ಬಾತ್‌ರೂಮ್‌ನಲ್ಲಿ ಬಿದ್ದು ಬಾಲಿವುಡ್ ನಿರ್ದೇಶಕ ನಿಧನ

Bollywood Director Sanjay Gupta Death: ಬಾಲಿವುಡ್ ಚಿತ್ರರಂಗದ ಖ್ಯಾತ ನಿರ್ದೇಶಕ ಹಾಗೂ ನಿರ್ಮಾಪಕ ಸಂಜಯ್ ಗುಪ್ತಾ (57) ಅವರು ಅಕ್ಟೋಬರ್ 30ರಂದು ನಿಧನರಾಗಿದ್ದಾರೆ. ತಮ್ಮ ನಿವಾಸದ ಬಾತ್‌ರೂಂನಲ್ಲಿ ಆಕಸ್ಮಿಕವಾಗಿ ಬಿದ್ದ ಪರಿಣಾಮ ಅವರು ಮೃತಪಟ್ಟಿದ್ದಾರೆ ಎಂಬ ಮಾಹಿತಿ ಲಭ್ಯವಾಗಿದೆ. ಅವರ ನಿಧನದ ಸುದ್ದಿ ಹಿಂದಿ ಚಿತ್ರರಂಗದ ಗಣ್ಯರು ಹಾಗೂ ಅಭಿಮಾನಿಗಳಿಗೆ ಆಘಾತ ಉಂಟುಮಾಡಿದೆ.

ಕ್ರೈಂ ಥ್ರಿಲ್ಲರ್ ಮತ್ತು ಆಕ್ಷನ್ ಕಥಾಹಂದರದ ಸಿನಿಮಾಗಳ ಮೂಲಕ ಸಂಜಯ್ ಗುಪ್ತಾ ಅವರು ಚಿತ್ರರಂಗದಲ್ಲಿ ತಮ್ಮದೇ ಆದ ಗುರುತನ್ನು ನಿರ್ಮಿಸಿಕೊಂಡಿದ್ದರು. ವಿಶೇಷವಾಗಿ ನಟ ಸಂಜಯ್ ದತ್ ಅವರೊಂದಿಗೆ ಅವರು ಹಲವು ಯಶಸ್ವಿ ಚಿತ್ರಗಳಲ್ಲಿ ಕೆಲಸ ಮಾಡಿದ್ದರು. ಇವರಿಬ್ಬರ ಸಹಯೋಗದಲ್ಲಿ ಮೂಡಿಬಂದ ‘ಕಾಂಟೇ’, ‘ಮುಸಾಫಿರ್’ ಮತ್ತು ‘ಝಿಂದಾ’ ಸಿನಿಮಾಗಳು ಪ್ರೇಕ್ಷಕರ ಗಮನ ಸೆಳೆದಿದ್ದವು.

1991ರಲ್ಲಿ ನಡೆದ ನೈಜ ಘಟನೆಯನ್ನು ಆಧರಿಸಿ ನಿರ್ಮಿಸಲಾದ ‘ಶೂಟೌಟ್ ಎಟ್ ಲೋಖಂಡ್ವಾಲಾ’ ಸಿನಿಮಾ ಅವರ ವೃತ್ತಿಜೀವನದ ಪ್ರಮುಖ ಚಿತ್ರಗಳಲ್ಲಿ ಒಂದಾಯಿತು. ಬಳಿಕ ಬಂದ ‘ಶೂಟೌಟ್ ಎಟ್ ವಡಾಲ’ ಕೂಡ ಉತ್ತಮ ಪ್ರತಿಕ್ರಿಯೆ ಪಡೆದುಕೊಂಡಿತ್ತು. ಕ್ರೈಂ ಚಿತ್ರಗಳ ಜೊತೆಗೆ ವಿಭಿನ್ನ ಕಥಾವಸ್ತುಗಳಿಗೂ ಅವರು ಆದ್ಯತೆ ನೀಡುತ್ತಿದ್ದರು. ಐಶ್ವರ್ಯಾ ರೈ ಅಭಿನಯದ ‘ಜಜ್ಬಾ’ ಹಾಗೂ ಹೃತಿಕ್ ರೋಷನ್ ನಟನೆಯ ‘ಕಾಬಿಲ್’ ಅವರ ನಿರ್ದೇಶನದ ಪ್ರಮುಖ ಸಿನಿಮಾಗಳಾಗಿವೆ.

ಇದಲ್ಲದೆ, ‘ದಸ್ ಕಹಾನಿಯಾ’ ಆಂಥಾಲಜಿ ಸಿನಿಮಾ ಮತ್ತು ಜಾನ್ ಅಬ್ರಹಾಂ ಅಭಿನಯದ ‘ಮುಂಬೈ ಸಾಗಾ’ ಮೂಲಕವೂ ಅವರು ಗಮನ ಸೆಳೆದಿದ್ದರು. ತಮ್ಮದೇ ಆದ ‘ವೈಟ್ ಫೆದರ್ ಫಿಲ್ಮ್ಸ್’ ನಿರ್ಮಾಣ ಸಂಸ್ಥೆಯ ಮೂಲಕ ಹಲವು ಸಿನಿಮಾಗಳನ್ನು ನಿರ್ಮಿಸಿದ್ದರು. 2024ರಲ್ಲಿ ಬಿಡುಗಡೆಯಾದ ‘ದಿ ಮಿರಾಂಡಾ ಬ್ರದರ್ಸ್’ ಅವರ ನಿರ್ದೇಶನದ ಕೊನೆಯ ಚಿತ್ರವಾಗಿತ್ತು. ತಮ್ಮ ವಿಶಿಷ್ಟ ಸಿನಿಮಾ ಶೈಲಿ ಮತ್ತು ವಿಭಿನ್ನ ಕಥೆಗಳ ಮೂಲಕ ಗುರುತಿಸಿಕೊಂಡಿದ್ದ ಸಂಜಯ್ ಗುಪ್ತಾ ಅವರ ನಿಧನಕ್ಕೆ ಚಿತ್ರರಂಗದ ಹಲವರು ಸಂತಾಪ ವ್ಯಕ್ತಪಡಿಸಿದ್ದಾರೆ.