• हिन्दीEnglishमराठीবাংলাதமிழ்മലയാളംગુજરાતીతెలుగుಕನ್ನಡଓଡ଼ିଶାZ BharatPHHBusinessWION
  • facebookyoutubetwitterwhatsapp
Zee News Kannada
  • ಹೋಮ್‌
  • ವಿಡಿಯೋ
  • ಫೋಟೋಗ್ಯಾಲರಿ
  • ನಗರ

Add Zee Business As A Preferred Source
App
  • Live TV
  • ಕರ್ನಾಟಕ
  • ರಾಷ್ಟ್ರೀಯ
  • ಅಂತರಾಷ್ಟ್ರೀಯ
  • ಕ್ರೀಡೆ
  • ಮನರಂಜನೆ
  • ಯುಟಿಲಿಟಿ
  • ಧರ್ಮ
  • ಜ್ಯೋತಿಷ್ಯ
  • ಜೀ ನ್ಯೂಸ್ ಕನ್ನಡ
  • /ಕರ್ನಾಟಕ
  • /ಬೈಕ್‌ ಟ್ಯಾಕ್ಸಿಯಿಂದ ಆಟೋ, ಕ್ಯಾಬ್‌ ಸೇವೆಗಳಿಗೆ ಹೊಡೆತ? ಚಾಲಕರ ಮುಂದಿರುವ ಸವಾಲುಗಳೇನು?

ಬೈಕ್‌ ಟ್ಯಾಕ್ಸಿಯಿಂದ ಆಟೋ, ಕ್ಯಾಬ್‌ ಸೇವೆಗಳಿಗೆ ಹೊಡೆತ? ಚಾಲಕರ ಮುಂದಿರುವ ಸವಾಲುಗಳೇನು?

ಕರ್ನಾಟಕದಲ್ಲಿ ಬೈಕ್‌ ಟ್ಯಾಕ್ಸಿ ಸೇವೆಗಳಿಗೆ ಅನುಮತಿ ದೊರೆತ ಬೆನ್ನಲ್ಲೇ ಆಟೋ ಮತ್ತು ಕ್ಯಾಬ್‌ ಚಾಲಕರಲ್ಲಿ ಆತಂಕ ಶುರುವಾಗಿದೆ. ಕಡಿಮೆ ದರ ಹಾಗೂ ವೇಗದ ಪ್ರಯಾಣದ ಕಾರಣ ಗ್ರಾಹಕರು ಬೈಕ್‌ ಟ್ಯಾಕ್ಸಿಗಳತ್ತ ಆಕರ್ಷಿತರಾದರೆ ಸಾಂಪ್ರದಾಯಿಕ ಸಾರಿಗೆ ಸೇವೆಗಳ ಬೇಡಿಕೆ ಕುಸಿಯುವ ಸಾಧ್ಯತೆಯಿದೆ. ಈಗಾಗಲೇ ಇಂಧನ, ನಿರ್ವಹಣೆ, ವಿಮೆ ಸೇರಿದಂತೆ ಹಲವು ವೆಚ್ಚಗಳನ್ನ ಎದುರಿಸುತ್ತಿರುವ ಚಾಲಕರಿಗೆ ಆದಾಯದ ಒತ್ತಡ ಹೆಚ್ಚಾಗಬಹುದು. ಹೀಗಾಗಿ ಪ್ರಯಾಣಿಕರ ಅನುಕೂಲದ ಜೊತೆಗೆ ಚಾಲಕರ ಹಿತಾಸಕ್ತಿಯನ್ನೂ ಕಾಪಾಡುವ ನಿಯಮಾವಳಿ ಅಗತ್ಯವಾಗಿದೆ.

