ತ್ರೇತಾಯುಗದಲ್ಲಿ ಹನುಮಂತ ಕನ್ನಡಕ ಹಾಕ್ತಿದ್ನಾ? ರಾಮಾಯಣ ಪೋಸ್ಟರ್‌ ನಲ್ಲಿ ಮಹಾಯಡವಟ್ಟು

ಬೆಂಗಳೂರು: ರಾಮಾಯಣ ಮತ್ತು ಮಹಾಭಾರತ ಭಾರತೀಯರ ಭಾವನೆ, ನಂಬಿಕೆ ಹಾಗೂ ಸಂಸ್ಕೃತಿಯೊಂದಿಗೆ ಆಳವಾಗಿ ಬೆಸೆದುಕೊಂಡಿರುವ ಮಹಾಕಾವ್ಯಗಳು. ಈ ಎರಡೂ ಕಥೆಗಳು ಹಲವು ವರ್ಷಗಳಿಂದ ಸಿನಿಮಾ, ಧಾರಾವಾಹಿ ಸೇರಿದಂತೆ ವಿವಿಧ ಮಾಧ್ಯಮಗಳ ಮೂಲಕ ಪ್ರೇಕ್ಷಕರ ಮುಂದೆ ಬರುತ್ತಲೇ ಇವೆ. ಇದೀಗ ರಾಮಾಯಣದ ಹಿನ್ನೆಲೆಯ ಮತ್ತೊಂದು ಸಿನಿಮಾ ಪ್ರೇಕ್ಷಕರ ಗಮನ ಸೆಳೆಯುತ್ತಿದೆ.

ನಿತೀಶ್ ತಿವಾರಿ ನಿರ್ದೇಶನದ ಬಹುನಿರೀಕ್ಷಿತ ‘ರಾಮಾಯಣ’ ಸಿನಿಮಾ ಬಗ್ಗೆ ಚರ್ಚೆ ನಡೆಯುತ್ತಿರುವ ಬೆನ್ನಲ್ಲೇ, ‘ಮಹಾಕಾವ್ಯ ಶ್ರೀ ರಾಮಾಯಣ ಕಥಾ’ ಚಿತ್ರವೂ ಚಿತ್ರಮಂದಿರಕ್ಕೆ ಆಗಮಿಸಿದೆ. ಆದರೆ ಸಿನಿಮಾ ಬಿಡುಗಡೆಯಾದ ಬಳಿಕ ಅದರ ಕಥೆಗಿಂತಲೂ ಚಿತ್ರದ ಪೋಸ್ಟರ್, ವಿಎಫ್‌ಎಕ್ಸ್ ಹಾಗೂ ಕೆಲವು ದೃಶ್ಯಗಳೇ ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚು ಚರ್ಚೆಗೆ ಕಾರಣವಾಗಿವೆ.

ಸೆಪ್ಟೆಂಬರ್ 25ರಂದು ‘ಮಹಾಕಾವ್ಯ ಶ್ರೀ ರಾಮಾಯಣ ಕಥಾ’ ಚಿತ್ರ ತೆರೆಗೆ ಬಂದಿದೆ. ಚಿತ್ರದ ಪ್ರಚಾರಕ್ಕಾಗಿ ಬಿಡುಗಡೆ ಮಾಡಿರುವ ಪೋಸ್ಟರ್‌ವೊಂದು ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿದೆ. ಪೋಸ್ಟರ್‌ನಲ್ಲಿ ಸುಗ್ರೀವನ ಪಾತ್ರದ ಜೊತೆಗೆ ಕಾಣಿಸುವ ವಾನರ ಸೈನಿಕನೊಬ್ಬ ಕಣ್ಣಿಗೆ ಕನ್ನಡಕ ಧರಿಸಿರುವಂತೆ ಕಾಣಿಸುತ್ತಾನೆ. ಇದೇ ವಿಚಾರವನ್ನು ಗಮನಿಸಿದ ನೆಟ್ಟಿಗರು ಹಲವು ರೀತಿಯ ಕಾಮೆಂಟ್‌ಗಳನ್ನು ಮಾಡುತ್ತಿದ್ದಾರೆ.

