ರೀಲ್ಸ್ ಲೋಕದ ಚೆಲುವೆ ಶವವಾಗಿ ಪತ್ತೆ : ಅತ್ತ ಗಂಡ ವಶಕ್ಕೆ, ಇತ್ತ ಕಂದನ ಆಕ್ರಂದನ.. ಏನಾಯ್ತು..?

ತುಮಕೂರು : ಅಮ್ಮ.. ಅಮ್ಮ ಬೇಕು ಅಂತ ಎದೆ ಒಡೆಯುವ ಹಾಗೆ ಅಳುತ್ತಿರೋ ಈ ಕಂದಮ್ಮನಿಗೆ ಏನು ತಾನೇ ಗೊತ್ತು ನನ್ನಮ್ಮ ಈ ಭೂಮಿ ಮೇಲೆ ಇಲ್ಲ ಅಂತ. ಕೇವಲ ಎರಡೂವರೆ ವರ್ಷದ ಆ ಹಸುಗೂಸಿನ ಅಳು, ಕರುಳು ಚುರುಕೆನ್ನುವಂತೆ ಮಾಡಿದೆ. ಅಮ್ಮ ಬೇಕು, ಅಮ್ಮ ಬೇಕು ಅಂತ ಆ ಮಗು ಕಣ್ಣೀರು ಹಾಕುತ್ತಿದ್ದರೆ, ನೋಡುವವರ ಎದೆಯೂ ಒಡೆದು ಹೋಗುತ್ತಿತ್ತು. ಹೌದು. ಮದುವೆಯಾಗಿ ಕೆಲವೇ ವರ್ಷಗಳಾಗಿವೆ, ಆದ್ರೆ ಇವತ್ತು ಆ ಸಂಸಾರ ಮಾತ್ರ ಕಣ್ಣೀರಿನ ಕಡಲಲ್ಲಿ ಮುಳುಗಿಹೋಗಿದೆ. ತುಮಕೂರು ತಾಲೂಕಿನ ಯಲ್ಲಾಪುರದಲ್ಲಿ ನಡೆದ ಈ ಹೃದಯ ವಿದ್ರಾವಕ ಘಟನೆಯ ಕಂಪ್ಲೀಟ್ ಸ್ಟೋರಿ ಇಲ್ಲಿದೆ ನೋಡಿ‌‌..

ಈ ಚೆಂದುಳ್ಳಿ ಚೆಲುವೆಯ ಹೆಸರು ಸುಷ್ಮಿತಾ ಅಂತ ವಯಸ್ಸಿನ್ನೂ 24.. ಚಿಕ್ಕವಯಸ್ಸಿಗೆ ಸಂಸಾರದ ಜವಾಬ್ದಾರಿ ಹೊತ್ತವಳು ಇವತ್ತು ನೆನಪು ಮಾತ್ರ ಆಗಿದ್ದಾಳೆ.. ನಿನ್ನೆ ಮೊನ್ನೆ ತನ್ಕ ರೀಲ್ಸ್ ಹಾಡಿ ನಲಿಯುತ್ತಿದ್ದ ಸುಷ್ಮಿತಾ ಇವತ್ತು ಒಬ್ಬಂಟಿಯಾಗಿ ಶವಾಗಾರದಲ್ಲಿ ಮಲಗಿದ್ದಾಳೆ.. ಚೆನ್ನಾಗಿದ್ದ ಹುಡುಗಿ ಹೀಗ್ ಮಾಡ್ಕೊಂಡ್ ಬಿಟ್ಲಲ್ಲ ಎಂಬ ನೋವು ಒಂದ್ಕಡೆಯಾದ್ರೆ ತನ್ನಮ್ಮನನ್ನ ಕಳೆದ್ಕೊಂಡ ಆ ಎರಡೂವರೆ ವರ್ಷದ ಕಂದಮ್ಮ ಕಣ್ಣೀರು ನೆರೆದಿದ್ದವರ ಹೃದಯವೇ ಒಡೆಯುವಂತ್ತಿತ್ತು..

ಹೌದು.. ​ತುಮಕೂರು ತಾಲೂಕಿನ ಯಲ್ಲಾಪುರ ಗ್ರಾಮದಲ್ಲಿ ಈ ಘಟನೆ ನಡೆದಿದೆ‌‌.. ಸುಷ್ಮಿತಾ ಶವ ನೇಣು ಬಿಗಿದ ಸ್ಥಿತಿಯಲ್ಲಿ ಪತ್ತೆಯಾಗಿದೆ. ಮದುವೆಯಾದ ದಿನದಿಂದಲೂ ಆ ದಂಪತಿ ನಡುವೆ ಕಲಹಗಳು ನಡೆಯುತ್ತಲೇ ಇದ್ದವಂತೆ. ಹಲವು ಬಾರಿ ಹಿರಿಯರ ಸಮಕ್ಷಮದಲ್ಲಿ ರಾಜಿಸಂಧಾನಗಳು ಕೂಡ ನಡೆದಿದ್ದವು. ಆದ್ರೀಗ, ಎಲ್ಲವೂ ಸರಿಹೋಗುತ್ತದೆ ಅಂದುಕೊಳ್ಳುವಷ್ಟರಲ್ಲಿಯೇ ಸುಷ್ಮಿತಾ ಸಾವಿನ ಮನೆ ಬಾಗಿಲು ತಟ್ಟಿದ್ದಾಳೆ..

