ಮೈಸೂರು ಮಾದರಿಯಲ್ಲೇ ತುಮಕೂರಿನಲ್ಲೂ ದಸರಾ ವೈಭವ.. ಕಲ್ಪತರು ನಾಡಿನಲ್ಲಿ ದಸರಾ ಸಂಭ್ರಮ ಹೇಗಿದೆ ಗೊತ್ತಾ!

ಕಲ್ಪತರು ನಾಡು ತುಮಕೂರು.. ನಾಡಿನ ಸಂಸ್ಕೃತಿ, ಪರಂಪರೆ, ಭಕ್ತಿ, ಕಲೆ ಮತ್ತು ಆಧುನಿಕತೆಯ ಸಂಗಮಕ್ಕೆ ಸಾಕ್ಷಿಯಾಗಿರುವ ಕಲ್ಪತರು ನಾಡು ತುಮಕೂರು ದಸರಾ ಮಹೋತ್ಸವ ಈಗ ರಾಜ್ಯದ ಗಮನ ಸೆಳೆಯುತ್ತಿದೆ. ಮೈಸೂರಿನ ನಾಡಹಬ್ಬದ ಮಾದರಿಯಲ್ಲಿ ತುಮಕೂರಿನಲ್ಲೂ ದಸರಾ ಸಂಭ್ರಮವನ್ನು ಜನಸಾಮಾನ್ಯರ ಮನೆಬಾಗಿಲಿಗೆ ತಲುಪಿಸುವ ಪ್ರಯತ್ನ... ಮತ್ತೊಂದೆಡೆ, ಹತ್ತು ಹಲವು ಕಾರ್ಯಕ್ರಮಗಳ ಮೂಲಕ ತುಮಕೂರಿನ ಸಾಂಸ್ಕೃತಿಕ ವೈಭವವನ್ನು ಅನಾವರಣಗೊಳಿಸುವ ಮಹತ್ವಾಕಾಂಕ್ಷೆ ಈ ಎರಡೂ ಉದ್ದೇಶಗಳೊಂದಿಗೆ ನಡೆಯುತ್ತಿರುವ ತುಮಕೂರು ದಸರಾ ಮಹೋತ್ಸವಕ್ಕೆ ಡಿಸಿಎಂ ಡಾ. ಜಿ. ಪರಮೇಶ್ವರ್ ಅವರ ನೇತೃತ್ವದಲ್ಲಿ ಅದ್ಧೂರಿ ಚಾಲನೆ ಸಿಕ್ಕಿದೆ.

ತುಮಕೂರು ದಸರಾ 2026ರಲ್ಲಿ ನಾಡ ಹಬ್ಬಕ್ಕೆ ಹೊಸ ಆಯಾಮ ಸಿಕ್ಕಿದ್ದು ಈ ಬೃಹತ್ ಉತ್ಸವವನ್ನು ಅಚ್ಚುಕಟ್ಟಾಗಿ ಆಯೋಜಿಸುವಲ್ಲಿ ಜಿಲ್ಲಾಧಿಕಾರಿ ಶುಭಕಲ್ಯಾಣ್ ನೇತೃತ್ವದ ಜಿಲ್ಲಾಡಳಿತದ ಪಾತ್ರವೂ ಮಹತ್ವದ್ದಾಗಿದೆ. ಹಾಗಾದರೆ, ತುಮಕೂರು ದಸರಾ ಈ ಬಾರಿ ಯಾವೆಲ್ಲ ವಿಶೇಷತೆಗಳಿಂದ ಗಮನ ಸೆಳೆಯುತ್ತಿದೆ? ಡಿಸಿಎಂ ಡಾ. ಜಿ. ಪರಮೇಶ್ವರ್ ಅವರ ಕನಸಿನ ದಸರಾ ಹೇಗೆ ಜನೋತ್ಸವವಾಗಿ ರೂಪುಗೊಂಡಿದೆ? ಎಂಬ ಮಹತ್ವದ ಮಾಹಿತಿ ಇಲ್ಲಿದೆ.

ತುಮಕೂರಿನಲ್ಲೇ ನಾಡಹಬ್ಬದ ವೈಭವ!
ನಾಡಹಬ್ಬ ದಸರಾ ಅಂದರೆ ಕೇವಲ ಹಬ್ಬವಲ್ಲ... ಅದು ನಮ್ಮ ನಾಡಿನ ಸಂಸ್ಕೃತಿ, ಧಾರ್ಮಿಕ ನಂಬಿಕೆ ಮತ್ತು ಐತಿಹಾಸಿಕ ಪರಂಪರೆಯ ಪ್ರತೀಕ. ಇಂತಹ ಮಹತ್ವದ ಹಬ್ಬವನ್ನು ತುಮಕೂರಿನಲ್ಲೂ ಅದ್ಧೂರಿಯಾಗಿ ಆಚರಿಸಬೇಕು ಎಂಬ ಉದ್ದೇಶದೊಂದಿಗೆ ಆರಂಭವಾದ ತುಮಕೂರು ದಸರಾ, ಇಂದು ಹಲವು ಆಯಾಮಗಳನ್ನು ಪಡೆದುಕೊಳ್ಳುತ್ತಿದೆ.
ದಸರಾ ನೋಡಲು ಮೈಸೂರಿಗೆ ತೆರಳಲು ಸಾಧ್ಯವಾಗದ ಅನೇಕ ಜನರಿಗೆ ತಮ್ಮದೇ ಜಿಲ್ಲೆಯಲ್ಲಿ ನಾಡಹಬ್ಬದ ಸಂಭ್ರಮವನ್ನು ಅನುಭವಿಸುವ ಅವಕಾಶ ಸಿಕ್ಕಿದೆ. ಇದು ಕೇವಲ ಕಾರ್ಯಕ್ರಮಗಳ ಆಯೋಜನೆಯಲ್ಲ... ಸ್ಥಳೀಯ ಕಲಾವಿದರಿಗೆ ವೇದಿಕೆ, ಮಕ್ಕಳಿಗೆ ಪ್ರತಿಭೆ ಪ್ರದರ್ಶಿಸಲು ಅವಕಾಶ, ಮಹಿಳೆಯರಿಗೆ ಪ್ರೋತ್ಸಾಹ, ಯುವಜನರಿಗೆ ಮನರಂಜನೆ ಮತ್ತು ಜನಸಾಮಾನ್ಯರಿಗೆ ಸಾಂಸ್ಕೃತಿಕ ಅನುಭವ ನೀಡುವ ಪ್ರಯತ್ನವೂ ಹೌದು. ಈ ಉದ್ದೇಶವನ್ನು ಮುಂದಿಟ್ಟುಕೊಂಡು ದಸರಾ ಮಹೋತ್ಸವವನ್ನು ರೂಪಿಸುವಲ್ಲಿ ಡಿಸಿಎಂ ಡಾ. ಜಿ. ಪರಮೇಶ್ವರ್ ಅವರ ಪಾತ್ರ ಪ್ರಮುಖವಾಗಿದೆ.

ತುಮಕೂರು ಜಿಲ್ಲೆಯ ಸಾಂಸ್ಕೃತಿಕ ಗುರುತನ್ನು ಮತ್ತಷ್ಟು ಬಲಪಡಿಸುವುದು, ಸ್ಥಳೀಯ ಪ್ರತಿಭೆಗಳಿಗೆ ಹೆಚ್ಚಿನ ಅವಕಾಶ ಕಲ್ಪಿಸುವುದು ಮತ್ತು ಸಾರ್ವಜನಿಕರನ್ನು ಒಂದೇ ವೇದಿಕೆಯಲ್ಲಿ ಸೇರಿಸುವುದು... ಇಂತಹ ಹಲವು ಆಶಯಗಳಿಗೆ ತುಮಕೂರು ದಸರಾ ವೇದಿಕೆಯಾಗುತ್ತಿದೆ.

