ಚುವರಿ ನೀರು ಮತ್ತು ತ್ಯಾಜ್ಯವನ್ನ ಹೊರಹಾಕುವುದು ಸೇರಿದಂತೆ ಹಲವು ಪ್ರಮುಖ ಕೆಲಸಗಳನ್ನ ಮಾಡುತ್ತವೆ. ಆದರೆ ಕಿಡ್ನಿಗಳ ಕಾರ್ಯಕ್ಷಮತೆ ಕಡಿಮೆಯಾದಾಗ ಆಹಾರ ಪದ್ಧತಿಯಲ್ಲೂ ಹಲವು ಬದಲಾವಣೆಗಳನ್ನ ಮಾಡಬೇಕಾಗುತ್ತದೆ. ಆರೋಗ್ಯವಂತ ವ್ಯಕ್ತಿಗೆ ಸಾಮಾನ್ಯವಾಗಿ ಒಳ್ಳೆಯದಾಗಿರುವ ಕೆಲವು ಆಹಾರಗಳು ಕಿಡ್ನಿ ಕಾಯಿಲೆ ಇರುವವರಿಗೆ ಸೂಕ್ತವಾಗಿರದೇ ಇರಬಹುದು. ವಿಶೇಷವಾಗಿ ಪೊಟ್ಯಾಶಿಯಂ, ಫಾಸ್ಫರಸ್ ಅಥವಾ ಕೆಲವು ನಿರ್ದಿಷ್ಟ ರಾಸಾಯನಿಕ ಅಂಶಗಳು ಹೆಚ್ಚಿರುವ ಆಹಾರಗಳನ್ನ ಕಿಡ್ನಿ ಸಮಸ್ಯೆ ಇರುವವರು ವೈದ್ಯರ ಅಥವಾ ಕಿಡ್ನಿ ಡಯಟಿಷಿಯನ್‌ ಸಲಹೆಯಿಲ್ಲದೆ ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವುದು ಸೂಕ್ತವಲ್ಲ. ಹಾಗಾದರೆ ಕಿಡ್ನಿ ಸಮಸ್ಯೆ ಇರುವವರು ಯಾವ ಆಹಾರಗಳ ಬಗ್ಗೆ ಹೆಚ್ಚು ಎಚ್ಚರಿಕೆ ವಹಿಸಬೇಕು?

