ಪ್ರಧಾನಿ ಮೋದಿ ಕುರಿತು ಅಪಹಾಸ್ಯ.! ತಾಯಿ ವಿಷಯದಲ್ಲಿ ರಾಜಕೀಯ ಬೇಡ.. ರಾಹುಲ್‌ ಗಾಂಧಿ ವಿರುದ್ಧ ಬಿಜೆಪಿ ಗರಂ

Rahul Gandhi Chhatron ki Gonj event : ಇಂದೋರ್‌ನಲ್ಲಿ ನಡೆದ ‘ಛತ್ರೋನ್ ಕಿ ಗೂಂಜ್’ ಕಾರ್ಯಕ್ರಮದಲ್ಲಿ ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ಸಮ್ಮುಖದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರನ್ನು ಅಣಕಿಸಿದ ವಿಡಿಯೋ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಕಾರ್ಯಕ್ರಮದ ವೇಳೆ ಕಾಮಿಡಿಯನ್ ಪುಲ್ಕಿತ್ ಮಣಿ ಎಂಬುವವರು ಪ್ರಧಾನಿ ಮೋದಿಯವರಂತೆ ನಟಿಸಿ, ವಿದೇಶಾಂಗ ನೀತಿ ಹಾಗೂ ವೃದ್ಧ ಮಹಿಳೆಯೊಂದಿಗಿನ ಅವರ ಸಂವಾದವನ್ನು ಅಣಕಿಸಿ ಅಭಿನಯಿಸಿದರು. ಈ ಸಂದರ್ಭದಲ್ಲಿ ರಾಹುಲ್ ಗಾಂಧಿ ನಗುತ್ತಿರುವುದು ವಿಡಿಯೋದಲ್ಲಿ ಕಂಡುಬಂದಿದ್ದು, ಬಿಜೆಪಿ ಮತ್ತು ಕಾಂಗ್ರೆಸ್ ನಡುವೆ ಹೊಸ ವಾಗ್ವಾದಕ್ಕೆ ಕಾರಣವಾಗಿದೆ.  

ರಾಹುಲ್ ಗಾಂಧಿ ನಡೆಗೆ ಬಿಜೆಪಿ ತೀವ್ರ ಆಕ್ರೋಶ 
ಬಿಜೆಪಿಯ ರಾಷ್ಟ್ರೀಯ ಖಾತೆಯು "ಒಂದೆಡೆ ಪ್ರಧಾನಿ ಮೋದಿ ವೃದ್ಧ ತಾಯಿಗೆ ಗೌರವ ನೀಡಿದರೆ, ಇನ್ನೊಂದೆಡೆ ರಾಹುಲ್ ಗಾಂಧಿ ತಮ್ಮ ಕಾರ್ಯಕ್ರಮದಲ್ಲಿ ಅವರನ್ನು ಅಪಹಾಸ್ಯ ಮಾಡಿದ್ದಾರೆ" ಎಂದು ಟೀಕಿಸಿದೆ. ಉತ್ತರಾಖಂಡ ಮುಖ್ಯಮಂತ್ರಿ ಪುಷ್ಕರ್ ಸಿಂಗ್ ಧಾಮಿ ಮಾತನಾಡಿ, "ತಾಯಿ ರಾಜಕೀಯದ ವಿಷಯವಲ್ಲ, ಯಾವುದೇ ನಾಗರಿಕ ಸಮಾಜದಲ್ಲಿ ತಾಯಿಗೆ ಅವಮಾನ ಮಾಡುವುದನ್ನು ಸಹಿಸಲು ಸಾಧ್ಯವಿಲ್ಲ" ಎಂದು ಕಿಡಿಕಾರಿದ್ದಾರೆ. ಸಚಿವ ಪ್ರಹ್ಲಾದ್ ಜೋಶಿ ಅವರು, "ವಿದ್ಯಾರ್ಥಿಗಳ ವೇದಿಕೆಯನ್ನು ಪ್ರಧಾನಿಯವರ ದಿವಂಗತ ತಾಯಿಯನ್ನು ಅಪಹಾಸ್ಯ ಮಾಡಲು ಬಳಸಿರುವುದು ಅವರ ನೈತಿಕ ದಿವಾಳಿತನವನ್ನು ತೋರಿಸುತ್ತದೆ" ಎಂದು ಎಕ್ಸ್‌ನಲ್ಲಿ ಬರೆದಿದ್ದಾರೆ. ಬಿಜೆಪಿ ವಕ್ತಾರ ಸಿ.ಆರ್. ಕೇಶವನ್ ಕೂಡ ರಾಹುಲ್ ಗಾಂಧಿಯವರ ಈ ನಡೆಯನ್ನು ಕಟುವಾಗಿ ವಿಮರ್ಶಿಸಿದ್ದಾರೆ.  

ವೇದಿಕೆಯಲ್ಲಿ ನಡೆದ ಹಾಸ್ಯ ಪ್ರದರ್ಶನದ ವಿವರ
ಸ್ಟ್ಯಾಂಡ್-ಅಪ್ ಕಾಮಿಡಿಯನ್ ಪುಲ್ಕಿತ್ ಮಣಿ ವೇದಿಕೆಯಲ್ಲಿ ಪ್ರಧಾನಿ ಮೋದಿಯವರ ಮಾತಿನ ಶೈಲಿ ಹಾಗೂ ವಿದೇಶಿ ನಾಯಕರೊಂದಿಗೆ ವ್ಯವಹರಿಸುವ "ಮೈ ಫ್ರೆಂಡ್" ಶೈಲಿಯನ್ನು ಅನುಕರಿಸಿದರು. ಈ ವೇಳೆ ಮೋದಿಯವರ ವಿದೇಶಾಂಗ ನೀತಿ, ಮಕ್ಕಳೊಂದಿಗೆ ನಡೆಸಿದ ನಾಣ್ಯದ ಟ್ರಿಕ್, ಗಲ್ಗೋಟಿಯಾಸ್ ವಿವಾದ ಹಾಗೂ ಪ್ರಧಾನಿಯವರ ತಾಯಿಯ ಉಲ್ಲೇಖಗಳನ್ನು ಮಾಡಲಾಗಿತ್ತು. ಕಾಮಿಡಿಯನ್ "ಮೈ ಫ್ರೆಂಡ್, ಹೇಗಿದ್ದೀರಾ?" ಎಂದು ಕೇಳಿದಾಗ, ರಾಹುಲ್ ಗಾಂಧಿ "ನಾನು ಚೆನ್ನಾಗಿದ್ದೇನೆ, ಮೋದಿ ಜಿ ನೀವು ಹೇಗಿದ್ದೀರಿ?" ಎಂದು ಉತ್ತರಿಸಿದ್ದರು. ಈ ಅಣಕದ ತುಣುಕುಗಳು ಜಾಲತಾಣಗಳಲ್ಲಿ ಹರಿದಾಡುತ್ತಿದ್ದು ದೊಡ್ಡ ರಾಜಕೀಯ ರಂಪಾಟಕ್ಕೆ ದಾರಿಮಾಡಿಕೊಟ್ಟಿದೆ.