ವಿಶೇಷವೆಂದರೆ, ಧಾರ್ಮಿಕ ಆಚರಣೆಗಳ ಜೊತೆಗೆ ವಿಜ್ಞಾನ, ತಂತ್ರಜ್ಞಾನ, ಕ್ರೀಡೆ, ಮನರಂಜನೆ ಮತ್ತು ಪ್ರವಾಸೋದ್ಯಮದಂತಹ ಕ್ಷೇತ್ರಗಳಿಗೂ ಈ ಉತ್ಸವದಲ್ಲಿ ಸ್ಥಾನ ನೀಡಲಾಗಿದೆ.

ಹೀಗಾಗಿ ತುಮಕೂರು ದಸರಾ ಕೇವಲ ಸಂಪ್ರದಾಯದ ಆಚರಣೆಯಾಗಿ ಉಳಿಯದೆ, ವಿವಿಧ ವಯೋಮಾನದ ಜನರನ್ನು ಸೆಳೆಯುವ ಜನೋತ್ಸವವಾಗಿ ಬೆಳೆಯುತ್ತಿದೆ.

ತುಮಕೂರು ದಸರಾಕ್ಕೆ ನಾಯಕತ್ವದ ಸ್ಪರ್ಶ! ಡಾ. ಜಿ. ಪರಮೇಶ್ವರ್ ಅವರ ಮುಂದಾಳತ್ವದಲ್ಲಿ ಸಾಂಸ್ಕೃತಿಕ ಉತ್ಸವ
ತುಮಕೂರು ದಸರಾ – ಜನರ ಹಬ್ಬ, ಸಂಸ್ಕೃತಿಯ ಹಬ್ಬ.. ಡಿಸಿಎಂ ಡಾ. ಜಿ. ಪರಮೇಶ್ವರ್ – ದಸರಾ ಸಂಭ್ರಮದ ಕೇಂದ್ರಬಿಂದು. ತುಮಕೂರು ದಸರಾ ಮಹೋತ್ಸವದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದು ಡಿಸಿಎಂ ಡಾ. ಜಿ. ಪರಮೇಶ್ವರ್ ಅವರ ಮುಂದಾಳತ್ವ. ರಾಜಕೀಯ ಮತ್ತು ಆಡಳಿತದ ಜವಾಬ್ದಾರಿಗಳ ನಡುವೆಯೂ ಜಿಲ್ಲೆಯ ಸಾಂಸ್ಕೃತಿಕ ಪರಂಪರೆಗೆ ಪ್ರಾಮುಖ್ಯತೆ ನೀಡುವ ಪ್ರಯತ್ನವಾಗಿ ತುಮಕೂರು ದಸರಾ ಗಮನ ಸೆಳೆಯುತ್ತಿದೆ.

ದಸರಾ ಮಹೋತ್ಸವವನ್ನು ಕೇವಲ ಒಂದು ದಿನದ ಕಾರ್ಯಕ್ರಮವಾಗಿ ಸೀಮಿತಗೊಳಿಸದೆ, ಹಲವು ದಿನಗಳ ಕಾಲ ನಡೆಯುವ ವೈವಿಧ್ಯಮಯ ಉತ್ಸವವಾಗಿ ರೂಪಿಸಿರುವುದು ವಿಶೇಷ. ಧಾರ್ಮಿಕ ಕಾರ್ಯಕ್ರಮಗಳು, ಸಾಂಸ್ಕೃತಿಕ ಸಂಜೆಗಳು, ಮಹಿಳಾ ದಸರಾ, ಮಕ್ಕಳ ದಸರಾ, ಫಲಪುಷ್ಪ ಪ್ರದರ್ಶನ, ವಿಜ್ಞಾನ ವಸ್ತುಪ್ರದರ್ಶನ ಮತ್ತು ಹೆಲಿ ರೈಡ್... ಹೀಗೆ ಹಲವು ಕಾರ್ಯಕ್ರಮಗಳನ್ನು ಒಂದೇ ಉತ್ಸವದಡಿ ಒಗ್ಗೂಡಿಸಲಾಗಿದೆ. ಈ ಮೂಲಕ ತುಮಕೂರಿನ ಜನತೆಗೆ ಮನರಂಜನೆಯ ಜೊತೆಗೆ ತಮ್ಮ ಸಂಸ್ಕೃತಿ ಮತ್ತು ಪರಂಪರೆಯನ್ನು ಹತ್ತಿರದಿಂದ ಅನುಭವಿಸುವ ಅವಕಾಶ ಸಿಕ್ಕಿದೆ.

ದಸರಾ ವೇದಿಕೆಯಲ್ಲಿ ಮಾತನಾಡಿದ ಡಾ. ಜಿ. ಪರಮೇಶ್ವರ್, ತುಮಕೂರು ಬೆಳೆಯಬೇಕು ಎಂಬ ಆಶಯವನ್ನು ವ್ಯಕ್ತಪಡಿಸಿದ್ದು, ಜಿಲ್ಲೆಯ ಸಾಂಸ್ಕೃತಿಕ ಚಟುವಟಿಕೆಗಳಿಗೆ ಮತ್ತಷ್ಟು ಪ್ರೋತ್ಸಾಹ ನೀಡುವ ಅಗತ್ಯವನ್ನೂ ಒತ್ತಿಹೇಳಿದ್ದಾರೆ.

ಇನ್ನು, ದಸರಾ ಮಹೋತ್ಸವದಲ್ಲಿ ಸ್ಥಳೀಯ ಕಲಾವಿದರು ಮತ್ತು ಯುವಜನರಿಗೆ ಅವಕಾಶ ಕಲ್ಪಿಸಿರುವುದು ಈ ಉತ್ಸವದ ಮತ್ತೊಂದು ಪ್ರಮುಖ ಅಂಶ. ಒಟ್ಟಿನಲ್ಲಿ, ತುಮಕೂರು ದಸರಾವನ್ನು ಜನರಿಗೆ ಹತ್ತಿರವಾಗಿಸುವುದು, ಜಿಲ್ಲೆಯ ಹೆಸರನ್ನು ಸಾಂಸ್ಕೃತಿಕವಾಗಿ ಮುನ್ನೆಲೆಗೆ ತರುವುದು ಮತ್ತು ಮುಂದಿನ ಪೀಳಿಗೆಗೆ ಪರಂಪರೆಯನ್ನು ಪರಿಚಯಿಸುವುದು... ಈ ಉತ್ಸವದ ಪ್ರಮುಖ ಆಶಯಗಳಾಗಿವೆ.

ದಸರಾ ಯಶಸ್ಸಿನ ಹಿಂದೆ ಆಡಳಿತದ ಸಮನ್ವಯ! ಜಿಲ್ಲಾಧಿಕಾರಿ ಶುಭಕಲ್ಯಾಣ್ ಮತ್ತು ಜಿಲ್ಲಾಡಳಿತದ ಸಂಘಟನಾ ಸಾಮರ್ಥ್ಯ 
ಒಂದು ದೊಡ್ಡ ಉತ್ಸವವನ್ನು ಆಯೋಜಿಸುವುದು ಅಂದರೆ ಕೇವಲ ವೇದಿಕೆ ನಿರ್ಮಿಸಿ ಕಾರ್ಯಕ್ರಮ ನಡೆಸುವುದಲ್ಲ. ಸಾವಿರಾರು ಜನರ ಓಡಾಟ, ವಿವಿಧ ಇಲಾಖೆಗಳ ಸಮನ್ವಯ, ಕಾರ್ಯಕ್ರಮಗಳ ವೇಳಾಪಟ್ಟಿ, ಪ್ರದರ್ಶನಗಳ ವ್ಯವಸ್ಥೆ, ಸಾರ್ವಜನಿಕರಿಗೆ ಅಗತ್ಯ ಸೌಲಭ್ಯಗಳು ಮತ್ತು ಒಟ್ಟಾರೆ ನಿರ್ವಹಣೆ... ಇವೆಲ್ಲವೂ ಸಮರ್ಪಕವಾಗಿ ನಡೆಯಬೇಕಾಗುತ್ತದೆ. ತುಮಕೂರು ದಸರಾ ಮಹೋತ್ಸವದಲ್ಲೂ ಜಿಲ್ಲಾಡಳಿತದ ಸಂಘಟನಾ ಸಾಮರ್ಥ್ಯ ಪ್ರಮುಖವಾಗಿ ಕಾಣಿಸುತ್ತದೆ. ಜಿಲ್ಲಾಧಿಕಾರಿ ಶುಭಕಲ್ಯಾಣ್ ಅವರ ನೇತೃತ್ವದಲ್ಲಿ ವಿವಿಧ ಇಲಾಖೆಗಳ ಸಹಕಾರದೊಂದಿಗೆ ಉತ್ಸವದ ಹಲವು ಕಾರ್ಯಕ್ರಮಗಳನ್ನು ರೂಪಿಸಲಾಗಿದೆ.

ಧಾರ್ಮಿಕ ಮಂಟಪದಿಂದ ಫಲಪುಷ್ಪ ಪ್ರದರ್ಶನದವರೆಗೆ... ವಿಜ್ಞಾನ ವಸ್ತುಪ್ರದರ್ಶನದಿಂದ ಮಹಿಳಾ ದಸರಾವರೆಗೆ... ಸಾಂಸ್ಕೃತಿಕ ವೇದಿಕೆಯಿಂದ ಸಾರ್ವಜನಿಕರ ಮನರಂಜನೆಯ ಕಾರ್ಯಕ್ರಮಗಳವರೆಗೆ, ವಿವಿಧ ಆಯಾಮಗಳನ್ನು ಒಂದೇ ಉತ್ಸವದಲ್ಲಿ ಒಗ್ಗೂಡಿಸಲಾಗಿದೆ.

ಪ್ರತಿ ಕಾರ್ಯಕ್ರಮವೂ ತನ್ನದೇ ಆದ ಉದ್ದೇಶವನ್ನು ಹೊಂದಿದ್ದು, ಎಲ್ಲ ವಯೋಮಾನದ ಜನರನ್ನು ತಲುಪುವ ರೀತಿಯಲ್ಲಿ ದಸರಾ ಮಹೋತ್ಸವವನ್ನು ರೂಪಿಸಿರುವುದು ಗಮನಾರ್ಹ.

ವಿಶೇಷವಾಗಿ ಮಹಿಳೆಯರು, ಮಕ್ಕಳು, ವಿದ್ಯಾರ್ಥಿಗಳು ಮತ್ತು ಸ್ಥಳೀಯ ಕಲಾವಿದರಿಗೆ ಅವಕಾಶ ಕಲ್ಪಿಸಿರುವುದು ಉತ್ಸವದ ವ್ಯಾಪ್ತಿಯನ್ನು ವಿಸ್ತರಿಸಿದೆ.

ಇಂತಹ ದೊಡ್ಡ ಕಾರ್ಯಕ್ರಮ ಯಶಸ್ವಿಯಾಗಬೇಕಾದರೆ ಜನಪ್ರತಿನಿಧಿಗಳ ಮಾರ್ಗದರ್ಶನದ ಜೊತೆಗೆ ಅಧಿಕಾರಿಗಳ ಯೋಜನೆ, ಸಿಬ್ಬಂದಿಯ ಪರಿಶ್ರಮ ಮತ್ತು ವಿವಿಧ ಇಲಾಖೆಗಳ ಸಮನ್ವಯವೂ ಅಷ್ಟೇ ಮುಖ್ಯ. ಈ ನಿಟ್ಟಿನಲ್ಲಿ ಜಿಲ್ಲಾಧಿಕಾರಿ ಶುಭಕಲ್ಯಾಣ್ ಮತ್ತು ಜಿಲ್ಲಾಡಳಿತದ ಕಾರ್ಯನಿರ್ವಹಣೆ ತುಮಕೂರು ದಸರಾ ಮಹೋತ್ಸವದ ಪ್ರಮುಖ ಭಾಗವಾಗಿದೆ.

ಯೋಜನೆ, ಸಮನ್ವಯ, ಸಾರ್ವಜನಿಕರ ಸಹಭಾಗಿತ್ವ, ತುಮಕೂರು ದಸರಾ.. ಭಕ್ತಿ ಮತ್ತು ಪರಂಪರೆಯ ಸಂಗಮ – ಧಾರ್ಮಿಕ ದಸರಾ:  
ತುಮಕೂರು ದಸರಾ ಮಹೋತ್ಸವದ ಆರಂಭವೇ ಭಕ್ತಿ ಮತ್ತು ಧಾರ್ಮಿಕ ಸಂಭ್ರಮದಿಂದ ಕೂಡಿದೆ. ಜೂನಿಯರ್ ಕಾಲೇಜು ಮೈದಾನದಲ್ಲಿ ನಡೆದ ಉದ್ಘಾಟನಾ ಕಾರ್ಯಕ್ರಮದ ವೇಳೆ ತಾಯಿ ಚಾಮುಂಡೇಶ್ವರಿಗೆ ವಿಶೇಷ ಪೂಜೆ ಸಲ್ಲಿಸಿ ನಾಡಿನ ಸುಭಿಕ್ಷೆ, ಶಾಂತಿ ಮತ್ತು ಸಮೃದ್ಧಿಗಾಗಿ ಪ್ರಾರ್ಥಿಸಲಾಯಿತು. ಡಿಸಿಎಂ ಡಾ. ಜಿ. ಪರಮೇಶ್ವರ್ ಹಾಗೂ ಅವರ ಧರ್ಮಪತ್ನಿ ಕನ್ನಿಕಾ ಪರಮೇಶ್ವರ್ ಧಾರ್ಮಿಕ ಕಾರ್ಯಕ್ರಮಗಳಲ್ಲಿ ಪಾಲ್ಗೊಂಡರು.  ಸಿದ್ಧಗಂಗಾ ಮಠದ ಸಿದ್ದಲಿಂಗ ಸ್ವಾಮೀಜಿ, ಸಿದ್ದರಬೆಟ್ಟದ ವೀರಭದ್ರ ಶಿವಾಚಾರ್ಯ ಸ್ವಾಮೀಜಿ, ಬೆಳ್ಳಾವಿ ಮಠದ ಕಾರದ ವೀರಬಸವ ಸ್ವಾಮೀಜಿ ಸೇರಿದಂತೆ ಧಾರ್ಮಿಕ ಗಣ್ಯರು ಪಾಲ್ಗೊಂಡ ಕಾರ್ಯಕ್ರಮಗಳು ಭಕ್ತರ ಗಮನ ಸೆಳೆದವು.

ವಿಶೇಷವಾಗಿ ಧಾರ್ಮಿಕ ಮಂಟಪದ ನಿರ್ಮಾಣ, ದೇವಿಯ ವಿವಿಧ ರೂಪಗಳ ಆರಾಧನೆ ಮತ್ತು ಪೂಜಾ ಕಾರ್ಯಕ್ರಮಗಳು ನವರಾತ್ರಿಯ ಮಹತ್ವವನ್ನು ಸಾರುತ್ತಿವೆ. ಉತ್ತರ ಮತ್ತು ದಕ್ಷಿಣ ಭಾರತದ ದೇವಾಲಯಗಳ ವಾಸ್ತುಶಿಲ್ಪದ ಮಾದರಿಗಳನ್ನು ಒಳಗೊಂಡ ಮಂಟಪವು ಉತ್ಸವದ ಪ್ರಮುಖ ಆಕರ್ಷಣೆಗಳಲ್ಲಿ ಒಂದಾಗಿದೆ.

ಭಕ್ತಿ, ಸಂಪ್ರದಾಯ ಮತ್ತು ಆಧ್ಯಾತ್ಮಿಕತೆಯನ್ನು ಮುಂದಿನ ಪೀಳಿಗೆಗೆ ಪರಿಚಯಿಸುವಲ್ಲಿ ಇಂತಹ ಕಾರ್ಯಕ್ರಮಗಳು ಮಹತ್ವದ ಪಾತ್ರ ವಹಿಸುತ್ತವೆ.

ಹೆಲಿ ರೈಡ್‌ನಲ್ಲಿ ಹಾರಾಟದ ರೋಮಾಂಚನ: ಮುಗಿಲಿನಿಂದ ತುಮಕೂರು ದಸರಾ ದರ್ಶನ!
ಈ ಬಾರಿಯ ತುಮಕೂರು ದಸರಾ ಮಹೋತ್ಸವದಲ್ಲಿ ಜನರ ಕುತೂಹಲವನ್ನು ಹೆಚ್ಚಿಸಿದ ಪ್ರಮುಖ ಆಕರ್ಷಣೆ ಹೆಲಿ ರೈಡ್. ನೆಲದ ಮೇಲೆ ನಡೆಯುವ ದಸರಾ ಸಂಭ್ರಮವನ್ನು ಕಣ್ತುಂಬಿಕೊಳ್ಳುವ ಅವಕಾಶ ಒಂದೆಡೆಯಾದರೆ, ಆಕಾಶದಿಂದ ತುಮಕೂರು ನಗರದ ಸೌಂದರ್ಯವನ್ನು ವೀಕ್ಷಿಸುವ ವಿಶೇಷ ಅನುಭವ ಮತ್ತೊಂದೆಡೆ. ತುಮಕೂರು ವಿಶ್ವವಿದ್ಯಾಲಯದ ಹೆಲಿಪ್ಯಾಡ್‌ನಲ್ಲಿ ಆಯೋಜಿಸಲಾದ ಹೆಲಿ ರೈಡ್ ಸಾರ್ವಜನಿಕರ ಗಮನ ಸೆಳೆದಿದೆ.

ದಸರಾ ಉತ್ಸವಕ್ಕೆ ಹೊಸ ಆಯಾಮ ನೀಡುವ ಉದ್ದೇಶದಿಂದ ರೂಪಿಸಲಾದ ಈ ಕಾರ್ಯಕ್ರಮವು ಪ್ರವಾಸೋದ್ಯಮ ಮತ್ತು ಮನರಂಜನೆಯ ದೃಷ್ಟಿಯಿಂದಲೂ ವಿಶೇಷವಾಗಿದೆ.

ಮಠಾಧೀಶರು ಹೆಲಿಕಾಪ್ಟರ್‌ನಲ್ಲಿ ಹಾರಾಟ ನಡೆಸಿರುವುದು ಕಾರ್ಯಕ್ರಮದ ಮತ್ತೊಂದು ವಿಶೇಷ ಆಕರ್ಷಣೆ. ನಗರದ ಭೌಗೋಳಿಕ ಸೌಂದರ್ಯ, ವಿಸ್ತಾರಗೊಳ್ಳುತ್ತಿರುವ ನಗರ ಪ್ರದೇಶಗಳು ಮತ್ತು ದಸರಾ ಮಹೋತ್ಸವದ ವೈಭವವನ್ನು ಆಕಾಶದಿಂದ ನೋಡುವ ಅವಕಾಶ ಜನರಲ್ಲಿ ಉತ್ಸಾಹ ಮೂಡಿಸಿದೆ. ಸಂಪ್ರದಾಯದ ಜೊತೆಗೆ ಹೊಸ ಅನುಭವಗಳನ್ನೂ ಪರಿಚಯಿಸುವ ತುಮಕೂರು ದಸರಾ, ಜನರಿಗೆ ವಿಭಿನ್ನ ರೀತಿಯ ಮನರಂಜನೆ ನೀಡುವ ಪ್ರಯತ್ನ ಮಾಡುತ್ತಿದೆ.

ಹೂವಿನ ಲೋಕದಲ್ಲಿ ತುಮಕೂರು ದಸರಾ!
ತುಮಕೂರು ದಸರಾದಲ್ಲಿ ಫಲಪುಷ್ಪ ಪ್ರದರ್ಶನವನ್ನೂ ಆಯೋಜಿಸಲಾಗಿದ್ದು ಹೂವಿನಲ್ಲಿ ಕಲಾಲೋಕವನ್ನೇ ಅರಳಿಸಲಾಗಿದೆ. ಬಣ್ಣಬಣ್ಣದ ಹೂವುಗಳು... ಕಲಾತ್ಮಕ ವಿನ್ಯಾಸಗಳು... ನಾಡಿನ ಪರಂಪರೆಯನ್ನು ಪ್ರತಿಬಿಂಬಿಸುವ ಆಕೃತಿಗಳು... ತುಮಕೂರು ದಸರಾ ಮಹೋತ್ಸವದ ಫಲಪುಷ್ಪ ಪ್ರದರ್ಶನವು ಪ್ರವಾಸಿಗರು ಮತ್ತು ಸಾರ್ವಜನಿಕರನ್ನು ಆಕರ್ಷಿಸುತ್ತಿದೆ.

ವಿವಿಧ ಬಗೆಯ ಹೂವುಗಳನ್ನು ಬಳಸಿ ರೂಪಿಸಿರುವ ಕಲಾಕೃತಿಗಳು ಸೃಜನಶೀಲತೆಯ ಜೊತೆಗೆ ಕಲಾತ್ಮಕ ಅಭಿರುಚಿಯನ್ನೂ ಪರಿಚಯಿಸುತ್ತಿವೆ.

ಇಂಡಿಯಾ ಗೇಟ್, ಪುರಭವನ, ಹಂಪಿಯ ಕಲ್ಲಿನ ರಥ, ಮೆಟ್ರೋ ಸೇರಿದಂತೆ ಹಲವು ಮಾದರಿಗಳು ಜನರ ಗಮನ ಸೆಳೆಯುತ್ತಿವೆ.

ಹೂವುಗಳ ಮೂಲಕ ಐತಿಹಾಸಿಕ ಸ್ಮಾರಕಗಳು ಮತ್ತು ಆಧುನಿಕ ಕಟ್ಟಡಗಳ ಮಾದರಿಗಳನ್ನು ನಿರ್ಮಿಸಿರುವುದು ವಿಶೇಷ.

ಇಂತಹ ಪ್ರದರ್ಶನಗಳು ಮಕ್ಕಳಿಗೆ ಪ್ರಕೃತಿಯ ಬಗ್ಗೆ ಆಸಕ್ತಿ ಮೂಡಿಸುವುದರ ಜೊತೆಗೆ ಕಲ್ಪನಾಶಕ್ತಿ ಮತ್ತು ಸೃಜನಶೀಲತೆಯನ್ನು ಬೆಳೆಸಲು ಸಹಕಾರಿಯಾಗುತ್ತವೆ.

ತೋಟಗಾರಿಕೆ ಸೇರಿದಂತೆ ವಿವಿಧ ಇಲಾಖೆಗಳ ಸಹಕಾರದೊಂದಿಗೆ ರೂಪಿಸಲಾದ ಪ್ರದರ್ಶನವು ತುಮಕೂರು ದಸರಾ ಮಹೋತ್ಸವದ ಪ್ರಮುಖ ಆಕರ್ಷಣೆಯಾಗಿದೆ.

ದಸರಾ ಎಂದರೆ ಕೇವಲ ಧಾರ್ಮಿಕ ಆಚರಣೆಯಲ್ಲ; ಪ್ರಕೃತಿ, ಕಲೆ ಮತ್ತು ಸೃಜನಶೀಲತೆಯನ್ನು ಸಂಭ್ರಮಿಸುವ ವೇದಿಕೆಯೂ ಹೌದು ಎಂಬುದಕ್ಕೆ ಈ ಫಲಪುಷ್ಪ ಪ್ರದರ್ಶನ ಸಾಕ್ಷಿಯಾಗಿದೆ.

ದಸರಾ ಪ್ರದರ್ಶನದಲ್ಲಿ ವಿಜ್ಞಾನದ ಲೋಕ!
ವಿಜ್ಞಾನ ಮತ್ತು ತಂತ್ರಜ್ಞಾನ – ಯುವಜನತೆಗೆ ಹೊಸ ಕುತೂಹಲ
ತುಮಕೂರು ದಸರಾ ಮಹೋತ್ಸವದ ಮತ್ತೊಂದು ವಿಶೇಷತೆ ವಿಜ್ಞಾನ ಮತ್ತು ತಂತ್ರಜ್ಞಾನಕ್ಕೆ ನೀಡಿರುವ ಪ್ರಾಮುಖ್ಯತೆ. ಇಸ್ರೋ ಉಪಗ್ರಹಗಳ ಮಾದರಿಗಳು, ಬಾಹ್ಯಾಕಾಶ ತಂತ್ರಜ್ಞಾನದ ಪರಿಚಯ ಮತ್ತು ವೈಮಾನಿಕ ಕ್ಷೇತ್ರಕ್ಕೆ ಸಂಬಂಧಿಸಿದ ಪ್ರದರ್ಶನಗಳು ವಿದ್ಯಾರ್ಥಿಗಳು ಹಾಗೂ ಯುವಜನರಲ್ಲಿ ಕುತೂಹಲ ಮೂಡಿಸುತ್ತಿವೆ. ಗುಬ್ಬಿಯಲ್ಲಿರುವ ಎಚ್‌ಎಎಲ್ ಘಟಕಕ್ಕೆ ಸಂಬಂಧಿಸಿದ ವೈಮಾನಿಕ ತಂತ್ರಜ್ಞಾನದ ಮಾಹಿತಿಗಳು ಜನರಿಗೆ ಹೊಸ ಅನುಭವ ನೀಡುತ್ತಿವೆ.ಇದರ ಜೊತೆಗೆ ರೋಬೋ ಪ್ರದರ್ಶನವೂ ಮಕ್ಕಳನ್ನು ಆಕರ್ಷಿಸುತ್ತಿದೆ. ಪುಸ್ತಕಗಳಲ್ಲಿ ಓದುವ ವಿಜ್ಞಾನವನ್ನು ನೈಜ ಮಾದರಿಗಳ ಮೂಲಕ ನೋಡುವ ಅವಕಾಶ ಮಕ್ಕಳಲ್ಲಿ ಪ್ರಶ್ನಿಸುವ ಮನೋಭಾವವನ್ನು ಬೆಳೆಸುತ್ತದೆ.

ವಿಜ್ಞಾನ ಎಂದರೆ ಕೇವಲ ಪಾಠಪುಸ್ತಕದ ವಿಷಯವಲ್ಲ; ಅದು ನಮ್ಮ ದೈನಂದಿನ ಬದುಕಿನ ಭಾಗ ಎಂಬ ಅರಿವು ಮೂಡಿಸಲು ಇಂತಹ ಪ್ರದರ್ಶನಗಳು ಸಹಕಾರಿಯಾಗುತ್ತವೆ.
ಜಿಲ್ಲಾಡಳಿತದ ವತಿಯಿಂದ ವಿವಿಧ ಇಲಾಖೆಗಳ ಸಹಭಾಗಿತ್ವದಲ್ಲಿ ಇಂತಹ ಪ್ರದರ್ಶನಗಳಿಗೆ ಅವಕಾಶ ಕಲ್ಪಿಸಿರುವುದು ದಸರಾ ಮಹೋತ್ಸವದ ಶೈಕ್ಷಣಿಕ ಮಹತ್ವವನ್ನು ಹೆಚ್ಚಿಸಿದೆ.
ಒಂದೆಡೆ ಪರಂಪರೆಯ ಪರಿಚಯ... ಮತ್ತೊಂದೆಡೆ ಭವಿಷ್ಯದ ತಂತ್ರಜ್ಞಾನದ ಅರಿವು...
ಈ ಎರಡನ್ನೂ ಒಟ್ಟಿಗೆ ಪರಿಚಯಿಸುವುದು ತುಮಕೂರು ದಸರಾ ಮಹೋತ್ಸವದ ವಿಶೇಷತೆಯಾಗಿದೆ.

ಮಹಿಳಾ ಶಕ್ತಿಯ ಅಬ್ಬರಕ್ಕೆ ಸಾಕ್ಷಿಯಾದ ತುಮಕೂರು ದಸರಾ!
ನವರಾತ್ರಿಯ ಸಂಭ್ರಮದ ನಡುವೆ ತುಮಕೂರು ದಸರಾ ಮಹೋತ್ಸವದ ಮಹಿಳಾ ದಸರಾ ವಿಶೇಷ ಆಕರ್ಷಣೆಯಾಗಿ ಗಮನ ಸೆಳೆಯಿತು. ದೇವಿಯ ಆರಾಧನೆಯ ಜೊತೆಗೆ ಮಹಿಳೆಯರ ಪ್ರತಿಭೆ, ಆತ್ಮವಿಶ್ವಾಸ ಮತ್ತು ಸಾಮರ್ಥ್ಯವನ್ನು ಗೌರವಿಸುವ ಉದ್ದೇಶದಿಂದ ವಿವಿಧ ಕಾರ್ಯಕ್ರಮಗಳನ್ನು ಆಯೋಜಿಸಲಾಗಿತ್ತು. ರಂಗೋಲಿ ಸ್ಪರ್ಧೆಯಿಂದ ಹಿಡಿದು ಓಟದ ಸ್ಪರ್ಧೆಯವರೆಗೆ... ಹಗ್ಗಜಗ್ಗಾಟದಿಂದ ಮ್ಯೂಸಿಕಲ್ ಚೇರ್‌ವರೆಗೆ ಹಲವು ಸ್ಪರ್ಧೆಗಳಲ್ಲಿ ಮಹಿಳೆಯರು ಉತ್ಸಾಹದಿಂದ ಪಾಲ್ಗೊಂಡರು. ಮಹಾತ್ಮ ಗಾಂಧೀಜಿ ಒಳಾಂಗಣ ಕ್ರೀಡಾಂಗಣದಲ್ಲಿ ನಡೆದ ಸ್ಪರ್ಧೆಗಳು ಮಹಿಳೆಯರ ಕ್ರೀಡಾಸ್ಫೂರ್ತಿ ಮತ್ತು ಒಗ್ಗಟ್ಟನ್ನು ಅನಾವರಣಗೊಳಿಸಿದವು. ಮಹಿಳೆಯರು ತಮ್ಮ ದೈನಂದಿನ ಜವಾಬ್ದಾರಿಗಳ ನಡುವೆಯೂ ತಮ್ಮ ಪ್ರತಿಭೆ ಪ್ರದರ್ಶಿಸಲು ಇಂತಹ ವೇದಿಕೆಗಳು ನೆರವಾಗುತ್ತವೆ.