ನಕ್ಷತ್ರ ಹಣ್ಣು: ಕಿಡ್ನಿ ರೋಗಿಗಳಿಗೆ ವಿಶೇಷ ಎಚ್ಚರಿಕೆ

ನಕ್ಷತ್ರ ಹಣ್ಣು ಅಥವಾ Star Fruit (Carambola) ನೋಡಲು ಆರೋಗ್ಯಕರ ಹಣ್ಣಿನಂತೆ ಕಾಣುತ್ತದೆ. ಆದರೆ ಕಿಡ್ನಿ ಕಾಯಿಲೆ ಇರುವವರು ಇದನ್ನ ತಪ್ಪಿಸುವಂತೆ ವೈದ್ಯಕೀಯ ಸಂಸ್ಥೆಗಳು ಎಚ್ಚರಿಸುತ್ತವೆ. ನ್ಯಾಷನಲ್ ಕಿಡ್ನಿ ಫೌಂಡೇಶನ್‌ ಕೂಡ ಕಿಡ್ನಿ ಸಮಸ್ಯೆ ಇರುವವರು ಸ್ಟಾರ್‌ಫ್ರೂಟ್‌ ಸೇವಿಸಬಾರದು ಎಂದು ತಿಳಿಸುತ್ತದೆ. ಇದರಲ್ಲಿ caramboxin ಎಂಬ ನ್ಯೂರೋಟಾಕ್ಸಿನ್‌ ಜೊತೆಗೆ oxalate ಕೂಡ ಇರುತ್ತದೆ. ಕಿಡ್ನಿ ಸರಿಯಾಗಿ ಕಾರ್ಯನಿರ್ವಹಿಸದಿದ್ದರೆ ಈ ಅಂಶಗಳನ್ನ ದೇಹದಿಂದ ಸಮರ್ಪಕವಾಗಿ ಹೊರಹಾಕಲು ಸಾಧ್ಯವಾಗದೆ ವಿಷಕಾರಿ ಪರಿಣಾಮ ಉಂಟಾಗಬಹುದು. ಬಿಕ್ಕಳಿಕೆ, ವಾಂತಿ, ಗೊಂದಲ, ಸ್ನಾಯು ದೌರ್ಬಲ್ಯ ಮತ್ತು ಗಂಭೀರ ಸಂದರ್ಭಗಳಲ್ಲಿ ಸೆಳೆತದಂತಹ ನರಮಂಡಲದ ಲಕ್ಷಣಗಳು ಕಾಣಿಸಿಕೊಳ್ಳಬಹುದು. ಹೀಗಾಗಿ ಕಿಡ್ನಿ ಕಾಯಿಲೆ ಅಥವಾ ಡಯಾಲಿಸಿಸ್‌ನಲ್ಲಿರುವವರು ಸ್ಟಾರ್‌ಫ್ರೂಟ್‌ ಅಥವಾ ಅದರ ಜ್ಯೂಸ್‌ ಸೇವಿಸುವ ಮೊದಲು ವೈದ್ಯರ ಸಲಹೆ ಪಡೆಯುವುದು ಅತ್ಯಂತ ಮುಖ್ಯ.

ಎಳನೀರು: ಎಲ್ಲರಿಗೂ ಒಂದೇ ರೀತಿಯ ಪಾನೀಯವಲ್ಲ

ಬೇಸಿಗೆಯಲ್ಲಿ ದೇಹವನ್ನ ಹೈಡ್ರೇಟ್‌ ಮಾಡಲು ಎಳನೀರು ಜನಪ್ರಿಯ ನೈಸರ್ಗಿಕ ಪಾನೀಯ. ಆದರೆ ಕಿಡ್ನಿ ಕಾರ್ಯಕ್ಷಮತೆ ಕಡಿಮೆಯಾದವರಲ್ಲಿ ಪೊಟ್ಯಾಶಿಯಂ ಪ್ರಮಾಣವನ್ನ ನಿಯಂತ್ರಿಸುವ ಅಗತ್ಯ ಇರಬಹುದು. ಕಿಡ್ನಿಗಳು ಹೆಚ್ಚುವರಿ ಪೊಟ್ಯಾಶಿಯಂ ಅನ್ನು ದೇಹದಿಂದ ಹೊರಹಾಕುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಕಿಡ್ನಿ ಕಾಯಿಲೆಯ ಹಂತ ಮತ್ತು ರಕ್ತದಲ್ಲಿನ ಪೊಟ್ಯಾಶಿಯಂ ಮಟ್ಟದ ಆಧಾರದ ಮೇಲೆ ವೈದ್ಯರು ಕೆಲವು ಆಹಾರ ಮತ್ತು ಪಾನೀಯಗಳನ್ನ ಮಿತಿಗೊಳಿಸಲು ಸೂಚಿಸಬಹುದು. ಆದ್ದರಿಂದ ಕಿಡ್ನಿ ಸಮಸ್ಯೆ ಇರುವವರು ಪ್ರತಿದಿನ ಎಳನೀರು ಕುಡಿಯುವುದು ಎಲ್ಲರಿಗೂ ಸುರಕ್ಷಿತ ಎಂದು ಭಾವಿಸಬಾರದು. ರಕ್ತದಲ್ಲಿನ ಪೊಟ್ಯಾಶಿಯಂ ಮಟ್ಟ ಮತ್ತು ವೈದ್ಯರ ಸಲಹೆಗೆ ಅನುಗುಣವಾಗಿ ಪ್ರಮಾಣ ನಿರ್ಧರಿಸಬೇಕು.