ತ್ರೇತಾಯುಗದ ಕಥೆಯಲ್ಲಿ ಕನ್ನಡಕ ಹೇಗೆ ಬಂತು? ಇದು ಕಾಲಘಟ್ಟಕ್ಕೆ ಹೊಂದಿಕೆಯಾಗುತ್ತದೆಯೇ? ಎಂಬ ಪ್ರಶ್ನೆಗಳೊಂದಿಗೆ ಕೆಲವರು ಸಿನಿಮಾವನ್ನು ಟ್ರೋಲ್ ಮಾಡುತ್ತಿದ್ದಾರೆ. ಇನ್ನು ಕೆಲವರು, ‘ವಾನರ ಸೇನೆಯಲ್ಲೂ ಸ್ಪೆಕ್ಸ್ ಬಳಸುತ್ತಿದ್ದರಾ?’ ಎಂದು ಹಾಸ್ಯಮಯವಾಗಿ ಪ್ರಶ್ನಿಸಿದ್ದಾರೆ. ಸಿನಿಮಾದ ಪೋಸ್ಟರ್‌ನಲ್ಲಿರುವ ಈ ಸಣ್ಣ ವಿವರವೇ ಇದೀಗ ಚಿತ್ರದ ಬಗ್ಗೆ ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆ ಹುಟ್ಟುಹಾಕಿದೆ.

‘ಮಹಾಕಾವ್ಯ ಶ್ರೀ ರಾಮಾಯಣ ಕಥಾ’ ಚಿತ್ರದ ನಿರೂಪಣೆ ಕೊಂಚ ವಿಭಿನ್ನವಾಗಿದೆ. ಶಾಶ್ವತ್ ಎಂಬ ಬಾಲಕನಿಗೆ ಹನುಮಂತನು ಮುನಿಯ ರೂಪದಲ್ಲಿ ಕಾಣಿಸಿಕೊಂಡು ಶ್ರೀರಾಮನ ಜೀವನ, ಅವರ ಪ್ರಯಾಣ ಹಾಗೂ ರಾಮಾಯಣದ ಪ್ರಮುಖ ಘಟನೆಗಳನ್ನು ವಿವರಿಸುವ ರೀತಿಯಲ್ಲಿ ಕಥೆಯನ್ನು ಕಟ್ಟಿಕೊಡಲಾಗಿದೆ. ಹೊಸ ತಲೆಮಾರಿನ ಮಕ್ಕಳಿಗೆ ಹಾಗೂ ಯುವಜನರಿಗೆ ರಾಮಾಯಣದ ಕಥೆ, ಅದರ ಸಾಂಸ್ಕೃತಿಕ ಹಿನ್ನೆಲೆ ಮತ್ತು ಭಕ್ತಿಯ ಮಹತ್ವವನ್ನು ಪರಿಚಯಿಸುವ ಉದ್ದೇಶದಿಂದ ಚಿತ್ರವನ್ನು ರೂಪಿಸಲಾಗಿದೆ ಎಂದು ಚಿತ್ರತಂಡ ಹೇಳಿಕೊಂಡಿದೆ.

ಚಿತ್ರದಲ್ಲಿ ದೇವ್ ಶರ್ಮಾ ಶ್ರೀರಾಮನ ಪಾತ್ರದಲ್ಲಿ ಕಾಣಿಸಿಕೊಂಡರೆ, ಅಂಜಲಿ ಅರೋರಾ ಸೀತೆಯಾಗಿ ಅಭಿನಯಿಸಿದ್ದಾರೆ. ಶೀಲ್ ವರ್ಮಾ ಲಕ್ಷ್ಮಣನ ಪಾತ್ರ ನಿರ್ವಹಿಸಿದ್ದಾರೆ. ನಿರ್ಭಯ್ ವಾಧ್ವಾ ಹನುಮಂತನ ಪಾತ್ರದಲ್ಲಿ ಹಾಗೂ ರಜನೀಶ್ ದುಗ್ಗಲ್ ರಾವಣನ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಚಿತ್ರದ ಟ್ರೇಲರ್ ಬಿಡುಗಡೆ ಕಾರ್ಯಕ್ರಮದಲ್ಲಿ ನಾಯಕ ನಟ ದೇವ್ ಶರ್ಮಾ ತಮ್ಮ ವೃತ್ತಿಜೀವನದ ಆಸಕ್ತಿಕರ ಸಂಗತಿಯೊಂದನ್ನು ಹಂಚಿಕೊಂಡಿದ್ದರು.

ಪ್ರಭಾಸ್ ಅಭಿನಯದ ‘ಆದಿಪುರುಷ್’ ಹಾಗೂ ರಣಬೀರ್ ಕಪೂರ್ ಅಭಿನಯಿಸುತ್ತಿರುವ ‘ರಾಮಾಯಣ’ ಚಿತ್ರಗಳಲ್ಲೂ ತಮಗೆ ಲಕ್ಷ್ಮಣನ ಪಾತ್ರಕ್ಕಾಗಿ ಅವಕಾಶ ಸಿಕ್ಕಿತ್ತು ಎಂದು ಅವರು ಹೇಳಿಕೊಂಡಿದ್ದರು. ಎರಡೂ ಚಿತ್ರಗಳಲ್ಲಿ ಲುಕ್ ಟೆಸ್ಟ್ ಸೇರಿದಂತೆ ಆಯ್ಕೆ ಪ್ರಕ್ರಿಯೆಯ ಅಂತಿಮ ಹಂತದವರೆಗೂ ತಾವು ತೆರಳಿದ್ದಾಗಿ ದೇವ್ ಶರ್ಮಾ ತಿಳಿಸಿದ್ದಾರೆ. ಆದರೆ ಕೊನೆಗೆ ತಮ್ಮ ಎತ್ತರವೇ ಪಾತ್ರ ಕೈತಪ್ಪಲು ಕಾರಣವಾಯಿತು ಎಂದು ಅವರು ವಿವರಿಸಿದ್ದಾರೆ.

ರಣಬೀರ್ ಕಪೂರ್‌ಗಿಂತ ತಾವು ಸುಮಾರು ಎರಡು ಇಂಚು ಎತ್ತರವಾಗಿದ್ದೆ. ಇದೇ ರೀತಿ ‘ಆದಿಪುರುಷ್’ ಸಿನಿಮಾದಲ್ಲಿ ಪ್ರಭಾಸ್‌ಗೂ ತಾವು ಸರಿಸಮನಾದ ಎತ್ತರ ಹೊಂದಿದ್ದೆ. ನಾಯಕನಿಗಿಂತ ಲಕ್ಷ್ಮಣನ ಪಾತ್ರಧಾರಿ ಎತ್ತರವಾಗಿ ಕಾಣಬಾರದು ಎಂಬ ಕಾರಣದಿಂದ ಎರಡೂ ಸಿನಿಮಾಗಳಲ್ಲಿ ಅವಕಾಶ ಸಿಗಲಿಲ್ಲ ಎಂದು ಅವರು ಹೇಳಿದ್ದರು. ಈ ಕಾರಣದಿಂದ ರಾಮಾಯಣದ ಪಾತ್ರಗಳೊಂದಿಗೆ ತಮ್ಮ ಅದೃಷ್ಟ ಕೈಕೊಡುತ್ತಿದೆ ಎಂದು ಭಾವಿಸಿದ್ದ ದೇವ್ ಶರ್ಮಾಗೆ ಇದೀಗ ‘ಮಹಾಕಾವ್ಯ ಶ್ರೀ ರಾಮಾಯಣ ಕಥಾ’ ಚಿತ್ರದಲ್ಲಿ ಶ್ರೀರಾಮನ ಪಾತ್ರವೇ ದೊರೆತಿದೆ. ಹೀಗಾಗಿ ಈ ಸಿನಿಮಾ ಬಿಡುಗಡೆಯಾದ ಬಳಿಕ ಚಿತ್ರದ ಕಥೆಯ ಜೊತೆಗೆ ನಟರ ಆಯ್ಕೆ ಹಾಗೂ ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗಿರುವ ಪೋಸ್ಟರ್ ಕೂಡ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ.