ಕರ್ನಾಟಕವನ್ನು 'ಚಿನ್ನದ ನಾಡು, ಶ್ರೀಗಂಧದ ಬೀಡು' ಅಂತ ಕರೆಯುವುದೇಕೆ.? ಇದು ಭವ್ಯ ನೈಸರ್ಗಿಕ ಸಿರಿಯ ಕಥೆ

Land of Gold and Sandalwood : ಕನ್ನಡ ನಾಡು ಚಿನ್ನದ ನಾಡು, ಶ್ರೀಗಂಧದ ಬೀಡು" ಎಂಬ ಸಾಲುಗಳನ್ನು ನಾವೆಲ್ಲರೂ ಬಾಲ್ಯದಿಂದಲೂ ಕೇಳುತ್ತಾ ಬೆಳೆದಿದ್ದೇವೆ. ಆದರೆ, ಇದು ಕೇವಲ ಕವಿಗಳ ಉತ್ಪ್ರೇಕ್ಷೆಯೇ ಅಥವಾ ಬರಿ ಮುಖಸ್ತುತಿಯೇ ಎಂಬ ಸಂಶಯ ಇಂದಿನ ಯುವ ಪೀಳಿಗೆಯಲ್ಲಿ ಮೂಡುವುದು ಸ್ವಾಭಾವಿಕ. ಪ್ರಕೃತಿ ನಮಗೆ ನೀಡಿದ ಕೊಡುಗೆ ಮತ್ತು ಐತಿಹಾಸಿಕ ಸಾಕ್ಷ್ಯಗಳನ್ನು ಸೂಕ್ಷ್ಮವಾಗಿ ಗಮನಿಸಿದರೆ, ಈ ಮಾತುಗಳು ಕೇವಲ ಅಲಂಕಾರಿಕ ಸಾಲುಗಳಲ್ಲ; ಬದಲಿಗೆ ಶತಮಾನಗಳ ಗಟ್ಟಿ ಇತಿಹಾಸ ಮತ್ತು ನೈಸರ್ಗಿಕ ಸಮೃದ್ಧಿಯ ಪ್ರತಿಫಲ ಎಂಬುದು ಸ್ಪಷ್ಟವಾಗುತ್ತದೆ. ಭಾರತದ ಇತರ ರಾಜ್ಯಗಳಿಗೆ ಹೋಲಿಸಿದರೆ ಕರ್ನಾಟಕಕ್ಕೆ ಅತ್ಯಂತ ವಿಶಿಷ್ಟ ಹಾಗೂ ಗೌರವಾನ್ವಿತ ಸ್ಥಾನ ತಂದುಕೊಟ್ಟಿದ್ದು ಇಲ್ಲಿನ ನೈಸರ್ಗಿಕ ಚಿನ್ನ ಮತ್ತು ಶ್ರೀಗಂಧದ ಸಿರಿಯಾಗಿದೆ.

5೦೦೦ ವರ್ಷಗಳ ಇತಿಹಾಸ: ಕರ್ನಾಟಕ ಮತ್ತು ಚಿನ್ನದ ನಡುವಿನ ಸಂಪರ್ಕ ನಿನ್ನೆ-ಮೊನ್ನೆಯದಲ್ಲ. ಭಾರತದಲ್ಲಿ ಚಿನ್ನದ ಬಳಕೆಯ ಮೊಟ್ಟಮೊದಲ ಇತಿಹಾಸ ಸಿಂಧೂ ಬಯಲಿನ ನಾಗರೀಕತೆಯ (ಕ್ರಿ.ಪೂ. 3300 ರಿಂದ ಕ್ರಿ.ಪೂ. 1300) ಕಾಲಘಟ್ಟದಲ್ಲಿ ಸಿಗುತ್ತದೆ. ಪುರಾತತ್ವ ಇಲಾಖೆಯು ಹರಪ್ಪ ಮತ್ತು ಮೊಹೆಂಜೊದಾರೊ ಪ್ರದೇಶಗಳಲ್ಲಿ ಕೈಗೊಂಡ ಉತ್ಖನನದ ಸಮಯದಲ್ಲಿ ಅತ್ಯಂತ ಪುರಾತನವಾದ ಚಿನ್ನದ ಆಭರಣಗಳು ದೊರೆತಿದ್ದವು.

