ಬಾಕ್ಸ್‌ ಆಫೀಸ್‌ನಲ್ಲಿ ‘ರಾಮಾಯಣ’ ಅಬ್ಬರ ಶುರು : ಮುಂಗಡ ಬುಕಿಂಗ್‌ನಲ್ಲೇ 73 ಕೋಟಿ ಗಳಿಕೆ

ಭಾರತೀಯ ಚಿತ್ರರಂಗದ ಬಹುನಿರೀಕ್ಷಿತ ಸಿನಿಮಾಗಳಲ್ಲಿ ಒಂದಾದ ನಿತೇಶ್‌ ತಿವಾರಿ ನಿರ್ದೇಶನದ ‘ರಾಮಾಯಣ: ಭಾಗ 1’ ಬಿಡುಗಡೆಗೂ ಮುನ್ನವೇ ಬಾಕ್ಸ್‌ ಆಫೀಸ್‌ನಲ್ಲಿ ಸದ್ದು ಮಾಡುತ್ತಿದೆ. ಬಾಲಿವುಡ್‌ ನಟ ರಣಬೀರ್‌ ಕಪೂರ್‌ ಹಾಗೂ ರಾಕಿಂಗ್‌ ಸ್ಟಾರ್‌ ಯಶ್‌ ಅಭಿನಯದ ಈ ಸಿನಿಮಾ ನವೆಂಬರ್‌ 5ರಂದು ತೆರೆಗೆ ಬರಲು ಸಜ್ಜಾಗಿದೆ. ಆದರೆ ಸಿನಿಮಾ ಬಿಡುಗಡೆಯಾಗುವ ಮುನ್ನವೇ ಮುಂಗಡ ಟಿಕೆಟ್‌ ಬುಕಿಂಗ್‌ನಲ್ಲಿ ಭರ್ಜರಿ ಪ್ರತಿಕ್ರಿಯೆ ವ್ಯಕ್ತವಾಗಿದ್ದು, ಭಾರತ ಮಾತ್ರವಲ್ಲದೆ ವಿದೇಶಗಳಲ್ಲೂ ಚಿತ್ರದ ಬಗ್ಗೆ ನಿರೀಕ್ಷೆ ಹೆಚ್ಚಾಗಿದೆ.

ವರದಿಗಳ ಪ್ರಕಾರ, ಭಾರತದಲ್ಲಿ ಐದು ಪ್ರದರ್ಶನ ದಿನಾಂಕಗಳ ಮುಂಗಡ ಬುಕಿಂಗ್‌ನಿಂದ ಚಿತ್ರವು ಒಟ್ಟು 73.40 ಕೋಟಿ ರೂ. ಗಳಿಸಿದೆ. ಇದರಲ್ಲಿ ಬ್ಲಾಕ್‌ ಸೀಟ್‌ಗಳನ್ನು ಹೊರತುಪಡಿಸಿದರೆ 58.57 ಕೋಟಿ ರೂ. ಮೌಲ್ಯದ ಟಿಕೆಟ್‌ಗಳು ಮಾರಾಟವಾಗಿವೆ. ಪ್ರೀಮಿಯರ್‌ ದಿನದ ಮುಂಗಡ ಬುಕಿಂಗ್‌ ಒಂದರಲ್ಲೇ 32.41 ಕೋಟಿ ರೂ. ದಾಖಲಾಗಿದೆ. ದೇಶಾದ್ಯಂತ ಇದುವರೆಗೆ 60,124 ಪ್ರದರ್ಶನಗಳಿಗೆ 18.67 ಲಕ್ಷ ಟಿಕೆಟ್‌ಗಳು ಮಾರಾಟವಾಗಿವೆ ಎಂದು ವರದಿಯಾಗಿದೆ.