Written ByPuttaraj K Alur
Published: Nov 21, 2026, 11:39 IST|Updated: Nov 21, 2026, 11:52 IST
joinshare
ಬೈಕ್‌ ಟ್ಯಾಕ್ಸಿಯಿಂದ ಆಟೋ, ಕ್ಯಾಬ್‌ ಸೇವೆಗಳಿಗೆ ಹೊಡೆತ? ಚಾಲಕರ ಮುಂದಿರುವ ಸವಾಲುಗಳೇನು?
Image Credit: Bike Taxi

About the Author

Puttaraj K Alur

Puttaraj K Alur

ಪುಟ್ಟರಾಜ ಕೆ. ಆಲೂರ (Puttaraj K Alur) ಅನುಭವಿ ಪತ್ರಕರ್ತರಾಗಿದ್ದು, ಪ್ರಸ್ತುತ ಜೀ ಕನ್ನಡ ನ್ಯೂಸ್‌ನ ಡಿಜಿಟಲ್ ವಿಭಾಗದಲ್ಲಿ ಸೀನಿಯರ್ ಸಬ್ ಎಡಿಟರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದಾರೆ. ಮುದ್ರಣ, ದೂರದರ್ಶನ ಮತ್ತು ಡಿಜಿಟಲ್ ಮಾಧ್ಯಮ ಸೇರಿದಂತೆ ಪತ್ರಿಕೋದ್ಯಮದ ವಿವಿಧ ಕ್ಷೇತ್ರಗಳಲ್ಲಿ 10ಕ್ಕೂ ಹೆಚ್ಚು ವರ್ಷಗಳ ವೃತ್ತಿಪರ ಅನುಭವ ಹೊಂದಿದ್ದಾರೆ. ಮೈಸೂರಿನ ರಾಜ್ಯಧರ್ಮ ಮತ್ತು ಮೈಸೂರು ಮಿತ್ರ ದಿನಪತ್ರಿಕೆಗಳಲ್ಲಿ ವೃತ್ತಿಜೀವನ ಆರಂಭಿಸಿದ ಅವರು, ಬೆಂಗಳೂರಿನ ದಿಗ್ವಿಜಯ ನ್ಯೂಸ್, ದೆಹಲಿಯ ಒಪೇರಾ ನ್ಯೂಸ್, ಯುಸಿ ನ್ಯೂಸ್ ಮತ್ತು ಒಪೊಯಿ ನ್ಯೂಸ್ ಸೇರಿದಂತೆ ಹಲವು ಮಾಧ್ಯಮ ಸಂಸ್ಥೆಗಳಲ್ಲಿ ಸೇವೆ ಸಲ್ಲಿಸಿದ್ದಾರೆ.ಕಳೆದ 5 ವರ್ಷಗಳಿಂದ ಜೀ ಕನ್ನಡ ನ್ಯೂಸ್‌ನಲ್ಲಿ ಕಾರ್ಯನಿರ್ವಹಿಸುತ್ತಿರುವ ಅವರು, ವಿವಿಧ ವಿಷಯಗಳ ಸುದ್ದಿಗಳನ್ನು ಸರಳ, ಸ್ಪಷ್ಟ ಮತ್ತು ಓದುಗರಿಗೆ ಆಸಕ್ತಿದಾಯಕವಾಗಿ ಪ್ರಸ್ತುತಪಡಿಸುವಲ್ಲಿ ಪರಿಣತಿ ಹೊಂದಿದ್ದಾರೆ. ಮೈಸೂರು ವಿಶ್ವವಿದ್ಯಾನಿಲಯದ ಮಾನಸಗಂಗೋತ್ರಿಯಲ್ಲಿ M.Sc. in Electronic Media ಸ್ನಾತಕೋತ್ತರ ಪದವಿ ಪಡೆದಿದ್ದಾರೆ. ಮನರಂಜನೆ, ಕ್ರೀಡೆ, ಜ್ಯೋತಿಷ್ಯ ಮತ್ತು ಆಧ್ಯಾತ್ಮಿಕತೆ, ಆರೋಗ್ಯ, ಲೈಫ್‌ಸ್ಟೈಲ್, ವೈರಲ್ ಸುದ್ದಿಗಳು, ಬ್ಯುಸಿನೆಸ್ ಹಾಗೂ ಷೇರು ಮಾರುಕಟ್ಟೆ ಸೇರಿದಂತೆ ಹಲವು ವಿಭಾಗಗಳಲ್ಲಿ ಸುದ್ದಿ ಬರವಣಿಗೆಯ ಅನುಭವ ಹೊಂದಿದ್ದಾರೆ. 
Read More

ಟ್ರೆಂಡಿಂಗ್

  • ಹೋಮ್‌
  • ಫೋಟೋಗಳು
  • ವಿಡಿಯೋ
ಹಿರಿಯ ನಾಗರಿಕರಿಗೆ ಎಲ್ಲಿ ಹೆಚ್ಚು ಬಡ್ಡಿ ಆದಾಯ? SBI FD ಅಥವಾ SCSS; ₹10, ₹20, ₹30 ಲಕ್ಷಕ್ಕೆ ಇಲ್ಲಿದೆ ಲೆಕ್ಕಾಚಾರ!

ಹಿರಿಯ ನಾಗರಿಕರಿಗೆ ಎಲ್ಲಿ ಹೆಚ್ಚು ಬಡ್ಡಿ ಆದಾಯ? SBI FD ಅಥವಾ SCSS; ₹10, ₹20, ₹30 ಲಕ್ಷಕ್ಕೆ ಇಲ್ಲಿದೆ ಲೆಕ್ಕಾಚಾರ!

2

₹1,000 ಇದ್ದರೆ ಸಾಕು! ಈ ವಾರ ಲಾಂಚ್ ಆಗಲಿವೆ 4 ಹೊಸ ಮ್ಯೂಚುವಲ್ ಫಂಡ್‌ಗಳು; ಹೂಡಿಕೆಗೆ ಸಿದ್ಧರಾಗಿ!

3

ʻಐಶಿರ್ʼ ಜೋಡಿಯ ನಿಶ್ಚಿತಾರ್ಥ ಸಂಭ್ರಮ: ಉಂಗುರ ಬದಲಾಯಿಸಿಕೊಂಡ ಶಿಶಿರ್ ಶಾಸ್ತ್ರಿ - ಐಶ್ವರ್ಯಾ

4

ಘೋರ ದುರಂತ: ಪ್ರೀತಿಸಿ ಮದುವೆಯಾದ ಕೇವಲ 45 ದಿನದಲ್ಲೇ ನವದಂಪತಿ ದುರ್ಮರಣ!

5

ಟೊಮೆಟೊ ಜ್ಯೂಸ್ vs ಕಿತ್ತಳೆ ಜ್ಯೂಸ್.. ಸಕ್ಕರೆ ನಿಯಂತ್ರಿಸಲು ಬೆಳಿಗ್ಗೆ ಯಾವುದು ಕುಡಿಯುವುದು ಉತ್ತಮ?

logo
  • contact us
  • privacy policy
  • legal
  • investor info
  • advertise with us
© 1998-2026 Indiadotcom Digital Private Limited, All Rights Reserved.

Bike Taxi Competition: ಕರ್ನಾಟಕದಲ್ಲಿ ಬೈಕ್‌ ಟ್ಯಾಕ್ಸಿ ಸೇವೆಗಳಿಗೆ ಸುಪ್ರೀಂಕೋರ್ಟ್‌ನಿಂದ ಹಸಿರು ನಿಶಾನೆ ದೊರೆತ ಬೆನ್ನಲ್ಲೇ ಸಾರಿಗೆ ವಲಯದಲ್ಲಿ ಹೊಸ ಚರ್ಚೆ ಆರಂಭವಾಗಿದೆ. ಬೈಕ್‌ ಟ್ಯಾಕ್ಸಿಗಳಿಂದ ಪ್ರಯಾಣಿಕರಿಗೆ ಕಡಿಮೆ ವೆಚ್ಚದ ಹಾಗೂ ವೇಗದ ಸಂಚಾರದ ಆಯ್ಕೆ ಸಿಗುವ ನಿರೀಕ್ಷೆಯಿದ್ದರೆ, ಮತ್ತೊಂದೆಡೆ ಆಟೋ ಮತ್ತು ಕ್ಯಾಬ್‌ ಚಾಲಕರಿಗೆ ಹೊಸ ಸ್ಪರ್ಧೆ ಎದುರಾಗುವ ಆತಂಕವೂ ವ್ಯಕ್ತವಾಗಿದೆ. ಈಗಾಗಲೇ ನಗರ ಪ್ರದೇಶಗಳಲ್ಲಿ ಪ್ರಯಾಣಿಕರನ್ನ ಕರೆದೊಯ್ಯುವ ಮೂಲಕ ಜೀವನೋಪಾಯ ಕಂಡುಕೊಂಡಿರುವ ಆಟೋ ಮತ್ತು ಕ್ಯಾಬ್‌ ಚಾಲಕರಿಗೆ ಬೈಕ್‌ ಟ್ಯಾಕ್ಸಿಗಳ ವಿಸ್ತರಣೆ ಯಾವ ರೀತಿಯ ಸವಾಲುಗಳನ್ನ ತಂದೊಡ್ಡಬಹುದು ಎಂಬ ಪ್ರಶ್ನೆ ಮುನ್ನೆಲೆಗೆ ಬಂದಿದೆ.

ಕಡಿಮೆ ದರ, ವೇಗದ ಪ್ರಯಾಣ: ಬೈಕ್‌ ಟ್ಯಾಕ್ಸಿಯ ಆಕರ್ಷಣೆ

ಬೈಕ್‌ ಟ್ಯಾಕ್ಸಿಗಳ ಪ್ರಮುಖ ಆಕರ್ಷಣೆ ಕಡಿಮೆ ಪ್ರಯಾಣ ದರ. ಆಟೋ ಅಥವಾ ಕ್ಯಾಬ್‌ಗೆ ಹೋಲಿಸಿದರೆ ಕಡಿಮೆ ವೆಚ್ಚದಲ್ಲಿ ಪ್ರಯಾಣಿಸುವ ಅವಕಾಶ ಗ್ರಾಹಕರಿಗೆ ಸಿಗಬಹುದು. ವಿಶೇಷವಾಗಿ ಕಡಿಮೆ ದೂರದ ಪ್ರಯಾಣಕ್ಕೆ ಬೈಕ್‌ ಟ್ಯಾಕ್ಸಿ ಅನುಕೂಲಕರ ಆಯ್ಕೆಯಾಗುವ ಸಾಧ್ಯತೆಯಿದೆ. ನಗರಗಳಲ್ಲಿ ವಾಹನ ದಟ್ಟಣೆ ಹೆಚ್ಚಿರುವ ಸಮಯದಲ್ಲಿ ದ್ವಿಚಕ್ರ ವಾಹನಗಳು ಕಿರಿದಾದ ರಸ್ತೆಗಳಲ್ಲಿ ಸುಲಭವಾಗಿ ಸಂಚರಿಸಬಲ್ಲವು. ಇದರಿಂದ ಕೆಲವು ಸಂದರ್ಭಗಳಲ್ಲಿ ಪ್ರಯಾಣದ ಸಮಯವೂ ಉಳಿತಾಯವಾಗಬಹುದು. ಕಚೇರಿಗಳಿಗೆ ತೆರಳುವವರು, ವಿದ್ಯಾರ್ಥಿಗಳು ಹಾಗೂ ಒಬ್ಬರೇ ಪ್ರಯಾಣಿಸುವವರು ಈ ಸೇವೆಯನ್ನ ಆಯ್ಕೆ ಮಾಡಿಕೊಳ್ಳುವ ಸಾಧ್ಯತೆಯಿದೆ. ಆ್ಯಪ್‌ ಮೂಲಕ ಬುಕ್ಕಿಂಗ್, ಜಿಪಿಎಸ್‌ ಟ್ರ್ಯಾಕಿಂಗ್ ಮತ್ತು ಪ್ರಯಾಣದ ವಿವರಗಳನ್ನ ತಿಳಿದುಕೊಳ್ಳುವ ಸೌಲಭ್ಯಗಳು ಕೂಡ ಬೈಕ್‌ ಟ್ಯಾಕ್ಸಿ ಸೇವೆಯ ಅನುಕೂಲಗಳಾಗಿವೆ. ಈ ಕಾರಣಗಳಿಂದ ಪ್ರಯಾಣಿಕರಿಗೆ ಸಾರಿಗೆಯ ಮತ್ತೊಂದು ಆಯ್ಕೆ ಲಭ್ಯವಾಗಲಿದೆ.

ಆಟೋ ಚಾಲಕರಿಗೆ ಹೆಚ್ಚಾಗಲಿದೆಯೇ ಸ್ಪರ್ಧೆ?

ಬೈಕ್‌ ಟ್ಯಾಕ್ಸಿಗಳ ವಿಸ್ತರಣೆಯಿಂದ ಆಟೋ ಚಾಲಕರಿಗೆ ನೇರ ಸ್ಪರ್ಧೆ ಎದುರಾಗುವ ಸಾಧ್ಯತೆಯಿದೆ. ವಿಶೇಷವಾಗಿ ಕಡಿಮೆ ದೂರದ ಪ್ರಯಾಣಕ್ಕೆ ಆಟೋ ಬಳಸುತ್ತಿದ್ದ ಗ್ರಾಹಕರು ಕಡಿಮೆ ದರದ ಬೈಕ್‌ ಟ್ಯಾಕ್ಸಿಗಳತ್ತ ಆಕರ್ಷಿತರಾದರೆ ಆಟೋ ಚಾಲಕರಿಗೆ ಪ್ರಯಾಣಿಕರ ಸಂಖ್ಯೆ ಕಡಿಮೆಯಾಗುವ ಆತಂಕ ಎದುರಾಗಬಹುದು. ಇಂಧನ ವೆಚ್ಚ, ವಾಹನ ನಿರ್ವಹಣೆ, ವಿಮೆ, ಪರವಾನಗಿ ಮತ್ತು ಇತರ ಖರ್ಚುಗಳನ್ನ ಭರಿಸುವ ಆಟೋ ಚಾಲಕರಿಗೆ ಆದಾಯದ ಮೇಲೆ ಪರಿಣಾಮ ಉಂಟಾಗುವ ಸಾಧ್ಯತೆಯಿದೆ. ಈಗಾಗಲೇ ಆ್ಯಪ್‌ ಆಧಾರಿತ ಆಟೋ ಸೇವೆಗಳ ಮೂಲಕ ಸ್ಪರ್ಧೆ ಎದುರಿಸುತ್ತಿರುವ ಚಾಲಕರಿಗೆ ಬೈಕ್‌ ಟ್ಯಾಕ್ಸಿಗಳ ಸೇರ್ಪಡೆ ಮತ್ತೊಂದು ಸವಾಲಾಗಬಹುದು. ಆದರೆ ಆಟೋ ಸೇವೆಗಳಿಗೆ ಇರುವ ಪ್ರತ್ಯೇಕ ಅನುಕೂಲಗಳೂ ಇವೆ. ಹೆಚ್ಚಿನ ಪ್ರಯಾಣಿಕರು ಅಥವಾ ಸಾಮಾನುಗಳನ್ನ ಕೊಂಡೊಯ್ಯುವ ಅಗತ್ಯವಿರುವವರಿಗೆ ಆಟೋ ಸೂಕ್ತ ಆಯ್ಕೆಯಾಗಿದೆ. ಹೀಗಾಗಿ ಬೈಕ್‌ ಟ್ಯಾಕ್ಸಿ ಎಲ್ಲಾ ರೀತಿಯ ಪ್ರಯಾಣಕ್ಕೂ ಪರ್ಯಾಯವಾಗುವುದಿಲ್ಲ.

