ದೂರದರ್ಶನ ಎಂಬ ವಿಸ್ಮಯ ಮತ್ತು ಭಾರತದ ಮೊದಲ ಧ್ವನಿ: ಪ್ರತಿಮಾ ಪುರಿ ಅವರ ಅಪರೂಪದ ಯಶೋಗಾಥೆ

ಇಂದು ನಮ್ಮ ಜೇಬಿನಲ್ಲಿರುವ ಮೊಬೈಲ್ ಫೋನ್‌ಗಳಲ್ಲಿ, ಬೆರಳ ತುದಿಯ ಸ್ಪರ್ಶದಲ್ಲೇ ಪ್ರಪಂಚದ ಎಲ್ಲಾ ಸುದ್ದಿಗಳು, ವೀಡಿಯೊಗಳು ಕ್ಷಣಮಾತ್ರದಲ್ಲಿ ಲಭ್ಯವಾಗುತ್ತವೆ. ಜಗತ್ತು ತಂತ್ರಜ್ಞಾನದ ತುದಿಯಲ್ಲಿ ನಿಂತಿದೆ. ಆದರೆ, ಭಾರತೀಯ ದೃಶ್ಯ ಮಾಧ್ಯಮದ ಇತಿಹಾಸದ ಪುಟಗಳನ್ನು ತಿರುಗಿಸಿ ನೋಡಿದರೆ, ನಮಗೊಂದು ರೋಮಾಂಚನಕಾರಿ ಮತ್ತು ಕೌತುಕದ ಕಥೆ ಕಾಣ ಸಿಗುತ್ತದೆ. ಇದು ದೇಶಕ್ಕೆ ಟೆಲಿವಿಷನ್ ತಂತ್ರಜ್ಞಾನ ಪರಿಚಯವಾದ ದಿನಗಳ ಮತ್ತು ಕೋಟ್ಯಂತರ ಭಾರತೀಯರನ್ನು ತನ್ನ ಧ್ವನಿಯಿಂದ ಮುಗ್ಧಗೊಳಿಸಿದ ಏಕೈಕ ಮಹಿಳೆಯ ಕಥೆ.

ಕಥೆ ಪ್ರಾರಂಭವಾಗುವುದು 1950ರ ಆರಂಭದಲ್ಲಿ. ಆಗಿನ್ನೂ ಭಾರತಕ್ಕೆ ಸ್ವಾತಂತ್ರ್ಯ ಸಿಕ್ಕು ಕೆಲವೇ ವರ್ಷಗಳಾಗಿದ್ದವು. ದೇಶವು ತನ್ನದೇ ಆದ ಸಂವಿಧಾನವನ್ನು ಅಳವಡಿಸಿಕೊಂಡು ಗಣರಾಜ್ಯವಾಗಲು ಇನ್ನು ಕೆಲವೇ ದಿನಗಳು ಬಾಕಿ ಇದ್ದವು. ಜನವರಿ 6, 1950 ರಂದು 'ದಿ ಇಂಡಿಯನ್ ಎಕ್ಸ್‌ಪ್ರೆಸ್' ಪತ್ರಿಕೆಯ ಮದ್ರಾಸ್ (ಇಂದಿನ ಚೆನ್ನೈ) ಆವೃತ್ತಿಯಲ್ಲಿ ಪ್ರಕಟವಾದ ಒಂದು ಲೇಖನ ಅಂದಿನ ದಿನಗಳಲ್ಲಿ ದೊಡ್ಡ ಸಂಚಲನವನ್ನೇ ಸೃಷ್ಟಿಸಿತ್ತು.