‘ಲೋ-ಸಾಲ್ಟ್’ ಅಥವಾ ಉಪ್ಪಿನ ಬದಲಿ ಉತ್ಪನ್ನಗಳು

ರಕ್ತದೊತ್ತಡ ಇರುವವರು ಸಾಮಾನ್ಯ ಉಪ್ಪಿನ ಬಳಕೆಯನ್ನ ಕಡಿಮೆ ಮಾಡಲು low-sodium salt ಬಳಸುವುದು ಸಾಮಾನ್ಯ. ಆದರೆ ಕೆಲವು ಉಪ್ಪಿನ ಬದಲಿ ಉತ್ಪನ್ನಗಳಲ್ಲಿ ಸೋಡಿಯಂ ಬದಲಿಗೆ potassium chloride ಬಳಸಲಾಗುತ್ತದೆ. ಕಿಡ್ನಿ ಸಮಸ್ಯೆ ಇರುವವರಿಗೆ ಹೆಚ್ಚುವರಿ ಪೊಟ್ಯಾಶಿಯಂ ದೇಹದಲ್ಲಿ ಸಂಗ್ರಹವಾಗುವ ಅಪಾಯವಿರಬಹುದು. ರಕ್ತದಲ್ಲಿನ ಪೊಟ್ಯಾಶಿಯಂ ತುಂಬಾ ಹೆಚ್ಚಾದರೆ ಹೃದಯದ ಬಡಿತದ ಮೇಲೆ ಪರಿಣಾಮ ಬೀರುವಂತಹ ಗಂಭೀರ ಸಮಸ್ಯೆಗಳು ಉಂಟಾಗಬಹುದು. ಹೀಗಾಗಿ ಕಿಡ್ನಿ ಕಾಯಿಲೆ ಇರುವವರು ವೈದ್ಯರ ಸಲಹೆಯಿಲ್ಲದೆ ಸಾಮಾನ್ಯ ಉಪ್ಪಿನ ಬದಲು potassium-based salt substitute ಬಳಸುವುದು ಸೂಕ್ತವಲ್ಲ.

ಡಾರ್ಕ್ ಚಾಕೊಲೇಟ್: ಮಿತಿಯೂ ಮುಖ್ಯ

ಡಾರ್ಕ್ ಚಾಕೊಲೇಟ್‌ನಲ್ಲಿ ಕೋಕೋ ಪ್ರಮಾಣ ಹೆಚ್ಚಿರುವುದರಿಂದ ಇದರಲ್ಲಿ ಕೆಲವು ಆ್ಯಂಟಿಆಕ್ಸಿಡೆಂಟ್‌ಗಳು ಇರುವುದಾಗಿ ಹೇಳಲಾಗುತ್ತದೆ. ಆದರೆ ಕಿಡ್ನಿ ಕಾಯಿಲೆ ಇರುವವರು ಆಹಾರದ ಮೂಲಕ ಪಡೆಯುವ ಫಾಸ್ಫರಸ್ ಮತ್ತು ಪೊಟ್ಯಾಶಿಯಂ ಪ್ರಮಾಣದ ಬಗ್ಗೆ ಗಮನಹರಿಸಬೇಕಾಗಬಹುದು. ವಿಶೇಷವಾಗಿ ಮುಂದುವರಿದ ಕಿಡ್ನಿ ಕಾಯಿಲೆ ಇರುವವರ ಆಹಾರದಲ್ಲಿ ಫಾಸ್ಫರಸ್ ನಿಯಂತ್ರಣ ಅಗತ್ಯವಾಗಬಹುದು. ಆದ್ದರಿಂದ “ಹೆಲ್ತ್‌ ಫುಡ್” ಎಂಬ ಕಾರಣಕ್ಕೆ ಡಾರ್ಕ್ ಚಾಕೊಲೇಟ್‌ ಅನ್ನ ಹೆಚ್ಚಿನ ಪ್ರಮಾಣದಲ್ಲಿ ಸೇವಿಸುವುದು ಸೂಕ್ತವಲ್ಲ. ಎಷ್ಟು ಪ್ರಮಾಣ ಸುರಕ್ಷಿತ ಎಂಬುದು ಕಿಡ್ನಿ ಕಾಯಿಲೆಯ ಹಂತ, ರಕ್ತ ಪರೀಕ್ಷೆಗಳ ಫಲಿತಾಂಶ ಮತ್ತು ವ್ಯಕ್ತಿಯ ಒಟ್ಟಾರೆ ಆಹಾರ ಪದ್ಧತಿಯ ಮೇಲೆ ಅವಲಂಬಿತವಾಗಿರುತ್ತದೆ.

