ಪರಮಾಣು ಪರೀಕ್ಷೆಗಳಿಂದ ನಡುಗಿದ ಪರ್ವತ : ಮೌಂಟ್ ಮಂಟಾಪ್ ಸುತ್ತ 1,399 ಭೂಕಂಪನ ದಾಖಲು

North Korea Nuclear Test effects : ಜಗತ್ತಿಗೆ ತನ್ನ ಸೈನಿಕ ಶಕ್ತಿಯನ್ನು ಪ್ರದರ್ಶಿಸಲು ಉತ್ತರ ಕೊರಿಯಾದ ಸರ್ವಾಧಿಕಾರಿ ಕಿಮ್ ಜಾಂಗ್ ಉನ್ ನಡೆಸಿದ ಸರಣಿ ಭೂಗತ ಪರಮಾಣು ಪರೀಕ್ಷೆಗಳು, ಈಗ ಆ ದೇಶದ ನೆಲಕ್ಕೇ ಭಾರೀ ಕಂಟಕವಾಗಿ ಪರಿಣಮಿಸಿವೆ. 'ಸೈನ್ಸ್' (Science) ಜರ್ನಲ್‌ನಲ್ಲಿ ಪ್ರಕಟವಾಗಿರುವ ನೂತನ ಅಧ್ಯಯನದ ಪ್ರಕಾರ, ಮೌಂಟ್ ಮಂಟಾಪ್ ಪರ್ವತದ ಅಡಿಯಲ್ಲಿರುವ ಪುಂಗ್ಯೆ-ರಿ ತಾಣದಲ್ಲಿ ನಡೆದ ಸರಣಿ ಅಣುಸ್ಫೋಟಗಳು ಭೂಪದರದ ಒತ್ತಡದ ಸಮತೋಲನವನ್ನು ಶಾಶ್ವತವಾಗಿ ಭಂಗಗೊಳಿಸಿವೆ.. ಈ ಕುರಿತ ಒಂದು ವರದಿ ಇಲ್ಲಿದೆ..

ಪರಮಾಣು ಬಾಂಬ್‌ಗಳನ್ನಿಟ್ಟು ಜಗತ್ತನ್ನೇ ಬೆದರಿಸುತ್ತಿದ್ದ ಉತ್ತರ ಕೊರಿಯಾದ ಹುಚ್ಚಾಟ ಈಗ ಅದೇ ದೇಶದ ನೆಲಕ್ಕೆ ಅಪಾಯ ತಂದಿದೆಯಾ..? ಕಿಮ್ ಜಾಂಗ್ ಉನ್‌ ಆಡಳಿತ ನಡೆಸಿದ ಸರಣಿ ಪರಮಾಣು ಪರೀಕ್ಷೆಗಳಿಂದ ಪರ್ವತದೊಳಗಿನ ಭೂಪದರವೇ ಬದಲಾಗಿರುವ ಆಘಾತಕಾರಿ ಸಂಗತಿ ಬೆಳಕಿಗೆ ಬಂದಿದೆ. ಉತ್ತರ ಕೊರಿಯಾದ ಮೌಂಟ್ ಮಂಟಾಪ್‌ ಸುತ್ತಮುತ್ತ ಬರೋಬ್ಬರಿ 1,399 ಭೂಕಂಪನಗಳು ದಾಖಲಾಗಿವೆ. ಅದರಲ್ಲೂ 2017ರ ಕೊನೆಯ ಹಾಗೂ ಅತ್ಯಂತ ಶಕ್ತಿಶಾಲಿ ಪರಮಾಣು ಪರೀಕ್ಷೆಯ ಬಳಿಕ ಭೂಕಂಪನಗಳ ಸಂಖ್ಯೆ ಮತ್ತು ತೀವ್ರತೆ ಕಡಿಮೆಯಾಗುವ ಬದಲು ವರ್ಷದಿಂದ ವರ್ಷಕ್ಕೆ ಹೆಚ್ಚಾಗಿದೆ. ವಿಜ್ಞಾನಿಗಳ ಪ್ರಕಾರ, ಸ್ಫೋಟಗಳಿಂದ ಭೂಮಿಯ ಮೇಲಿನ ಬಂಡೆ ಪದರದಲ್ಲಿ ಬಿರುಕುಗಳು ಹೆಚ್ಚಾಗಿ, ಮೊದಲೇ ದುರ್ಬಲವಾಗಿದ್ದ ದೋಷರೇಖೆಗಳು ಮತ್ತೆ ಚಲಿಸಲು ಆರಂಭಿಸಿರಬಹುದು. ಹಾಗಾದ್ರೆ ಕಿಮ್ ಜಾಂಗ್ ಉನ್‌ ನಡೆಸಿದ ಪರಮಾಣು ಪರೀಕ್ಷೆಗಳು ಪರ್ವತದ ಕೆಳಗೆ ಎಂಥಾ ಭೂವೈಜ್ಞಾನಿಕ ಬದಲಾವಣೆ ಮಾಡಿವೆ..? ಮುಂದೊಂದು ದಿನ ಇದೇ ಪ್ರದೇಶದಲ್ಲಿ ಮತ್ತೊಂದು ದೊಡ್ಡ ಭೂಕಂಪ ಸಂಭವಿಸುವ ಅಪಾಯ ಇದೆಯಾ..? ಸಂಪೂರ್ಣ ವರದಿ ಇಲ್ಲಿದೆ..

ಉತ್ತರ ಕೊರಿಯಾದ ಪ್ರಮುಖ ಪರಮಾಣು ಪರೀಕ್ಷಾ ತಾಣವಾಗಿರುವ ಪುಂಗ್ಯೆ-ರಿ, ಮೌಂಟ್ ಮಂಟಾಪ್ ಪರ್ವತದ ಕೆಳಭಾಗದಲ್ಲಿದೆ. 2006ರಿಂದ 2017ರವರೆಗೆ ಉತ್ತರ ಕೊರಿಯಾ ಇಲ್ಲಿ ಒಟ್ಟು ಆರು ಭೂಗತ ಪರಮಾಣು ಪರೀಕ್ಷೆಗಳನ್ನು ನಡೆಸಿದೆ. ಇದೀಗ Science ಜರ್ನಲ್‌ನಲ್ಲಿ ಪ್ರಕಟವಾಗಿರುವ ಹೊಸ ಅಧ್ಯಯನದಲ್ಲಿ, 2008ರಿಂದ 2025ರವರೆಗಿನ ಭೂಕಂಪನ ದಾಖಲೆಗಳನ್ನು ವಿಜ್ಞಾನಿಗಳು ವಿಶ್ಲೇಷಿಸಿದ್ದಾರೆ. ಚೀನಾ ಮತ್ತು ದಕ್ಷಿಣ ಕೊರಿಯಾದ ಭೂಕಂಪನ ಕೇಂದ್ರಗಳಿಂದ ಸಂಗ್ರಹಿಸಿದ ಮಾಹಿತಿಯಲ್ಲಿ ಮೌಂಟ್ ಮಂಟಾಪ್ ಸುತ್ತಮುತ್ತ 1,399 ಸ್ಥಳೀಯ ಭೂಕಂಪನಗಳು ಪತ್ತೆಯಾಗಿವೆ. ಈ ಪ್ರದೇಶದಲ್ಲಿ 2017ರ ಕೊನೆಯ ಪರಮಾಣು ಪರೀಕ್ಷೆಯ ಬಳಿಕ ಭೂಕಂಪನ ಚಟುವಟಿಕೆ ವಿಶೇಷವಾಗಿ ಹೆಚ್ಚಿರುವುದು ಅಧ್ಯಯನದಲ್ಲಿ ಕಂಡುಬಂದಿದೆ.

2017ರ ಸೆಪ್ಟೆಂಬರ್ 3ರಂದು ಉತ್ತರ ಕೊರಿಯಾ ತನ್ನ ಆರನೇ ಮತ್ತು ಅತ್ಯಂತ ದೊಡ್ಡ ಪರಮಾಣು ಪರೀಕ್ಷೆ ನಡೆಸಿತ್ತು. ಈ ಸ್ಫೋಟದಿಂದ ಸುಮಾರು 6.3 ತೀವ್ರತೆಯ ಭೂಕಂಪನ ದಾಖಲಾಗಿತ್ತು. ಸ್ಫೋಟದ ಸಾಮರ್ಥ್ಯವನ್ನು ವಿಜ್ಞಾನಿಗಳು ಸುಮಾರು 100ರಿಂದ 250 ಕಿಲೋಟನ್‌ಗಳಷ್ಟು ಎಂದು ಅಂದಾಜಿಸಿದ್ದಾರೆ. ಉಪಗ್ರಹ ಮಾಹಿತಿಯಲ್ಲೂ ಮೌಂಟ್ ಮಂಟಾಪ್ ಶಿಖರದ ಸುತ್ತ ಭಾರೀ ಭೂವೈಜ್ಞಾನಿಕ ಬದಲಾವಣೆ ಕಂಡುಬಂದಿತ್ತು. ಆದರೆ ಈ ಅಧ್ಯಯನದಲ್ಲಿ ಪತ್ತೆಯಾದ ಅಚ್ಚರಿಯ ಅಂಶವೇನೆಂದರೆ, ಸ್ಫೋಟದ ಬಳಿಕ ಭೂಕಂಪನ ಚಟುವಟಿಕೆ ಕೆಲವೇ ದಿನಗಳಲ್ಲಿ ಕಡಿಮೆಯಾಗಲಿಲ್ಲ. ಸುಮಾರು ಮೂರು ವಾರಗಳ ಬಳಿಕ ಭೂಕಂಪನಗಳು ಹೆಚ್ಚಾಗಲು ಆರಂಭಿಸಿ, 2025ರವರೆಗೂ ಅವುಗಳ ಸಂಖ್ಯೆ ಮತ್ತು ತೀವ್ರತೆ ಏರಿಕೆಯಾಗಿದೆ.

ಸಾಮಾನ್ಯವಾಗಿ ಭೂಗತ ಪರಮಾಣು ಸ್ಫೋಟದ ಬಳಿಕ ಉಂಟಾಗುವ ಭೂಕಂಪನ ಚಟುವಟಿಕೆ ಕೆಲವು ದಿನಗಳು ಅಥವಾ ವಾರಗಳ ನಂತರ ನಿಧಾನವಾಗಿ ಕಡಿಮೆಯಾಗುತ್ತದೆ. ಆದರೆ ಮೌಂಟ್ ಮಂಟಾಪ್‌ನಲ್ಲಿ ಇದಕ್ಕೆ ತದ್ವಿರುದ್ಧ ಬೆಳವಣಿಗೆ ಕಂಡುಬಂದಿದೆ. ಸಂಶೋಧಕರು ಪತ್ತೆಹಚ್ಚಿದ ಭೂಕಂಪನಗಳ ಬಹುಪಾಲು ಎರಡು ಪ್ರಮುಖ ದೋಷರೇಖೆಗಳ ಉದ್ದಕ್ಕೂ ಕೇಂದ್ರೀಕೃತವಾಗಿವೆ. ವಿಜ್ಞಾನಿಗಳ ವಿವರಣೆ ಪ್ರಕಾರ, ಪದೇಪದೇ ನಡೆಸಿದ ಭೂಗತ ಪರಮಾಣು ಸ್ಫೋಟಗಳು ಮೇಲ್ಮೈ ಸಮೀಪದ ಭೂಪದರವನ್ನು ಹಾನಿಗೊಳಿಸಿ, ಅದರೊಳಗಿನ ಒತ್ತಡದ ಸಮತೋಲನವನ್ನು ಬದಲಿಸಿರಬಹುದು. ಇದರಿಂದ ಈಗಾಗಲೇ ದುರ್ಬಲ ಸ್ಥಿತಿಯಲ್ಲಿದ್ದ ದೋಷರೇಖೆಗಳು ನಿಧಾನವಾಗಿ ಮರುಸಕ್ರಿಯಗೊಂಡಿರಬಹುದು.

