ಪಿಂಕ್ ಲೈನ್ ಮೆಟ್ರೋ ಉದ್ಘಾಟನೆಗೆ ಕೌಂಟ್ಡೌನ್ ಬೆನ್ನಲ್ಲೇ ಶುರುವಾಯ್ತು ಕ್ರೆಡಿಟ್ ವಾರ್!
ನಮ್ಮ ಮೆಟ್ರೋ ಪಿಂಕ್ ಲೈನ್ ಮೋದಿ ಸರ್ಕಾರದ ಕೊಡುಗೆ ಎಂದಿದ್ದ ಸಂಸದ ತೇಜಸ್ವಿ ಸೂರ್ಯ ವಿರುದ್ಧ ಮಾಜಿ ಸಚಿವ ದಿನೇಶ್ ಗುಂಡೂರಾವ್ ಕಿಡಿಕಾರಿದ್ದಾರೆ.
ಬೆಂಗಳೂರು ನಗರ ಜೀವನವನ್ನು ಸುಲಭಗೊಳಿಸಿರುವ ʼನಮ್ಮ ಮೆಟ್ರೋʼದ ಪಿಂಕ್ ಲೈನ್ ಇದೇ ನವೆಂಬರ್ 13ರಂದು ಲೋಕಾರ್ಪಣೆಗೊಳ್ಳಲಿದೆ. ಕಾಳೇನಾ ಅಗ್ರಹಾರದಿಂದ ತಾವರೆಕೆರೆವರೆಗೂ 7.5Km ಮೆಟ್ರೋ ಪಿಂಕ್ ಮಾರ್ಗಕ್ಕೆ ಪ್ರಧಾನಮಂತ್ರಿ ನರೇಂದ್ರ ಮೋದಿ ಅಧಿಕೃತವಾಗಿ ಚಾಲನೆ ನೀಡಲಿದ್ದಾರೆ. ಸರ್ಕಾರದಿಂದ ಅಧಿಕೃತವಾಗಿ ಪಿಂಕ್ ಲೈನ್ ಆರಂಭದ ಪ್ರಕಟಣೆ ಮಾಡುವ ಮೊದಲೇ ಸಂಸದ ತೇಜಸ್ವಿ ಸೂರ್ಯ ಇದರ ಡೇಟ್ ಅನೌನ್ಸ್ ಮಾಡಿದ್ದು ಈಗ ಕ್ರೆಡಿಟ್ ವಾರ್ಗೆ ಕಾರಣವಾಗಿದೆ.
ಪಿಂಕ್ ಲೈನ್ ಕ್ರೆಡಿಟ್ ವಾರ್:
ನಮ್ಮ ಮೆಟ್ರೋ ಪಿಂಕ್ ಲೈನ್ ಕ್ರೆಡಿಟ್ ಮೋದಿ ಸರ್ಕಾರದ್ದು ಎಂದು ಸಂಸದ ತೇಜಸ್ವಿ ಸೂರ್ಯ ಸಾಮಾಜಿಕ ಜಾಲತಾಣಗಳಲ್ಲಿ ಬರೆದುಕೊಂಡಿದ್ದರು. ಇದನ್ನು ತೀವ್ರವಾಗಿ ಖಂಡಿಸಿರುವ ಮಾಜಿ ಸಚಿವ ದಿನೇಶ್ ಗುಂಡೂರಾವ್, ನಮ್ಮ ಮೆಟ್ರೋ ರಾಜ್ಯದ ಜನತೆ, ರಾಜ್ಯ ಸರ್ಕಾರದ್ದು ಎಂದು ಕಿಡಿ ಕಾರಿದ್ದಾರೆ.
ನವೆಂಬರ್ 13ಕ್ಕೆ ಪಿಂಕ್ ಲೈನ್ ಆರಂಭವಾಗಲಿದ್ದು ಪ್ರಧಾನಿ ನರೇಂದ್ರ ಮೋದಿಯಿಂದ ಚಾಲನೆ ಸಿಗಲಿದೆ. ಆದರೆ, ರಾಜ್ಯ ಸರ್ಕಾರಕ್ಕೂ ಮೊದಲೇ ತೇಜಸ್ವಿ ಸೂರ್ಯ ಪಿಂಕ್ ಲೈನ್ ಉದ್ಘಾಟನೆ ದಿನಾಂಕ ಘೋಷಿಸಿದ್ದು ಈ ಕ್ರೆಡಿಟ್ ವಾರ್ ಗೆ ಕಾರಣ ಆಯ್ತಾ? ಎಂಬ ಪ್ರಶ್ನೆಗಳು ಉದ್ಭವವಾಗಿವೆ.
