ದೇವರ ಮೇಲಿದ್ದ ಭಾರೀ ಮೌಲ್ಯದ ಚಿನ್ನಾಭರಣ ಕಳವು.. ತಟ್ಟೆಯಲ್ಲಿದ್ದ ದಕ್ಷಿಣೆ ದುಡ್ಡನ್ನು ಬಿಟ್ಟಿರಲಿಲ್ಲ ಪಾಪಿ

Kengeri Kailash BDA apartment house stealing gold ornaments worth Rs 8 lakh:ಕೆಂಗೇರಿಯ ಕೈಲಾಸ್ ಬಿಡಿಎ ಅಪಾರ್ಟ್ಮೆಂಟ್‌ನಲ್ಲಿ ಇತ್ತೀಚೆಗೆ ನಡೆದ ಕಳ್ಳತನ ಪ್ರಕರಣವೊಂದನ್ನು ಕೆಂಗೇರಿ ಪೊಲೀಸ್ ಠಾಣೆಯ ಅಧಿಕಾರಿಗಳು ಯಶಸ್ವಿಯಾಗಿ ಭೇದಿಸಿದ್ದಾರೆ. ದೂರದ ಸಂಬಂಧಿಯೊಬ್ಬನೇ ನಂಬಿಕೆದ್ರೋಹ ಎಸಗಿ, ಲಕ್ಷಾಂತರ ಮೌಲ್ಯದ ಚಿನ್ನಾಭರಣ ಹಾಗೂ ನಗದನ್ನು ಕಳವು ಮಾಡಿದ್ದ ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಶ್ವಥ್ ಕೆ.ಹೆಚ್ ಎಂಬ ಆರೋಪಿಯನ್ನು ಪೊಲೀಸರು ಬಂಧಿಸಿದ್ದಾರೆ. ಕಳ್ಳತನ ಮಾಡಲು ಆರೋಪಿ ಅಶ್ವಥ್ ಕೆ.ಹೆಚ್ ಮಾಡಿದ ಪ್ಲಾನ್ ಅವ ಚಾಣಾಕ್ಷತನ ಎಲ್ಲರಿಗೂ ಅಚ್ಚರಿ ಮೂಡಿಸಿದೆ.

ಬಂಧಿತ ಆರೋಪಿ ಅಶ್ವಥ್ ಕೆ.ಹೆಚ್, ಬಂಗಾರ ಕಳೆದುಕೊಂಡಿದ್ದವರ ಅಂದರೆ ದೂರುದಾರರ ಮನೆಯ ದೂರದ ಸಂಬಂಧಿ ಆಗಿದ್ದಾನೆ. ಆಗಾಗ ಅವರ ಮನೆಗೆ ಬಂದು ಹೋಗುತ್ತಿದ್ದನು. ಈ ನಂಬಿಕೆಯನ್ನೇ ಬಂಡವಾಳ ಮಾಡಿಕೊಂಡಿದ್ದ ಆತ, ಕೃತ್ಯವೆಸಗಲು ಸಕ್ಕತ್ ಮಾಸ್ಟರ್ ಪ್ಲ್ಯಾನ್ ಮಾಡಿದ್ದನು. ಕಳೆದ ತಿಂಗಳು ದೂರುದಾರರ ಮನೆಯಲ್ಲಿ ಲಕ್ಷ್ಮಿ ಪೂಜೆ ಹಮ್ಮಿಕೊಳ್ಳಲಾಗಿತ್ತು. ಈ ವಿಶೇಷ ಪೂಜೆಗೆ ಮನೆಯವರು ತಮ್ಮ ದೂರದ ಸಂಬಂಧಿಯಾದ ಅಶ್ವಥ್ ಸೇರಿದಂತೆ ಇತರೆ ಸಂಬಂಧಿಕರನ್ನು ಆಹ್ವಾನಿಸಿದ್ದರು. ಅತ್ಯಂತ ಸಡಗರದಿಂದ ನೆರವೇರಿದ ಈ ಪೂಜೆಯ ಸಂದರ್ಭದಲ್ಲಿ ಅಶ್ವಥ್ ಕೂಡ ಭಾಗವಹಿಸಿದ್ದನು. ಪೂಜೆಯ ನೆಪದಲ್ಲಿ ಮನೆಗೆ ಬಂದಿದ್ದ ಈತ, ಮನೆಯ ರೂಮ್‌ಗಳು, ಕಪಾಟುಗಳು ಹಾಗೂ ಒಡವೆಗಳಿರುವ ಸ್ಥಳಗಳನ್ನು ಬಹಳ ಸೂಕ್ಷ್ಮವಾಗಿ ಗಮನಿಸಿದ್ದನು.

ಪೂಜೆ ಮುಗಿದ ಮಾರನೆಯ ದಿನ, ಅನಿವಾರ್ಯ ಕಾರಣಗಳಿಂದ ಮನೆಯ ಎಲ್ಲ ಸದಸ್ಯರು ಒಟ್ಟಿಗೆ ಹೊರಗೆ ಹೋಗಿದ್ದರು. ಮನೆಯಲ್ಲಿ ಯಾರೂ ಇಲ್ಲದಿರುವುದನ್ನು ಖಚಿತಪಡಿಸಿಕೊಂಡ ಅಶ್ವಥ್, ತಕ್ಷಣ ತನ್ನ ಕಪಟನಾಟಕವನ್ನು ಶುರುಮಾಡಿದನು. ಈ ವೇಳೆ ಮನೆಗೆ ಬಂದಿದ್ದ ಅಶ್ಬಥ್ ಕೆ ಹೆಚ್ ಮನೆಯಲ್ಲಿ ಯಾರು ಇಲ್ಲದ್ದನ್ನ ಗಮನಿಸಿದ್ದನು. ಕಾರು ಪಾರ್ಕ್‌ ಮಾಡುವ ನೆಪದಲ್ಲಿ ಬಂದಿದ್ದನು. ನನ್ನದೇ ಮನೆಯ ಕೀ ಮಿಸ್ ಆಗಿದೆ ಎಂದು ನಂಬಿಸಿ ನಾಟಕವಾಡಿದನು. ತದನಂತರ ಸ್ಥಳಕ್ಕೆ ನಕಲಿ ಕೀ ತಯಾರಿಸುವವರನ್ನು ಕರೆತಂದನು. ನಕಲಿ ಕೀ ಮೂಲಕ ಮನೆಯ ಮುಖ್ಯ ಬಾಗಿಲನ್ನು ತೆರೆದ ಆತ ನೇರವಾಗಿ ಒಡವೆಗಳಿದ್ದ ಕೋಣೆಗಳ ಕಡೆಗೆ ಹೋಗಿದ್ದನು.

ಅಸಲಿ ಒಡವೆಗಳ ಜಾಗದಲ್ಲಿ ನಕಲಿ ಆಭರಣಗಳ ಅಳವಡಿಕೆ; ಈ ಕಳ್ಳತನದ ಪ್ರಮುಖ ಹೈಲೈಟ್ ಏನೆಂದರೆ, ಒಡವೆಗಳನ್ನು ಕದ್ದ ತಕ್ಷಣವೇ ಮನೆಯವರಿಗೆ ಅನುಮಾನ ಬಾರದಂತೆ ತಡೆಯಲು ಈತ ಮುಂಚಿತವಾಗಿಯೇ ಸಿದ್ಧತೆ ಮಾಡಿಕೊಂಡಿದ್ದನು. ಮನೆಯಲ್ಲಿದ್ದ ಅಸಲಿ ಆಭರಣಗಳನ್ನು ಹೋಲುವಂಥ ನಕಲಿ ಆಭರಣಗಳನ್ನು ಆತ ತಂದಿದ್ದನು. ದೇವರ ಮೇಲಿದ್ದ ಹಾಗೂ ರೂಮ್‌ನಲ್ಲಿದ್ದ ಅಸಲಿ ಆಭರಣಗಳನ್ನು ತೆಗೆದುಕೊಂಡು, ಅದೇ ಜಾಗದಲ್ಲಿ ತಂದಿಟ್ಟಿದ್ದ ನಕಲಿ ಆಭರಣಗಳನ್ನು ಜೋಡಿಸಿದ್ದನು. ದೇವರ ಮನೆಯ ಪೂಜೆ ತಟ್ಟೆಯಲ್ಲಿದ್ದ 8 ಸಾವಿರ ರೂಪಾಯಿ ನಗದನ್ನು ಹಾಗೂ ಸರಿಸುಮಾರು 8 ಲಕ್ಷ ರೂಪಾಯಿ ಮೌಲ್ಯದ ಚಿನ್ನಾಭರಣ ದೋಚಿ ಪರಾರಿ ಆಗಿದ್ದನು.

ಅನುಮಾನ ಮೂಡಿದ್ದು ಹೇಗೆ; ಮನೆಗೆ ಮರಳಿದ ಮಾಲೀಕರಿಗೆ ಒಡವೆಗಳು ಹಾಗೇ ಇರುವುದು ಕಂಡುಬಂದರೂ, ಪೂಜೆ ತಟ್ಟೆಯಲ್ಲಿ ಇಡಲಾಗಿದ್ದ ನಗದು ಮಾತ್ರ ಮಾಯವಾಗಿರುವುದು ಕಂಡುಬಂದಾಗ ಅನುಮಾನ ಶುರುವಾಯಿತು. ತಕ್ಷಣ ಅನುಮಾನಗೊಂಡು ಆಭರಣಗಳನ್ನು ಹತ್ತಿರದಿಂದ ಸೂಕ್ಷ್ಮವಾಗಿ ಪರಿಶೀಲಿಸಿದಾಗ, ಅಸಲಿ ಒಡವೆಗಳು ಮಾಯವಾಗಿ ಅವುಗಳ ಜಾಗದಲ್ಲಿ ನಕಲಿ ಆಭರಣಗಳನ್ನು ಇರಿಸಲಾಗಿದೆ ಎಂಬ ಸತ್ಯ ಬಯಲಾಯಿತು.

ವಿಶೇಷವೆಂದರೆ, ದೂರುದಾರರ ಸಹೋದರನಿಗೆ ಸೇರಿದ ಕಟ್ ಆಗಿದ್ದ ಚಿನ್ನದ ಸರವೊಂದನ್ನು ದೂರುದಾರರ ಮನೆಯಲ್ಲಿಯೇ ಇರಿಸಲಾಗಿತ್ತು. ಆರೋಪಿ ಆ ಕಟ್ ಆಗಿದ್ದ ಸರ ಸೇರಿದಂತೆ ಒಟ್ಟು ಎರಡು ಸರಗಳು ಮತ್ತು ಒಂದು ಜೊತೆ ಬಳೆಗಳನ್ನು ದೋಚಿದ್ದನು. ತಕ್ಷಣ ಎಚ್ಚೆತ್ತುಕೊಂಡ ಮನೆಯವರು ಅಪಾರ್ಟ್ಮೆಂಟ್‌ನ ಸಿಸಿಟಿವಿ ದೃಶ್ಯಾವಳಿಗಳನ್ನು ಪರಿಶೀಲಿಸಿ, ಕೂಡಲೇ ಕೆಂಗೇರಿ ಪೊಲೀಸ್ ಠಾಣೆಗೆ ದೂರು ದಾಖಲಿಸಿದರು.

ದೂರು ದಾಖಲಿಸಿಕೊಂಡ ತಕ್ಷಣ ಕಾರ್ಯಪ್ರವೃತ್ತರಾದ ಕೆಂಗೇರಿ ಠಾಣೆ ಪೊಲೀಸರು, ಸಿಸಿಟಿವಿ ಕ್ಯಾಮೆರಾಗಳ ದೃಶ್ಯಗಳು ಮತ್ತು ತಾಂತ್ರಿಕ ಸಾಕ್ಷ್ಯಗಳ ಆಧಾರದ ಮೇಲೆ ಆರೋಪಿ ಅಶ್ವಥ್ ಕೆ.ಹೆಚ್. ನನ್ನು ಅರೆಸ್ಟ್‌ ಮಾಡಿದ್ದಾರೆ. ವಿಚಾರಣೆ ವೇಳೆ ಆರೋಪಿಯು ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದು, ಪೊಲೀಸರು ಆತನಿಂದ ಕಳುವಾಗಿದ್ದ ಕೆಲ ಆಭರಣಗಳನ್ನು ವಶಪಡಿಸಿಕೊಂಡಿದ್ದಾರೆ. ನಂಬಿಕೆ ಇಟ್ಟ ಸಂಬಂಧಿಕನೇ ಈ ರೀತಿಯ ವಂಚನೆ ಎಸಗಿರುವುದು ದೂರುದಾರರಿಗೆ ತೀವ್ರ ಆಘಾತ ತರಿಸಿದೆ. ಸದ್ಯ ಪೊಲೀಸರು ಆರೋಪಿಯನ್ನು ಅರೆಸ್ಟ್‌ ಮಾಡಿರುವ ಪೊಲೀಸರು ಇನ್ನು ಹೆಚ್ಚಿನ ವಿಚಾರಣೆಯನ್ನು ಕೈಗೊಂಡಿದ್ದಾರೆ.