ವರ್ಷಗಳ ಕಾಯುವಿಕೆ, ಮತ್ತೆ ಟೀಂ ಇಂಡಿಯಾಗೆ ಎಂಟ್ರಿ! ಈ 7 ಕ್ರಿಕೆಟಿಗರ ಕಮ್‌ಬ್ಯಾಕ್‌ ಸ್ಟೋರಿ ಇಂಟ್ರೆಸ್ಟಿಂಗ್‌!

Team India Comeback: ಭಾರತೀಯ ಕ್ರಿಕೆಟ್‌ನಲ್ಲಿ ಪ್ರತಿಭಾವಂತ ಆಟಗಾರರಿಗೆ ಕೊರತೆಯಿಲ್ಲ. ಆದರೆ ಒಮ್ಮೆ ಟೀಂ ಇಂಡಿಯಾದಿಂದ ಹೊರಬಿದ್ದರೆ ಮತ್ತೆ ರಾಷ್ಟ್ರೀಯ ತಂಡದಲ್ಲಿ ಸ್ಥಾನ ಪಡೆಯುವುದು ಅಷ್ಟು ಸುಲಭವಲ್ಲ. ದೇಶೀಯ ಕ್ರಿಕೆಟ್‌ನಲ್ಲಿ ನಿರಂತರ ಉತ್ತಮ ಪ್ರದರ್ಶನ, ಫಿಟ್‌ನೆಸ್, ತಾಳ್ಮೆ ಮತ್ತು ಸೂಕ್ತ ಅವಕಾಶಕ್ಕಾಗಿ ಕಾಯುವ ಮನೋಭಾವ ಆಟಗಾರರಿಗೆ ಅತ್ಯಗತ್ಯ. ಇಂತಹ ಸವಾಲುಗಳ ನಡುವೆಯೂ ವರ್ಷಗಳ ಕಾಲ ತಂಡದಿಂದ ದೂರವಿದ್ದು, ಮತ್ತೆ ಭಾರತ ತಂಡಕ್ಕೆ ಮರಳಿದ ಏಳು ಪ್ರಮುಖ ಕ್ರಿಕೆಟಿಗರ ಕಥೆ ಈಗ ಗಮನ ಸೆಳೆಯುತ್ತಿದೆ. ಜಯದೇವ್ ಉನದ್ಕಟ್, ಕನ್ನಡಿಗ ಕರುಣ್ ನಾಯರ್, ಪಾರ್ಥಿವ್ ಪಟೇಲ್, ಆಶಿಶ್ ನೆಹ್ರಾ, ಭುವನೇಶ್ವರ್ ಕುಮಾರ್, ದಿನೇಶ್ ಕಾರ್ತಿಕ್ ಮತ್ತು ವರುಣ್ ಚಕ್ರವರ್ತಿ ದೀರ್ಘ ವಿರಾಮದ ಬಳಿಕ ಭಾರತ ತಂಡದಲ್ಲಿ ಮತ್ತೆ ಅವಕಾಶ ಪಡೆದ ಆಟಗಾರರು.

ಜಯದೇವ್ ಉನದ್ಕಟ್: 12 ವರ್ಷಗಳ ಸುದೀರ್ಘ ಕಾಯುವಿಕೆ

ಈ ಪಟ್ಟಿಯಲ್ಲಿ ಅತಿ ದೀರ್ಘ ಅಂತರದ ಬಳಿಕ ಟೆಸ್ಟ್ ತಂಡಕ್ಕೆ ಮರಳಿದವರಲ್ಲಿ ವೇಗಿ ಜಯದೇವ್ ಉನದ್ಕಟ್ ಪ್ರಮುಖರು. 2010ರ ಡಿಸೆಂಬರ್‌ನಲ್ಲಿ ದಕ್ಷಿಣ ಆಫ್ರಿಕಾ ವಿರುದ್ಧ ಸೆಂಚುರಿಯನ್‌ನಲ್ಲಿ ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಅವರು, ನಂತರ ಮತ್ತೊಂದು ಟೆಸ್ಟ್ ಪಂದ್ಯವಾಡಲು ಬರೋಬ್ಬರಿ 12 ವರ್ಷ ಕಾಯಬೇಕಾಯಿತು. 2022ರ ಡಿಸೆಂಬರ್‌ನಲ್ಲಿ ಬಾಂಗ್ಲಾದೇಶ ವಿರುದ್ಧ ಅವರಿಗೆ ಮತ್ತೆ ಟೆಸ್ಟ್ ಆಡುವ ಅವಕಾಶ ದೊರೆಯಿತು. ಸುದೀರ್ಘ ಕಾಯುವಿಕೆಯ ನಡುವೆಯೂ ತಮ್ಮ ಪ್ರಯತ್ನವನ್ನ ಮುಂದುವರಿಸಿದ ಉನದ್ಕಟ್ ಅವರ ಪಯಣ ಕ್ರಿಕೆಟಿಗರ ತಾಳ್ಮೆಗೆ ಉದಾಹರಣೆಯಾಗಿದೆ.

