‘ಹೆಬ್ಬುಲಿ ಕಟ್‌’ ಬಳಿಕ ‘ಗಂಜ್‌ ಸರ್ಕಲ್‌’ಗೆ ಸಜ್ಜಾದ ಭೀಮರಾವ್‌: ಮಾಸ್‌ ಕಥೆಗೆ ವಿನಯ್‌ ಕುಮಾರ್‌ ಜಿ.ಬಿ ಬಂಡವಾಳ!
ಗಂಜ್‌ ಸರ್ಕಲ್‌’ ಕಥೆಯು ‘ಹಸಿವು’ ಎಂಬ ಮೂಲಭೂತ ಹಾಗೂ ಭಾವನಾತ್ಮಕ ಅಂಶದ ಸುತ್ತ ಸಾಗಲಿದೆ. ‘ಹೆಬ್ಬುಲಿ ಕಟ್‌’ ಚಿತ್ರಕ್ಕೆ ಕೆಲಸ ಮಾಡಿದ್ದ ಬಹುತೇಕ ತಂತ್ರಜ್ಞರೇ ಈ ಚಿತ್ರದಲ್ಲೂ ಮುಂದುವರಿಯಲಿದ್ದು, ಸ್ಯಾಂಡಲ್‌ವುಡ್‌ನ ಪರಿಚಿತ ಕಲಾವಿದರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
ಬೆಂಗಳೂರು: ಸಮಾಜದಲ್ಲಿರುವ ಅಸ್ಪೃಶ್ಯತೆಯಂತಹ ಸೂಕ್ಷ್ಮ ಹಾಗೂ ಗಂಭೀರ ವಿಷಯವನ್ನು ಕಮರ್ಷಿಯಲ್‌ ಚೌಕಟ್ಟಿನಲ್ಲಿ ಕಟ್ಟಿಕೊಟ್ಟು ಗಮನ ಸೆಳೆದಿದ್ದ ‘ಹೆಬ್ಬುಲಿ ಕಟ್‌’ ಚಿತ್ರದ ನಿರ್ದೇಶಕ ಭೀಮರಾವ್‌ ಪಿ., ಈಗ ತಮ್ಮ ಎರಡನೇ ಹೆಜ್ಜೆಗೆ ಅಣಿಯಾಗಿದ್ದಾರೆ. ತಮ್ಮ ನೂತನ ಚಿತ್ರಕ್ಕೆ ‘ಗಂಜ್‌ ಸರ್ಕಲ್‌’ ಎಂಬ ಆಕರ್ಷಕ ಶೀರ್ಷಿಕೆ ಇಟ್ಟಿದ್ದು, ಇದರ ಟೈಟಲ್‌ ಬಿಡುಗಡೆಗೊಂಡಿದೆ.
ಮೂಲತಃ ರಾಯಚೂರು ಜಿಲ್ಲೆಯ ಮಾನ್ವಿಯವರಾದ ಭೀಮರಾವ್‌, ಈ ಬಾರಿ ಮಾಸ್‌ ಪ್ರೇಕ್ಷಕರನ್ನು ಸೆಳೆಯುವ ನಿಟ್ಟಿನಲ್ಲಿ ಕಥೆ ಹೆಣೆದಿದ್ದಾರೆ. ವಿಶೇಷವೆಂದರೆ, ಈ ಚಿತ್ರದ ಕಥಾಹಂದರವು ರಾಯಚೂರು ಭಾಗದ ಹಿನ್ನೆಲೆಯಲ್ಲೇ ಸಾಗಲಿದ್ದು, ಸಂಭಾಷಣೆಗಳಲ್ಲೂ ಅದೇ ಸೊಗಡಿನ ಕನ್ನಡವನ್ನು ಬಳಸಲಾಗುತ್ತಿದೆ. ಚಿತ್ರದ ಪ್ರಿಪ್ರೊಡಕ್ಷನ್‌ ಕೆಲಸಗಳು ಈಗಾಗಲೇ ಪೂರ್ಣಗೊಂಡಿದ್ದು, ಮುಂದಿನ ತಿಂಗಳಿನಿಂದ ಚಿತ್ರೀಕರಣ ಆರಂಭವಾಗಲಿದೆ.
ಮಾಸ್‌ ಪ್ರೇಕ್ಷಕರಿಗೆ ಕನೆಕ್ಟ್‌ ಆಗುವ ಕಥೆ:
ತಮ್ಮ ಹೊಸ ಚಿತ್ರದ ಕುರಿತು ಮಾತನಾಡಿದ ನಿರ್ದೇಶಕ ಭೀಮರಾವ್‌, "ಮೊದಲ ಸಿನಿಮಾದ ಯಶಸ್ಸಿನ ಬಳಿಕ, ನಾನು ಹೇಳಲು ಬಯಸುವ ವಿಚಾರಗಳನ್ನು ಮಾಸ್‌ ಪ್ರೇಕ್ಷಕರಿಗೆ ಹೇಗೆ ತಲುಪಿಸಬೇಕು ಎಂಬುದರ ಕಡೆಗೆ ಹೆಚ್ಚು ಗಮನಹರಿಸಿದೆ. ಮನರಂಜನೆಯ ಅಂಶಗಳನ್ನು ಸಮತೋಲನದಲ್ಲಿಟ್ಟುಕೊಂಡು ಈ ಕಥೆ ಸಿದ್ಧಪಡಿಸಿದ್ದೇನೆ. ಇದು ಮೊದಲ ಚಿತ್ರದಿಂದ ಕಲಿತ ಪಾಠ ಎನ್ನುವುದಕ್ಕಿಂತ ಹೆಚ್ಚಾಗಿ, ‘ಹೆಬ್ಬುಲಿ ಕಟ್‌’ಗೆ ನಾನು ಊಹಿಸಿದ್ದಕ್ಕಿಂತ ಹೆಚ್ಚಿನ ಪ್ರಶಂಸೆ ಹಾಗೂ ಪ್ರತಿಕ್ರಿಯೆ ಸಿಕ್ಕಿತ್ತು. ಆ ಸಿನಿಮಾ ನನಗೆ ಅತ್ಯಂತ ತೃಪ್ತಿ ತಂದಿದೆ. ಮೊದಲ ಸಿನಿಮಾ ಬಿಡುಗಡೆಯಾದ ಬಳಿಕ ಹಲವರು ಕಥೆ ಕೇಳಿಕೊಂಡು ಬಂದಿದ್ದರು. ನನ್ನ ಹೊಸ ಚಿತ್ರದ ನಿರ್ಮಾಪಕರು ಕೂಡ ‘ಹೆಬ್ಬುಲಿ ಕಟ್‌’ ನೋಡಿ ಮೆಚ್ಚಿಕೊಂಡವರೇ ಆಗಿದ್ದಾರೆ" ಎಂದು ಹಂಚಿಕೊಂಡಿದ್ದಾರೆ.
ವಿನಯ್‌ ಕುಮಾರ್‌ ಜಿ.ಬಿ ನಿರ್ಮಾಣ:
ಸಮಾಜಮುಖಿ ಕಾರ್ಯಗಳು ಹಾಗೂ ರಾಜಕಾರಣದಲ್ಲಿ ಸಕ್ರಿಯವಾಗಿ ಗುರುತಿಸಿಕೊಂಡಿರುವ, ‘ಇನ್‌ಸೈಟ್ಸ್‌ ಐಎಎಸ್‌’ನ ಸಂಸ್ಥಾಪಕರಾದ ವಿನಯ್‌ ಕುಮಾರ್‌ ಜಿ.ಬಿ ಅವರು ಈ ಚಿತ್ರಕ್ಕೆ ಬಂಡವಾಳ ಹೂಡುತ್ತಿದ್ದಾರೆ. ಭೀಮರಾವ್‌ ಅವರ ಕಥೆಯ ಮೇಲಿನ ನಂಬಿಕೆಯಿಂದ ಅವರು ಚಿತ್ರರಂಗ ಪ್ರವೇಶಿಸಿದ್ದಾರೆ.
ಹಸಿವಿನ ಸುತ್ತ ಸಾಗುವ ಕಥಾಹಂದರ:
ಚಿತ್ರತಂಡ ನೀಡಿರುವ ಮಾಹಿತಿ ಪ್ರಕಾರ ‘ಗಂಜ್‌ ಸರ್ಕಲ್‌’ ಕಥೆಯು ‘ಹಸಿವು’ ಎಂಬ ಮೂಲಭೂತ ಹಾಗೂ ಭಾವನಾತ್ಮಕ ಅಂಶದ ಸುತ್ತ ಸಾಗಲಿದೆ. ‘ಹೆಬ್ಬುಲಿ ಕಟ್‌’ ಚಿತ್ರಕ್ಕೆ ಕೆಲಸ ಮಾಡಿದ್ದ ಬಹುತೇಕ ತಂತ್ರಜ್ಞರೇ ಈ ಚಿತ್ರದಲ್ಲೂ ಮುಂದುವರಿಯಲಿದ್ದು, ಸ್ಯಾಂಡಲ್‌ವುಡ್‌ನ ಪರಿಚಿತ ಕಲಾವಿದರು ಪ್ರಮುಖ ಪಾತ್ರಗಳಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಶೀಘ್ರದಲ್ಲೇ ಉಳಿದ ತಾರಾಗಣ ಹಾಗೂ ಇತರ ವಿವರಗಳನ್ನು ಚಿತ್ರತಂಡ ಅಧಿಕೃತವಾಗಿ ಪ್ರಕಟಿಸಲಿದೆ.