‘ಕಿಡ್ನಿ ಡಿಟಾಕ್ಸ್’ ಕಷಾಯ ಮತ್ತು ಪ್ರೋಟೀನ್ ಪೌಡರ್

ಕಿಡ್ನಿ ಸ್ಟೋನ್ ಕರಗಿಸುತ್ತದೆ, ಕಿಡ್ನಿಯನ್ನ ಕ್ಲೀನ್ ಮಾಡುತ್ತದೆ ಅಥವಾ ದೇಹದಿಂದ ವಿಷಕಾರಿ ಅಂಶಗಳನ್ನ ಹೊರಹಾಕುತ್ತದೆ ಎಂಬ ಹೆಸರಿನಲ್ಲಿ ಹಲವು herbal detox drinks, ಕಷಾಯಗಳು ಮತ್ತು supplements ಮಾರುಕಟ್ಟೆಯಲ್ಲಿ ಲಭ್ಯವಿವೆ. ಆದರೆ “ನ್ಯಾಚುರಲ್” ಎಂಬ ಪದ ಇದ್ದ ಮಾತ್ರಕ್ಕೆ ಪ್ರತಿಯೊಂದು ಉತ್ಪನ್ನವೂ ಕಿಡ್ನಿಗೆ ಸುರಕ್ಷಿತ ಎಂದು ಹೇಳಲು ಸಾಧ್ಯವಿಲ್ಲ. ಕೆಲವು ಗಿಡಮೂಲಿಕೆ ಅಥವಾ ಆಹಾರ ಪೂರಕಗಳಲ್ಲಿ ಕಿಡ್ನಿಗೆ ಹಾನಿಕರವಾಗಬಹುದಾದ ಅಂಶಗಳು ಇರಬಹುದು. 

ಕಿಡ್ನಿ ಕಾಯಿಲೆ ಇರುವವರು ಯಾವುದೇ herbal supplement ಅಥವಾ detox ಉತ್ಪನ್ನವನ್ನ ಆರಂಭಿಸುವ ಮೊದಲು ವೈದ್ಯರ ಸಲಹೆ ಪಡೆಯುವುದು ಮುಖ್ಯ. ನ್ಯಾಷನಲ್ ಕಿಡ್ನಿ ಫೌಂಡೇಶನ್‌ ಕೂಡ CKD ಇರುವವರಲ್ಲಿ supplements‌ ಆಯ್ಕೆ ಮಾಡುವಾಗ ಎಚ್ಚರಿಕೆ ಅಗತ್ಯವೆಂದು ತಿಳಿಸುತ್ತದೆ. ಅದೇ ರೀತಿ ಪ್ರೋಟೀನ್ ಪೌಡರ್‌ ಎಲ್ಲರಿಗೂ ಹಾನಿಕರ ಎಂಬುದಿಲ್ಲ. ಆದರೆ ಕಿಡ್ನಿ ಕಾಯಿಲೆ ಇರುವವರಿಗೆ ಅಗತ್ಯವಿರುವ ಪ್ರೋಟೀನ್ ಪ್ರಮಾಣ ವ್ಯಕ್ತಿಯ ಕಾಯಿಲೆಯ ಹಂತ, ಡಯಾಲಿಸಿಸ್‌ ಸ್ಥಿತಿ ಮತ್ತು ಪೌಷ್ಟಿಕಾಂಶದ ಅಗತ್ಯವನ್ನ ಅವಲಂಬಿಸಿರುತ್ತದೆ. ಆದ್ದರಿಂದ ವೈದ್ಯರು ಅಥವಾ ಕಿಡ್ನಿ ಡಯಟಿಷಿಯನ್‌ ಸಲಹೆಯಿಲ್ಲದೆ ಹೆಚ್ಚಿನ ಪ್ರಮಾಣದಲ್ಲಿ ಪ್ರೋಟೀನ್‌ ಪೂರಕಗಳನ್ನ ತೆಗೆದುಕೊಳ್ಳುವುದು ಸೂಕ್ತವಲ್ಲ.