ಕ್ಯಾಬ್‌ ಚಾಲಕರಿಗೂ ಹೊಸ ಸವಾಲು

ಕ್ಯಾಬ್‌ ಚಾಲಕರ ಪಾಲಿಗೂ ಬೈಕ್‌ ಟ್ಯಾಕ್ಸಿ ಸ್ಪರ್ಧೆಯ ಪ್ರಶ್ನೆ ಎದುರಾಗಲಿದೆ. ಒಬ್ಬರೇ ಪ್ರಯಾಣಿಸುವ ಗ್ರಾಹಕರು ಕಡಿಮೆ ವೆಚ್ಚದ ಬೈಕ್‌ ಟ್ಯಾಕ್ಸಿಯನ್ನ ಆಯ್ಕೆ ಮಾಡಿಕೊಂಡರೆ, ಕ್ಯಾಬ್‌ ಸೇವೆಗಳ ಬೇಡಿಕೆಯ ಮೇಲೆ ಪರಿಣಾಮ ಬೀರುವ ಸಾಧ್ಯತೆಯಿದೆ. ಕ್ಯಾಬ್‌ ನಿರ್ವಹಣೆಗೆ ಇಂಧನ, ವಾಹನದ ಕಂತು, ವಿಮೆ, ನಿರ್ವಹಣೆ ಮತ್ತು ಇತರ ವೆಚ್ಚಗಳನ್ನ ಭರಿಸಬೇಕಾಗುತ್ತದೆ. ಇಂತಹ ಪರಿಸ್ಥಿತಿಯಲ್ಲಿ ಕಡಿಮೆ ದರದ ಬೈಕ್‌ ಟ್ಯಾಕ್ಸಿಗಳೊಂದಿಗೆ ಸ್ಪರ್ಧಿಸುವುದು ಕ್ಯಾಬ್‌ ಚಾಲಕರಿಗೆ ಸವಾಲಾಗಬಹುದು. ಪ್ರಯಾಣಿಕರನ್ನ ಆಕರ್ಷಿಸಲು ದರದಲ್ಲಿ ಸ್ಪರ್ಧೆ ಹೆಚ್ಚಾದರೆ ಚಾಲಕರ ಆದಾಯದ ಮೇಲೂ ಒತ್ತಡ ಉಂಟಾಗುವ ಸಾಧ್ಯತೆಯಿದೆ.

ಪರವಾನಗಿ ಮತ್ತು ನಿಯಮಗಳಲ್ಲಿ ಸಮಾನತೆ ಅಗತ್ಯವೇ?

ಬೈಕ್‌ ಟ್ಯಾಕ್ಸಿ ಸೇವೆಗಳ ವಿಸ್ತರಣೆಯೊಂದಿಗೆ ವಾಹನ ನೋಂದಣಿ, ವಾಣಿಜ್ಯ ಬಳಕೆಗೆ ಅಗತ್ಯವಾದ ಪರವಾನಗಿ, ವಿಮೆ ಮತ್ತು ಸುರಕ್ಷತಾ ನಿಯಮಗಳ ಪಾಲನೆ ಮಹತ್ವ ಪಡೆದುಕೊಂಡಿದೆ. ಬೈಕ್‌ ಟ್ಯಾಕ್ಸಿ ಚಾಲಕರು ಮತ್ತು ಆಟೋ, ಕ್ಯಾಬ್‌ ಚಾಲಕರಿಗೆ ಅನ್ವಯಿಸುವ ನಿಯಮಗಳ ನಡುವೆ ಸ್ಪಷ್ಟತೆ ಇರಬೇಕೆಂಬ ಚರ್ಚೆಯೂ ಇದೆ. ಸುರಕ್ಷತೆ, ಚಾಲಕರ ದಾಖಲೆಗಳ ಪರಿಶೀಲನೆ, ಜಿಪಿಎಸ್‌ ವ್ಯವಸ್ಥೆ ಹಾಗೂ ಪ್ರಯಾಣಿಕರಿಗೆ ವಿಮಾ ಸೌಲಭ್ಯ ಕಲ್ಪಿಸುವುದು ಪ್ರಮುಖ ಅಂಶಗಳಾಗಿವೆ. ನಿಯಮಗಳ ಅನುಷ್ಠಾನದಲ್ಲಿ ಯಾವುದೇ ಗೊಂದಲ ಉಂಟಾಗದಂತೆ ನೋಡಿಕೊಳ್ಳುವುದು ಸಾರಿಗೆ ವ್ಯವಸ್ಥೆಯ ಪಾಲಿಗೆ ಮುಖ್ಯವಾಗಿದೆ.

ಪ್ರಯಾಣಿಕರಿಗೆ ಅನುಕೂಲ, ಚಾಲಕರಿಗೆ ಸ್ಪರ್ಧೆಯ ಆತಂಕ

ಒಟ್ನಲ್ಲಿ ಬೈಕ್‌ ಟ್ಯಾಕ್ಸಿಗಳಿಂದ ಪ್ರಯಾಣಿಕರಿಗೆ ಕಡಿಮೆ ದರದಲ್ಲಿ ಸಂಚರಿಸುವ ಅವಕಾಶ ಸಿಗಬಹುದು. ಬೈಕ್‌ ಮಾಲೀಕರಿಗೂ ಹೆಚ್ಚುವರಿ ಆದಾಯ ಮತ್ತು ಉದ್ಯೋಗದ ಅವಕಾಶಗಳು ಸೃಷ್ಟಿಯಾಗಬಹುದು. ಆದರೆ ಆಟೋ ಮತ್ತು ಕ್ಯಾಬ್‌ ಚಾಲಕರಿಗೆ ಹೊಸ ಸ್ಪರ್ಧೆ ಎದುರಾಗುವ ಸಾಧ್ಯತೆಯಿದೆ. ಪ್ರಯಾಣಿಕರ ಆಯ್ಕೆ ಹೆಚ್ಚುತ್ತಿರುವ ಸಂದರ್ಭದಲ್ಲಿ ಸಾಂಪ್ರದಾಯಿಕ ಸಾರಿಗೆ ಸೇವೆಗಳ ಚಾಲಕರ ಆದಾಯ ಮತ್ತು ಜೀವನೋಪಾಯದ ಮೇಲಿನ ಪರಿಣಾಮವೂ ಚರ್ಚೆಗೆ ಗ್ರಾಸವಾಗಿದೆ.

ಹೀಗಾಗಿ ಬೈಕ್‌ ಟ್ಯಾಕ್ಸಿ ಸೇವೆಗಳ ಅನುಮತಿಯ ಜೊತೆಗೆ ಪ್ರಯಾಣಿಕರ ಸುರಕ್ಷತೆ, ಪರವಾನಗಿ, ವಿಮೆ ಹಾಗೂ ಆಟೋ ಮತ್ತು ಕ್ಯಾಬ್‌ ಚಾಲಕರ ಹಿತಾಸಕ್ತಿಗಳನ್ನೂ ಗಮನದಲ್ಲಿಟ್ಟುಕೊಂಡು ನಿಯಮಾವಳಿ ರೂಪಿಸುವುದು ಪ್ರಮುಖವಾಗಲಿದೆ. ಬೈಕ್‌ ಟ್ಯಾಕ್ಸಿಗಳ ಆಗಮನ ಸಾರಿಗೆ ಕ್ಷೇತ್ರದಲ್ಲಿ ಹೊಸ ಆಯ್ಕೆಯನ್ನ ತೆರೆದಿದ್ದರೂ, ಅದರ ಪರಿಣಾಮವನ್ನ ಮುಂದಿನ ದಿನಗಳಲ್ಲಿ ಗಮನಿಸಬೇಕಿದೆ.

Add Zee News as a Preferred Source
TAGS:
Karnataka Politics
Kannada News