ಆಯುಧ ಪೂಜೆ, ವಿಜಯದಶಮಿಗೆ ಹೂವು-ಹಣ್ಣಿನ ಬೆಲೆ ಎಷ್ಟು? ಇಲ್ಲಿದೆ ಇಂದಿನ ದರ ಪಟ್ಟಿ!

ಆಯುಧ ಪೂಜೆ ಮತ್ತು ವಿಜಯದಶಮಿ ಹಿನ್ನಲೆಯಲ್ಲಿ ಬೆಂಗಳೂರಿನ ಕೆಆರ್‌ ಮಾರುಕಟ್ಟೆಯಲ್ಲಿ ಭಾನುವಾರ ಹೂವು, ಹಣ್ಣು ಹಾಗೂ ಪೂಜಾ ಸಾಮಗ್ರಿಗಳ ಖರೀದಿ ಭರಾಟೆ ಜೋರಾಗಿತ್ತು. ಮಳೆಯಿಂದ ಹೂವಿನ ಬೆಳೆ ಹಾನಿಯಾಗಿದ್ದು, ಪೂರೈಕೆಯ ಮೇಲೆ ಪರಿಣಾಮ ಬಿದ್ದಿರುವುದರಿಂದ ಹೂವುಗಳ ದರ ಏರಿಕೆಯಾಗಿದೆ ಹೂವು-ಹಣ್ಣುಗಳ ದರ ವಿವರ ಇಲ್ಲಿದೆ.

ನಾಡಿನಾದ್ಯಂತ ಆಯುಧ ಪೂಜೆ ಮತ್ತು ವಿಜಯದಶಮಿ ಹಬ್ಬದ ಸಂಭ್ರಮ ಮನೆ ಮಾಡಿದೆ. ಹಬ್ಬದ ಪೂಜೆಗೆ ಬೇಕಾದ ಹೂವು, ಹಣ್ಣು ಹಾಗೂ ಪೂಜಾ ಸಾಮಗ್ರಿಗಳನ್ನು ಖರೀದಿಸಲು ಬೆಂಗಳೂರಿನ ಕೆ.ಆರ್‌. ಮಾರುಕಟ್ಟೆಯಲ್ಲಿ ಜನಸಾಗರವೇ ಹರಿದುಬಂದಿತ್ತು. ಆದ್ರೆ ಹಬ್ಬದ ಸಂಭ್ರಮದ ನಡುವೆಯೇ ಹೂವು, ಹಣ್ಣುಗಳ ಬೆಲೆ ಏರಿಕೆ ಗ್ರಾಹಕರಿಗೆ ಶಾಕ್ ನೀಡಿದೆ. ಅದರಲ್ಲೂ ಮಳೆಯಿಂದ ಹೂವಿನ ಬೆಳೆ ಹಾನಿಯಾಗಿದ್ದು, ಮಾರುಕಟ್ಟೆಗೆ ಹೂವುಗಳ ಪೂರೈಕೆ ಕಡಿಮೆಯಾಗಿದೆ. ಹಾಗಾದ್ರೆ ಕೆ.ಆರ್‌. ಮಾರುಕಟ್ಟೆಯಲ್ಲಿ ಹೂವು, ಹಣ್ಣುಗಳ ದರ ಎಷ್ಟಿದೆ? ಗ್ರಾಹಕರ ಜೇಬಿಗೆ ಎಷ್ಟು ಹೊರೆ ಬಿದ್ದಿದೆ? ಈ ಕುರಿತ ಕಂಪ್ಲೀಟ್‌ ಡೀಟೇಲ್ಸ್ ಇಲ್ಲಿದೆ ನೋಡಿ.

ಹಬ್ಬದ ಖರೀದಿಗೆ ಮುಗಿಬಿದ್ದ ಜನರು
ಆಯುಧ ಪೂಜೆ.. ವಿಜಯದಶಮಿ.. ನಾಡಿನಾದ್ಯಂತ ಹಬ್ಬದ ಕಳೆ ಜೋರಾಗಿದೆ. ಮನೆ, ಅಂಗಡಿ, ಕಚೇರಿಗಳಲ್ಲಿ ಆಯುಧ ಪೂಜೆಗೆ ಸಿದ್ಧತೆ ಜೋರಾಗಿದ್ದು, ಹೂವು, ಹಣ್ಣುಗಳ ಖರೀದಿಗೆ ಜನರು ಮುಗಿಬಿದ್ದಿದ್ದಾರೆ. ಬೆಂಗಳೂರಿನ ಕೆ.ಆರ್‌. ಮಾರುಕಟ್ಟೆಯಲ್ಲಂತೂ ಭಾನುವಾರ ಜನವೋ ಜನ. ಬೆಳಗ್ಗೆಯಿಂದಲೇ ಮಾರುಕಟ್ಟೆಗೆ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿ ಹಬ್ಬಕ್ಕೆ ಬೇಕಾದ ಸಾಮಗ್ರಿಗಳನ್ನು ಖರೀದಿಸಿದ್ರು. ಆದ್ರೆ ಈ ಬಾರಿ ಹೂವು, ಹಣ್ಣುಗಳ ಬೆಲೆ ಏರಿಕೆಯಾಗಿದ್ದು, ಗ್ರಾಹಕರಿಗೆ ಬೆಲೆ ಏರಿಕೆಯ ಬಿಸಿ ತಟ್ಟಿದೆ.

ಹೂವುಗಳ ದರ ಕೇಳಿದ್ರೆ ಶಾಕ್!
ಹಬ್ಬದ ಪೂಜೆಗೆ ಪ್ರಮುಖವಾಗಿ ಬೇಕಾಗಿರುವ ಹೂವುಗಳ ಬೆಲೆ ಗಗನಕ್ಕೇರಿದೆ. ಮಳೆಯಿಂದ ಹೂವಿನ ಬೆಳೆ ಹಾನಿಯಾಗಿದ್ದು, ಮಾರುಕಟ್ಟೆಗೆ ಹೂವುಗಳ ಪೂರೈಕೆಯಲ್ಲೂ ವ್ಯತ್ಯಯವಾಗಿದೆ. ಹೀಗಾಗಿ ಹೂವುಗಳ ದರ ಹೆಚ್ಚಳವಾಗಿದೆ. ಸೇವಂತಿಗೆ ಒಂದು ಮಾರು 150 ರೂಪಾಯಿ, ಮಲ್ಲಿಗೆ ಒಂದು ಮಾರು 120 ರೂಪಾಯಿ, ಕನಕಾಂಬರ ಒಂದು ಮಾರು 120 ರೂಪಾಯಿ ದರವಿದೆ. ಇನ್ನು ಸಣ್ಣ ಮಿನಿ ರೋಸ್ ಹಾರಕ್ಕೆ 550 ರೂಪಾಯಿ, ದೊಡ್ಡ ರೋಸ್ ಹಾರಕ್ಕೆ 800 ರೂಪಾಯಿ, ಸುಗಂಧರಾಜ ಹಾರಕ್ಕೆ 300 ರೂಪಾಯಿ ದರವಿದೆ. ದೊಡ್ಡ ತೋಮಾಲೆಯ ಬೆಲೆ ಬರೋಬ್ಬರಿ 2,500 ರೂಪಾಯಿ ತಲುಪಿದೆ. ಹಬ್ಬಕ್ಕೆ ಹೂವು ಖರೀದಿಸಲೇಬೇಕಾದ ಅನಿವಾರ್ಯತೆ ಒಂದೆಡೆಯಾದ್ರೆ, ಬೆಲೆ ಏರಿಕೆ ಗ್ರಾಹಕರಿಗೆ ಮತ್ತೊಂದೆಡೆ ಹೊರೆಯಾಗಿದೆ.

ಹಣ್ಣುಗಳ ದರದಲ್ಲೂ ಏರಿಳಿತ
ಹೂವುಗಳಷ್ಟೇ ಅಲ್ಲ, ಹಣ್ಣುಗಳ ಖರೀದಿಗೂ ಜನರು ಮಾರುಕಟ್ಟೆಗೆ ಆಗಮಿಸಿದ್ದಾರೆ. ಕಪ್ಪು ದ್ರಾಕ್ಷಿ ಕೆಜಿಗೆ 200 ರೂಪಾಯಿ, ಹಸಿರು ದ್ರಾಕ್ಷಿ ಕೆಜಿಗೆ 280 ರೂಪಾಯಿ,ಕಿತ್ತಳೆ ಕೆಜಿಗೆ 100 ರೂಪಾಯಿ ದರವಿದೆ. ಸೇಬು ಕೆಜಿಗೆ 140ರಿಂದ 200 ರೂಪಾಯಿ, ಸಪೋಟ ಕೆಜಿಗೆ 100 ರೂಪಾಯಿ, ದಾಳಿಂಬೆ ಕೆಜಿಗೆ 200ರಿಂದ 250 ರೂಪಾಯಿ ದರವಿದೆ. ಇನ್ನು ಏಲಕ್ಕಿ ಬಾಳೆಹಣ್ಣಿನ ಬೆಲೆ 80 ರೂಪಾಯಿ ಇದೆ. ಹಬ್ಬದ ಪೂಜೆಗೆ ಬೇಕಾದ ಹಣ್ಣು, ಹೂವುಗಳನ್ನು ಖರೀದಿಸಲು ಬಂದ ಗ್ರಾಹಕರು ಬೆಲೆ ಏರಿಕೆಯಿಂದಾಗಿ ಖರ್ಚಿನ ಲೆಕ್ಕಾಚಾರ ಹಾಕುವಂತಾಗಿದೆ.

ಮಳೆಯಿಂದ ಹೂವಿನ ಬೆಳೆ ಹಾನಿ
ಕಳೆದ ಎರಡು ದಿನಗಳಿಂದ ಬೆಂಗಳೂರು ನಗರ ಮತ್ತು ಗ್ರಾಮಾಂತರ ಭಾಗಗಳಲ್ಲಿ ಸುರಿದ ಮಳೆ ಹೂವಿನ ಬೆಳೆಗಾರರಿಗೂ ಸಂಕಷ್ಟ ತಂದಿದೆ. ಮಳೆಯಿಂದ ಹೂವು ಕಟಾವು ಮಾಡಲು ರೈತರಿಗೆ ತೊಂದರೆಯಾಗಿದ್ದು, ಬೆಳೆ ಹಾನಿಯೂ ಸಂಭವಿಸಿದೆ. ಇದರಿಂದ ಮಾರುಕಟ್ಟೆಗೆ ಬರುವ ಹೂವುಗಳ ಪ್ರಮಾಣದ ಮೇಲೆ ಪರಿಣಾಮ ಬೀರಿದೆ. ಬೇಡಿಕೆ ಹೆಚ್ಚಿರುವ ಹಬ್ಬದ ಸಮಯದಲ್ಲೇ ಪೂರೈಕೆಗೆ ಅಡ್ಡಿಯಾಗಿರುವುದು ದರ ಏರಿಕೆಗೆ ಕಾರಣವಾಗಿದೆ. ಇನ್ನು ಹೂವು ಖರೀದಿಸಲು ಬಂದ ಗ್ರಾಹಕರೂ ಬೆಲೆ ಏರಿಕೆಗೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.

ಇನ್ನು ಹಬ್ಬದ ಖರೀದಿಗೆ ಜನರು ಹೆಚ್ಚಿನ ಸಂಖ್ಯೆಯಲ್ಲಿ ಆಗಮಿಸಿದ್ದರಿಂದ ಕೆ.ಆರ್‌. ಮಾರುಕಟ್ಟೆಯ ಸುತ್ತಮುತ್ತ ವಾಹನ ದಟ್ಟಣೆ ಉಂಟಾಗಿತ್ತು. ರಸ್ತೆಯಲ್ಲಿ ವಾಹನಗಳು ಸಾಲುಗಟ್ಟಿ ನಿಂತಿದ್ದರಿಂದ ವಾಹನ ಸವಾರರು 
ಪರದಾಡುವಂತಾಯಿತು. ಸಂಚಾರ ದಟ್ಟಣೆಯನ್ನು ನಿಯಂತ್ರಿಸಿ ವಾಹನಗಳ ಓಡಾಟ ಸುಗಮಗೊಳಿಸಲು ಟ್ರಾಫಿಕ್ ಪೊಲೀಸರು ಹರಸಾಹಸ ಪಟ್ಟರು.

ಒಟ್ಟಿನಲ್ಲಿ ಆಯುಧ ಪೂಜೆ ಮತ್ತು ವಿಜಯದಶಮಿ ಹಬ್ಬದ ಸಂಭ್ರಮದ ನಡುವೆ ಹೂವು, ಹಣ್ಣುಗಳ ಬೆಲೆ ಏರಿಕೆ ಗ್ರಾಹಕರಿಗೆ ಹೊರೆಯಾಗಿದೆ. ಮಳೆಯಿಂದ ಹೂವಿನ ಪೂರೈಕೆಗೆ ಹೊಡೆತ ಬಿದ್ದಿದ್ದು, ಹಬ್ಬದ ಖರೀದಿಯ ಖರ್ಚು ಹೆಚ್ಚಾಗಿದೆ. ಹೀಗಾಗಿ ಹಬ್ಬದ ಸಂಭ್ರಮದ ಜೊತೆಗೆ ಬೆಲೆ ಏರಿಕೆಯ ಬಿಸಿಯೂ ಗ್ರಾಹಕರನ್ನು ಕಾಡುತ್ತಿದೆ.