ಈಗ ವಿಜ್ಞಾನಿಗಳ ಮುಂದಿರುವ ದೊಡ್ಡ ಪ್ರಶ್ನೆ, ಮೌಂಟ್ ಮಂಟಾಪ್ ಸುತ್ತಲಿನ ಭೂಪದರ ಮುಂದೆ ಹೇಗೆ ವರ್ತಿಸಲಿದೆ ಅನ್ನೋದು. ಅಧ್ಯಯನದಲ್ಲಿ ಗುರುತಿಸಲಾದ ಫಾಲ್ಟ್ ವಲಯ ಸುಮಾರು 24 ಕಿಲೋಮೀಟರ್ ವ್ಯಾಪಿಸಿದೆ. ಈ ದೋಷರೇಖೆಯ ಒಂದು ಭಾಗ ಏಕಕಾಲದಲ್ಲಿ ಚಲಿಸಿದರೆ ಸುಮಾರು 6.4 ತೀವ್ರತೆಯ ಭೂಕಂಪ ಸಂಭವಿಸುವ ಸಾಧ್ಯತೆಯನ್ನು ಸಂಶೋಧಕರು ಲೆಕ್ಕ ಹಾಕಿದ್ದಾರೆ. ಆದರೆ ಇದು ಮುಂದಿನ ಭೂಕಂಪ ಖಚಿತವಾಗಿ ಸಂಭವಿಸಲಿದೆ ಎಂಬ ಮುನ್ಸೂಚನೆಯಲ್ಲ. ಬದಲಾಗಿ, ಈಗಾಗಲೇ ಬದಲಾಗಿರುವ ಭೂಪದರದಲ್ಲಿ ದೊಡ್ಡ ಪ್ರಮಾಣದ ಕಂಪನ ಸಂಭವಿಸುವ ಭೌಗೋಳಿಕ ಸಾಧ್ಯತೆಯನ್ನು ಈ ಅಧ್ಯಯನ ಸೂಚಿಸುತ್ತದೆ.

ಈ ಅಧ್ಯಯನ ಉತ್ತರ ಕೊರಿಯಾದ ಪರಮಾಣು ಪರೀಕ್ಷೆಗಳ ಪರಿಣಾಮ ಕೇವಲ ಸ್ಫೋಟ ನಡೆದ ಕ್ಷಣಕ್ಕೆ ಸೀಮಿತವಾಗಿಲ್ಲ ಎಂಬ ಸಾಧ್ಯತೆಯನ್ನು ಮುಂದಿಟ್ಟಿದೆ. ಭೂಗತ ಸ್ಫೋಟಗಳಿಂದ ಸೃಷ್ಟಿಯಾದ ಭೂಕಂಪನ ಚಟುವಟಿಕೆ ವರ್ಷಗಳ ಬಳಿಕವೂ ಮುಂದುವರಿಯಬಹುದು ಎಂಬುದು ಅಣು ಪರೀಕ್ಷೆಗಳ ಮೇಲ್ವಿಚಾರಣೆಗೆ ಹೊಸ ಸವಾಲು. ಅದರಲ್ಲೂ ಹಲವು ವರ್ಷಗಳ ನಂತರ ಉಂಟಾಗುವ ಭೂಕಂಪನಗಳು ನೈಸರ್ಗಿಕ ಭೂಕಂಪಗಳಂತೆ ಕಾಣಬಹುದಾದ ಕಾರಣ, ಭವಿಷ್ಯದಲ್ಲಿ ಹೊಸ ಪರಮಾಣು ಪರೀಕ್ಷೆ ನಡೆದಿದೆಯೇ ಅಥವಾ ಅದು ಭೂವೈಜ್ಞಾನಿಕ ಚಟುವಟಿಕೆಯೇ ಎಂಬುದನ್ನು ಗುರುತಿಸುವುದು ಇನ್ನಷ್ಟು ಸಂಕೀರ್ಣವಾಗಬಹುದು ಎಂದು ಸಂಶೋಧಕರು ಹೇಳಿದ್ದಾರೆ.

