ಹೆಂಡತಿ ಬಿಟ್ಟು ಹೋದಳು, ಮಗಳು ದೂರವಾದಳು... ಬಿಗ್ ಬಾಸ್ ನಲ್ಲಿ ಜಗ್ಗ ಮಮ್ಮಿ ಕಣ್ಣೀರು!
Jagadish emotional in Bigg Boss : ಬಿಗ್ ಬಾಸ್ ಕನ್ನಡ ಸೀಸನ್ 13 ರ ಮನೆ ದಿನದಿಂದ ದಿನಕ್ಕೆ ಭಾವನೆಗಳು, ಜಗಳ, ಟಾಸ್ಕ್‌ಗಳು ಹಾಗೂ ಅನಿರೀಕ್ಷಿತ ತಿರುವುಗಳಿಗೆ ಸಾಕ್ಷಿಯಾಗುತ್ತಿದೆ. ಸ್ಪರ್ಧಿಗಳ ಆಟದ ನಡುವೆ ಅವರ ವೈಯಕ್ತಿಕ ಬದುಕಿನ ನೋವುಗಳು ಕೂಡ ಆಗಾಗ್ಗೆ ಹೊರಬರುತ್ತಿದ್ದು, ಇದು ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ.
Jagadish Bigg Boss Season Kannada 13: ಜಗ್ಗ ಮಮ್ಮಿ ಎಂದೇ ಗುರುತಿಸಿಕೊಂಡಿರುವ ಜಗದೀಶ್ ತಮ್ಮ ವೈಯಕ್ತಿಕ ಜೀವನದ ನೋವನ್ನು ಹಂಚಿಕೊಂಡು ಬಿಗ್ ಬಾಸ್ ಮನೆಯಲ್ಲಿ ಕಣ್ಣೀರಿಟ್ಟಿರುವುದು ಭಾವುಕ ಕ್ಷಣಕ್ಕೆ ಕಾರಣವಾಗಿದೆ. ಅದರಲ್ಲೂ ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ‘ಗಿಚ್ಚಿ ಗಿಲಿಗಿಲಿ’ ಖ್ಯಾತಿಯ ಪ್ರಶಾಂತ್ ಮನೆಗೆ ಎಂಟ್ರಿ ಕೊಟ್ಟ ಬೆನ್ನಲ್ಲೇ ಜಗ್ಗ ಮಮ್ಮಿ ತಮ್ಮ ಮನಸ್ಸಿನಲ್ಲಿದ್ದ ಹಲವು ನೋವುಗಳನ್ನು ಅವರ ಮುಂದೆ ತೆರೆದಿಟ್ಟಿದ್ದಾರೆ.
ಬಿಗ್ ಬಾಸ್ ಮನೆಗೆ ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ಬಂದ ಪ್ರಶಾಂತ್, ಜಗದೀಶ್ ಅವರೊಂದಿಗೆ ಆತ್ಮೀಯವಾಗಿ ಮಾತನಾಡುತ್ತಾ ಅವರ ಮನಸ್ಸಿನ ಮಾತುಗಳನ್ನು ಹೊರತೆಗೆದಿದ್ದಾರೆ. ಬಿಗ್ ಬಾಸ್ ತಮ್ಮಗೆ ಇಮ್ಯುನಿಟಿ ಪವರ್ ನೀಡಿದ್ದಾರೆ ಮತ್ತು ಫೋನ್ ಕೂಡ ನೀಡಲಾಗಿದೆ ಎಂದು ಪ್ರಶಾಂತ್ ಹೇಳಿಕೊಂಡಿದ್ದಾರೆ. ರಾತ್ರಿ ಫೋನ್ ನೀಡುತ್ತೇನೆ, ಮಾತನಾಡಬಹುದು ಎಂದು ಜಗ್ಗ ಮಮ್ಮಿಗೆ ಹೇಳುವ ಮೂಲಕ ಅವರಲ್ಲಿ ಕುತೂಹಲ ಮೂಡಿಸಿದ್ದಾರೆ. ಆದರೆ ಈ ಮಾತುಕತೆ ನಿಧಾನವಾಗಿ ಜಗ್ಗ ಮಮ್ಮಿಯ ವೈಯಕ್ತಿಕ ಬದುಕಿನತ್ತ ತಿರುಗಿದ್ದು, ಅಲ್ಲಿಯೇ ಅವರು ತಮ್ಮ ಜೀವನದಲ್ಲಿ ಎದುರಿಸುತ್ತಿರುವ ನೋವನ್ನು ಹಂಚಿಕೊಂಡಿದ್ದಾರೆ.
