ರಾಷ್ಟ್ರೀಯ ಹೆದ್ದಾರಿಯಲ್ಲಿ ಯುವಕರ ಕುದುರೆ ರೇಸ್ ಹುಚ್ಚಾಟ.!

Mandya Belluru Cross News : ರಾಷ್ಟ್ರೀಯ ಹೆದ್ದಾರಿ 75ರಲ್ಲಿ ಕುದುರೆ ಟಾಂಗಾ ಗಾಡಿಗಳ ರೇಸ್ ನಡೆಸಿದ ಯುವಕರು, ಸಾರ್ವಜನಿಕರ ಸುರಕ್ಷತೆಯನ್ನೇ ಅಪಾಯಕ್ಕೆ ದೂಡಿದ್ದಾರೆ. ಬೆಟ್ಟಿಂಗ್ ಕಟ್ಟಿ ಕುದುರೆ ರೇಸ್ ನಡೆಸಿದ್ದಲ್ಲದೆ, ರೇಸ್‌ನ ಹಿಂದೆ ನೂರಾರು ಯುವಕರು ಬೈಕ್‌ಗಳಲ್ಲಿ ಸಾಗಿದ್ದಾರೆ. ಇದರಿಂದ ಹೆದ್ದಾರಿಯಲ್ಲಿ ವಾಹನ ಸಂಚಾರಕ್ಕೂ ಅಡ್ಡಿಯಾಗಿದೆ ಈ ಕುರಿತು ಒಂದು ರಿಪೋರ್ಟ್ ಇಲ್ಲಿದೆ ನೋಡಿ.

ಮಂಡ್ಯ ಜಿಲ್ಲೆ ನಾಗಮಂಗಲ ತಾಲೂಕಿನ ಬೆಳ್ಳೂರು ಕ್ರಾಸ್ ಬಳಿ ನಡೆದ ಈ ಘಟನೆಗೆ ವಾಹನ ಸವಾರರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಇದು ರಾಷ್ಟ್ರೀಯ ಹೆದ್ದಾರಿ 75. ವಾಹನಗಳು ವೇಗವಾಗಿ ಸಂಚರಿಸಬೇಕಾದ ರಸ್ತೆಯಲ್ಲಿ ಕುದುರೆಗಳ ಓಟ ನಡೆದಿದೆ. ಇದು ಕ್ರೀಡಾಂಗಣವಲ್ಲ. ಸಾರ್ವಜನಿಕರ ಸಂಚಾರಕ್ಕೆ ಮೀಸಲಾದ ಹೆದ್ದಾರಿ. ಆದರೆ, ಕೆಲ ಯುವಕರ ಹುಚ್ಚಾಟಕ್ಕೆ ಸಾಕ್ಷಿಯಾಗಿದೆ. 

ಮಂಡ್ಯ ಜಿಲ್ಲೆ ನಾಗಮಂಗಲ ತಾಲೂಕಿನ ಬೆಳ್ಳೂರು ಕ್ರಾಸ್ ಬಳಿ ಈ ಘಟನೆ ನಡೆದಿದ್ದು. ಬೆಂಗಳೂರು - ಮಂಗಳೂರು ರಾಷ್ಟ್ರೀಯ ಹೆದ್ದಾರಿಯಲ್ಲಿ ಕುದುರೆ ಟಾಂಗಾ ಗಾಡಿಗಳ ರೇಸ್ ನಡೆಸಲಾಗಿದೆ. ಬೆಟ್ಟಿಂಗ್ ಕಟ್ಟಿ ರೇಸ್ ನಡೆಸಲಾಗಿದೆ ಎನ್ನಲಾಗಿದ್ದು, ಬೆಳ್ಳೂರು ಕ್ರಾಸ್‌ನಿಂದ ಕದಬಳ್ಳಿ ಟೋಲ್‌ವರೆಗೆ ಕುದುರೆ ಟಾಂಗಾ ಗಾಡಿಗಳನ್ನು ಓಡಿಸಲಾಗಿದೆ.