ವಿಜ್ಞಾನಿಗಳು ಆ ಆಭರಣಗಳನ್ನು ಸಂಶೋಧನೆಗೆ ಒಳಪಡಿಸಿದಾಗ ಮತ್ತು ಅದರಲ್ಲಿರುವ ಕಲ್ಮಶದ ಪ್ರಮಾಣವನ್ನು ಅಳೆದಾಗ, ಆ ಚಿನ್ನದಲ್ಲಿ ಶೇಕಡಾ 11 ರಷ್ಟು ಬೆಳ್ಳಿಯ ಪ್ರಮಾಣವಿರುವುದು ದೃಢಪಟ್ಟಿತು. ಅಷ್ಟು ಪ್ರಮಾಣದ ಬೆಳ್ಳಿಯ ಮಿಶ್ರಣವಿರುವ ನೈಸರ್ಗಿಕ ಚಿನ್ನ ದೊರೆಯುವುದು ಪ್ರಪಂಚದಲ್ಲೇ ನಮ್ಮ ಕರ್ನಾಟಕದ ಕೋಲಾರ ಚಿನ್ನದ ಗಣಿ (KGF) ಯಲ್ಲಿ ಮಾತ್ರ.

ಈ ಸಂಶೋಧನೆಯು ಪ್ರಮುಖ ಸತ್ಯವೊಂದನ್ನು ಜಗತ್ತಿಗೆ ಸಾರಿದೆ. ಇಂದಿಗೆ ಸರಿಸುಮಾರು 5000 ವರ್ಷಗಳ ಹಿಂದೆಯೇ ಕನ್ನಡ ಸೀಮೆಯ ಜನರಿಗೆ ಚಿನ್ನದ ಗಣಿಗಾರಿಕೆ ಮಾಡುವುದು ಹಾಗೂ ಅದರಿಂದ ಆಭರಣಗಳನ್ನು ತಯಾರಿಸುವ ಕಲೆ ಕರತಲಾಮಲಕವಾಗಿತ್ತು. ಕೋಲಾರದ ಈ ಗಣಿಯನ್ನು ಗುಪ್ತರು, ತಲಕಾಡು ಗಂಗರು, ಚೋಳರು, ಹೊಯ್ಸಳರು, ವಿಜಯನಗರದ ಸಾಮ್ರಾಜ್ಯ, ಮೈಸೂರಿನ ಒಡೆಯರು ಹಾಗೂ ಬ್ರಿಟಿಷರು ಹೀಗೆ ನಿರಂತರವಾಗಿ ಬಳಸಿಕೊಂಡಿದ್ದಾರೆ. ಇಷ್ಟೊಂದು ಸುದೀರ್ಘ ಅವಧಿಗೆ ಮಾನವ ಇತಿಹಾಸದಲ್ಲಿ ಬಳಕೆಯಾದ ಮತ್ತೊಂದು ಚಿನ್ನದ ಗಣಿ ಜಗತ್ತಿನಲ್ಲಿ ಸಿಗುವುದು ದುಸ್ತರ.

800 ಟನ್ ಚಿನ್ನ ಲೂಟಿ : ಬ್ರಿಟಿಷರು ಭಾರತವನ್ನು ಆಳಿದ 150 ವರ್ಷಗಳ ಅವಧಿಯಲ್ಲಿ ಕೋಲಾರ ಚಿನ್ನದ ಗಣಿಯಿಂದ ಹೊರತೆಗೆದ ಚಿನ್ನದ ಪ್ರಮಾಣ ಎಷ್ಟು ಗೊತ್ತೇ? ಬರೋಬ್ಬರಿ 800 ಟನ್. ಇದರ ಇಂದಿನ ಮೌಲ್ಯ ಸುಮಾರು ಮೂರು ಲಕ್ಷ ಕೋಟಿ ರೂಪಾಯಿಗಳಿಗಿಂತಲೂ ಹೆಚ್ಚು. ಕೇವಲ 150 ವರ್ಷಗಳಲ್ಲಿ ಬ್ರಿಟಿಷರೇ ಇಷ್ಟೊಂದು ಅಪಾರ ಪ್ರಮಾಣದ ಚಿನ್ನವನ್ನು ಹೊರತೆಗೆದಿರುವಾಗ, ಸಿಂಧೂ ನಾಗರೀಕತೆಯ ಕಾಲದಿಂದಲೂ ಇಲ್ಲಿಂದ ಎಷ್ಟು ಲಕ್ಷ ಟನ್ ಚಿನ್ನ ಹೊರಬಂದಿರಬಹುದು ಎಂಬುದು ಊಹೆಗೂ ಸಿಗದ ಸಂಗತಿ. ಕೋಲಾರದಿಂದ ಹೋದ ಚಿನ್ನವು ಪ್ರಪಂಚದ ನಾನಾ ಮೂಲೆಗಳಲ್ಲಿ ಆಭರಣವಾಗಿ, ಬಿಸ್ಕತ್ ಆಗಿ ಅಥವಾ ಔಷಧಿಯಾಗಿ ಹಂಚಿಹೋಗಿದೆ.

ಇನ್ನು ರಾಯಚೂರು ಜಿಲ್ಲೆಯಲ್ಲಿರುವ ಹಟ್ಟಿ ಚಿನ್ನದ ಗಣಿಯೂ ಸಹ ಮೌರ್ಯ ಸಾಮ್ರಾಟ ಅಶೋಕನ ಕಾಲದಿಂದಲೂ (ಕ್ರಿ.ಪೂ.) ಚಾಲ್ತಿಯಲ್ಲಿದೆ. ಐತಿಹಾಸಿಕ ಆಧಾರಗಳ ಪ್ರಕಾರ, ಕೋಲಾರ ಮತ್ತು ಹಟ್ಟಿ ಗಣಿಗಳು ಸತತ 5000 ವರ್ಷಗಳ ಕಾಲ ಭಾರತದ ಶೇಕಡಾ 85 ರಿಂದ 90 ರಷ್ಟು ಚಿನ್ನದ ಬೇಡಿಕೆಯನ್ನು ಒಂಟಿಯಾಗಿ ಪೂರೈಸುತ್ತಿದ್ದವು. ಆಂಧ್ರಪ್ರದೇಶದ ರಾಮಗಿರಿ, ಜಾರ್ಖಂಡ್‌ನ ಲಾವಾ ಮತ್ತು ಇತ್ತೀಚೆಗೆ ಉತ್ತರಪ್ರದೇಶದ ಸೋನ್‌ಭದ್ರಾದಲ್ಲಿ ಚಿನ್ನದ ನಿಕ್ಷೇಪಗಳು ಪತ್ತೆಯಾಗಿದ್ದರೂ, ಕೋಲಾರದ ಸಂಪತ್ತಿಗೆ ಅವು ಸರಿಸಾಟಿಯಾಗಲಾರವು. ಇಂದಿಗೂ ಭೂಗರ್ಭ ವಿಜ್ಞಾನಿಗಳ ಪ್ರಕಾರ ಬೆಂಗಳೂರು, ಹಾಸನ ಮತ್ತು ಶಿವಮೊಗ್ಗದ ಶಿಕಾರಿಪುರ ಪ್ರದೇಶಗಳಲ್ಲಿ ಅಪಾರ ಪ್ರಮಾಣದ ಚಿನ್ನದ ನಿಕ್ಷೇಪಗಳು ಭೂಮಿಯ ಅಡಿಯಲ್ಲಡಗಿವೆಯಂತೆ.

ಶ್ರೀಗಂಧದ ಕಂಪು: ಪ್ರಪಂಚದ ಎರಡನೇ ಅತ್ಯಂತ ದುಬಾರಿ ಮರ
ಕರ್ನಾಟಕವನ್ನು 'ಚಿನ್ನದ ನಾಡು' ಎನ್ನಲು ಸಾಕಷ್ಟು ಸಾಕ್ಷ್ಯಗಳಿದ್ದರೆ, 'ಶ್ರೀಗಂಧದ ಬೀಡು' ಎನ್ನಲು ಮತ್ತೊಂದು ಬಲಿಷ್ಠ ಕಾರಣವಿದೆ. ವಿಶ್ವದಲ್ಲೇ ಅತ್ಯಂತ ದುಬಾರಿ ಮರ 'ಆಫ್ರಿಕನ್ ಬ್ಲಾಕ್ ವುಡ್' ಆದರೆ, **ಎರಡನೇ ಅತ್ಯಂತ ದುಬಾರಿ ಮರ**ವೇ ನಮ್ಮ ಶ್ರೀಗಂಧ! ತನ್ನ ಸುವಾಸನೆಯುಕ್ತ ಕಂಪನ್ನು ದಶಕಗಳ ಕಾಲ ಹಿಡಿದಿಟ್ಟುಕೊಳ್ಳುವ ಅದ್ಭುತ ಶಕ್ತಿ ಶ್ರೀಗಂಧಕ್ಕಿದೆ.

ಕನ್ನಡಿಗರ ಸಂಸ್ಕೃತಿಯಲ್ಲಿ ಶ್ರೀಗಂಧ ಹಾಸುಹೊಕ್ಕಾಗಿದೆ. ಸಾಂಪ್ರದಾಯಿಕ ಉತ್ಸವಗಳು, ಪೂಜಾ ವಿಧಿವಿಧಾನಗಳು, ಆಯುರ್ವೇದ, ಸುಗಂಧ ದ್ರವ್ಯ ತಯಾರಿಕೆ ಮತ್ತು ಚಿಕಿತ್ಸಾ ಪದ್ಧತಿಗಳಲ್ಲಿ ಶ್ರೀಗಂಧವನ್ನು ಸಾವಿರಾರು ವರ್ಷಗಳಿಂದ ಬಳಸಲಾಗುತ್ತಿದೆ.

ಶ್ರೀಗಂಧವು ಭಾರತದ ಮೈಸೂರು, ಪಶ್ಚಿಮ ಘಟ್ಟಗಳು, ಸೇಲಂ, ಚಿತ್ತೂರು ಪ್ರದೇಶಗಳ ಜೊತೆಗೆ ಶ್ರೀಲಂಕಾ, ಆಸ್ಟ್ರೇಲಿಯಾ, ಇಂಡೋನೇಷ್ಯಾಗಳಲ್ಲೂ ಬೆಳೆಯುತ್ತದೆ. ಆದರೆ, ಮೈಸೂರು ಪ್ರಾಂತ್ಯದಲ್ಲಿ ಬೆಳೆಯುವ ಶ್ರೀಗಂಧಕ್ಕೆ ಇರುವ ನೈಸರ್ಗಿಕ ಸುಗಂಧ ಮತ್ತು ಶ್ರೇಷ್ಠ ಗುಣಮಟ್ಟ ಪ್ರಪಂಚದ ಇನ್ನಾವ ಮೂಲೆಯ ಗಂಧಕ್ಕೂ ಇಲ್ಲ. ಮೈಸೂರು ಶ್ರೀಗಂಧಕ್ಕೆ ಸಿಕ್ಕ ಜಾಗತಿಕ ಮನ್ನಣೆಯಿಂದಾಗಿಯೇ ಕರ್ನಾಟಕವು ಶ್ರೀಗಂಧದ ಉತ್ಪಾದನೆಯಲ್ಲಿ ವಿಶ್ವದಲ್ಲೇ ಅಗ್ರಸ್ಥಾನದಲ್ಲಿದೆ. ಈ ಕಾರಣಕ್ಕಾಗಿ ಶ್ರೀಗಂಧವನ್ನು ಕರ್ನಾಟಕದ 'ರಾಜ್ಯ ವೃಕ್ಷ' ಎಂದೂ ಘೋಷಿಸಲಾಗಿದೆ.

ಹೀಗಾಗಿ, "ಕನ್ನಡ ನಾಡು ಚಿನ್ನದ ನಾಡು, ಶ್ರೀಗಂಧದ ಬೀಡು" ಎನ್ನುವುದು ಬರೀ ಕವಿಗಳ ಪ್ರಾಸಬದ್ಧ ಸಾಲುಗಳಲ್ಲ. ಅದು ನಮ್ಮ ಮಣ್ಣಿನ ಗುಣ, ನಮ್ಮ ಹಿರಿಯರ ತಂತ್ರಜ್ಞಾನ ಮತ್ತು ನೈಸರ್ಗಿಕ ವೈಭವಕ್ಕೆ ಹಿಡಿದ ಕೈಗನ್ನಡಿ. ಈ ಭವ್ಯ ಪರಂಪರೆಯನ್ನು ಇಂದಿನ ಕನ್ನಡದ ಮಕ್ಕಳು ಅರಿತು ಹೆಮ್ಮೆಪಡುವುದು ಅತ್ಯಗತ್ಯ.