ಮಹಿಳಾ ದಸರಾಕ್ಕೆ ಮತ್ತಷ್ಟು ಮೆರುಗು ನೀಡಿದ್ದು ಬೈಕ್ ರ್ಯಾಲಿ:
ತುಮಕೂರು ನಗರದ ಬಿಜಿಎಸ್ ವೃತ್ತದಿಂದ ಆರಂಭವಾದ ರ್ಯಾಲಿಯಲ್ಲಿ 200ಕ್ಕೂ ಹೆಚ್ಚು ಮಹಿಳೆಯರು ಪಾಲ್ಗೊಂಡಿದ್ದರು ಎಂದು ಕಾರ್ಯಕ್ರಮದ ವಿವರಗಳಲ್ಲಿ ತಿಳಿಸಲಾಗಿದೆ.
ಇದರಲ್ಲೇ ವಿಶೇಷವಾಗಿ ಗಮನ ಸೆಳೆದದ್ದು ಜಿಲ್ಲಾಧಿಕಾರಿ ಶುಭಕಲ್ಯಾಣ್ ಅವರ ಬೈಕ್ ಸವಾರಿ. ಎನ್‌ಫೀಲ್ಡ್ ಬೈಕ್‌ನಲ್ಲಿ ಗಾಗಲ್ಸ್ ಧರಿಸಿ ರ್ಯಾಲಿಯಲ್ಲಿ ಪಾಲ್ಗೊಂಡ ಜಿಲ್ಲಾಧಿಕಾರಿ ಮಹಿಳೆಯರ ಉತ್ಸಾಹಕ್ಕೆ ಸಾಥ್ ನೀಡಿದರು. ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಅಶ್ವಿಜಾ ಕೂಡ ರ್ಯಾಲಿಯಲ್ಲಿ ಭಾಗವಹಿಸಿದ್ದರು.

ನಗರದ ಪ್ರಮುಖ ರಸ್ತೆಗಳಲ್ಲಿ ಸಾಗಿದ ಬೈಕ್ ರ್ಯಾಲಿ ಮಹಿಳೆಯರು ಯಾವುದೇ ಕ್ಷೇತ್ರದಲ್ಲೂ ಹಿಂದೆ ಉಳಿಯಬಾರದು ಎಂಬ ಸಂದೇಶವನ್ನು ಸಾರಿತು.

ಇನ್ನು ಮಹಿಳೆಯರ ಗೌರವದ ಕುರಿತು ಮಾತನಾಡಿದ ಜಿಲ್ಲಾಧಿಕಾರಿ ಶುಭಕಲ್ಯಾಣ್, ಮಹಿಳೆಯರನ್ನು ಕೇವಲ ಹಬ್ಬದ ದಿನಗಳಲ್ಲಿ ಮಾತ್ರವಲ್ಲ, ಪ್ರತಿದಿನವೂ ಗೌರವದಿಂದ ಕಾಣುವ ಮನೋಭಾವ ಸಮಾಜದಲ್ಲಿ ಬೆಳೆಸಬೇಕೆಂಬ ಆಶಯವನ್ನು ವ್ಯಕ್ತಪಡಿಸಿದರು. ದೇವಿಯ ಆರಾಧನೆಯ ಜೊತೆಗೆ ಮಹಿಳೆಯರ ಘನತೆ, ಸಮಾನತೆ ಮತ್ತು ಸ್ವಾಭಿಮಾನಕ್ಕೂ ಆದ್ಯತೆ ನೀಡಬೇಕೆಂಬ ಸಂದೇಶ ಮಹಿಳಾ ದಸರಾ ಮೂಲಕ ಮೂಡಿಬಂದಿತು.

ಕಲೆಗಳ ಕಲರವದಲ್ಲಿ ತುಮಕೂರು!
ತುಮಕೂರು ದಸರಾ ಮಹೋತ್ಸವದ ಸಂಜೆಯ ಕಾರ್ಯಕ್ರಮಗಳು ಸಾಂಸ್ಕೃತಿಕ ಸಂಭ್ರಮಕ್ಕೆ ಹೊಸ ಮೆರುಗು ನೀಡುತ್ತಿವೆ. ಜೂನಿಯರ್ ಕಾಲೇಜು ಮೈದಾನ ಮತ್ತು ಸಾಂಸ್ಕೃತಿಕ ವೇದಿಕೆಯಲ್ಲಿ ವಿವಿಧ ಕಲಾಪ್ರಕಾರಗಳು ಪ್ರೇಕ್ಷಕರನ್ನು ರಂಜಿಸುತ್ತಿವೆ. ನಂದಿಧ್ವಜ, ವೀರಗಾಸೆ, ಚಂಡೆವಾದ್ಯ, ಪೂಜಾ ಕುಣಿತ ಸೇರಿದಂತೆ ಸಾಂಪ್ರದಾಯಿಕ ಕಲಾಪ್ರದರ್ಶನಗಳು ನಾಡಿನ ಪರಂಪರೆಯನ್ನು ನೆನಪಿಸುತ್ತಿವೆ. ಇನ್ನೊಂದೆಡೆ ಭರತನಾಟ್ಯ, ಜಾನಪದ ನೃತ್ಯ, ನವದುರ್ಗೆಯರ ರೂಪಕ ಮತ್ತು ಸಂಗೀತ ಕಾರ್ಯಕ್ರಮಗಳು ಪ್ರೇಕ್ಷಕರ ಮನಸೂರೆಗೊಳ್ಳುತ್ತಿವೆ.

ದಸರಾ ಮಹೋತ್ಸವದ ಮೂಲಕ ಸ್ಥಳೀಯ ಕಲಾವಿದರಿಗೆ ವೇದಿಕೆ ಕಲ್ಪಿಸಿರುವುದು ವಿಶೇಷ. ಪ್ರತಿಭೆ ಇದ್ದರೂ ಸೂಕ್ತ ವೇದಿಕೆ ಸಿಗದ ಅನೇಕ ಕಲಾವಿದರಿಗೆ ಇಂತಹ ಉತ್ಸವಗಳು ತಮ್ಮ ಸಾಮರ್ಥ್ಯವನ್ನು ಪ್ರದರ್ಶಿಸಲು ಅವಕಾಶ ನೀಡುತ್ತವೆ.

ಯುವಜನರಿಗಾಗಿ ರೂಪಿಸಿರುವ ಯುವ ದಸರಾ ಕಾರ್ಯಕ್ರಮಗಳು ಸಂಗೀತ ಮತ್ತು ಆಧುನಿಕ ಮನರಂಜನೆಯ ಮೂಲಕ ಹೊಸ ಪೀಳಿಗೆಯನ್ನು ಸೆಳೆಯುತ್ತಿವೆ. ಇದರ ನಡುವೆ ರಂಗ ದಸರಾ ಕಾರ್ಯಕ್ರಮದಲ್ಲಿ ಡಿಸಿಎಂ ಡಾ. ಜಿ. ಪರಮೇಶ್ವರ್ ತಮ್ಮ ಗಾಯನ ಪ್ರತಿಭೆಯನ್ನು ಪ್ರದರ್ಶಿಸಿರುವುದು ವಿಶೇಷವಾಗಿತ್ತು. ಪೌರಾಣಿಕ ನಾಟಕದ ವಿಜಯ ವಿಜಯ ಹಾಡನ್ನು ಹಾಡಿದ ಅವರು ಸಾಂಸ್ಕೃತಿಕ ವೇದಿಕೆಯಲ್ಲೂ ತಮ್ಮ ಆಸಕ್ತಿಯನ್ನು ತೋರಿಸಿದರು.
ರಾಜಕೀಯ ನಾಯಕರು ಮತ್ತು ಆಡಳಿತದ ಗಣ್ಯರು ಕಲಾ ಕಾರ್ಯಕ್ರಮಗಳಿಗೆ ಪ್ರೋತ್ಸಾಹ ನೀಡುವುದು ಕಲಾವಿದರಿಗೆ ಉತ್ತೇಜನ ನೀಡುವ ಸಂಗತಿಯಾಗಿದೆ. ಒಟ್ಟಿನಲ್ಲಿ, ತುಮಕೂರು ದಸರಾ ಸಾಂಪ್ರದಾಯಿಕ ಕಲೆಗಳಿಂದ ಆಧುನಿಕ ಸಂಗೀತದವರೆಗೆ ಹಲವು ಕಲಾಪ್ರಕಾರಗಳನ್ನು ಒಂದೇ ವೇದಿಕೆಯಲ್ಲಿ ಒಗ್ಗೂಡಿಸಿದೆ.

ಮಕ್ಕಳ ದಸರಾ – ಪುಟ್ಟ ಪ್ರತಿಭೆಗಳಿಗೆ ದೊಡ್ಡ ವೇದಿಕೆ!
ದಸರಾ ಅಂದರೆ ದೊಡ್ಡವರ ಸಂಭ್ರಮ ಮಾತ್ರವಲ್ಲ... ಮಕ್ಕಳ ಪ್ರತಿಭೆ ಮತ್ತು ಕನಸುಗಳಿಗೆ ವೇದಿಕೆ ಕಲ್ಪಿಸುವ ಹಬ್ಬವೂ ಹೌದು. ಈ ಆಶಯದೊಂದಿಗೆ ಆಯೋಜಿಸಲಾದ ಮಕ್ಕಳ ದಸರಾ ಉತ್ಸವವು ಪುಟ್ಟ ಪ್ರತಿಭೆಗಳ ಕಲಾಪ್ರದರ್ಶನಕ್ಕೆ ವಿಶೇಷ ಅವಕಾಶ ನೀಡಿದೆ. ಹಾಡು, ನೃತ್ಯ, ನಾಟಕ ಮತ್ತು ಮನರಂಜನೆಯ ಮೂಲಕ ಮಕ್ಕಳು ತಮ್ಮ ಪ್ರತಿಭೆಯನ್ನು ಅನಾವರಣಗೊಳಿಸುವ ವೇದಿಕೆಯಾಗಿ ಈ ಕಾರ್ಯಕ್ರಮ ರೂಪುಗೊಂಡಿದೆ. ಮಕ್ಕಳಿಗೆ ಬಾಲ್ಯದಲ್ಲೇ ವೇದಿಕೆಯ ಅನುಭವ ಸಿಕ್ಕರೆ ಅವರಲ್ಲಿ ಆತ್ಮವಿಶ್ವಾಸ ಹೆಚ್ಚುತ್ತದೆ. ತಮ್ಮಲ್ಲಿರುವ ಪ್ರತಿಭೆಯನ್ನು ಗುರುತಿಸಿಕೊಳ್ಳಲು ಮತ್ತು ಅದನ್ನು ಇನ್ನಷ್ಟು ಬೆಳೆಸಿಕೊಳ್ಳಲು ಪ್ರೇರಣೆ ಸಿಗುತ್ತದೆ.

ಡ್ರಾಮಾ ಜೂನಿಯರ್, ಡಿಕೆಡಿ ಮತ್ತು ಸರಿಗಮಪದಂತಹ ಕಾರ್ಯಕ್ರಮಗಳ ಮೂಲಕ ಗುರುತಿಸಿಕೊಂಡಿರುವ ಮಕ್ಕಳ ಕಲಾಪ್ರತಿಭೆಗಳನ್ನು ಪರಿಚಯಿಸುವ ಕಾರ್ಯಕ್ರಮಗಳೂ ದಸರಾ ಸಂಭ್ರಮಕ್ಕೆ ವಿಶೇಷ ಮೆರುಗು ನೀಡಿವೆ. ಮಕ್ಕಳನ್ನು ಕೇವಲ ಪ್ರೇಕ್ಷಕರನ್ನಾಗಿ ಇರಿಸದೆ, ಉತ್ಸವದ ಭಾಗವಾಗಿಸುವ ಪ್ರಯತ್ನವೇ ಮಕ್ಕಳ ದಸರಾದ ವಿಶೇಷತೆ ಆಗಿತ್ತು.
ಇಂತಹ ಕಾರ್ಯಕ್ರಮಗಳು ಮಕ್ಕಳಲ್ಲಿ ಸಾಂಸ್ಕೃತಿಕ ಆಸಕ್ತಿ ಬೆಳೆಸುವುದರ ಜೊತೆಗೆ ಅವರ ಕಲಾತ್ಮಕ ಬೆಳವಣಿಗೆಗೂ ನೆರವಾಗುತ್ತವೆ.

ಕುಟುಂಬ ಸಮೇತ ಕಾರ್ಯಕ್ರಮ ವೀಕ್ಷಿಸುವ ಪೋಷಕರಿಗೆ ಮಕ್ಕಳ ಪ್ರತಿಭೆಯನ್ನು ಹತ್ತಿರದಿಂದ ನೋಡುವ ಅವಕಾಶವೂ ಸಿಗುತ್ತದೆ. ತುಮಕೂರು ದಸರಾ ಮಹೋತ್ಸವದಲ್ಲಿ ಮಕ್ಕಳಿಗಾಗಿ ರೂಪಿಸಿರುವ ಕಾರ್ಯಕ್ರಮಗಳು ಮುಂದಿನ ಪೀಳಿಗೆಯ ಕಲಾವಿದರಿಗೆ ಉತ್ತೇಜನ ನೀಡುವ ಪ್ರಯತ್ನವಾಗಿ ಗಮನ ಸೆಳೆಯುತ್ತಿವೆ.

ಜಂಬೂಸವಾರಿ ಸಿದ್ಧತೆ – ದಸರಾ ವೈಭವದ ನಿರೀಕ್ಷೆ: 
ತುಮಕೂರು ದಸರಾ ಮಹೋತ್ಸವದ ಮತ್ತೊಂದು ಪ್ರಮುಖ ಆಕರ್ಷಣೆ ಜಂಬೂಸವಾರಿ. ದಸರಾ ಸಂಭ್ರಮದ ಅಂತಿಮ ಘಟ್ಟಕ್ಕೆ ವಿಶೇಷ ಮೆರುಗು ನೀಡುವ ಜಂಬೂಸವಾರಿಯನ್ನು ಕಣ್ತುಂಬಿಕೊಳ್ಳಲು ಸಾರ್ವಜನಿಕರು ಕಾತರರಾಗಿದ್ದಾರೆ. ಅಂಬಾರಿ ಹೊರಲಿರುವ ಗಂಡಾನೆ ಲಕ್ಷ್ಮಣ ಹಾಗೂ ಎರಡು ಲಕ್ಷ್ಮಿ ಆನೆಗಳು ಸಿದ್ಧತೆಯ ಭಾಗವಾಗಿ ಪ್ರಾಯೋಗಿಕ ತಾಲೀಮು ನಡೆಸಿವೆ. ನಗರದ ಪ್ರಮುಖ ರಸ್ತೆಗಳಲ್ಲಿ ಆನೆಗಳು ಗಂಭೀರ ಹೆಜ್ಜೆ ಹಾಕುತ್ತ ಸಾಗುವ ದೃಶ್ಯಗಳು ಸಾರ್ವಜನಿಕರ ಗಮನ ಸೆಳೆಯುತ್ತಿವೆ. ಬಿಜಿಎಸ್ ವೃತ್ತದಿಂದ ಆರಂಭವಾಗಿ ಸ್ವಾತಂತ್ರ್ಯ ಚೌಕ, ಕೋಟೆ ಆಂಜನೇಯಸ್ವಾಮಿ ವೃತ್ತ, ಅಮಾನಿಕೆರೆ ರಸ್ತೆ, ಕೋತಿತೋಪು ವೃತ್ತ, ಶ್ರೀ ಶಿವಕುಮಾರ ಸ್ವಾಮೀಜಿ ವೃತ್ತ ಮತ್ತು ಬಿ.ಎಚ್. ರಸ್ತೆಯ ಮೂಲಕ ಸಾಗುವ ಮಾರ್ಗದಲ್ಲಿ ತಾಲೀಮು ನಡೆಸಲಾಗಿದೆ.ಜಂಬೂಸವಾರಿ ಎಂದರೆ ಕೇವಲ ಆನೆಗಳ ಮೆರವಣಿಗೆಯಲ್ಲ; ಅದು ನಮ್ಮ ಪರಂಪರೆ, ಧಾರ್ಮಿಕ ನಂಬಿಕೆ ಮತ್ತು ಸಾಂಸ್ಕೃತಿಕ ವೈಭವದ ಪ್ರತೀಕ.ಈ ಹಿನ್ನೆಲೆಯಲ್ಲಿ ಮೆರವಣಿಗೆಯ ಸಿದ್ಧತೆಗಳು, ಮಾರ್ಗದ ವ್ಯವಸ್ಥೆ ಮತ್ತು ಸಾರ್ವಜನಿಕರ ಅನುಕೂಲಕ್ಕೆ ಸಂಬಂಧಿಸಿದಂತೆ ಸಂಬಂಧಪಟ್ಟ ಇಲಾಖೆಗಳ ಸಮನ್ವಯ ಮಹತ್ವ ಪಡೆಯುತ್ತದೆ.ಜಿಲ್ಲಾಡಳಿತದ ಮೇಲ್ವಿಚಾರಣೆಯಲ್ಲಿ ನಡೆಯುವ ಸಿದ್ಧತೆಗಳು ಉತ್ಸವದ ಸುಗಮ ನಿರ್ವಹಣೆಗೆ ಅಗತ್ಯವಾದ ಭಾಗವಾಗಿವೆ. ದಸರಾ ಮಹೋತ್ಸವದ ಅಂತಿಮ ದಿನದ ಸಂಭ್ರಮವನ್ನು ಮತ್ತಷ್ಟು ಹೆಚ್ಚಿಸಲಿರುವ ಜಂಬೂಸವಾರಿ ತುಮಕೂರಿನ ಜನರಿಗೆ ಮರೆಯಲಾಗದ ಅನುಭವ ನೀಡುವ ನಿರೀಕ್ಷೆಯಿದೆ.

ತುಮಕೂರು ದಸರಾ – ಸಂಸ್ಕೃತಿ, ಸಂಭ್ರಮ, ಸಮೃದ್ಧಿಯ ಹಬ್ಬ!
ಧಾರ್ಮಿಕ ವೈಭವದಿಂದ ಆರಂಭವಾದ ತುಮಕೂರು ದಸರಾ... ಸಾಂಸ್ಕೃತಿಕ ಸಂಭ್ರಮದ ಮೂಲಕ ಜನಮನ ಸೆಳೆಯುತ್ತಿದೆ. ಒಂದೆಡೆ ತಾಯಿ ಚಾಮುಂಡೇಶ್ವರಿಯ ಆರಾಧನೆ... ಮತ್ತೊಂದೆಡೆ ಕಲಾವಿದರ ಕಲಾಪ್ರದರ್ಶನ. ಒಂದೆಡೆ ವಿಜ್ಞಾನ ಮತ್ತು ತಂತ್ರಜ್ಞಾನದ ಪರಿಚಯ... ಮತ್ತೊಂದೆಡೆ ಫಲಪುಷ್ಪ ಪ್ರದರ್ಶನದ ಸೌಂದರ್ಯ. ಮಹಿಳಾ ದಸರಾ ಮೂಲಕ ಮಹಿಳಾ ಶಕ್ತಿಗೆ ಪ್ರೋತ್ಸಾಹ... ಮಕ್ಕಳ ದಸರಾ ಮೂಲಕ ಪುಟ್ಟ ಪ್ರತಿಭೆಗಳಿಗೆ ವೇದಿಕೆ. ಹೆಲಿ ರೈಡ್ ಮೂಲಕ ಹೊಸ ಅನುಭವ... ಜಂಬೂಸವಾರಿ ಮೂಲಕ ನಾಡಿನ ಪರಂಪರೆಯ ವೈಭವ.

ಹೀಗೆ ಹಲವು ಆಯಾಮಗಳನ್ನು ಒಗ್ಗೂಡಿಸಿಕೊಂಡಿರುವ ತುಮಕೂರು ದಸರಾ ಮಹೋತ್ಸವ ಜಿಲ್ಲೆಯ ಸಾಂಸ್ಕೃತಿಕ ಗುರುತನ್ನು ಮತ್ತಷ್ಟು ಬಲಪಡಿಸುವ ಪ್ರಯತ್ನವಾಗಿ ಮೂಡಿಬಂದಿದೆ.

ಈ ಉತ್ಸವಕ್ಕೆ ರಾಜಕೀಯ ನಾಯಕತ್ವದ ಮಾರ್ಗದರ್ಶನ, ಜಿಲ್ಲಾಡಳಿತದ ಯೋಜನೆ ಮತ್ತು ಸಮನ್ವಯ, ವಿವಿಧ ಇಲಾಖೆಗಳ ಸಹಕಾರ, ಕಲಾವಿದರ ಪರಿಶ್ರಮ ಹಾಗೂ ಸಾರ್ವಜನಿಕರ ಭಾಗವಹಿಸುವಿಕೆ ಬೆನ್ನೆಲುಬಾಗಿದೆ.

ಡಿಸಿಎಂ ಡಾ. ಜಿ. ಪರಮೇಶ್ವರ್ ಅವರ ಮುಂದಾಳತ್ವದಲ್ಲಿ ತುಮಕೂರು ದಸರಾವನ್ನು ಜನರಿಗೆ ಹತ್ತಿರವಾಗಿಸುವ ಪ್ರಯತ್ನ ನಡೆಯುತ್ತಿದ್ದರೆ, ಜಿಲ್ಲಾಧಿಕಾರಿ ಶುಭಕಲ್ಯಾಣ್ ನೇತೃತ್ವದ ಜಿಲ್ಲಾಡಳಿತವು ಕಾರ್ಯಕ್ರಮಗಳ ಆಯೋಜನೆ ಮತ್ತು ನಿರ್ವಹಣೆಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿದೆ.

ದಸರಾ ಎಂಬುದು ಕೇವಲ ಹಬ್ಬದ ಆಚರಣೆಯಲ್ಲ... ಅದು ನಮ್ಮ ನಾಡಿನ ಗುರುತು, ನಮ್ಮ ಸಂಸ್ಕೃತಿಯ ಹೆಮ್ಮೆ ಮತ್ತು ಮುಂದಿನ ಪೀಳಿಗೆಗೆ ನೀಡುವ ಪರಂಪರೆಯ ಕೊಡುಗೆ. ತುಮಕೂರು ದಸರಾ ಇದೇ ಆಶಯದೊಂದಿಗೆ ಜನರ ಸಂಭ್ರಮವಾಗಿ ಮುಂದುವರಿಯಲಿ. ತಾಯಿ ಚಾಮುಂಡೇಶ್ವರಿ ನಾಡಿನೆಲ್ಲೆಡೆ ಶಾಂತಿ, ನೆಮ್ಮದಿ, ಸಮೃದ್ಧಿ ಮತ್ತು ಸುಭಿಕ್ಷೆ ಕರುಣಿಸಲಿ, ತುಮಕೂರು ದಸರಾ ಮಹೋತ್ಸವ ಜನಮಾನಸದಲ್ಲಿ ಅಚ್ಚಳಿಯುವಂತೆ ಉಳಿಯಲಿ.