ರಾಜ್ಯದಲ್ಲಿ ಬರ ಪರಿಸ್ಥಿತಿ ಇರುವಾಗ ಮೈಸೂರು ದಸರಾದಲ್ಲಿ ಕಂಬಳ ನಡೆಸದಂತೆ ಮಾಜಿ ಶಾಸಕ ಎ.ಟಿ.ರಾಮಸ್ವಾಮಿ ಆಗ್ರಹ

ರಾಜ್ಯದಲ್ಲಿ ಭೀಕರ ಬರ ಪರಿಸ್ಥಿತಿ ಇರುವಾಗ ಮೈಸೂರು ದಸರಾದಲ್ಲಿ ಕಂಬಳ ಕ್ರೀಡೆ ನಡೆಸಬೇಡಿ ಎಂದು ‘ಪರಿಸರಕ್ಕಾಗಿ ನಾವು’ ಸಂಘಟನೆಯ ಪ್ರಧಾನ ಕಾರ್ಯದರ್ಶಿ ಪರಶುರಾಮೇಗೌಡ ಹಾಗೂ ಮಾಜಿ ಶಾಸಕರಾದ ಎ.ಟಿ.ರಾಮಸ್ವಾಮಿ ಆಗ್ರಹಿಸಿದ್ದಾರೆ.

ಮಂಗಳೂರಿನ ಖಾಸಗಿ ಹೊಟೇಲ್ ಹಾಲ್ ನಲ್ಲಿ ಕರ್ನಾಟಕ ರಾಜ್ಯ ರೈತ ಸಂಘ ಹಾಗೂ ʼಪರಿಸರಕ್ಕಾಗಿ ನಾವುʼ ಸಂಘಟನೆ ಜಂಟಿಯಾಗಿ ನಡೆಸಿದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಪರಿಸರಕ್ಕಾಗಿ ನಾವು ಸಂಘಟನೆಯ ಪ್ರಧಾನ ಕಾರ್ಯದರ್ಶಿ ಪರಶುರಾಮೇಗೌಡ, ಕರಾವಳಿಯ ಗ್ರಾಮೀಣ ಕ್ರೀಡೆಯಾದ ಕಂಬಳದ ಬಗ್ಗೆ ನಮಗೆಲ್ಲ ಅಪಾರ ಗೌರವದ ಜೊತೆಗೆ ಅಭಿಮಾನವಿದೆ.

ಕಂಬಳ ತುಳು ನಾಡಿನ ಹೆಮ್ಮೆಯ ಕ್ರೀಡೆ ಆಗಿದೆ. ಕಂಬಳವನ್ನು ನಾವು ವಿರೋಧ ಮಾಡಿಲ್ಲ.. ಆದರೆ, ಈ ಸಂದರ್ಭದಲ್ಲಿ ಮೈಸೂರಿನಲ್ಲಿ ದಸರಾ ಮಹೋತ್ಸವದ ಸಂದರ್ಭದಲ್ಲಿ ಕಂಬಳ ಮಾಡಬೇಡಿ ಎಂಬುದಷ್ಟೇ ನಮ್ಮ ವಿನಂತಿ. ದಯವಿಟ್ಟು ನಿಮ್ಮ ನಿರ್ಧಾರವನ್ನು ಮರು ಪರಿಶೀಲಿಸಿ ಮೈಸೂರು ದಸರಾದಲ್ಲಿ ಕಂಬಳ ಆಯೋಜನೆಯನ್ನು ರದ್ದುಪಡಿಸುವಂತೆ ನಾವು ಮನವಿ ಮಾಡಿದ್ದಾರೆ.

ಮುಖ್ಯಮಂತ್ರಿಗಳು ಹಲವಾರು ಸಂದರ್ಭಗಳಲ್ಲಿ ಜನಗಳ ಭಾವನೆಗಳಿಗೆ ನಾವು ಯಾವಾಗಲೂ ತೊಂದರೆ ಮಾಡಲ್ಲ. ನಾನು ಇದನ್ನ ಪ್ರತಿಷ್ಠೆ ಆಗಿ ತೆಗೆದುಕೊಂಡಿಲ್ಲ ಮರು ಪರಿಶೀಲನೆ ಮಾಡುತ್ತೇನೆ. ಅಧಿಕಾರಿಗಳೊಂದಿಗೆ ಮಾತಾಡುತ್ತೇನೆ ಎಂದು ಹೇಳಿರುವುದು ವರದಿಯಾಗಿದೆ. ಈ ಸಂಬಂಧ ನಮ್ಮ ನಿಯೋಗ ಅವರನ್ನು ಭೇಟಿ ಆದಾಗಲೂ ಅವರು ಇದೇ ಮಾತುಗಳನ್ನು ಹೇಳಿದ್ದರು. ಅವರು ಮೇಲೆ ಒಂದು ಮಾತು ಹೇಳಿ, ಒಳಗಡೆ ಸಿದ್ಧತೆಗಳನ್ನು ಮಾಡುತ್ತಾ ಈಗ ಕಂಬಳ ಮಾಡಲೇಬೇಕು ಎಂಬ ಮಟ್ಟಕ್ಕೆ ತಂದು ನಿಲ್ಲಿಸಿದ್ದಾರೆ.

ಮೈಸೂರು ದಸರಾದಲ್ಲಿ ಕಂಬಳ ಆಯೋಜನೆಯಿಂದ ನಮಗೆ ಈಗ ಬೇರೆ ದಾರಿಯೇ ಇಲ್ಲದಂತಾಗಿದ್ದು ನಮ್ಮ ತುಳುನಾಡಿನ ಜನತೆಗೆ, ಕರಾವಳಿಯ ಜನರಿಗೇ ಈ ಬಗ್ಗೆ ಮನವರಿಕೆ ಮಾಡುವ ಸಲುವಾಗಿ ನಾವು ಮಂಗಳೂರಿಗೆ ಬಂದಿದ್ದೇವೆ. ಕೋಣಗಳ ಮಾಲೀಕರಿಗೂ ಕೂಡ ಈ ಬಾರಿಯ ದಸರಾದಲ್ಲಿ ಕಂಬಳಕ್ಕೆ ಹೋಗದಂತೆ ಮನವಿ ಮಾಡಿದ್ದೇವೆ. ಸಹೋದರ ಭಾವನೆಯಿಂದ ನಿಮ್ಮ ಬಳಿ ವಿನಂತಿಸಲು ಬಂದಿದ್ದೇವೆ. ನಾವೆಲ್ಲಾ ಒಂದು ರಾಜ್ಯದ ಅಣ್ಣ-ತಮ್ಮಂದಿರು. ದಯಮಾಡಿ ನಮ್ಮ ಸಮಸ್ಯೆಗಳನ್ನು ಅರ್ಥಮಾಡಿಕೊಳ್ಳಿ ಎಂದು ಹೇಳಿದರು.

ನಿಮ್ಮ ಕ್ರೀಡೆಯ ಬಗ್ಗೆ ನಮಗೆ ಅಪಾರ ಗೌರವವಿದೆ. ಬೇರೆ ಸಂದರ್ಭದಲ್ಲಿ ನೀವು ಮಾಡಬಹುದು. ವೈಯಕ್ತಿಕವಾಗಿ ನಮಗೇನೂ ಇಲ್ಲ. ನಾವು ʼಪರಿಸರಕ್ಕಾಗಿ ನಾವುʼ ಸಂಘಟನೆಯವರು. ಅತ್ಯಂತ ಪ್ರಾಮಾಣಿಕವಾಗಿ ನಮ್ಮ ಹಣ ಖರ್ಚು ಮಾಡಿಕೊಂಡು ಪರಿಸರ ಉಳಿದರಷ್ಟೇ ನಾವು ಉಳಿಯುವುದು ಎಂಬ ಭಾವನೆಯಿಂದ ಕೆಲಸ ಮಾಡುತ್ತಿದ್ದೇವೆ. ನಮ್ಮ ಭಾವನೆಯನ್ನು ನೀವು ಅರ್ಥ ಮಾಡಿಕೊಳ್ಳಬೇಕು. ಕೋಣಗಳ ಮಾಲೀಕರು ಈ ಸ್ಪರ್ಧೆಯಿಂದ ಹಿಂದೆ ಸರಿಯುವಂತೆ ತುಳು ನಾಡಿನ ಬಾಂಧವರಿಗೆ ಮನವಿ ಮಾಡಿದ್ದಾರೆ.

ಬರಗಾಲದ ಪರಿಸ್ಥಿತಿಯಲ್ಲಿ ಕಂಬಳ.. ಮುಂದಿನ ಸಂಕಷ್ಟಗಳನ್ನು ಊಹಿಸಲೂ ಸಾಧ್ಯವಿಲ್ಲ!
ರಾಜ್ಯದ 200ಕ್ಕೂ ಹೆಚ್ಚು ತಾಲ್ಲೂಕುಗಳು ಭೀಕರ ಬರಗಾಲಕ್ಕೆ ತುತ್ತಾಗಿದ್ದು, ರೈತರು ಮತ್ತು ಇತರ ಜನಸಾಮಾನ್ಯರು ತೀವ್ರ ಸಂಕಷ್ಟಕ್ಕೆ ಸಿಲುಕಿದ್ದಾರೆ. ಅಂತರ್ಜಲ ಪಾತಾಳ ಮುಟ್ಟಿದೆ. ನೂರಾರು ಹಳ್ಳಿಗಳಲ್ಲಿ ಕುಡಿಯುವ ನೀರಿಗೂ ತತ್ವಾರವಾಗಿದೆ. ದನಕರು ಆಡುಕುರಿಗಳಿಗೆ ನೀರು ಮತ್ತು ಮೇವಿನ ಅಭಾವ ಉಂಟಾಗಿದೆ. ಅಕ್ಟೋಬರ್ ತಿಂಗಳಲ್ಲೇ ಇಂತಹ ಪರಿಸ್ಥಿತಿ ಇದೆ. ಮುಂದಿನ ದಿನಗಳಲ್ಲಿ ಎದುರಾಗುವ ಸಂಕಷ್ಟಗಳನ್ನು ಊಹಿಸಲೂ ಸಾಧ್ಯವಿಲ್ಲ ಎಂದು ಹೇಳಿದರು.

ಈ ಸಂದರ್ಭದಲ್ಲಿ ಮಾತನಾಡಿದ ಮಾಜಿ ಶಾಸಕರೂ ಆಗಿರುವ ಎ.ಟಿ.ರಾಮಸ್ವಾಮಿ ಅವರು, ಈ ವರ್ಷದ ನಾಡಹಬ್ಬ ದಸರಾದಲ್ಲಿ ಕಂಬಳ ಆಯೋಜಿಸುವುದು ಸೂಕ್ತವಲ್ಲ ಎಂಬ ಅಭಿಪ್ರಾಯವನ್ನು ವ್ಯಕ್ತಪಡಿಸಲು ಮಂಗಳೂರಿಗೆ ಬಂದಿದ್ದೇವೆ. ಸುಮಾರು 140 ವರ್ಷಗಳಿಂದಲೂ ಕಂಡು ಕೇಳರಿಯದ ಭೀಕರ ಬರಗಾಲವಿದೆ. ಮಳೆ ಇಲ್ಲ, ಬೆಳೆ ಇಲ್ಲ, ಕುಡಿಯುವ ನೀರಿಗೂ ಬರಗಾಲವಿದೆ. ಈ ಹಿಂದೆ ಇಷ್ಟು ಬರಗಾಲ ಇಲ್ಲದಿದ್ದಾಗ್ಯೂ, ಸರಳ ದಸರಾ ನಡೆಸಿದ್ದನ್ನು ನಾವು ಗಮನಿಸಿದ್ದೇವೆ. ಈ ವರ್ಷ ಅಪಾಯಕಾರಿ ಬರಗಾಲ ಇದೆ. ಈ ಸಂದರ್ಭದಲ್ಲಿ ಇನ್ನೂ ಸರಳವಾಗಿ ದಸರಾ ಆಯೋಜಿಸುವುದರ ಜೊತೆಗೆ ಪರಿಸರ ದಸರಾ ನಡೆಸಬೇಕಿತ್ತು. ಅದರ ಬದಲಿಗೆ ಅದ್ಧೂರಿ ದಸರಾ ಬೇಕಿತ್ತಾ ಎಂಬುದು ನಮ್ಮ ನೋವು ಎಂದರು.

ಕೆಲವು ಕಂಬಳದ ಕ್ರೀಡೆ ಪ್ರಚಾರ ಆಗಬೇಕು. ಅದನ್ನೂ ಇನ್ನೂ ಎತ್ತರಕ್ಕೆ ಕೊಂಡೊಯ್ಯಬೇಕು ಎಂದು ಹೇಳುತ್ತಾರೆ. ನಮಗೂ ಈ ಬಗ್ಗೆ ಎರಡು ಮಾತಿಲ್ಲ. ಆದರೆ, ಇದು ಸಕಾಲವಲ್ಲ.  ಆ ದೃಷ್ಟಿಯಿಂದ ನಾವಿಲ್ಲಿ ಮನವಿ ಮಾಡಲು ಬಂದಿದ್ದೇವೆ. ರಾಜವಂಶಸ್ಥರೂ ಸಹ ದಸರಾದಲ್ಲಿ ಕಂಬಳ ಆಯೋಜಿಸುವುದು ಸರಿಯಲ್ಲ ಎಂಬ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಸಾಕಷ್ಟು ಬುದ್ದಿಜೀವಿಗಳು, ಈ ಬಗ್ಗೆ ಜ್ಞಾನ ಇರುವವರು ಈ ಸಂದರ್ಭದಲ್ಲಿ ಮೈಸೂರು ದಸರಾದಲ್ಲಿ ಕಂಬಳ ಆಯೋಜಿಸಬಾರದು ಎಂದು ಅಭಿಪ್ರಾಯ ಪಟ್ಟಿದ್ದರೂ, ಅವರ ಮಾತನ್ನು ಧಿಕ್ಕರಿಸುತ್ತಿರುವುದು ಸರಿಯಲ್ಲ ಎಂದವರು ತಿಳಿಸಿದರು.

ಬರ ಪರಿಹಾರ: ಇದು ಸರ್ಕಾರ ರೈತರಿಗೆ ಮಾಡಿರುವ ಅವಮಾನ:
ಸೂಪರ್ ಎಲ್ ನಿನೋ ಪರಿಣಾಮ ಭಯಾನಕವಾಗಿರುತ್ತದೆ ಎಂಬ ವರದಿಗಳಿವೆ. ಭೀಕರ ಬರಗಾಲದಿಂದ ತತ್ತರಿಸಿರುವ ರೈತರಿಗೆ ಬೆಳೆ ನಷ್ಟಕ್ಕೆ ಕೇವಲ 2500 ರೂ. ಬರ ಪರಿಹಾರ ಘೋಷಿಸುವ ಸರ್ಕಾರ ರೈತರಿಗೆ ಅನ್ಯಾಯ ಮಾಡಿದೆ. ಇದು ಸರ್ಕಾರ ತಮಗೆ ಮಾಡಿರುವ ಅವಮಾನ ಎಂದು ರೈತರು ಆಕ್ರೋಶಗೊಂಡಿದ್ದಾರೆ. ಈ ಹಣ ಬಂದ ಕೂಡಲೇ ಆ ಮೊತ್ತಕ್ಕೆ ಒಂದು ರೂ. ಸೇರಿಸಿ 2501 ರೂಗಳನ್ನು ಮುಖ್ಯ ಮಂತ್ರಿಗಳ ನಿಧಿಗೆ ಕೊಡುವ ತೀರ್ಮಾನವನ್ನು ರಾಜ್ಯದ ರೈತರು ಮಾಡಿದ್ದಾರೆ ಎಂದರು.