ಕರುಣ್ ನಾಯರ್: ತ್ರಿಶತಕದ ದಾಖಲೆ, ಎಂಟು ವರ್ಷಗಳ ಬಳಿಕ ಅವಕಾಶ

ಕರ್ನಾಟಕದ ಬ್ಯಾಟ್ಸ್‌ಮನ್ ಕರುಣ್ ನಾಯರ್ ಭಾರತ ಪರ ಟೆಸ್ಟ್ ಕ್ರಿಕೆಟ್‌ನಲ್ಲಿ ಅಜೇಯ 303 ರನ್ ಗಳಿಸಿ ಇತಿಹಾಸ ನಿರ್ಮಿಸಿದ್ದರು. 2016ರ ಡಿಸೆಂಬರ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ಚೆನ್ನೈನಲ್ಲಿ ಈ ಸಾಧನೆ ಮಾಡಿದ್ದ ಅವರು, ಟೆಸ್ಟ್‌ನಲ್ಲಿ ತ್ರಿಶತಕ ಗಳಿಸಿದ ಎರಡನೇ ಭಾರತೀಯ ಬ್ಯಾಟ್ಸ್‌ಮನ್ ಎನಿಸಿಕೊಂಡರು. ಆದರೆ 2017ರ ಮಾರ್ಚ್ ಬಳಿಕ ಅವರಿಗೆ ಭಾರತ ಟೆಸ್ಟ್ ತಂಡದಲ್ಲಿ ಮತ್ತೊಂದು ಅವಕಾಶ ಸಿಗಲಿಲ್ಲ. ಸುಮಾರು ಎಂಟು ವರ್ಷಗಳ ಬಳಿಕ, 2025ರ ಜೂನ್‌ನಲ್ಲಿ ಇಂಗ್ಲೆಂಡ್ ಪ್ರವಾಸದ ಟೆಸ್ಟ್ ತಂಡದಲ್ಲಿ ಮತ್ತೆ ಸ್ಥಾನ ಪಡೆದರು. ಕರುಣ್ ಅವರ ಪುನರಾಗಮನ ಕನ್ನಡಿಗ ಕ್ರಿಕೆಟ್ ಅಭಿಮಾನಿಗಳಲ್ಲೂ ವಿಶೇಷ ಆಸಕ್ತಿ ಮೂಡಿಸಿತ್ತು.

ಪಾರ್ಥಿವ್ ಪಟೇಲ್: ಯುವ ವಯಸ್ಸಿನಲ್ಲೇ ಪದಾರ್ಪಣೆ, ಮತ್ತೆ ಎಂಟು ವರ್ಷಗಳ ಬಳಿಕ

ವಿಕೆಟ್ ಕೀಪರ್-ಬ್ಯಾಟ್ಸ್‌ಮನ್ ಪಾರ್ಥಿವ್ ಪಟೇಲ್ ಚಿಕ್ಕ ವಯಸ್ಸಿನಲ್ಲೇ ಭಾರತ ತಂಡಕ್ಕೆ ಪದಾರ್ಪಣೆ ಮಾಡಿದ್ದರು. ಆದರೆ ತಂಡದಲ್ಲಿ ಖಾಯಂ ಸ್ಥಾನ ಪಡೆಯಲು ಅವರಿಗೆ ಸಾಧ್ಯವಾಗಲಿಲ್ಲ. 2008ರಲ್ಲಿ ಕೊನೆಯ ಟೆಸ್ಟ್ ಆಡಿದ್ದ ಪಾರ್ಥಿವ್, 2016ರ ನವೆಂಬರ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ಮೊಹಾಲಿಯಲ್ಲಿ ನಡೆದ ಟೆಸ್ಟ್ ಮೂಲಕ ಮತ್ತೆ ಭಾರತ ತಂಡದಲ್ಲಿ ಅವಕಾಶ ಪಡೆದರು. ಈ ಮೂಲಕ ಸುಮಾರು ಎಂಟು ವರ್ಷಗಳ ನಂತರ ಟೆಸ್ಟ್ ತಂಡಕ್ಕೆ ಮರಳಿದರು.

