ಬಿಗ್‌ ಬಾಸ್‌ ಮನೆಯಲ್ಲಿ ಅತೀ ಹೆಚ್ಚು ಸಂಭಾವನೆ ಪಡೆಯುತ್ತಿರುವ ಸ್ಪರ್ಧಿ ಯಾರು ಗೊತ್ತಾ?

Bigg Boss Kannada season 13 highest paid contestant: ಬಿಗ್ ಬಾಸ್ ಕನ್ನಡ ಸೀಸನ್ 13 ಆರಂಭವಾಗಿದೆ. ಸ್ಪರ್ಧಿಗಳು ಮೊದಲ ವಾರ ಮನೆ ಮತ್ತು ವಿಮಾನ ತಂಡಗಳಾಗಿ ವಿಭಜನೆಗೊಂಡಿದ್ದು, ಈ ತಂಡಗಳ ಮೂಲಕವೇ ಟಾಸ್ಕ್‌ಗಳನ್ನು ಸಹ ಆಡುತ್ತಿದ್ದಾರೆ. ಬಿಗ್‌ ಬಾಸ್‌ ಮನೆ ಅಂದರೆ ಅಲ್ಲೊಂದು ಜಗಳ, ಸದ್ದು, ನಗು, ಅಳು ಎಲ್ಲವೂ ಇರಲೇ ಬೇಕು. ಹಾಗೆಯೇ ಈ ಬಾರಿಯೂ ಮೊದಲ ವಾರವೇ ಬಿಗ್‌ ಬಾಸ್‌ ಮನೆಯಲ್ಲಿ ಎಲ್ಲ ಭಾವನೆಗಳ ಮಿಶ್ರಣ ಕಂಡುಬಂದಿದೆ.

ಬಿಗ್‌ ಬಾಸ್‌ ಆರಂಭವಾಗಿ ಮೊದಲ ವಾರದ ಕಿಚ್ಚನ ಪಂಚಾಯ್ತಿ ಕೂಡ ಬಂದೇ ಬಿಟ್ಟಿದೆ. ಈ ಬೆನ್ನಲ್ಲೇ ಇದೀಗ ಬಿಗ್‌ ಬಾಸ್‌ ಮನೆಯಲ್ಲಿರುವ ಸ್ಪರ್ಧಿಗಳ ಸಂಭಾವನೆಯ ಬಗ್ಗೆಯೂ ಚರ್ಚೆ ಶುರುವಾಗಿದೆ. ಬಿಗ್‌ ಬಾಸ್‌ ಕನ್ನಡ ಸೀಸನ್‌ 13 ರಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆದ ಸ್ಪರ್ಧಿ ಯಾರೆಂಬ ವಿಚಾರ ಇದೀಗ ಚರ್ಚೆ ಆಗುತ್ತಿದೆ. ಈ ಮಧ್ಯೆ ಕನ್ನಡ ಚಿತ್ರರಂಗದಲ್ಲಿ ಹಲವು ವರ್ಷಗಳಿಂದ ಗುರುತಿಸಿಕೊಂಡಿರುವ ನಟ ಹಾಗೂ ನಿರ್ದೇಶಕ ಓಂ ಪ್ರಕಾಶ್ ರಾವ್ ಅವರಿಗೆ ಬಿಗ್ ಬಾಸ್ ಮನೆಯಲ್ಲಿ ಆಟ ಆಡಲು ಎಷ್ಟು ಸಂಭಾವನೆ ನೀಡಲಾಗುತ್ತಿದೆ ಎಂಬ ಕುತೂಹಲ ಅಭಿಮಾನಿಗಳಲ್ಲಿದೆ.

ಬಿಗ್ ಬಾಸ್ ಸ್ಪರ್ಧಿಗಳ ಒಪ್ಪಂದದ ಸಂಭಾವನೆಯನ್ನು ಸಾಮಾನ್ಯವಾಗಿ ವಾಹಿನಿ ಅಥವಾ ಕಾರ್ಯಕ್ರಮದ ಆಯೋಜಕರು ಅಧಿಕೃತವಾಗಿ ಬಹಿರಂಗಪಡಿಸಬಾರದೆಂಬ ನಿಯಮ ಇರುತ್ತದೆ. ಈ ಹಿನ್ನೆಲೆಯಲ್ಲಿ ಸ್ಪರ್ಧಿಗಳ ಅಧಿಕೃತ ಸಂಭಾವನೆ ಎಲ್ಲಿಯೂ ಬಹಿರಂಗವಾಗುವುದಿಲ್ಲ. ಪ್ರತಿ ಸ್ಪರ್ಧಿಯ ಜನಪ್ರಿಯತೆ, ವೃತ್ತಿಜೀವನದ ಅನುಭವ, ಅಭಿಮಾನಿಗಳ ಬಳಗ ಹಾಗೂ ಮಾತುಕತೆಯ ಆಧಾರದ ಮೇಲೆ ಸಂಭಾವನೆಯನ್ನು ಪಡೆದಿರುತ್ತಾರೆ.

ಓಂ ಪ್ರಕಾಶ್ ರಾವ್ ಬಿಗ್‌ ಬಾಸ್‌ ಕನ್ನಡ ಸೀಸನ್‌ 13 ರಲ್ಲಿ ಅತಿ ಹೆಚ್ಚು ಸಂಭಾವನೆ ಪಡೆಯುವ ಸ್ಪರ್ಧಿ ಎಂದು ಹೇಳಲಾಗುತ್ತಿದೆ. ಚಿತ್ರರಂಗದಲ್ಲಿ ಹಲವು ವರ್ಷಗಳ ಅನುಭವ ಹೊಂದಿರುವ ಓಂ ಪ್ರಕಾಶ್ ರಾವ್ ಅವರಿಗೆ ಇತರ ಸ್ಪರ್ಧಿಗಳಿಗಿಂತ ಹೆಚ್ಚಿನ ಸಂಭಾವನೆ ನೀಡಲಾಗುತ್ತಿದೆ ಎಂಬ ಮಾತು ಕೇಳಿಬರುತ್ತಿದೆ. ಅವರಿಗೆ ವಾರಕ್ಕೆ ಸುಮಾರು ₹2 ಲಕ್ಷದಿಂದ ₹2.5 ಲಕ್ಷದವರೆಗೆ ಸಂಭಾವನೆ ಇರಬಹುದು ಎಂದು ಅಂದಾಜಿಸಲಾಗಿದೆ.

ಅಂದರೆ ಅವರು ಬಿಗ್ ಬಾಸ್ ಮನೆಯಲ್ಲಿ ಸತತವಾಗಿ 15 ವಾರಗಳ ಕಾಲ ಓಂ ಪ್ರಕಾಶ್ ರಾವ್ ಉಳಿದರೆ, ವಾರದ ಸಂಭಾವನೆಯ ಆಧಾರದ ಮೇಲೆ ಸುಮಾರು ₹30 ಲಕ್ಷದಿಂದ ₹37.5 ಲಕ್ಷದವರೆಗೆ ಗಳಿಸುವ ಸಾಧ್ಯತೆ ಇರುತ್ತದೆ. ಇದರಲ್ಲಿ ಯಾವುದೇ ಹೆಚ್ಚುವರಿ ಬೋನಸ್, ವಿಶೇಷ ಪಾವತಿ ಅಥವಾ ಬಹುಮಾನ ಮೊತ್ತವನ್ನು ಸೇರಿಸಲಾಗುವುದಿಲ್ಲ.

ಓಂ ಪ್ರಕಾಶ್ ರಾವ್ ಅವರ ಅನುಭವ ಮತ್ತು ಚಿತ್ರರಂಗದಲ್ಲಿನ ಗುರುತಿನ ಹಿನ್ನೆಲೆಯಲ್ಲಿ ಈ ಅಂದಾಜು ಮಾಡಲಾಗಿದೆ. ಆದರೆ ₹2 ರಿಂದ 2.5 ಲಕ್ಷ ಎಂಬ ಮೊತ್ತ ಅಧಿಕೃತವಾಗಿ ದೃಢಪಟ್ಟಿಲ್ಲ ಎಂಬುದನ್ನು ಗಮನಿಸುವುದು ಮುಖ್ಯ. ಓಂ ಪ್ರಕಾಶ್ ರಾವ್ ಈ ಸೀಸನ್‌ನ ಅತಿ ಹೆಚ್ಚು ಸಂಭಾವನೆ ಪಡೆಯುವ ಸ್ಪರ್ಧಿ ಎಂಬ ಮಾಹಿತಿಯೂ ಅಧಿಕೃತವಾಗಿ ಖಚಿತವಾಗಿಲ್ಲ. ಓಂ ಪ್ರಕಾಶ್ ರಾವ್  ಅವರ ನಿಜವಾದ ಸಂಭಾವನೆ ಎಷ್ಟು ಎಂಬುದು ವಾಹಿನಿ ಅಥವಾ ಸ್ವತಃ ಓಂ ಪ್ರಕಾಶ್ ರಾವ್ ಅವರು ಮಾಹಿತಿ ನೀಡಿದ ಬಳಿಕವಷ್ಟೇ ಖಚಿತವಾಗಲಿದೆ.

ಬಿಗ್ ಬಾಸ್ ಮನೆಯಲ್ಲಿ ಅವರ ಆಟ ಹೇಗೆ ಸಾಗಲಿದೆ, ಅವರು ಎಷ್ಟು ವಾರಗಳ ಕಾಲ ಮನೆಯೊಳಗೆ ಉಳಿಯಲಿದ್ದಾರೆ ಮತ್ತು ಅಂತಿಮವಾಗಿ ಎಷ್ಟು ಮೊತ್ತವನ್ನು ಸಂಭಾವನೆಯಾಗಿ ಪಡೆಯಲಿದ್ದಾರೆ ಎಂಬುದು ಮುಂದಿನ ದಿನಗಳಲ್ಲಿ ಕುತೂಹಲ ಮೂಡಿಸಿದೆ.

ಖ್ಯಾತ ನಿರ್ದೇಶಕ ಓಂ ಪ್ರಕಾಶ್ ರಾವ್ ಅವರು ಇದು ಎರಡನೇ ಬಾರಿಗೆ ಬಿಗ್ ಬಾಸ್ ಮನೆಗೆ ಕಾಲಿಟ್ಟಿದ್ದಾರೆ. ಮೊದಲ ಬಾರಿ ಅನಾರೋಗ್ಯದ ಕಾರಣದಿಂದ ಅನಿವಾರ್ಯವಾಗಿ ಶೋನಿಂದ ಹೊರಬಂದಿದ್ದರು. ಈ ಹಿಂದೆ ಬಿಗ್ ಬಾಸ್ ಸೀಸನ್ 4 ರಲ್ಲಿ ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ಪ್ರವೇಶಿಸಿದ್ದ ಅವರು, ತೀವ್ರ ಕಾಲು ನೋವು ಹಾಗೂ ಅನಾರೋಗ್ಯದ ಕಾರಣದಿಂದಾಗಿ ಆಟದ 7ನೇ ವಾರದಲ್ಲಿ ಮಧ್ಯದಲ್ಲೇ ಹೊರನಡೆದಿದ್ದರು. ಇದೀಗ ಓಂ ಪ್ರಕಾಶ್ ರಾವ್ ಸೆಕೆಂಡ್ ಇನ್ನಿಂಗ್ಸ್ ಆರಂಭಿಸಲು ಮತ್ತೆ ಬಿಗ್ ಬಾಸ್ ಕನ್ನಡ ಸೀಸನ್‌ 13 ರ ಮನೆಗೆ ಬಂದಿದ್ದಾರೆ. ಈ ಬಾರಿ ಬಿಗ್‌ ಬಾಸ್‌ ಮೆನೆಗೆ ಎಂಟ್ರಿ ಕೊಟ್ಟಿರುವ ಸ್ಪರ್ಧಿಗಳ ಪೈಕಿ ನಿರ್ದೇಶಕ ಹಾಗೂ ನಟ ಓಂ ಪ್ರಕಾಶ್‌ ರಾವ್‌ ಕೂಡ ಪ್ರಮುಖರಾಗಿದ್ದಾರೆ.

ಎನ್. ಓಂ ಪ್ರಕಾಶ್ ರಾವ್ ಕನ್ನಡ ಚಿತ್ರರಂಗದ ಪ್ರಸಿದ್ಧ ನಿರ್ದೇಶಕ, ಚಿತ್ರಕಥೆಗಾರ, ನಿರ್ಮಾಪಕ ಹಾಗೂ ನಟ ಆಗಿದ್ದಾರೆ. ಇವರು ಸ್ಯಾಂಡಲ್‌ವುಡ್‌ನ ಹಿರಿಯ ಹಾಸ್ಯ ನಟ ಎನ್. ಎಸ್. ರಾವ್ ಅವರ ಪುತ್ರ ಕೂಡ ಹೌದು. ಕನ್ನಡದಲ್ಲಿ ಹತ್ತಾರು ಸೂಪರ್‌ಹಿಟ್ ಆ್ಯಕ್ಷನ್ ಹಾಗೂ ಕಮರ್ಷಿಯಲ್ ಸಿನಿಮಾಗಳನ್ನು ನೀಡಿದ ಹೆಗ್ಗಳಿಕೆ ಓಂ ಪ್ರಕಾಶ್ ರಾವ್ ಇವರಿಗಿದೆ. 1994 ರಲ್ಲಿ ಮೂಡಿಬಂದ ಅಧಿಪತಿ ಸಿನಿಮಾ ಮೂಲಕ ನಿರ್ದೇಶಕರಾಗಿ ಓಂ ಪ್ರಕಾಶ್ ರಾವ್ ಸಿನಿರಂಗಕ್ಕೆ ಪಾದಾರ್ಪಣೆ ಮಾಡಿದರು.

ಶಿವರಾಜ್‌ಕುಮಾರ್ ಅಭಿನಯದ ಎ.ಕೆ. 47, ಕಿಚ್ಚ ಸುದೀಪ್ ಅಭಿನಯದ ಹುಚ್ಚ, ಮತ್ತು ಚಾಲೆಂಜಿಂಗ್ ಸ್ಟಾರ್ ದರ್ಶನ್ ಅಭಿನಯದ ಕಲಾಸಿಪಾಳ್ಯ ಹಾಗೂ ಅಯ್ಯ ಸಿನಿಮಾಗಳು ಓಂ ಪ್ರಕಾಶ್ ರಾವ್ ವೃತ್ತಿಜೀವನದ ಅತ್ಯಂತ ಯಶಸ್ವಿ ಸಿನಿಮಾಗಳಾಗಿವೆ. 2002 ರ ಜನಪ್ರಿಯ ಹಾಸ್ಯ ಚಿತ್ರ ಡಕೋಟಾ ಎಕ್ಸ್‌ಪ್ರೆಸ್ ಸಿನಿಮಾದಲ್ಲಿ ಅಭಿನಯಿಸಿ ಪೂರ್ಣ ಪ್ರಮಾಣದಲ್ಲಿ ನಟನಾಗಿ ಗುರುತಿಸಿಕೊಂಡರು. ಸೆಪ್ಟೆಂಬರ್ 2026 ರಲ್ಲಿ ಆರಂಭವಾಗಿರುವ ಸೀಸನ್ 13 ರ ಮೊದಲ ವಾರದಲ್ಲೇ ಇವರು ಎಲಿಮಿನೇಷನ್ ಪ್ರಕ್ರಿಯೆಗೆ ನಾಮಿನೇಟ್ ಆಗಿದ್ದಾರೆ.