ಆಹಾರದಲ್ಲಿ ಸ್ವಯಂ ನಿರ್ಧಾರ ಮಾಡಬೇಡಿ

ಕಿಡ್ನಿ ಕಾಯಿಲೆ ಎಂದರೆ ಎಲ್ಲರೂ ಒಂದೇ ರೀತಿಯ ಆಹಾರವನ್ನ ಸೇವಿಸಬೇಕು ಅಥವಾ ಒಂದೇ ಆಹಾರಗಳನ್ನ ಸಂಪೂರ್ಣವಾಗಿ ತಪ್ಪಿಸಬೇಕು ಎಂದರ್ಥವಲ್ಲ. CKDಯ ಹಂತ, ಪೊಟ್ಯಾಶಿಯಂ, ಫಾಸ್ಫರಸ್, ಸೋಡಿಯಂ ಮಟ್ಟ, ಡಯಾಲಿಸಿಸ್‌ ಹಾಗೂ ಇತರ ಆರೋಗ್ಯ ಸಮಸ್ಯೆಗಳನ್ನ ಆಧರಿಸಿ ಆಹಾರ ನಿಯಮಗಳು ಬದಲಾಗುತ್ತವೆ. ಹೀಗಾಗಿ ಕಿಡ್ನಿ ಸಮಸ್ಯೆ ಇರುವವರು ಸಾಮಾಜಿಕ ಜಾಲತಾಣಗಳಲ್ಲಿ ಕಂಡುಬರುವ “ಕಿಡ್ನಿ ಡಿಟಾಕ್ಸ್”, “ಸ್ಟೋನ್ ಕರಗಿಸುವ” ಅಥವಾ “100% ನೈಸರ್ಗಿಕ ಚಿಕಿತ್ಸೆ” ಎಂಬ ಹೇಳಿಕೆಗಳನ್ನ ನಂಬಿ ಆಹಾರ ಅಥವಾ ಪೂರಕಗಳನ್ನ ಸ್ವಯಂ ಆರಂಭಿಸುವುದಕ್ಕಿಂತ ವೈದ್ಯರು ಅಥವಾ ನೋಂದಾಯಿತ ಡಯಟಿಷಿಯನ್‌ ಸಲಹೆ ಪಡೆಯುವುದು ಉತ್ತಮ.

(ಸೂಚನೆ: ಮೇಲಿನ ಮಾಹಿತಿ ಸಾಮಾನ್ಯ ಆರೋಗ್ಯ ಮಾಹಿತಿ ಮಾತ್ರ. ಕಿಡ್ನಿ ಕಾಯಿಲೆ, ಡಯಾಲಿಸಿಸ್‌, ಹೆಚ್ಚಿದ ಪೊಟ್ಯಾಶಿಯಂ ಅಥವಾ ಇತರ ಮೂತ್ರಪಿಂಡ ಸಮಸ್ಯೆ ಇರುವವರು ತಮ್ಮ ವೈದ್ಯರು ಸೂಚಿಸಿದ ಆಹಾರ ಕ್ರಮವನ್ನೇ ಅನುಸರಿಸಬೇಕು.)