ಜಗದೀಶ್ ಮಾತನಾಡುವ ವೇಳೆ ತಮ್ಮ ತಾಯಿಯ ಆರೋಗ್ಯದ ಬಗ್ಗೆ ಹೆಚ್ಚು ಆತಂಕ ವ್ಯಕ್ತಪಡಿಸಿದ್ದಾರೆ. ಸದ್ಯ ತಮ್ಮ ತಾಯಿ ಆಸ್ಪತ್ರೆಯಲ್ಲಿ ದಾಖಲಾಗಿದ್ದು, ಅವರ ಆರೋಗ್ಯದ ವಿಚಾರವೇ ತಮ್ಮ ಮನಸ್ಸನ್ನು ಕಾಡುತ್ತಿದೆ ಎಂದು ಹೇಳಿದ್ದಾರೆ. ಬಿಗ್ ಬಾಸ್ ಮನೆಯೊಳಗಿರುವುದರಿಂದ ತಾಯಿಯ ಬಳಿ ಇರಲು ಸಾಧ್ಯವಾಗುತ್ತಿಲ್ಲ ಎಂಬ ನೋವು ಕೂಡ ಅವರನ್ನು ಭಾವುಕರನ್ನಾಗಿಸಿದೆ. ತಾಯಿಗೆ ಏನೂ ಆಗಬಾರದು, ಅವರು ಸುರಕ್ಷಿತವಾಗಿರಬೇಕು ಎಂಬುದೇ ತಮ್ಮ ದೊಡ್ಡ ಬಯಕೆ ಎಂದು ಜಗದೀಶ್ ಹೇಳಿದ್ದಾರೆ.
ತಾಯಿ ತಮ್ಮ ಜೀವನದಲ್ಲಿ ಎಷ್ಟು ಮುಖ್ಯ ವ್ಯಕ್ತಿ ಎಂಬುದನ್ನು ವಿವರಿಸಿದ ಜಗ್ಗ ಮಮ್ಮಿ, ತಮ್ಮ ಪ್ರಪಂಚವೇ ತಾಯಿ ಮತ್ತು ಮಗಳು ಎಂದು ಹೇಳಿದ್ದಾರೆ. ತಾಯಿಯ ಆರೋಗ್ಯದ ಬಗ್ಗೆ ಆತಂಕಗೊಂಡಿರುವ ಅವರು, ದೇವಿ ಚಾಮುಂಡೇಶ್ವರಿಯ ಆಶೀರ್ವಾದದಿಂದ ತಮ್ಮ ತಾಯಿಗೆ ಯಾವುದೇ ತೊಂದರೆಯಾಗಬಾರದು ಎಂದು ಪ್ರಾರ್ಥಿಸಿದ್ದಾರೆ. ತಾಯಿಗೆ ಏನಾದರೂ ಆದರೆ ಮುಂದೆ ತಾವು ಏನು ಮಾಡಬೇಕು ಎಂಬ ಭಯ ಕಾಡುತ್ತಿದೆ ಎಂದು ಹೇಳುವಾಗ ಜಗದೀಶ್ ಭಾವುಕರಾಗಿದ್ದಾರೆ.
ಇದೇ ವೇಳೆ ತಮ್ಮ ಕುಟುಂಬದ ಪರಿಸ್ಥಿತಿಯ ಬಗ್ಗೆಯೂ ಅವರು ಮಾತನಾಡಿದ್ದಾರೆ. ತಮಗೆ ನಾಲ್ಕು ಮಂದಿ ಅಣ್ಣಂದಿರಿದ್ದರೂ, ಜೀವನದಲ್ಲಿ ಕಷ್ಟದ ಸಮಯ ಎದುರಾದಾಗ ತಮ್ಮನ್ನು ನೋಡಿಕೊಳ್ಳಲು ಯಾರೂ ಮುಂದೆ ಬರಲಿಲ್ಲ ಎಂಬ ನೋವನ್ನು ಹಂಚಿಕೊಂಡಿದ್ದಾರೆ. ಹಲವು ಸಂದರ್ಭಗಳಲ್ಲಿ ತಾವು ಒಂಟಿಯಾಗಿರುವ ಭಾವನೆ ಅನುಭವಿಸಿದ್ದಾಗಿ ಹೇಳಿಕೊಂಡಿರುವ ಅವರು, ಒಂದು ಹಂತದಲ್ಲಿ ಬದುಕುವುದೇ ಯಾಕೆ ಎಂಬ ಪ್ರಶ್ನೆ ಮೂಡಿತ್ತು ಎಂದು ತಮ್ಮ ಕಷ್ಟದ ದಿನಗಳನ್ನು ನೆನಪಿಸಿಕೊಂಡಿದ್ದಾರೆ.
ಜಗದೀಶ್ ಅವರ ಮಾತುಗಳಲ್ಲಿ ಪತ್ನಿ ಹಾಗೂ ಮಗಳ ಕುರಿತ ನೋವು ಕೂಡ ವ್ಯಕ್ತವಾಗಿದೆ. ಮದುವೆಯಾದ ನಂತರ ಮಗಳು ಜನಿಸಿದ್ದು ತಮ್ಮ ಬದುಕಿಗೆ ಹೊಸ ಭರವಸೆ ನೀಡಿತ್ತು ಎಂದು ಅವರು ಹೇಳಿದ್ದಾರೆ. ಮಗಳು ತಮ್ಮ ಜೀವನದಲ್ಲಿ ಸಂತೋಷ ಮತ್ತು ಉತ್ಸಾಹವನ್ನು ತಂದಿದ್ದಳು. ಆರಂಭದಲ್ಲಿ ತಾವು ಮತ್ತು ತಮ್ಮ ಪತ್ನಿ ಚೆನ್ನಾಗಿಯೇ ಇದ್ದೆವು. ಆದರೆ ನಂತರ ಇಬ್ಬರ ನಡುವಿನ ಸಂಬಂಧದಲ್ಲಿ ಬಿರುಕು ಮೂಡಿ, ಮಾತುಕತೆ ಕಡಿಮೆಯಾಗಿ, ಕೊನೆಗೆ ಪತ್ನಿ ತವರು ಮನೆಗೆ ಹೋಗಿದ್ದಾರೆ ಎಂದು ಜಗದೀಶ್ ತಿಳಿಸಿದ್ದಾರೆ.