ಇನ್ನು ಕುದುರೆ ಟಾಂಗಾ ಗಾಡಿಗಳ ರೇಸ್ ನೋಡಲು ಮತ್ತು ಅದರ ಹಿಂದೆ ಸಾಗಲು ನೂರಾರು ಯುವಕರು ಬೈಕ್‌ಗಳಲ್ಲಿ ತೆರಳಿದ್ದಾರೆ. ಇದರಿಂದ ಹೆದ್ದಾರಿಯಲ್ಲಿ ಸಂಚರಿಸುತ್ತಿದ್ದ ಇತರ ವಾಹನ ಸವಾರರಿಗೆ ತೊಂದರೆಯಾಗಿದೆ. ರಾಷ್ಟ್ರೀಯ ಹೆದ್ದಾರಿಯಲ್ಲೇ ಇಂತಹ ರೇಸ್ ಆಯೋಜಿಸಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ. ತಪ್ಪಿತಸ್ಥ ಯುವಕರ ವಿರುದ್ಧ ಕ್ರಮಕ್ಕೆ ಆಗ್ರಹಿಸಿದ್ದಾರೆ.

ಘಟನೆ ಸಂಬಂಧಿಸಿದಂತೆ ಮಂಡ್ಯದಲ್ಲಿ ಎಸ್ಪಿ ಶೋಭಾರಾಣಿ ಪ್ರತಿಕ್ರಿಯಿಸಿ ನೆನ್ನೆ ಬೆಳಿಗ್ಗೆ 6 ಗಂಟೆ ಸಮಯದಲ್ಲಿ ಈ ರೇಸ್ ನಡೆದಿದೆ. ಬೆಳ್ಳೂರು ಪೊಲೀಸ್ ಠಾಣೆಯಲ್ಲಿ ಸುಮೋಟೊ ಪ್ರಕರಣ ದಾಖಲಾಗಿದೆ. ಎಲ್ಲಾ ವಾಹನಗಳು ಹಾಸನ ಜಿಲ್ಲೆಯದಾಗಿದೆ. ತನಿಖೆ ಬಳಿಕ ಮಾಹಿತಿ ಸಿಗಲಿದೆ. ಕುದುರೆ ರೇಸ್ ಗೆ ನಾವು ಯಾವ ಅನುಮತಿ ಕೊಟ್ಟಿಲ್ಲ. ಏಕಾಏಕಿ ಬಂದಿದ್ದಾರೆ. ಯಾವ ಕಡೆಯಿಂದ ಬಂದಿದ್ದಾರೆ ಅನ್ನೋದರ ತನಿಖೆ ಆಗ್ತಿದೆ.ರಾಷ್ಟ್ರೀಯ ಹೆದ್ದಾರಿಯಲ್ಲಿ ರೇಸ್ ಮಾಡುವ ಆಗಿಲ್ಲ. ಕ್ರೈಂ ನಂ 169/26 ಅಡಿಯಲ್ಲಿ ಪ್ರಕರಣ ದಾಖಲಿಸಿ ಆರೋಪಿಗಳ ಪತ್ತೆ ಕಾರ್ಯ ಆಗಲಿದೆ ಎಂದ ಎಸ್ಪಿ. ಒಟ್ಟಾರೆ ಘಟನೆಗೆ ಸಂಬಂಧಿಸಿದಂತೆ ರೇಸ್ ನಡೆಸಿದವರ ವಿರುದ್ಧ ಬೆಳ್ಳೂರು ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ರಾಷ್ಟ್ರೀಯ ಹೆದ್ದಾರಿಗಳಲ್ಲಿ ಇಂತಹ ರೇಸ್‌ಗಳಿಗೆ ಕಡಿವಾಣ ಹಾಕಬೇಕು. ಸಾರ್ವಜನಿಕರ ಸುರಕ್ಷತೆಗೆ ಆದ್ಯತೆ ನೀಡಬೇಕು ಎಂದು ಸಾರ್ವಜನಿಕರ ಆಗ್ರಹವಾಗಿದೆ.