ಆಶಿಶ್ ನೆಹ್ರಾ: ಗಾಯಗಳ ನಡುವೆಯೂ ಮತ್ತೆ ತಂಡಕ್ಕೆ

ಭಾರತದ ಎಡಗೈ ವೇಗಿ ಆಶಿಶ್ ನೆಹ್ರಾ ಅವರ ವೃತ್ತಿಜೀವನದಲ್ಲಿ ಗಾಯಗಳು ಮತ್ತು ಫಿಟ್‌ನೆಸ್ ಸಮಸ್ಯೆಗಳು ಪದೇಪದೆ ಅಡ್ಡಿಯಾದವು. 2011ರ ವಿಶ್ವಕಪ್ ಸೆಮಿಫೈನಲ್‌ನಲ್ಲಿ ಪಾಕಿಸ್ತಾನ ವಿರುದ್ಧ ಆಡಿದ ಬಳಿಕ ಅವರು ಭಾರತ ತಂಡದಿಂದ ದೂರ ಉಳಿದರು. ಬಳಿಕ 2016ರ ಜನವರಿಯಲ್ಲಿ ಆಸ್ಟ್ರೇಲಿಯಾ ವಿರುದ್ಧದ ಟಿ20 ಸರಣಿಯಲ್ಲಿ ಮತ್ತೆ ರಾಷ್ಟ್ರೀಯ ತಂಡಕ್ಕೆ ಮರಳಿದರು. ಸುಮಾರು ಐದು ವರ್ಷಗಳ ವಿರಾಮದ ಬಳಿಕ ಅವರ ಪುನರಾಗಮನ ಸಾಧ್ಯವಾಯಿತು.

ಭುವನೇಶ್ವರ್ ಕುಮಾರ್: ಸ್ವಿಂಗ್ ಬೌಲಿಂಗ್‌ನ ಅನುಭವಿ ಆಟಗಾರ

ಸ್ವಿಂಗ್ ಬೌಲಿಂಗ್‌ಗೆ ಹೆಸರುವಾಸಿಯಾದ ಭುವನೇಶ್ವರ್ ಕುಮಾರ್ ಕೂಡ ದೀರ್ಘ ವಿರಾಮದ ಬಳಿಕ ಭಾರತ ತಂಡಕ್ಕೆ ಮರಳಿದ ಆಟಗಾರರಲ್ಲಿ ಒಬ್ಬರು. 2022ರ ನವೆಂಬರ್‌ನಲ್ಲಿ ನ್ಯೂಜಿಲೆಂಡ್ ವಿರುದ್ಧ ಕೊನೆಯ ಟಿ20 ಅಂತಾರಾಷ್ಟ್ರೀಯ ಪಂದ್ಯವಾಡಿದ್ದ ಅವರು, ನಂತರ ರಾಷ್ಟ್ರೀಯ ತಂಡದಿಂದ ದೂರ ಉಳಿದಿದ್ದರು. ಇದೀಗ ಸುಮಾರು ನಾಲ್ಕು ವರ್ಷಗಳ ಬಳಿಕ, 2026ರ ಅಕ್ಟೋಬರ್‌ನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಐದನೇ ಟಿ20 ಪಂದ್ಯಕ್ಕೂ ಮುನ್ನ ತಂಡಕ್ಕೆ ಸೇರ್ಪಡೆಯಾದರು. ಆ ಪಂದ್ಯದಲ್ಲಿ ಅವರು ಆಡುವ ಹನ್ನೊಂದರ ಬಳಗದಲ್ಲೂ ಸ್ಥಾನ ಪಡೆದರು. ಅನುಭವ ಮತ್ತು ಬೌಲಿಂಗ್ ಕೌಶಲ್ಯಕ್ಕೆ ಮತ್ತೊಮ್ಮೆ ಅವಕಾಶ ಸಿಕ್ಕಂತಾಯಿತು. ಆದರೆ ಆ ಪಂದ್ಯ ಮಳೆಯಿಂದ ರದ್ದಾಗಿದ್ದರಿಂದ ಭುವಿಗೆ ಆಡುವ ಅವಕಾಶ ಸಿಕ್ಕಿರಲಿಲ್ಲ.

ದಿನೇಶ್ ಕಾರ್ತಿಕ್: ಅವಕಾಶಕ್ಕಾಗಿ ನಿರಂತರ ಹೋರಾಟ

ವಿಕೆಟ್ ಕೀಪರ್-ಬ್ಯಾಟ್ಸ್‌ಮನ್ ದಿನೇಶ್ ಕಾರ್ತಿಕ್ ಕೂಡ ಭಾರತ ತಂಡದಲ್ಲಿ ಮರಳಿ ಸ್ಥಾನ ಪಡೆದ ಆಟಗಾರರ ಪಟ್ಟಿಯಲ್ಲಿದ್ದಾರೆ. 2014ರಲ್ಲಿ ತಮ್ಮ ಕೊನೆಯ ಏಕದಿನ ಪಂದ್ಯವಾಡಿದ್ದ ಅವರು, 2017ರ ಜುಲೈನಲ್ಲಿ ವೆಸ್ಟ್ ಇಂಡೀಸ್ ವಿರುದ್ಧದ ಏಕದಿನ ಸರಣಿಯಲ್ಲಿ ಮತ್ತೊಮ್ಮೆ ಅವಕಾಶ ಪಡೆದರು. ಮೂರು ವರ್ಷಗಳಿಗೂ ಹೆಚ್ಚಿನ ವಿರಾಮದ ಬಳಿಕ ತಂಡಕ್ಕೆ ಮರಳಿದ ಕಾರ್ತಿಕ್, ತಮ್ಮ ವೃತ್ತಿಜೀವನದಲ್ಲಿ ಹಲವು ಬಾರಿ ಪುನರಾಗಮನದ ಸಾಮರ್ಥ್ಯವನ್ನ ತೋರಿಸಿದ್ದರು.

ವರುಣ್ ಚಕ್ರವರ್ತಿ: ಮಿಸ್ಟರಿ ಸ್ಪಿನ್ನರ್‌ನ ಮರಳುವಿಕೆ

ಮಿಸ್ಟರಿ ಸ್ಪಿನ್ನರ್ ವರುಣ್ ಚಕ್ರವರ್ತಿ 2021ರ ಟಿ20 ವಿಶ್ವಕಪ್‌ನಲ್ಲಿ ಭಾರತವನ್ನ ಪ್ರತಿನಿಧಿಸಿದ್ದರು. ಬಳಿಕ ತಂಡದಿಂದ ಹೊರಗುಳಿದ ಅವರು ಮತ್ತೊಂದು ಅವಕಾಶಕ್ಕಾಗಿ ಸುಮಾರು ಮೂರು ವರ್ಷ ಕಾಯಬೇಕಾಯಿತು. 2024ರ ಅಕ್ಟೋಬರ್‌ನಲ್ಲಿ ಬಾಂಗ್ಲಾದೇಶ ವಿರುದ್ಧದ ಟಿ20 ಸರಣಿಯಲ್ಲಿ ಮತ್ತೆ ಭಾರತ ತಂಡದಲ್ಲಿ ಆಡಲು ಅವಕಾಶ ಪಡೆದರು. ತಮ್ಮ ವಿಭಿನ್ನ ಸ್ಪಿನ್ ಶೈಲಿಯ ಮೂಲಕ ಅವರು ಪುನರಾಗಮನದ ಹೊಸ ಅಧ್ಯಾಯ ಆರಂಭಿಸಿದರು.

ತಾಳ್ಮೆ ಮತ್ತು ಪರಿಶ್ರಮವೇ ಯಶಸ್ಸಿನ ಕೀಲಿ

ಈ ಏಳು ಆಟಗಾರರ ಸ್ಟೋರಿಗಳು ರಾಷ್ಟ್ರೀಯ ತಂಡದಲ್ಲಿ ಸ್ಥಾನ ಕಳೆದುಕೊಂಡರೂ ವೃತ್ತಿಜೀವನ ಮುಗಿದಂತಲ್ಲ ಎಂಬುದನ್ನ ತೋರಿಸುತ್ತವೆ. ತಂಡಕ್ಕೆ ಮರಳಲು ನಿರಂತರ ಪರಿಶ್ರಮ, ಪ್ರದರ್ಶನ ಮತ್ತು ಅವಕಾಶವನ್ನ ಸದುಪಯೋಗಪಡಿಸಿಕೊಳ್ಳುವ ಸಾಮರ್ಥ್ಯ ಅಗತ್ಯ. ಕ್ರಿಕೆಟ್‌ನಲ್ಲಿ ಸ್ಪರ್ಧೆ ಹೆಚ್ಚಿದ್ದರೂ, ಸರಿಯಾದ ಸಮಯದಲ್ಲಿ ತಮ್ಮ ಸಾಮರ್ಥ್ಯವನ್ನ ಸಾಬೀತುಪಡಿಸುವ ಆಟಗಾರರಿಗೆ ಮತ್ತೆ ಅವಕಾಶದ ಬಾಗಿಲು ತೆರೆಯಬಹುದು.