ಈ ಸಂಬಂಧ ಸಂಸದ ತೇಜಸ್ವಿ ಸೂರ್ಯ ವಿರುದ್ಧ ಕಿಡಿ ಕಾರಿರುವ ಮಾಜಿ ಸಚಿವ ದಿನೇಶ್ ಗುಂಡೂರಾವ್, ಪಿಂಕ್ ಲೈನ್ ಆರಂಭದ ಮಾಹಿತಿಯನ್ನ ಸಿಎಂ ಆಗಲಿ ಅಥವಾ ಸರ್ಕಾರದ ಕಡೆಯಿಂದ ಆಗಲಿ ಹೇಳುವುದಕ್ಕೂ ಮೊದಲೇ ಸಂಸದರ ಸಂಭ್ರಮ ಯಾಕೆ? ಅಂತ ಪ್ರಶ್ನೆ ಮಾಡಿದ್ದಾರೆ.
'ನಮ್ಮ ಮೆಟ್ರೋ'ದ ಪಿಂಕ್ ಲೈನ್ (Pink Line) ಉದ್ಘಾಟನೆಗಾಗಿ ಪ್ರಧಾನಿ ನರೇಂದ್ರ ಮೋದಿ ಅವರು ಬೆಂಗಳೂರಿಗೆ ಬರುತ್ತಿರುವುದು ಸಂತೋಷದ ವಿಷಯ. ಆದರೆ, ಈ ಉದ್ಘಾಟನಾ ದಿನಾಂಕವನ್ನು ಘೋಷಿಸುವ ವಿಚಾರದಲ್ಲಿ ಸಂಸದ ತೇಜಸ್ವಿ ಸೂರ್ಯ ಅವರು ಇಷ್ಟೊಂದು ಅಬ್ಬರ ಮಾಡಿದ್ದೇಕೆ? ಈ ಘೋಷಣೆಯು ನಮ್ಮ ಮುಖ್ಯಮಂತ್ರಿ ಡಿ. ಕೆ. ಶಿವಕುಮಾರ್ ಮತ್ತು ಬೆಂಗಳೂರು ಅಭಿವೃದ್ಧಿ ಸಚಿವ ಕೃಷ್ಣಬೈರೇಗೌಡ ಅವರ ಕಡೆಯಿಂದ ಬರಬೇಕಿತ್ತು.
ಕರ್ನಾಟಕ ಸರ್ಕಾರದಿಂದ 84%, ಕೇಂದ್ರ ಸರ್ಕಾರದಿಂದ ಕೇವಲ 16% ನಮ್ಮ ಮೆಟ್ರೋ ಯೋಜನೆ ವೆಚ್ಚ:
ಇದೇ ಸಂದರ್ಭದಲ್ಲಿ ನಮ್ಮ ಮೆಟ್ರೋ ಯೋಜನಾ ವೆಚ್ಚದ ಬಗ್ಗೆಯೂ ಉಲ್ಲೇಖಿಸಿರುವ ದಿನೇಶ್ ಗುಂಡೂರಾವ್, 'ನಮ್ಮ ಮೆಟ್ರೋ' ಯೋಜನೆಯ ವೆಚ್ಚದ ಶೇಕಡಾ 84ರಷ್ಟನ್ನು ಕರ್ನಾಟಕವೇ ಭರಿಸುತ್ತಿದೆ, ಆದರೆ ಕೇಂದ್ರ ಸರ್ಕಾರ ನೀಡುತ್ತಿರುವುದು ಕೇವಲ ಶೇಕಡಾ 16ರಷ್ಟು ಮಾತ್ರ. ಬಿಜೆಪಿ ನಾಯಕರು ಈ ಬಗ್ಗೆ ಮಾತನಾಡುವ ರೀತಿಯನ್ನು ನೋಡಿದರೆ, ಈ ವಾಸ್ತವವೇನೂ ಅವರಿಗೆ ತಿಳಿದಿಲ್ಲವೇನೋ ಎನಿಸುತ್ತದೆ! ಎನ್ನುತ್ತಲೇ ಬಿಜೆಪಿ ನಾಯಕರ ವಿರುದ್ಧ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಪ್ರಧಾನಿಯವರನ್ನು ಸ್ವಾಗತಿಸೋಣ ಮತ್ತು #PinkLine ಉದ್ಘಾಟನೆಯನ್ನು ಸಂಭ್ರಮಿಸೋಣ. ಆದರೆ, #NammaMetro ಸಾಕಾರಗೊಳ್ಳಲು ಕಾರಣರಾದ ಕರ್ನಾಟಕ ಸರ್ಕಾರ, ರಾಜ್ಯದ ಜನತೆ ಮತ್ತು ತೆರಿಗೆದಾರರಿಗೆ ಸಲ್ಲಬೇಕಾದ ಮನ್ನಣೆಯನ್ನು ಅವರಿಗೆ ಖಂಡಿತವಾಗಿಯೂ ನೀಡೋಣ ಎಂದು ದಿನೇಶ್ ಗುಂಡೂರಾವ್ ತಮ್ಮ ಎಕ್ಸ್ ಖಾತೆಯಲ್ಲಿ ಉಲ್ಲೇಖಿಸಿದ್ದಾರೆ.