ಒಟ್ಟಾರೆಯಾಗಿ, ಉತ್ತರ ಕೊರಿಯಾದ ಪರಮಾಣು ಪರೀಕ್ಷೆಗಳ ಬೆಚ್ಚಿಬೀಳಿಸುವ ಪರಿಣಾಮ ಈಗ ಪರ್ವತದೊಳಗಿನ ಭೂಪದರದಲ್ಲೂ ಕಾಣಿಸಿಕೊಂಡಿದೆ. 2008ರಿಂದ 2025ರವರೆಗೆ ಮೌಂಟ್ ಮಂಟಾಪ್ ಸುತ್ತಮುತ್ತ 1,399 ಭೂಕಂಪನಗಳು ಪತ್ತೆಯಾಗಿದ್ದು, 2017ರ ಅತ್ಯಂತ ದೊಡ್ಡ ಪರಮಾಣು ಸ್ಫೋಟದ ಬಳಿಕ ಭೂಕಂಪನ ಚಟುವಟಿಕೆ ಮತ್ತಷ್ಟು ಹೆಚ್ಚಾಗಿದೆ. ವಿಜ್ಞಾನಿಗಳ ಪ್ರಕಾರ, ಪದೇಪದೇ ನಡೆದ ಸ್ಫೋಟಗಳು ಭೂಪದರದ ಒತ್ತಡವನ್ನು ಬದಲಿಸಿ ಸುಪ್ತ ದೋಷರೇಖೆಗಳನ್ನು ಮರುಸಕ್ರಿಯಗೊಳಿಸಿರಬಹುದು. ಅಂದರೆ ಕಿಮ್ ಜಾಂಗ್ ಉನ್‌ನ ಪರಮಾಣು ಶಸ್ತ್ರಾಸ್ತ್ರಗಳ ಪರೀಕ್ಷೆಯ ಪರಿಣಾಮ ಸ್ಫೋಟದ ಕ್ಷಣಕ್ಕೆ ಮಾತ್ರ ಸೀಮಿತವಾಗಿಲ್ಲ; ಅದರ ಭೂವೈಜ್ಞಾನಿಕ ಪರಿಣಾಮ ಹಲವು ವರ್ಷಗಳ ಬಳಿಕವೂ ಮುಂದುವರಿಯುತ್ತಿರುವ ಸಾಧ್ಯತೆ ಈಗ ಅಧ್ಯಯನದಿಂದ ಬೆಳಕಿಗೆ ಬಂದಿದೆ.

ಒಟ್ಟಾರೆಯಾಗಿ.. ಉತ್ತರ ಕೊರಿಯಾ ನಡೆಸಿದ ಭೂಗತ ಪರಮಾಣು ಪರೀಕ್ಷೆಗಳ ಪರಿಣಾಮವು ಕೇವಲ ಸ್ಫೋಟ ಸಂಭವಿಸಿದ ಕ್ಷಣಕ್ಕೆ ಸೀಮಿತವಾಗಿಲ್ಲ. 2006ರಿಂದ 2017ರವರೆಗೆ ಮೌಂಟ್ ಮಂಟಾಪ್ (ಪುಂಗ್ಯೆ-ರಿ) ಪ್ರದೇಶದಲ್ಲಿ ನಡೆಸಿದ ಸರಣಿ ಸ್ಫೋಟಗಳು ಭೂಮಿಯ ಒಳಗಿನ ಒತ್ತಡದ ಸಮತೋಲನವನ್ನು ಭಂಗಗೊಳಿಸಿದ್ದು, ಸುಪ್ತವಾಗಿದ್ದ ದೋಷರೇಖೆಗಳನ್ನು (fault lines) ಮರುಸಕ್ರಿಯಗೊಳಿಸಿವೆ. ಕೃತಕ ಸ್ಫೋಟಗಳು ನೈಸರ್ಗಿಕ ದೋಷರೇಖೆಗಳನ್ನು ಸಕ್ರಿಯಗೊಳಿಸಿರುವುದರಿಂದ, ಭವಿಷ್ಯದಲ್ಲಿ ಸಂಭವಿಸುವ ಕಂಪನಗಳು ನೈಸರ್ಗಿಕವೇ ಅಥವಾ ಹೊಸ ಪರಮಾಣು ಪರೀಕ್ಷೆಯಿಂದ ಉಂಟಾಗಿದ್ದೇ ಎಂಬುದನ್ನು ಪತ್ತೆಹಚ್ಚುವುದು ವಿಜ್ಞಾನಿಗಳಿಗೆ ಅತ್ಯಂತ ಸಂಕೀರ್ಣ ಸವಾಲಾಗಿ ಪರಿಣಮಿಸಿದೆ.