ಪತ್ನಿ ತಮ್ಮೊಂದಿಗೆ ಇಲ್ಲದಿರುವುದು ಮಾತ್ರವಲ್ಲದೆ, ಮಗಳ ವಿಚಾರವೂ ಅವರನ್ನು ಹೆಚ್ಚು ಕಾಡುತ್ತಿದೆ. ತಮ್ಮ ಮಗಳು ಅಜ್ಜಿ ಮನೆಯಲ್ಲಿದ್ದಾಳೆ ಎಂದು ಹೇಳಿದ ಜಗ್ಗ ಮಮ್ಮಿ, ಸದ್ಯ ತಾಯಿ ಆಸ್ಪತ್ರೆಯಲ್ಲಿರುವುದು ಮತ್ತು ತಾವು ಬಿಗ್ ಬಾಸ್ ಮನೆಯಲ್ಲಿರುವುದರಿಂದ ಮಗಳ ಬಗ್ಗೆ ಸರಿಯಾಗಿ ಗಮನ ಹರಿಸಲು ಸಾಧ್ಯವಾಗುತ್ತಿಲ್ಲ ಎಂಬ ನೋವನ್ನು ವ್ಯಕ್ತಪಡಿಸಿದ್ದಾರೆ. ಮಗಳ ಭವಿಷ್ಯ ಮತ್ತು ಆಕೆಯ ಸ್ಥಿತಿ ಹೇಗಿರಬಹುದು ಎಂಬ ಚಿಂತೆ ಕೂಡ ತಮ್ಮನ್ನು ಕಾಡುತ್ತಿದೆ ಎಂದು ಹೇಳಿದ್ದಾರೆ.
“ಅಮ್ಮ ಆಸ್ಪತ್ರೆಯಲ್ಲಿದ್ದಾರೆ. ನನ್ನ ಮಗಳು ತಬ್ಬಲಿಯಾಗಿಬಿಡುತ್ತಾಳೆ ಎಂಬ ಭಯವಾಗುತ್ತಿದೆ. ನನ್ನ ಪ್ರೀತಿಯೂ ಇಲ್ಲ, ತಾಯಿಯ ಪ್ರೀತಿಯೂ ಇಲ್ಲ. ಭಯವಾಗುತ್ತಿದೆ” ಎಂದು ಜಗದೀಶ್ ಭಾವುಕರಾಗಿ ಹೇಳಿಕೊಂಡಿದ್ದಾರೆ. ತಮ್ಮ ಬದುಕಿನಲ್ಲಿ ತಾಯಿ ಮತ್ತು ಮಗಳ ಸ್ಥಾನ ಎಷ್ಟು ದೊಡ್ಡದು ಎಂಬುದು ಅವರ ಮಾತುಗಳಿಂದ ಸ್ಪಷ್ಟವಾಗಿದೆ. ಕುಟುಂಬದ ಪರಿಸ್ಥಿತಿ, ತಾಯಿಯ ಅನಾರೋಗ್ಯ ಹಾಗೂ ಮಗಳ ಬಗ್ಗೆ ಇರುವ ಕಾಳಜಿ ಎಲ್ಲವೂ ಒಂದೇ ಸಮಯದಲ್ಲಿ ಅವರನ್ನು ಭಾವುಕರನ್ನಾಗಿಸಿದೆ.
ಜಗ್ಗ ಮಮ್ಮಿ ಕಣ್ಣೀರಿಡುತ್ತಿರುವುದನ್ನು ನೋಡಿದ ಪ್ರಶಾಂತ್ ಕೂಡ ಭಾವುಕರಾಗಿದ್ದಾರೆ. ಜಗದೀಶ್‌ಗೆ ಧೈರ್ಯ ತುಂಬಿದ ಅವರು, ಬಿಗ್ ಬಾಸ್ ಮನೆಯಲ್ಲಿರುವಾಗ ತಾವು ಅವರ ಜೊತೆಗಿರುವುದಾಗಿ ಭರವಸೆ ನೀಡಿದ್ದಾರೆ. “ಅಣ್ಣಾ, ಈ ಮನೆಯಲ್ಲಿ ನೀನೊಬ್ಬನೇ ನನಗೆ ಇಷ್ಟ. ಯೋಚನೆ ಮಾಡಬೇಡ, ನಾನಿದ್ದೀನಿ. ನಿನಗೋಸ್ಕರ ನಾನು ನಿಂತುಕೊಳ್ಳುತ್ತೇನೆ” ಎಂದು ಪ್ರಶಾಂತ್ ಹೇಳುವ ಮೂಲಕ ಜಗದೀಶ್‌ಗೆ ಆತ್ಮಸ್ಥೈರ್ಯ ತುಂಬಿದ್ದಾರೆ.
ಬಿಗ್ ಬಾಸ್ ಮನೆಯಲ್ಲಿ ಸಾಮಾನ್ಯವಾಗಿ ಸ್ಪರ್ಧಿಗಳ ಆಟ, ತಂತ್ರಗಾರಿಕೆ ಹಾಗೂ ಮನಸ್ತಾಪಗಳೇ ಹೆಚ್ಚು ಚರ್ಚೆಯಾಗುತ್ತವೆ. ಆದರೆ ಕೆಲವೊಮ್ಮೆ ಸ್ಪರ್ಧಿಗಳು ತಮ್ಮ ವೈಯಕ್ತಿಕ ಬದುಕಿನ ನೋವುಗಳನ್ನು ಹಂಚಿಕೊಂಡಾಗ, ಅವರ ಮತ್ತೊಂದು ಮುಖ ಪ್ರೇಕ್ಷಕರಿಗೆ ಪರಿಚಯವಾಗುತ್ತದೆ. ಜಗ್ಗ ಮಮ್ಮಿ ಅವರ ಈ ಭಾವುಕ ಕ್ಷಣ ಕೂಡ ಅಂತಹದ್ದೇ ಆಗಿದೆ. ತಾಯಿಯ ಅನಾರೋಗ್ಯದ ಚಿಂತೆ, ಪತ್ನಿಯಿಂದ ದೂರವಾಗಿರುವ ನೋವು ಮತ್ತು ಮಗಳ ಬಗ್ಗೆ ಇರುವ ಆತಂಕವನ್ನು ಒಂದೇ ಸಂದರ್ಭದಲ್ಲಿ ಎದುರಿಸುತ್ತಿರುವ ಜಗದೀಶ್, ಬಿಗ್ ಬಾಸ್ ಮನೆಯೊಳಗೆ ತಮ್ಮ ಭಾವನೆಗಳನ್ನು ತಡೆದುಕೊಳ್ಳಲು ಸಾಧ್ಯವಾಗದೆ ಕಣ್ಣೀರಿಟ್ಟಿದ್ದಾರೆ.
ಇದೀಗ ಪ್ರಶಾಂತ್ ಅವರ ಎಂಟ್ರಿಯ ನಂತರ ಜಗ್ಗ ಮಮ್ಮಿ ಅವರ ಆಟದಲ್ಲಿ ಯಾವ ರೀತಿಯ ಬದಲಾವಣೆ ಆಗಲಿದೆ ಎಂಬ ಕುತೂಹಲವೂ ಮೂಡಿದೆ. ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ಬಂದಿರುವ ಪ್ರಶಾಂತ್, ಜಗದೀಶ್ ಅವರಿಗೆ ನೀಡಿರುವ ಬೆಂಬಲ ಮುಂದಿನ ದಿನಗಳಲ್ಲಿ ಬಿಗ್ ಬಾಸ್ ಮನೆಯ ಆಟದ ಮೇಲೆ ಯಾವ ರೀತಿಯ ಪರಿಣಾಮ ಬೀರುತ್ತದೆ ಎಂಬುದನ್ನು ಕಾದು ನೋಡಬೇಕಿದೆ. ಆದರೆ ಈ ನಡುವೆ ಜಗ್ಗ ಮಮ್ಮಿ ಹಂಚಿಕೊಂಡಿರುವ ವೈಯಕ್ತಿಕ ಬದುಕಿನ ನೋವು ಮಾತ್ರ ಬಿಗ್ ಬಾಸ್ ಮನೆಯ ಭಾವುಕ ಕ್ಷಣಗಳಲ್ಲಿ ಒಂದಾಗಿ ಗಮನ ಸೆಳೆದಿದೆ.