ಟಿ.ಎನ್. ಶೇಷಾದ್ರಿ ಎಂಬ ಪತ್ರಕರ್ತರು ಬರೆದ ಆ ಲೇಖನದಲ್ಲಿ ಒಂದು ಅದ್ಭುತ ಪ್ರದರ್ಶನದ ವಿವರಣೆಯಿತ್ತು. ಸೆಂಟ್ರಲ್ ಪಾಲಿಟೆಕ್ನಿಕ್ ಮದ್ರಾಸ್‌ನ ಎಲೆಕ್ಟ್ರಿಕಲ್ ಎಂಜಿನಿಯರಿಂಗ್ ವಿದ್ಯಾರ್ಥಿಯಾಗಿದ್ದ ಬಿ. ಶಿವಕುಮಾರನ್ ಎಂಬ ಯುವಕ, ತಾನೇ ಸ್ವತಃ ಸಣ್ಣಪುಟ್ಟ ಕಚ್ಚಾ ಬಿಡಿಭಾಗಗಳನ್ನು ಜೋಡಿಸಿ ಒಂದು ಟೆಲಿವಿಷನ್ ಉಪಕರಣವನ್ನು (ಪ್ರಸಾರ ಯಂತ್ರ) ಸಜ್ಜುಗೊಳಿಸಿದ್ದರು!

ಅದನ್ನು ಕಂಡು ಬೆರಗಾದ ಶೇಷಾದ್ರಿ, "ನನ್ನ ಜ್ಞಾನದ ಪ್ರಕಾರ, ಭಾರತದಲ್ಲೇ ಅಲ್ಲದಿದ್ದರೂ ಮದ್ರಾಸ್‌ನಲ್ಲಿ ಇಂತಹ ತಾಂತ್ರಿಕ ಪ್ರದರ್ಶನ ನಡೆಯುತ್ತಿರುವುದು ಇದೇ ಮೊದಲು. ಇಡೀ ಉಪಕರಣವನ್ನು ತೀರ ಕಚ್ಚಾ ಘಟಕಗಳಿಂದ ನಿರ್ಮಿಸಲಾಗಿದೆ, ಆದರೆ ಅದುವೇ ಅದರ ದೊಡ್ಡ ಸಾಧನೆ. ಶಿವಕುಮಾರನ್ ಅವರ ಈ ವಿಶಿಷ್ಟ ಸಾಧನೆ ಮತ್ತು ಅದನ್ನು ಕಾರ್ಯಾಚರಣೆಗೆ ತಂದ ಅವರ ಜಾಣ್ಮೆಗೆ ನಾವು ಅಭಿನಂದಿಸಲೇಬೇಕು" ಎಂದು ಬರೆದಿದ್ದರು. ಅದು ಭಾರತೀಯರು ಸ್ವತಃ ಟೆಲಿವಿಷನ್ ತಂತ್ರಜ್ಞಾನದ ಕನಸು ಕಾಣಲು ಶುರುಮಾಡಿದ ಕ್ಷಣವಾಗಿತ್ತು.

History in the Picx: Pratima Puri was the first newsreader on Doordarshan.
DD began 5-minute news bulletin in 1965. pic.twitter.com/aT5xZCPNOI

— Prasar Bharati प्रसार भारती (@prasarbharati) September 15, 2016

ದೆಹಲಿಯ ಸಣ್ಣ ಸ್ಟುಡಿಯೋ ಮತ್ತು 'ದೂರದರ್ಶನ'ದ ಉದಯ

ಮದ್ರಾಸ್‌ನಲ್ಲಿ ನಡೆದ ಆ ಪ್ರಯೋಗದ ಒಂಬತ್ತು ವರ್ಷಗಳ ನಂತರ, ಅಂದರೆ ಸೆಪ್ಟೆಂಬರ್ 15, 1959 ರಂದು ಭಾರತೀಯ ಪ್ರಸಾರ ರಂಗದಲ್ಲಿ ಒಂದು ನೂತನ ಅಧ್ಯಾಯ ಪ್ರಾರಂಭವಾಯಿತು. ರಾಜಧಾನಿ ದೆಹಲಿಯಲ್ಲಿ ಒಂದು ಸಣ್ಣ ತಾತ್ಕಾಲಿಕ ಸ್ಟುಡಿಯೋ ಮತ್ತು ಕಡಿಮೆ ಸಾಮರ್ಥ್ಯದ ಟ್ರಾನ್ಸ್‌ಮಿಟರ್ ಮೂಲಕ ದೇಶದ ಮೊದಲ ಸಾರ್ವಜನಿಕ ಸೇವಾ ಪ್ರಸಾರಕ 'ದೂರದರ್ಶನ' (ಡಿಡಿ) ತನ್ನ ಪ್ರಾಯೋಗಿಕ ಪ್ರಸಾರವನ್ನು ಆರಂಭಿಸಿತು.

ಅಂದು ಪ್ರಸಾರವಾಗಿದ್ದು ಕೇವಲ ಐದು ನಿಮಿಷಗಳ ಸುದ್ದಿ! ಆದರೆ, ಆ ಐದು ನಿಮಿಷಗಳು ಭಾರತದ ಸುದ್ದಿ ಮಾಧ್ಯಮದ ಭವಿಷ್ಯವನ್ನೇ ಬದಲಾಯಿಸಿಬಿಟ್ಟವು. ಆ ಐತಿಹಾಸಿಕ ಐದು ನಿಮಿಷಗಳ ಪ್ರಸಾರಕ್ಕೆ ಒಬ್ಬರು ಧ್ವನಿಯಾಗಬೇಕಿತ್ತು. ಆ ಸೌಭಾಗ್ಯ ಮತ್ತು ಜವಾಬ್ದಾರಿ ಒಲಿದು ಬಂದಿದ್ದು 'ಪ್ರತಿಮಾ ಪುರಿ' ಅವರಿಗೆ. ಹೀಗೆ, ಪ್ರತಿಮಾ ಪುರಿ ಅವರು ಭಾರತದ ಅಧಿಕೃತ 'ಮೊದಲ ವಾರ್ತಾ ವಾಚಕಿ' ಎಂಬ ಹೆಗ್ಗಳಿಕೆಗೆ ಪಾತ್ರರಾದರು.

ಹಿಮಾಚಲ ಪ್ರದೇಶದ ರಮಣೀಯ ಶಿಮ್ಲಾದಲ್ಲಿ ವಿದ್ಯಾ ರಾವತ್ ಆಗಿ ಜನಿಸಿದ ಪ್ರತಿಮಾ, ತಮ್ಮ ವೃತ್ತಿಜೀವನವನ್ನು ಆರಂಭಿಸಿದ್ದು ತಮ್ಮ ತವರು ನಗರದ 'ಆಲ್ ಇಂಡಿಯಾ ರೇಡಿಯೋ' (AIR - ಆಕಾಶವಾಣಿ) ಕೇಂದ್ರದಲ್ಲಿ. ಪ್ರಸಾರ ಮಾಧ್ಯಮಕ್ಕೆಂದೇ ದೇವದತ್ತವಾಗಿ ಬಂದಂತಿದ್ದ ಅಪರೂಪದ ಗಂಭೀರ ಮತ್ತು ಸ್ಪಷ್ಟ ಧ್ವನಿ ಅವರದ್ದಾಗಿತ್ತು. ರೇಡಿಯೋ ಮೈಕ್ ಮುಂದೆ ನಿಂತು ಅವರು ಮಾತನಾಡಿದರೆ, ಕೇಳುಗರು ಮಂತ್ರಮುಗ್ಧರಾಗುತ್ತಿದ್ದರು.

ಆಲ್ ಇಂಡಿಯಾ ರೇಡಿಯೋದಲ್ಲಿ ಅವರ ಈ ಯಶಸ್ಸು, ಮುಂದೆ ಕೇಂದ್ರ ಸರ್ಕಾರವು ತನ್ನದೇ ಆದ ದೂರದರ್ಶನ ಚಾನೆಲ್ ಆರಂಭಿಸಲು ನಿರ್ಧರಿಸಿದಾಗ ಅವರ ನೆರವಿಗೆ ಬಂತು. ಅವರ ಧ್ವನಿ ಮತ್ತು ಆಕರ್ಷಕ ವ್ಯಕ್ತಿತ್ವವನ್ನು ಗುರುತಿಸಿದ ಅಧಿಕಾರಿಗಳು, ಅವರನ್ನು ದೇಶದ ಮೊದಲ ಸುದ್ದಿ ಉದ್ಘೋಷಕಿಯಾಗಿ ಆಯ್ಕೆ ಮಾಡಿದರು.

ಇಂದಿನಂತೆ ನೂರಾರು ಚಾನೆಲ್‌ಗಳು, ನಿರಂತರ ಆರ್ಭಟಿಸುವ ನ್ಯೂಸ್ ರೂಮ್‌ಗಳು ಅಂದು ಇರಲಿಲ್ಲ. 1975ರವರೆಗೂ ದೆಹಲಿಯನ್ನು ಹೊರತುಪಡಿಸಿದರೆ ದೇಶದ ಮತ್ತಿನ್ನಾವ ನಗರಗಳಿಗೂ ದೂರದರ್ಶನ ಸೇವೆ ವಿಸ್ತರಿಸಿರಲಿಲ್ಲ. ಇಡೀ ದೇಶಕ್ಕೆ ದೂರದರ್ಶನವೇ ಏಕೈಕ ದೃಶ್ಯ ಮಾಧ್ಯಮವಾಗಿತ್ತು. ಆಗಿನ್ನೂ ಬೆರಳೆಣಿಕೆಯಷ್ಟು ಶ್ರೀಮಂತರ ಮನೆಗಳಲ್ಲಿ ಮಾತ್ರ ಬ್ಲಾಕ್ ಅಂಡ್ ವೈಟ್ ಟಿವಿಗಳಿದ್ದವು. ಪ್ರತಿಮಾ ಪುರಿ ಅವರ ಪರದೆಯ ಸಮಯ (Screen time) ಕೂಡ ದಿನಕ್ಕೆ ಕೆಲವೇ ನಿಮಿಷಗಳಿಗೆ ಸೀಮಿತವಾಗಿತ್ತು.

ಆದಾಗ್ಯೂ, ಭಾರತೀಯ ವೀಕ್ಷಕರ ಮೇಲೆ ಪ್ರತಿಮಾ ಪುರಿ ಬೀರಿದ ಪ್ರಭಾವ ಅಪಾರ. ಯಾವುದೇ ಆರ್ಭಟವಿಲ್ಲದ ಸರಳ ಭಾರತೀಯ ಉಡುಪು, ಮುಖದಲ್ಲಿ ಸಾತ್ವಿಕ ಮಂದಹಾಸ, ಕಿವಿಗೆ ಇಂಪೆನಿಸುವ ಸ್ಪಷ್ಟ ಭಾಷಾ ಉಚ್ಚಾರಣೆ ಮತ್ತು ಸೌಮ್ಯ ವ್ಯಕ್ತಿತ್ವದಿಂದ ಅವರು ಭಾರತದ ಪ್ರತಿಯೊಬ್ಬ ವೀಕ್ಷಕನ ಮನಸ್ಸನ್ನು ಗೆದ್ದರು. ಸುದ್ದಿ ಓದುವುದೆಂದರೆ ಕೇವಲ ಮಾಹಿತಿ ನೀಡುವುದಲ್ಲ, ಅದಕ್ಕೊಂದು ಗೌರವ ತಂದುಕೊಡುವುದು ಎಂಬುದನ್ನು ಅವರು ನಿರೂಪಿಸಿದರು. ಸುದ್ದಿ ವೀಕ್ಷಣೆಗಾಗಿ ಜನರು ಟಿವಿ ಮುಂದೆ ಕಾದು ಕುಳಿತುಕೊಳ್ಳುವಂತೆ ಮಾಡಿದ ಅವರ ಕಾಲದ 'ಐಕಾನಿಕ್' (Iconic) ವ್ಯಕ್ತಿಯಾಗಿ ಅವರು ಹೊರಹೊಮ್ಮಿದರು.

ಅವರ ವೃತ್ತಿಜೀವನದ ಮತ್ತೊಂದು ಪ್ರಮುಖ ಮೈಲಿಗಲ್ಲು ಎಂದರೆ ಅವರು ನಡೆಸಿದ ಸಂದರ್ಶನಗಳು. ಅಂತರರಾಷ್ಟ್ರೀಯ ಮಟ್ಟದ ಹಲವು ಗಣ್ಯರನ್ನು ಅವರು ಸಂದರ್ಶಿಸಿದ್ದರು. ಅದರಲ್ಲಿ ಅತ್ಯಂತ ಪ್ರಮುಖವಾದದ್ದು, ಬಾಹ್ಯಾಕಾಶಕ್ಕೆ ಕಾಲಿಟ್ಟ ವಿಶ್ವದ ಮೊದಲ ಮಾನವ, ರಷ್ಯಾದ ಯೂರಿ ಗಗಾರಿನ್ ಅವರ ಸಂದರ್ಶನ! ಗಗಾರಿನ್ ಭಾರತಕ್ಕೆ ಭೇಟಿ ನೀಡಿದ್ದಾಗ ಪ್ರತಿಮಾ ಪುರಿ ಅವರು ಅವರನ್ನು ಅತ್ಯಂತ ಚಾತುರ್ಯದಿಂದ ಸಂದರ್ಶಿಸಿ, ತಮ್ಮ ಪತ್ರಕರ್ತೆ ಸಾಮರ್ಥ್ಯವನ್ನು ಸಾಬೀತುಪಡಿಸಿದ್ದರು.

ಬೋಳಾದ ತಲೆ ಮತ್ತು ನೂತನ ನಾಯಕಿ ಸಲ್ಮಾ ಸುಲ್ತಾನ್!

1965 ರಲ್ಲಿ ದೂರದರ್ಶನವು ಆಕಾಶವಾಣಿಯ ಒಂದು ವಿಭಾಗವಾಗಿ ದೈನಂದಿನ ಪ್ರಸಾರವನ್ನು ಆರಂಭಿಸಿತು. ವೀಕ್ಷಕರ ಸಂಖ್ಯೆ ಹೆಚ್ಚಾದಂತೆ, ಸುದ್ದಿ ನಿರೂಪಣೆಗೆ ಹೆಚ್ಚಿನ ಆಂಕರ್‌ಗಳ ಅಗತ್ಯವಿತ್ತು. ಆ ಸಮಯದಲ್ಲಿ ನಡೆದ ಒಂದು ಸ್ವಾರಸ್ಯಕರ ಘಟನೆಯನ್ನು ಹಿರಿಯ ಸುದ್ದಿ ನಿರೂಪಕಿ ಸಲ್ಮಾ ಸುಲ್ತಾನ್ ಅವರು 'ದಿ ಹಿಂದೂ' ಪತ್ರಿಕೆಗೆ ನೀಡಿದ ಸಂದರ್ಶನದಲ್ಲಿ ನೆನಪಿಸಿಕೊಂಡಿದ್ದಾರೆ.

"ಆ ದಿನಗಳಲ್ಲಿ (1967-68ರ ಸುಮಾರಿಗೆ), ಸುದ್ದಿ ಪ್ರಸಾರಕ್ಕೆ ಯುವಕರನ್ನು ಆಯ್ಕೆ ಮಾಡುತ್ತಿರಲಿಲ್ಲ. ಬದಲಾಗಿ, ಪ್ರಬುದ್ಧತೆ ಮತ್ತು ಅನುಭವ ಇರುವವರನ್ನು ಮಾತ್ರ ಆಯ್ಕೆ ಮಾಡುತ್ತಿದ್ದರು. ಆಗ ಪ್ರತಿಮಾ ಪುರಿ ಮತ್ತು ಗೋಪಾಲ್ ಕೌಲ್ ಅವರು ದೂರದರ್ಶನದ ಖಾಯಂ ಮುಖಗಳಾಗಿದ್ದರು. ಆದರೆ, ಗೋಪಾಲ್ ಕೌಲ್ ಅವರಿಗೆ ಸುದ್ದಿ ಓದುವುದೆಂದರೆ ಅಷ್ಟಕ್ಕಷ್ಟೇ. ಅವರಿಗೆ ಆ ಕೆಲಸ ಇಷ್ಟವಿರಲಿಲ್ಲ. ಹೀಗಾಗಿ, ಒಮ್ಮೆ ಸುದ್ದಿ ಪ್ರಸಾರಕ್ಕೆ ಕೆಲವೇ ಸಮಯ ಬಾಕಿ ಇರುವಾಗ, ಕೌಲ್ ಅವರು ತಮ್ಮ ತಲೆಯನ್ನು ಸಂಪೂರ್ಣವಾಗಿ ಬೋಳಿಸಿಕೊಂಡು (ಮೊಟ್ಟೆಯಂತೆ) ಆಫೀಸಿಗೆ ಬಂದರು! ಇದನ್ನು ನೋಡಿ ಗಾಬರಿಗೊಂಡ ನಿರ್ಮಾಪಕರು, ಆ ನೇರ ಪ್ರಸಾರದಲ್ಲಿ ಕೌಲ್ ಅವರನ್ನು ಪರದೆಯ ಮೇಲೆ ತರಲು ಸಾಧ್ಯವೇ ಇಲ್ಲ ಎಂದುಕೊಂಡು, ತಕ್ಷಣವೇ ಪರ್ಯಾಯ ವ್ಯಕ್ತಿಗಾಗಿ ಹುಡುಕಾಟ ನಡೆಸಿದರು. ಆಗ ಅವರ ಕಣ್ಣಿಗೆ ಬಿದ್ದಿದ್ದು ನಾನು! ನನಗೆ ತಕ್ಷಣವೇ ಒಂದು ತ್ವರಿತ ಆಡಿಷನ್ ನೀಡಲು ಹೇಳಿದರು," ಎಂದು ಸಲ್ಮಾ ಸುಲ್ತಾನ್ ಸ್ಮರಿಸುತ್ತಾರೆ.

ಹೀಗೆ ಸಲ್ಮಾ ಸುಲ್ತಾನ್ 1967 ರಲ್ಲಿ ದೂರದರ್ಶನವನ್ನು ಸೇರಿಕೊಂಡರು ಮತ್ತು ಶೀಘ್ರದಲ್ಲೇ ಪ್ರತಿಮಾ ಪುರಿ ಅವರೊಂದಿಗೆ ಪ್ರಮುಖ ಸುದ್ದಿ ನಿರೂಪಕಿಯಾಗಿ ಜನಪ್ರಿಯರಾದರು.

ಶಿಕ್ಷಕಿಯಾಗಿ ಬದಲಾದ 'ಮೊದಲ ಧ್ವನಿ'

ಸಲ್ಮಾ ಸುಲ್ತಾನ್ ಅವರ ಹಠಾತ್ ಆಗಮನದ ನಂತರ, ದೂರದರ್ಶನಕ್ಕೆ ಒಂದು ವಿಷಯ ಸ್ಪಷ್ಟವಾಯಿತು. ಮಾಧ್ಯಮ ಬೆಳೆದಂತೆ ಸುದ್ದಿ ನಿರೂಪಕರಿಗೆ ಸೂಕ್ತವಾದ ವೃತ್ತಿಪರ ತರಬೇತಿಯ ಅಗತ್ಯವಿದೆ ಎಂದು ಪ್ರಸಾರಕರು ಅರಿತುಕೊಂಡರು. ಈ ಹಂತದಲ್ಲಿ ಪ್ರತಿಮಾ ಪುರಿ ಅವರ ಪಾತ್ರವೂ ಬದಲಾಯಿತು.

ಅವರು ಕೇವಲ ಕ್ಯಾಮೆರಾ ಮುಂದೆ ಸುದ್ದಿ ಓದುವುದಕ್ಕಷ್ಟೇ ಸೀಮಿತವಾಗದೆ, ಹೊಸದಾಗಿ ಸೇರ್ಪಡೆಗೊಳ್ಳುತ್ತಿದ್ದ ಯುವ ಸುದ್ದಿ ವಾಚಕರಿಗೆ ಮತ್ತು ನಿರೂಪಕರಿಗೆ ಮಾರ್ಗದರ್ಶಕಿಯಾಗಿ, ತರಬೇತುದಾರರಾಗಿ ಕಾರ್ಯಾಚರಿಸಲು ತೊಡಗಿದರು. ಧ್ವನಿಯ ಏರಿಳಿತ, ದೇಹಭಾಷೆ, ಕ್ಯಾಮೆರಾ ಎದುರಿಸುವ ಧೈರ್ಯ ಮತ್ತು ಉಚ್ಚಾರಣಾ ಸ್ಪಷ್ಟತೆಯನ್ನು ತಮ್ಮ ಉತ್ತರಾಧಿಕಾರಿಗಳಿಗೆ ಧಾರೆ ಎರೆದರು. ಭಾರತದ ಮೊದಲ ಸುದ್ದಿ ವಾಚಕಿಯೇ, ದೇಶದ ಮುಂದಿನ ತಲೆಮಾರಿನ ಪ್ರಸಾರಕರಿಗೆ ಗುರುವಾಗಿ ನಿಂತಿದ್ದು ದೂರದರ್ಶನದ ಇತಿಹಾಸದ ಸುಂದರ ಅಧ್ಯಾಯ.

ಪ್ರತಿಮಾ ಪುರಿ ಅವರು 2007 ರಲ್ಲಿ ಈ ಲೋಕವನ್ನು ಅಗಲಿದರು. ಆದರೆ, ಅವರು ಹಾಕಿಕೊಟ್ಟ ತಡಿ ಮತ್ತು ಕಲ್ಪಿಸಿದ ಭದ್ರ ಬುನಾದಿ ಇಂದಿಗೂ ಮಾಧ್ಯಮ ರಂಗದಲ್ಲಿದೆ. ಭಾರತೀಯ ದೃಶ್ಯ ಮಾಧ್ಯಮದಲ್ಲಿ ಪುರುಷರದ್ದೇ ಮೇಲುಗೈ ಇದ್ದ ಕಾಲದಲ್ಲಿ, ತಮ್ಮ ಗಂಭೀರತೆ, ವಿದ್ವತ್ತು ಮತ್ತು ಸರಳತೆಯಿಂದ ದೇಶದ ಕೋಟ್ಯಂತರ ಮನಗಳನ್ನು ಗೆದ್ದು, ತದನಂತರ ಬಂದ ಸಾವಿರಾರು ಮಹಿಳಾ ಪತ್ರಕರ್ತೆಯರು ಹಾಗೂ ಸುದ್ದಿ ನಿರೂಪಕಿಯರಿಗೆ ದಾರಿದೀಪವಾದರು.

ಇಂದು ಸಾವಿರಾರು ಚಾನೆಲ್‌ಗಳು, ತರಹೇವಾರಿ ತಂತ್ರಜ್ಞಾನಗಳು ನಮ್ಮ ಮುಂದಿರಬಹುದು. ಆದರೆ, 1950 ರಲ್ಲಿ ಮದ್ರಾಸ್‌ನ ಸಣ್ಣ ತಾಂತ್ರಿಕ ಪ್ರಯೋಗದಿಂದ ಹಿಡಿದು, 1959 ರ ದೆಹಲಿಯ ಸಣ್ಣ ಸ್ಟುಡಿಯೋದಲ್ಲಿ ಪ್ರತಿಮಾ ಪುರಿ ಅವರು "ನಮಸ್ಕಾರ, ಇದು ಆಕಾಶವಾಣಿ... ದೂರದರ್ಶನದ ಸುದ್ದಿಗಳು" ಎಂದು ಹೇಳಿದ ಆ ಮೊದಲ ಧ್ವನಿ ಇದೆಯಲ್ಲ, ಅದು ಭಾರತೀಯ ಪ್ರಸಾರ ರಂಗದ ಇತಿಹಾಸದಲ್ಲಿ ಎಂದಿಗೂ ಮಾಸದ ಸುವರ್ಣಾಕ್ಷರ!