ಮುಂಗಡ ಬುಕಿಂಗ್‌ನಲ್ಲಿ ಕರ್ನಾಟಕವೇ ಟಾಪ್: 
‘ರಾಮಾಯಣ’ ಚಿತ್ರದ ಮೊದಲ ದಿನದ ಮುಂಗಡ ಟಿಕೆಟ್‌ ಬುಕಿಂಗ್‌ ಗಳಿಕೆಯಲ್ಲಿ ಕರ್ನಾಟಕ ದೇಶದಲ್ಲೇ ಮೊದಲ ಸ್ಥಾನ ಪಡೆದುಕೊಂಡಿದೆ. ರಾಜ್ಯದಲ್ಲಿ 5.90 ಕೋಟಿ ರೂ. ಮೌಲ್ಯದ ಟಿಕೆಟ್‌ಗಳು ಬುಕ್‌ ಆಗಿವೆ. 5.59 ಕೋಟಿ ರೂ. ಗಳಿಕೆಯೊಂದಿಗೆ ಮಹಾರಾಷ್ಟ್ರ ಎರಡನೇ ಸ್ಥಾನದಲ್ಲಿದ್ದರೆ, 4.34 ಕೋಟಿ ರೂ. ಗಳಿಕೆಯೊಂದಿಗೆ ದೆಹಲಿ ಮೂರನೇ ಸ್ಥಾನದಲ್ಲಿದೆ. ತೆಲಂಗಾಣ 2.59 ಕೋಟಿ ರೂ. ಗಳಿಕೆಯೊಂದಿಗೆ ನಾಲ್ಕನೇ ಸ್ಥಾನದಲ್ಲಿದೆ.
ಕರ್ನಾಟಕದಲ್ಲಿ ಚಿತ್ರದ ಬಗ್ಗೆ ಅಭಿಮಾನಿಗಳಲ್ಲಿ ಇರುವ ನಿರೀಕ್ಷೆ ಮತ್ತು ರಾಕಿಂಗ್‌ಸ್ಟಾರ್‌ ಯಶ್‌ ಅವರ ಜನಪ್ರಿಯತೆ ಈ ಭರ್ಜರಿ ಬುಕಿಂಗ್‌ಗೆ ಪ್ರಮುಖ ಕಾರಣವಾಗಿರಬಹುದು.

ಹಿಂದಿ ಆವೃತ್ತಿಗೆ ಭರ್ಜರಿ ಬೇಡಿಕೆ: 
ಭಾಷಾವಾರು ಮುಂಗಡ ಬುಕಿಂಗ್‌ ಗಮನಿಸಿದರೆ ಹಿಂದಿ ಆವೃತ್ತಿ ಮುಂಚೂಣಿಯಲ್ಲಿದೆ. ಮೊದಲ ದಿನದ ಮುಂಗಡ ಬುಕಿಂಗ್‌ನಲ್ಲಿ ಹಿಂದಿ ಆವೃತ್ತಿಯೊಂದರಿಂದಲೇ 25.41 ಕೋಟಿ ರೂ. ಮೌಲ್ಯದ ಟಿಕೆಟ್‌ಗಳು ಮಾರಾಟವಾಗಿವೆ. ಇದು ಒಟ್ಟು ಮೊದಲ ದಿನದ ಬುಕಿಂಗ್‌ನ ಸುಮಾರು ಶೇ.78ರಷ್ಟಾಗಿದೆ.

ಇನ್ನು ಕನ್ನಡ ಆವೃತ್ತಿಯು 3.62 ಕೋಟಿ ರೂ. ಮೌಲ್ಯದ ಟಿಕೆಟ್‌ ಮಾರಾಟದೊಂದಿಗೆ ಎರಡನೇ ಸ್ಥಾನದಲ್ಲಿದೆ. ತೆಲುಗು ಆವೃತ್ತಿಯಿಂದ 2.45 ಕೋಟಿ ರೂ., ತಮಿಳು ಆವೃತ್ತಿಯಿಂದ 70.57 ಲಕ್ಷ ರೂ. ಹಾಗೂ ಮಲಯಾಳಂ ಆವೃತ್ತಿಯಿಂದ 22.04 ಲಕ್ಷ ರೂ. ಮೌಲ್ಯದ ಟಿಕೆಟ್‌ಗಳು ಬುಕ್‌ ಆಗಿವೆ.

3D, IMAX ಪ್ರದರ್ಶನಗಳಿಗೂ ಭರ್ಜರಿ ಬೇಡಿಕೆ:
ಚಿತ್ರದ 3D ಮತ್ತು ಪ್ರೀಮಿಯಂ ಪ್ರದರ್ಶನಗಳಿಗೂ ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ಹಿಂದಿ 3D ಆವೃತ್ತಿಯು 7,973 ಪ್ರದರ್ಶನಗಳ ಮೂಲಕ 14.47 ಕೋಟಿ ರೂ. ಮೌಲ್ಯದ ಮುಂಗಡ ಟಿಕೆಟ್‌ ಬುಕಿಂಗ್‌ ದಾಖಲಿಸಿದೆ. ಇದು ಮೊದಲ ದಿನದ ಒಟ್ಟು ಮುಂಗಡ ಬುಕಿಂಗ್‌ನ ಸುಮಾರು ಶೇ.45ರಷ್ಟಾಗಿದೆ.

