ಒಟಿಟಿಯಲ್ಲಿ 'ಅಯ್ಯನ ಮನೆ 2' ಅಬ್ಬರ: ಜೀ5ನಲ್ಲಿ ಹೊಸ ದಾಖಲೆ

ಕನ್ನಡ ಒಟಿಟಿ ಲೋಕದಲ್ಲಿ ಸಸ್ಪೆನ್ಸ್‌, ಥ್ರಿಲ್ಲರ್‌ ಸರಣಿಯೊಂದು ಹೊಸ ಇತಿಹಾಸ ಸೃಷ್ಟಿಸಿದೆ. ಜೀ 5 ಒಟಿಟಿ ವೇದಿಕೆಯಲ್ಲಿ ಪ್ರಸಾರವಾಗುತ್ತಿರುವ ಜನಪ್ರಿಯ ವೆಬ್‌ ಸರಣಿ ‘ಅಯ್ಯನ ಮನೆ 2’ ಬರೋಬ್ಬರಿ 100 ಮಿಲಿಯನ್‌ ಅಂದರೆ 10 ಕೋಟಿ ವೀಕ್ಷಣೆ ನಿಮಿಷಗಳನ್ನು ಪೂರೈಸುವ ಮೂಲಕ ಮಹತ್ವದ ಮೈಲಿಗಲ್ಲು ಸ್ಥಾಪಿಸಿದೆ. ಈ ಸಾಧನೆಯೊಂದಿಗೆ ಕರ್ನಾಟಕದಾದ್ಯಂತ ಪ್ರೇಕ್ಷಕರ ಗಮನ ಸೆಳೆದಿರುವ ಸರಣಿಯು, ಕನ್ನಡದ ಸ್ಥಳೀಯ ಕಥೆಗಳಿಗೆ ಒಟಿಟಿ ವೇದಿಕೆಯಲ್ಲಿ ದೊಡ್ಡ ಮಟ್ಟದ ಬೇಡಿಕೆ ಇದೆ ಎಂಬುದನ್ನು ಮತ್ತೊಮ್ಮೆ ಸಾಬೀತುಪಡಿಸಿದೆ.

ರೋಚಕ ಕಥಾಹಂದರ, ಭಯಾನಕ ಸನ್ನಿವೇಶಗಳು, ನಿಗೂಢ ಘಟನೆಗಳು ಹಾಗೂ ಊಹೆಗೂ ನಿಲುಕದ ತಿರುವುಗಳು ‘ಅಯ್ಯನ ಮನೆ 2’ ಸರಣಿಯ ಪ್ರಮುಖ ಆಕರ್ಷಣೆಗಳಾಗಿವೆ. ಆರಂಭದಿಂದ ಕೊನೆಯವರೆಗೂ ವೀಕ್ಷಕರಲ್ಲಿ ಕುತೂಹಲವನ್ನು ಉಳಿಸಿಕೊಳ್ಳುವಂತೆ ಕಥೆಯನ್ನು ಹೆಣೆಯಲಾಗಿದೆ. ಕೇವಲ ಸಸ್ಪೆನ್ಸ್‌ ಮತ್ತು ಥ್ರಿಲ್ಲರ್‌ಗೆ  ಸೀಮಿತವಾಗದೆ, ಕೌಟುಂಬಿಕ ಭಾವನೆಗಳು ಮತ್ತು ಮಾನವೀಯ ಸಂಬಂಧಗಳನ್ನೂ ಕಥೆಯಲ್ಲಿ ಸಮರ್ಥವಾಗಿ ಬೆರೆಸಿರುವುದು ಸರಣಿಯ ಜನಪ್ರಿಯತೆಗೆ ಮತ್ತಷ್ಟು ಬಲ ನೀಡಿದೆ.

ನಿಗೂಢ ಮನೆಯೊಳಗೆ ತೆರೆದುಕೊಳ್ಳುವ ರಹಸ್ಯ: 
ಪುರಾತನ ಹಿರಿಯರ ಮನೆ ಒಂದರ ಹಿನ್ನೆಲೆಯಲ್ಲೇ ಸರಣಿಯ ಕಥೆ ಸಾಗುತ್ತದೆ. ಹಲವು ವರ್ಷಗಳಿಂದ ಮುಚ್ಚಿ ಹೋಗಿರುವ ರಹಸ್ಯಗಳು, ಅಸಹಜ ಘಟನೆಗಳು ಹಾಗೂ ಭಯ ಹುಟ್ಟಿಸುವ ಅನುಭವಗಳ ಸುತ್ತ ಕಥೆ ತೆರೆದುಕೊಳ್ಳುತ್ತದೆ. ವಿಚಿತ್ರ ಕನಸುಗಳು ಮತ್ತು ನಿಗೂಢ ಸನ್ನಿವೇಶಗಳ ನಡುವೆ ಭಯವನ್ನು ಮೆಟ್ಟಿನಿಂತು ನಾಗಲಾಂಬಿಕೆಯ ಸಾವಿನ ಹಿಂದಿನ ಸತ್ಯವನ್ನು ಪತ್ತೆ ಹಚ್ಚಲು ಪ್ರಯತ್ನಿಸುವ ಪೂರ್ಣಿ ಪಾತ್ರ ಸರಣಿಯ ಪ್ರಮುಖ ಕೇಂದ್ರ ಬಿಂದುವಾಗಿದೆ.

ನಂಬಿಕೆ ಮತ್ತು ಭಯದ ನಡುವಿನ ತೆಳುವಾದ ಗೆರೆಯನ್ನು ಅನ್ವೇಷಿಸುತ್ತಾ ಸಾಗುವ ಕಥೆ, ವೀಕ್ಷಕರನ್ನು ನಿರಂತರ ಕುತೂಹಲದಲ್ಲಿರಿಸುತ್ತದೆ. ಪ್ರತಿ ಹಂತದಲ್ಲೂ ಎದುರಾಗುವ ಹೊಸ ತಿರುವುಗಳು ಮುಂದೇನಾಗಬಹುದು ಎಂಬ ಪ್ರಶ್ನೆಯನ್ನು ಹುಟ್ಟು ಹಾಕುತ್ತವೆ. ಈ ಕಾರಣದಿಂದಲೇ ‘ಅಯ್ಯನ ಮನೆ 2’ ಕನ್ನಡ ಪ್ರೇಕ್ಷಕರ ಮೆಚ್ಚುಗೆಗಳಿಸುವಲ್ಲಿ ಯಶಸ್ವಿಯಾಗಿದೆ.

ಸರಣಿಯ ಯಶಸ್ಸಿನ ಕುರಿತು ಮಾತನಾಡಿರುವ ಜೀ ಕನ್ನಡ ಹಾಗೂ ಜೀ ಪವರ್‌ ಮುಖ್ಯ ವಾಹಿನಿ ಅಧಿಕಾರಿ ಮತ್ತು ಕನ್ನಡ ಜೀ5 ಬಿಸಿನೆಸ್‌ ಹೆಡ್‌ ದೀಪಕ್‌ ಶ್ರೀರಾಮುಲು  ಮಾತನಾಡಿ, ‘ಅಯ್ಯನ ಮನೆ 2’ ಸರಣಿಯು 100 ಮಿಲಿಯನ್‌ ವೀಕ್ಷಣೆ ನಿಮಿಷಗಳ ಮೈಲಿಗಲ್ಲು ತಲುಪಿರುವುದು ಹೆಮ್ಮೆಯ ಸಂಗತಿ. ಕರ್ನಾಟಕದ ಪ್ರೇಕ್ಷಕರಿಂದ ದೊರೆತಿರುವ ಅದ್ಭುತ ಪ್ರತಿಕ್ರಿಯೆ ಈ ಸರಣಿಯ ಕಥಾಹಂದರಕ್ಕೆ ಸಿಕ್ಕ ಮೆಚ್ಚುಗೆಯಾಗಿದೆ ಎಂದು ಸಂತಸ ವ್ಯಕ್ತಪಡಿಸಿದ್ದಾರೆ.

ಕೌಟುಂಬಿಕ ಭಾವನೆಗಳು ಮತ್ತು ಅಮಾನುಷ ಕೌತುಕವನ್ನು ಒಳಗೊಂಡ ಕಥೆಯನ್ನು ಪ್ರೇಕ್ಷಕರು ಪ್ರೀತಿಯಿಂದ ಸ್ವೀಕರಿಸಿದ್ದಾರೆ. ಸಾಂಸ್ಕೃತಿಕವಾಗಿ ಬೇರೂರಿರುವ, ಪ್ರಭಾವಶಾಲಿ ಹಾಗೂ ಮನಮುಟ್ಟುವ ಸ್ಥಳೀಯ ಕಥೆಗಳನ್ನು ಜೀ5 ಮೂಲಕ ಜನರಿಗೆ ತಲುಪಿಸುವುದು ಸಂಸ್ಥೆಯ ಉದ್ದೇಶವಾಗಿದೆ. ಈ ಯಶಸ್ಸು ಕನ್ನಡ ಒಟಿಟಿ ಬೆಳವಣಿಗೆಗೆ ಹಾಗೂ ವಿಭಿನ್ನ ಕಥೆಗಳನ್ನು ನೀಡುವ ಪ್ರಯತ್ನಕ್ಕೆ ಸಿಕ್ಕ ಪ್ರತಿಫಲವಾಗಿದೆ ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

‘ಅಯ್ಯನ ಮನೆ 2’  ಸಸ್ಪೆನ್ಸ್‌ ಥ್ರಿಲ್ಲರ್‌ ವೆಬ್‌ ಸರಣಿಯನ್ನು ರಮೇಶ್‌ ಇಂದಿರಾ ನಿರ್ದೇಶನ ಮಾಡಿದ್ದಾರೆ. ಶ್ರುತಿ ನಾಯ್ಡು ನಿರ್ಮಾಣದಲ್ಲಿ ಮೂಡಿಬಂದಿರುವ ಈ ಸರಣಿಯಲ್ಲಿ ಖುಷಿ ರವಿ, ಅಕ್ಷಯ್‌ ನಾಯಕ್‌, ರೂಪೇಶ್‌ ಶೆಟ್ಟಿ, ಮಾನಸಿ ಸುಧೀರ್‌, ಅನಿರುದ್ಧ್‌ ಆಚಾರ್ಯ, ಹಿತಾ ಚಂದ್ರಶೇಖರ್‌, ಅಶ್ವಿತಾ ಹೆಗಡೆ ಸೇರಿದಂತೆ ಹಲವು ಕಲಾವಿದರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಒಟ್ಟಿನಲ್ಲಿ, 10 ಕೋಟಿ ವೀಕ್ಷಣೆ ನಿಮಿಷಗಳ ಸಾಧನೆಯು ‘ಅಯ್ಯನ ಮನೆ 2’ ಸರಣಿಯ ಜನಪ್ರಿಯತೆಯನ್ನು ಮಾತ್ರವಲ್ಲದೆ, ಕನ್ನಡದ ಮೂಲ ಕಥೆಗಳಿಗೆ ಡಿಜಿಟಲ್‌ ವೇದಿಕೆಯಲ್ಲಿ ಇರುವ ಸಾಮರ್ಥ್ಯವನ್ನೂ ಎತ್ತಿ ತೋರಿಸಿದೆ. ಸ್ಥಳೀಯ ಭಾಷೆಯ ಕಂಟೆಂಟ್‌ ಕೂಡ ದೊಡ್ಡ ಮಟ್ಟದ ಪ್ರೇಕ್ಷಕರನ್ನು ತಲುಪಬಲ್ಲದು ಎಂಬುದಕ್ಕೆ ಈ ಸರಣಿ ಮತ್ತೊಂದು ಉದಾಹರಣೆಯಾಗಿದೆ.