ಇದಕ್ಕೂ ಮೊದಲು ನಿನ್ನೆ (ನವೆಂಬರ್ 9)ರಂದು ನಮ್ಮ ಮೆಟ್ರೋ ಬಗ್ಗೆ ಎಕ್ಸ್ ಖಾತೆಯಲ್ಲಿ ಮಾಹಿತಿ ಹಂಚಿಕೊಂಡಿದ್ದ ಸಂಸದ ತೇಜಸ್ವಿ ಸೂರ್ಯ ರಾಜ್ಯ ಸರ್ಕಾರ ಖಾಲಿ ಟ್ರಂಕ್ ಎಂದು ಕಿಡಿಕಾರಿದ್ದರು.
2014ರಲ್ಲಿ, ಬೆಂಗಳೂರು ಮೆಟ್ರೋ ಕೇವಲ 7 ಕಿ.ಮೀ ಉದ್ದವಿತ್ತು. ಪ್ರಧಾನಿ ಮೋದಿ ನೇತೃತ್ವದ ಕೇಂದ್ರ ಸರ್ಕಾರದ ನಿರಂತರ ಪ್ರಯತ್ನಗಳು ಮತ್ತು ಬದ್ಧತೆಯ ಫಲವಾಗಿ, ಇಂದು ಅದು 100 ಕಿ.ಮೀ ಮೈಲಿಗಲ್ಲನ್ನು ದಾಟುವ ಹಂತದಲ್ಲಿದೆ.
ಕರ್ನಾಟಕದಲ್ಲಿ ಡಿ.ಕೆ. ಶಿವಕುಮಾರ್ ಅವರ ಪ್ರಭಾವವಿರುವ ಕಾಂಗ್ರೆಸ್ ನೇತೃತ್ವದ ಸರ್ಕಾರವು, ಯೋಜನೆಗಳನ್ನು ವಿಳಂಬಗೊಳಿಸುವುದು, ದ್ವಂದ್ವ ನಿಲುವುಗಳನ್ನು ತಳೆಯುವುದು ಮತ್ತು ಆದ್ಯತೆಗಳನ್ನು ತಪ್ಪಾಗಿ ನಿಗದಿಪಡಿಸುವುದರಲ್ಲಿ ಪರಿಣತಿ ಪಡೆದಿದೆ.
ಈ ಅಂಕಿಅಂಶಗಳನ್ನು ಗಮನಿಸಿ.
ಬೆಂಗಳೂರು ಮೆಟ್ರೋದ ಎಲ್ಲಾ ಅನುಮೋದಿತ ಹಂತಗಳಲ್ಲಿ - ಅಂದರೆ ಹಂತ 1, ಹಂತ 2, ಹಂತ 2A ಮತ್ತು 2B ಹಾಗೂ ಹಂತ 3 - ನಿರ್ಮಾಣ ಕಾರ್ಯಕ್ಕಾಗಿ ಭಾರತ ಸರ್ಕಾರವು ₹41,557 ಕೋಟಿಗಳನ್ನು ಒದಗಿಸಲು ಬದ್ಧವಾಗಿದೆ. ಕರ್ನಾಟಕ ಸರ್ಕಾರವು ಈ ಯೋಜನೆಗಳಿಗೆ ₹36,332 ಕೋಟಿಗಳನ್ನು ನೀಡಲು ಬದ್ಧವಾಗಿದೆ.
ಒಪ್ಪಂದದ (MoU) ಪ್ರಕಾರ, '20:20:60' ಮಾದರಿಯ ಹಣಕಾಸು ವ್ಯವಸ್ಥೆಯಡಿ, ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳ ಕೊಡುಗೆಗಳ ಜೊತೆಗೆ, ಅಂತರರಾಷ್ಟ್ರೀಯ ದ್ವಿಪಕ್ಷೀಯ ಮತ್ತು ಬಹುಪಕ್ಷೀಯ ಸಂಸ್ಥೆಗಳಿಂದ ಸಾಲಗಳನ್ನು ಪಡೆಯಲಾಗುತ್ತದೆ. ಈ ಸಾಲಗಳನ್ನು ನೇರವಾಗಿ BMRCL (ಬೆಂಗಳೂರು ಮೆಟ್ರೋ ರೈಲು ನಿಗಮ) ಪಡೆಯುತ್ತದೆ ಮತ್ತು ಇದಕ್ಕೆ ಕೇಂದ್ರ ಸರ್ಕಾರದ 'ಸಾರ್ವಭೌಮ ಖಾತರಿ' (Sovereign Guarantee) ಇರುತ್ತದೆ.
ಸರಳವಾಗಿ ಹೇಳುವುದಾದರೆ, ಕೇಂದ್ರ ಸರ್ಕಾರವು ಕೇವಲ ದೊಡ್ಡ ಮೊತ್ತದ ಹಣಕಾಸಿನ ನೆರವನ್ನು ನೀಡುತ್ತಿಲ್ಲ, ಬದಲಾಗಿ ಬೆಂಗಳೂರು ಮೆಟ್ರೋ ವಿಸ್ತರಣೆಗೆ ಅತ್ಯಗತ್ಯವಾದ 'ಸಾರ್ವಭೌಮ ಬೆಂಬಲ'ವನ್ನೂ ಒದಗಿಸುತ್ತಿದೆ.
ರಾಜ್ಯ ಸರ್ಕಾರದ ಬೊಕ್ಕಸವು ಖಾಲಿಯಾಗಿರುವುದರಿಂದ (ಆರ್ಥಿಕ ಸ್ಥಿತಿ ಹದಗೆಟ್ಟಿರುವುದರಿಂದ), ಸ್ವತಃ ಅವರೇ ಇಂತಹ ಹಣಕಾಸು ನೆರವನ್ನು ಪಡೆಯುವ ವಿಶ್ವಾಸವನ್ನು ಮೂಡಿಸಲು ಸಾಧ್ಯವಿಲ್ಲ. ಕೇಂದ್ರ ಸರ್ಕಾರದ ಸಾರ್ವಭೌಮ ಖಾತರಿಯೇ ಈ ಅಂತರರಾಷ್ಟ್ರೀಯ ಸಾಲಗಳು ಸಿಗುವಂತೆ ಮಾಡಿದೆ.
ಆದರೆ, ಕಾಂಗ್ರೆಸ್ ಸರ್ಕಾರ ಏನು ಮಾಡುತ್ತಿದೆ?
ಮೂಲಸೌಕರ್ಯ ಯೋಜನೆಗಳಲ್ಲಿ ವಿಳಂಬ, ಗಡುವಿನ ವಿಸ್ತರಣೆ ಮತ್ತು ವೆಚ್ಚ ಹೆಚ್ಚಳಕ್ಕೆ ಕಾರಣವಾಗುತ್ತಲೇ, ಒಂದಾದ ನಂತರ ಒಂದರಂತೆ ಅವಿವೇಕದ, ಕೇವಲ ಕಾರುಗಳಿಗೆ (ವಾಹನಗಳಿಗೆ) ಆದ್ಯತೆ ನೀಡುವ ಯೋಜನೆಗಳನ್ನು ಘೋಷಿಸುತ್ತಿದೆ.
ಮೆಟ್ರೋ ಯೋಜನೆಯ ಪ್ರತಿ ಹಂತದಲ್ಲೂ ಉಂಟಾಗುವ ವಿಳಂಬವು ಆರ್ಥಿಕ ನಷ್ಟಕ್ಕೆ ದಾರಿ ಮಾಡಿಕೊಡುತ್ತದೆ. ಯೋಜನೆ ಅನುಷ್ಠಾನದಲ್ಲಿನ ವಿಳಂಬವು ವೆಚ್ಚವನ್ನು ಹೆಚ್ಚಿಸುತ್ತದೆ ಮತ್ತು BMRCL ಪಡೆದ ಸಾಲಗಳ ಮೇಲಿನ ಬಡ್ಡಿಯ ಹೊರೆಯನ್ನು ಹೆಚ್ಚಿಸುತ್ತದೆ; ಇದರ ಆರ್ಥಿಕ ಪರಿಣಾಮಗಳನ್ನು ರಾಜ್ಯ ಸರ್ಕಾರವೂ ಎದುರಿಸಬೇಕಾಗುತ್ತದೆ. ಅಂತಿಮವಾಗಿ, ಈ ವಿಳಂಬಗಳ ಬೆಲೆಯನ್ನು ಸಾರ್ವಜನಿಕ ಬೊಕ್ಕಸವೇ (ಜನರ ತೆರಿಗೆ ಹಣವೇ) ಭರಿಸಬೇಕಾಗುತ್ತದೆ. ವಿಳಂಬದಿಂದ ಉಂಟಾಗುವ ಹೆಚ್ಚುವರಿ ವೆಚ್ಚವನ್ನು, ಯೋಜನೆಯ ಮೂಲ ಹೂಡಿಕೆಯ ವೆಚ್ಚದೊಂದಿಗೆ ಗೊಂದಲ ಮಾಡಿಕೊಳ್ಳಬಾರದು.
ರಾಜ್ಯ ಸರ್ಕಾರದ ತಪ್ಪಾದ ಆದ್ಯತೆಗಳ ಪರಿಣಾಮಗಳು ಸ್ಪಷ್ಟವಾಗಿ ಕಾಣುತ್ತಿವೆ:
- ಕಳೆದ ಮೂರು ವರ್ಷಗಳಲ್ಲಿ ಯಾವುದೇ ಹೊಸ ಮೆಟ್ರೋ ಮಾರ್ಗದ ಪ್ರಸ್ತಾವನೆ ಬಂದಿಲ್ಲ.
- ಕೇಂದ್ರ ಸರ್ಕಾರ ಅನುಮೋದಿಸಿರುವ 'ಆರೆಂಜ್ ಲೈನ್' (Orange Line) ಯೋಜನೆಯ ಅನುಷ್ಠಾನದಲ್ಲಿಯೂ ವಿಳಂಬ ಮುಂದುವರಿದಿದೆ. - ಪ್ರಸ್ತಾವಿತ 'ರೆಡ್ ಲೈನ್' (Red Line) ಯೋಜನೆಯ ಪ್ರಗತಿ ಮತ್ತು ಅದರ ಮಾರ್ಗ ವಿನ್ಯಾಸವು, ರಾಜ್ಯ ಸರ್ಕಾರದ 'ಟನಲ್ ರೋಡ್' (ಸುರಂಗ ರಸ್ತೆ) ಯೋಜನೆಗಳಿಂದಾಗಿ ಅಪಾಯಕ್ಕೆ ಸಿಲುಕಿದೆ. ಈ ಯೋಜನೆಗಳು ನಗರದ ಸಮಗ್ರ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯನ್ನೇ ಬುಡಮೇಲು ಮಾಡುವ ಭೀತಿಯನ್ನು ಒಡ್ಡಿವೆ.
ಬೆಂಗಳೂರಿಗೆ ಹೆಚ್ಚಿನ ಮೆಟ್ರೋ ಮಾರ್ಗಗಳು, ಉತ್ತಮ ಬಸ್ ಸಂಪರ್ಕ ವ್ಯವಸ್ಥೆ ಮತ್ತು ಸುಸ್ಥಿರ ಸಾರ್ವಜನಿಕ ಸಾರಿಗೆಯ ಅಗತ್ಯವಿದೆ. ಆದರೆ, ರಾಜ್ಯ ಸರ್ಕಾರವು ದೀರ್ಘಕಾಲೀನ ಸಾರಿಗೆ ಪರಿಹಾರಗಳನ್ನು ಕಡೆಗಣಿಸಿ, ಕಾರು-ಕೇಂದ್ರಿತ ಮೂಲಸೌಕರ್ಯಗಳಿಗೆ ಆದ್ಯತೆ ನೀಡುತ್ತಲೇ ಸಾಗಿದೆ.
ಇಲ್ಲಿನ ವ್ಯತ್ಯಾಸ ಸ್ಪಷ್ಟವಾಗಿದೆ. ಕೇಂದ್ರ ಸರ್ಕಾರವು ಬೆಂಗಳೂರಿನ ಭವಿಷ್ಯಕ್ಕಾಗಿ ಹೂಡಿಕೆ ಮಾಡುತ್ತಿದ್ದರೆ, ಕರ್ನಾಟಕದ ಕಾಂಗ್ರೆಸ್ ಸರ್ಕಾರವು ವಿಳಂಬಗಳು, ತಪ್ಪಾದ ಆದ್ಯತೆಗಳು ಮತ್ತು ಕೇವಲ ರಾಜಕೀಯ ಘೋಷಣೆಗಳ ಮೂಲಕ ನಗರದ ಪ್ರಗತಿಗೆ ಅಡ್ಡಿಪಡಿಸುತ್ತಿದೆ ಎಂದು ಹೇಳಿದ್ದರು.