ಇದಲ್ಲದೆ IMAX, 4DX, Dolby, ICE ಮತ್ತು EPIQ ಸೇರಿದಂತೆ ವಿವಿಧ ಪ್ರೀಮಿಯಂ ಪ್ರದರ್ಶನಗಳಿಂದ 5.32 ಕೋಟಿ ರೂ. ಮೌಲ್ಯದ ಟಿಕೆಟ್‌ಗಳು ಮಾರಾಟವಾಗಿವೆ. ಇದು ಮೊದಲ ದಿನದ ಒಟ್ಟು ಮುಂಗಡ ಬುಕಿಂಗ್‌ನ ಶೇ.16ರಷ್ಟಿದೆ.

ವಿದೇಶಗಳಲ್ಲೂ ‘ರಾಮಾಯಣ’ ಕ್ರೇಜ್‌:
ಭಾರತದ ಹೊರಗೂ ‘ರಾಮಾಯಣ’ ಚಿತ್ರದ ಟಿಕೆಟ್‌ಗಳಿಗೆ ಬೇಡಿಕೆ ಹೆಚ್ಚಾಗಿದೆ. ಸ್ಯಾಕ್ನಿಲ್ಕ್‌ ನವೆಂಬರ್‌ 2ರಂದು ಪ್ರಕಟಿಸಿದ ವರದಿಯ ಪ್ರಕಾರ, ನವೆಂಬರ್‌ 4ರಂದು ನಡೆಯಲಿರುವ ಪೂರ್ವವೀಕ್ಷಣೆ ಪ್ರದರ್ಶನಗಳಿಗಾಗಿ ವಿದೇಶಗಳಲ್ಲಿ 51 ಸಾವಿರಕ್ಕೂ ಹೆಚ್ಚು ಟಿಕೆಟ್‌ಗಳು ಮಾರಾಟವಾಗಿವೆ.

ಉತ್ತರ ಅಮೆರಿಕಾದಲ್ಲಿ ನವೆಂಬರ್‌ 4ರಿಂದ 8ರವರೆಗಿನ ಮೊದಲ ಐದು ದಿನಗಳ ಪ್ರದರ್ಶನಗಳಿಗೆ 1.40 ಲಕ್ಷ ಟಿಕೆಟ್‌ಗಳು ಮಾರಾಟವಾಗಿವೆ ಎಂದು ವರದಿ ತಿಳಿಸಿದೆ. ಈ ಮುಂಗಡ ಮಾರಾಟದ ಆಧಾರದ ಮೇಲೆ ಉತ್ತರ ಅಮೆರಿಕಾದಲ್ಲಿ ಮೊದಲ ಐದು ದಿನಗಳಲ್ಲಿ ಸುಮಾರು 13ರಿಂದ 14 ಮಿಲಿಯನ್‌ ಡಾಲರ್‌ ಗಳಿಕೆ ನಿರೀಕ್ಷಿಸಲಾಗಿದೆ ಎಂದು ಅಂದಾಜಿಸಲಾಗಿದೆ.

ಒಟ್ಟಿನಲ್ಲಿ, ರಣಬೀರ್‌ ಕಪೂರ್‌ ಮತ್ತು ಯಶ್‌ ಅಭಿನಯದ ‘ರಾಮಾಯಣ: ಭಾಗ 1’ ಸಿನಿಮಾ ಬಿಡುಗಡೆಯ ಮುನ್ನವೇ ಮುಂಗಡ ಟಿಕೆಟ್‌ ಬುಕಿಂಗ್‌ನಲ್ಲಿ ಭರ್ಜರಿ ಸದ್ದು ಮಾಡುತ್ತಿದೆ. ಅದರಲ್ಲೂ ಕರ್ನಾಟಕ ಮೊದಲ ಸ್ಥಾನದಲ್ಲಿರುವುದು ಕನ್ನಡಿಗರಲ್ಲಿನ ಚಿತ್ರದ ನಿರೀಕ್ಷೆಯನ್ನು ಎತ್ತಿ ತೋರಿಸಿದೆ. ಈ ಆರಂಭಿಕ ಪ್ರತಿಕ್ರಿಯೆ ಬಿಡುಗಡೆಯ ಬಳಿಕ ಬಾಕ್ಸ್‌ ಆಫೀಸ್‌ನಲ್ಲಿ ಯಾವ ರೀತಿಯ ದಾಖಲೆ ಸೃಷ್ಟಿಸಲಿದೆ ಎಂಬ ಕುತೂಹಲ ಈಗ ಹೆಚ್ಚಾಗಿದೆ.