​ಸಾವಿನ ಹಿಂದೆ  ಹಲವು ಅನುಮಾನಗಳು ದಟ್ಟವಾಗಿ ಆವರಿಸಿವೆ. ಮೊನ್ನೆ ಸಂಜೆಯಷ್ಟೇ ಗಂಡನ ಜೊತೆಯಲ್ಲಿ ಮನೆಗೆ ಬಂದಿದ್ದ ಸುಷ್ಮಿತಾಳ ಕಿವಿಯಲ್ಲಿ ಹಾಗೂ ತೊಡೆಯಲ್ಲಿ ರಕ್ತವಿತ್ತು ಅಂತ ಕುಟುಂಬಸ್ಥರು ಗಂಭೀರ ಆರೋಪ ಮಾಡಿದ್ದಾರೆ. ಇದು ಆತ್ಮಹತ್ಯೆಯಲ್ಲ, ಬದಲಿಗೆ ಕೊಲೆ ಮಾಡಿ ಬಳಿಕ ನೇಣುಹಾಕಿದ್ದಾರೆ ಅಂತ ಮೃತಳ ಕುಟುಂಬಸ್ಥರು ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ. ಇತ್ತೀಚೆಗಷ್ಟೇ ತನ್ನ ಖುಷಿಯ ಲೋಕದಲ್ಲಿ ರೀಲ್ಸ್ ಗಳಿಗೆ ಹೆಜ್ಜೆ ಹಾಕಿದ್ದ ಆ ಹೆಣ್ಣುಮಗಳು, ಇಂದು ಇಹಲೋಕವನ್ನೇ ತ್ಯಜಿಸಿರುವುದು ವಿಧಿ ವಿಪರ್ಯಾಸವೇ ಸರಿ..

​​ಸದ್ಯ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುಷ್ಮಿತಾಳ ಪತಿ ಶ್ರೀನಿವಾಸ್‌ನನ್ನ ಪೊಲೀಸರು ವಶಕ್ಕೆ ಪಡೆದಿದ್ದಾರೆ. ಖಾಸಗಿ ಕಂಪನಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದ ಶ್ರೀನಿವಾಸ್, ಪೊಲೀಸರ ವಿಚಾರಣೆ ವೇಳೆ ಹಲವು ವಿಚಾರ ತಿಳಿಸಿದ್ದಾನೆ.. ನಾವು ತಮಾಷೆಗಾಗಿ ಜಗಳ ಆಡಿದ್ವಿ, ಬಳಿಕ ನಾನು ಈಚೆ ಬಂದೆ, ಮತ್ತೆ ಮನೆಗೆ ಹೋಗುವ ವೇಳೆಗೆ ಅವಳು ಆತ್ಮಹತ್ಯೆ ಮಾಡಿಕೊಂಡಿದ್ದಳು ಎಂದು ಸಮರ್ಥನೆ ನೀಡಿದ್ದಾನೆ. ಆದರೆ ಈ ಸಾವಿನ ಹಿಂದೆ ಅಸಲಿ ಸತ್ಯ ಏನು ಅನ್ನೋದು ಪೊಲೀಸ್ ತನಿಖೆಯಿಂದಷ್ಟೇ ಹೊರಬರಬೇಕಿದೆ.

​ಈ ಎಲ್ಲದರ ನಡುವೆ ಅಪ್ಪನೂ ಇಲ್ಲ, ಅಮ್ಮನೂ ಇಲ್ಲದೆ ಆ ಎರಡೂವರೆ ವರ್ಷದ ಹಸುಗೂಸು ಮಾತ್ರ ಅನಾಥವಾಗಿದೆ. ಅಮ್ಮ ಬೇಕು... ಅಮ್ಮ ಬೇಕು... ಅಂತ ಆ ಮಗು ಅಂಗಲಾಚುತ್ತಿರುವುದನ್ನು ನೋಡಿದರೆ, ಕಲ್ಲು ಹೃದಯದವರ ಕಣ್ಣಲ್ಲೂ ಕಣ್ಣೀರು ಹರಿಯುತ್ತದೆ. ತಾಯಿಯ ಪ್ರೀತಿಯಿಂದ ವಂಚಿತವಾಗಿರುವ ಆ ಕಂದಮ್ಮನ ಗೋಳು ಮಾತ್ರ ನೋಡುತ್ತಿದ್ದರೆ ಮೈ ಜುಮ್ಮೆನಿಸುತ್ತದೆ. ಸದ್ಯ ಈ ಸಂಬಂಧ ತುಮಕೂರು ಮಹಿಳಾ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರೆದಿದೆ..